Rois el bo Dolemiak
Mla er a President Henry B. Eyring
Kot el Counselor er a First Presidency
Alsekum meng ngar ngii a klaumerang er kid er a Jesus Kristo, e se el kot el meringel me a se el kot el beot el klengar er kid a sebechel el mo klengeltengat.
Ak rirengesii a President Spencer W. Kimball er a mla er ngii el ongdibel lulengit er a Dios mel bsa rois el bo lolemiakl er ngii. Ng dillu: “Ngar ngii a meringel omelasem el ngar medad, me a meklou el techall el me er kid. Ak mengemedaol e semeriar er a ika el tekoi e soak el melekoi el mo er a Rubak, el oba ngariou el reng, ‘Beskak tia el rois,’ beskak a ika el omelasem.”1
A renguk a mlukrael, e medengei, a ika, el bebil er a omelasem me a ringel el mlo er ngii. Ng mlo soak el mo uai ngii, el bekeu el mesiungel a Dios. A ta el kesus e ak milluluuch el kirel a skeng el mo chochotii a blekengek. Ng sebechek el kmal dirk ungil dobedebekii. Seikid el kesus e ak mlo outubaruach er a delmerab er a riou el blai el oba klaumerang el ngii a milkekii a chaidirnguk e soual mo el obriid.
Ng ta malehcub e ng eru el klebesei e ng mlorenges a nglunguchek. Se el kot el meringel ongarm er a klengar er ngak er ak kekerei a chilsir a renguk e ngiluu a renguk el meriou. Ng milskak eru el suobel. A kot, ak mlo medengei el kmo a Dios a rirenges e onger a nglungucheck er a klaumerang er ngak. Eng di ongerung, a mlo uchelel osisechakl el me er ngak el ngii a dirk melemolem me bo kudengelii a uchul me ng mlo klou a renguk er se el kesus el kirel a klengeltengt el bo knguu el okiu a ringel el ngii a medeel el sumechokl a rokui el mo berraod.
Me se el ongarm el mle er ngak er a ngar a mong a ko er a kekere kung se el domekesiu er ngii er a ika el mla mo er ngii—er ngak me a rebetik er a renguk. Te betok er kemiu a ulsiseb er a ringel er a bedenged, uldasu, me a reng el sebechel rullau el mo lmangel el uai ng ke el ta er a blak a rengul el mesiungel a Dios el kmal kudengelii. A nurs a rirengesii el melekoi el ngar a bet er ngii er a ringel. “Ng rokir el klengar er ngak el kulasem el di ungil, e ngera ma choua tia mla duubech el me er ngak.
Ke medengei el kmo a Rubak ng milekera er a longer er tia el ker el mo er a Profet Joseph Smith er a le ngar a kelebus:
A Rubak a dilu er a Joseph Smith me alsekum eng mechoit er a deliobech, te rumekoad, ng mocha er a kodall; ng mechoit er a tmolch el daob; me alsekum a meklou el iuul omtok er ngii; me a meringel iolt a mo cherreuel; me a babeluades a mo ngar a ilkolk, me a rokui el tekoi a mo dmak e merers er a rolel; e se el mo meng tkul rebab, el beluu er a ngau a blok a ngerel el kirel, eng kirel medengei el kmo a ika el rokui a mo msa klubelel, el ngii a di mo klungiolel.
A Rubak a melekoi el kmo a Ngelekel a Chad a mlo riou er a ika el rokui, a Joseph ng ngarbab er Ngii?
A Rubak a millekoi me bo el urekodel er a meral rael, e a priesthood a di obengkel; e le sakai a ngar ngii, el diak el sebechir el loieur. A sils er a Joseph a lodengei, me a rak er ngii a diak bo el mekesai; ng diak el kirel medakt a sebechir a rechad el remuul, e le Dios a mobengkel el mo cherechar.” 2.
A denguu er ngak e ng diak a ungil nger el mo er a ker el kmo ngera uchul me a ongarm a mei meng ngera kired el mo meruul el uai a tekingel a Rubak, el siliseb er a meringel ongarm el ngii a diak el sebeched el mo medengelii.
Ke melebedebek a Tekingel er a lollach er kid el kired, el okiu a klaumerang er kid er Ngii, e ke de mo ouchel a rengud er a kngtid:
A Osobel a mla mellach er kid mebo douchel a rengud—e le Ng mo el mengelebed er kid loba chelebed er a Ngerel me a ngesechel a Rengul me a klsbengel a Rengul, me ke de kmal mo chuarm—chuarm el uangerang a diak dodengelii, a ringelel meng diak dodengelii, ng kol mo sebeched el otekur meng diak dodengelii.
A Osobel a melekoi el kmo Ng mlo er a ringel el kirel a ikang meng diak de bo er a ringel alsekum me kede mouchel a rengud.
A Osobel a melekoi el kmo alsekum me a rechad a diak el bo louchel a rengrir, e te mo er a ringel el di uai ngak.
A ringel el mlor Ngii a rirelii, ngii el Dios, el ngarbab er a rokui, el momritel e le ringel a uchul, tilobed a rsechel a bedengel rokir, e mlo er a ringel a bedengel me a rengul. A ringel a mlo imis meng ullengit me a le sebechel el lak el bo er ngii;
Meng uaisei, el Ngii a milsa chetengakl a Chedam. Ng ngiluu e rirekui a lulengedmokl el kired el rokui.3
Kau me ngak a ngarngii a klaumerang er kid el kmo a rael el mo mekiis el mo rebab er a ongarm a mo oumerang el kmo ngarngii a “chilt er a Gilead”4 e a Rubak a mla yaksok, “Ng diak … chitemiu.”5Tiaikid sel ngii a President Thomas S. Monson a ulsisechakl er kid el mo ngusikid me tirkel kid a mesiou er tir er a ikel ual cheloit me a soal lobaol a rengud er ngii longarm.6
Eng di a Presiden Monson a dirrek el ngara ungil losisecheklii el kmo a dodai er a klaumerang el ngara meral ngii el kirel aikel yaksok a mo mela taem el doleketek. Alta e ke locha mla mesa a ulsebechellel tial dodai, el uai ngak, er bita er a delmerab er a ta el mla mo kldmokl el kimer e diak el outekangel el mo er a ulebongel. Alsekum me a dodai er a klaumerang a diak el tebedechel a rengud, ea klisiich el mo outekangel a mo mekimd.
A moktek er chelechal sils a mo smodii a kudengelii el mo kudmeklii a diak el mesim el dodai. Ak mo meruul er ngii loba ngariou el reng lokiu eru el uchul. A kot, a bo kulekoi a sebchel rulii a rebebil el mo mesaul a rengrir er a ringelel ongarm me te mo omelechesiu er a dodai er tir er a klaumerang el dikeang. Ongerung, e ak medengei el kmo a klou el skeng a ngar medak er a uchei er a kmad. Maluausei, e a tekoi el bo ku meskemiu e dirke bo domes el kmo ng merang lokiu a klengar er ngak loutekangel el mo er a ulebongel.
Se er ak kekere el chad e a kuluureor er a okedecherul a tebedechel a dodai er a mo beches el blai. Se el mekeald e ng meringel a dongedmokl er a chutem el kirel a mo kata el kibo mongubel a smengt el melisiich er a tebedechel a dodai. Ng dimlak a mesil. Aki uluusbech a taod me a sebel. Okedecherul a ungil dodai er a blai a mle meringel el urreor er se el taem.
Ng ousbech a kllou el reng. A uriul er a ki mo chubel a mo ra dodai e a ki milengiil er ngii el mo medecherecher. Ng mle somam a di lorael a ureor, eng di ki dirrek el milengiil el mo merek ochebelel a mo dodai er a uchei er a ki bo molubet a kata.
E sel chosir a rengul a beches el daiksang se el ual leudel a ureor er a omelecha tekking er a chelsel aika el kata el mo melisiich er a mla meruul el dodai.
Me ngokiu osisiu el rael, e a chutem a kirel moungil mekedmokl el kirel a mo dodai er a klaumerang el mo omtok a mesisiich el iolt el mei er a bek el klengar. Se el mo smisichii a dodai er a klaumerang a mellemalt el klengar.
Sel de blechoel el melilt er a melemalt er a bek el taem el dolilt a mebii a mesisiich el chutem el ngar eungel a klaumerang er kid. Ng sebechel el omuchel se el de mekekerei e le bek el delbenged a mlechell el oba mimokl el sengk el Reng er a Kristo. Meng ngar tia el Reng e ng sebeched el medenge doruul el melemalt er a medal a Dios me a sel kuk doruul a mekngit er a Medal.
Me a ikal omelilt, e le ng betok er a dart er a bek el sils, a kudmeklii a mesisiich el chetemel a klaumerang el mo dechor er ngii. Sel chelsakl el deel dongubel a klaumerang er kid er a ngii a ebangkelio er Jesus Kristo, lobengkel a rokui el telbiil, ruoll, me a osisechakl.
A ta er a rulii a mesisiich el klaumerang sel mo meduch el omes er a mo ungil temel. Misei e a uchul eng dimlak el ungil el di blek mereched er a klengar rengak el meluluuch el kirel a ngarbab el rois el bo kulemiakl me a meringel el skeng.
Tial mengiil el mo er se el ungil temel a diak el dil keberruul el merkid er a tia el klengar, tia a mela taem. A merael el mo chuodel a diak el dil ngii a kudmeklii. Ng bai mesiou er a Dios me a rebebil el di blechoel loba rengud me kid el rokir el momult a klaumerang er a klemerang el mo mesisich el klisichel a rengud.
Elechang, soak el mo oldubech er tirkel tir a ngar a chelsel a meringel longarm, el melechesiu er a klaumerang er tir el locha merael mo kekerei er a betok el meringel tekoi. Ongarm a sebechel mo smisichii e meskau a mesisiich el klaumerang. A Moroni, el ngelekel a Mormon el sechal er a Babier er a Mormon, a uluuchais el kmo ng mekera tia el klengeltengat e morngii. Ng ulsisechakl er a beot e klemerang el kmo a de ngar omeruul lokiu a di kekeriei el klaumerang a mo msa techall a Dios el mo omekeroul er ngii.
A Moroni ulsisechakl el kmo a klaumerang a tekoi el doureng e diak de deues; maleuaisei, eng diak domtok e le ng diak de ues, le kid a diak el sebeched el nguu a sioning er kid dil merko bolmerek omelasem er a klaumerang er kid.
Ng millekoi el kmo ngulekiu tia el klaumerang e a Kristo mlo dum er a redemad, ruriul er a le meksiis er a kodall; ng dimlak boldum er tir dil merko uriul er a klaumerang er tir er Ngii; meng uaisei, ng ulsebechall el kirir a rebebil el mo er ngii a klaumerang er tir er Ngii, e le Ngii a dimlak bol dum er a beluulechad.
E le uchul a klaumerang er a rechad e Ngulechotii el mo er a beluulechad, e kilbkelii a ngklel a Rubak, e kildmeklii a rael el sebechel a rebebil el mo nguu a chedaeol sengk me bol sebecherir el moureng a tekoi, el dirkak el ues.
Maluaisei, e ng sebeched el morngii a doureng, e monguu tia el sengk, alsekum meng mo er ngii a klaumerang er kid.7
Tia el tebechedel a klaumerang el kot el mekreos el kau a kirem el mengkar er ngii e mousbech er ngii a klaumerang er a Rubak el Jesus Kristo. A Moroni a ulsisechakl er a klisichel tia el klaumerang el melekoi el kmo ng diak er a ngii di el taem el borngii ongasireng el mo er a rechad dil merko uriul er a klaumerang er tir; meng kirir el kot e te moumerang er a Ngelekel a Dios.8
Ak mloldingel er a klou redil el ngiluu ongasireng er a klisiich el mo otekangel a meringel kodall loba kmal beot lomeruul el melekoi lomelekl a ika el tekoi, “Ak medegei el kmo a Osebelek a Ngar.”9 Tia el klaumerang me a tekoi er a sioning a dirk lobang e ulab er a lekekerei e mirrael mo nguemed e ng di ng dimlak lengemed el rokui.
Ak mlo mechas a renguk el mlo medengei el kmo a ta er a redil a mla ousubes er a tang el ngar ngii a mekngit el rirelii el morngii el betok el rak. Ng mlo mechas a renguk ma kuleker rengii el kmo ngera uchul meng millilt el mousubes e obes aika el betok el rak er a mekngit lomeruul el mlor ngii.
Ng millekoi el kekere ngerel, “Ng kot el meringel el tekoi el blak relii, ng di ak mle medengei el kmo ng kirek el rullii. Me ak rirelii.” A klaumerang er ngii el kmo Osobel a mousubes er ngii alsekum meng ousubes er a rebebil a mlo ngosukii el momelchesiu er a budech me a ikel loureng er a le chelbangel er a kodall el di mle mekesai el buil er a uriul er a lousubes er a cherreuel.
Nguleker er ngak, “Me se el kbocha rsei, e ng mo ua ngera er a babeluades?”
Me ak millekoi, “Ak medengei lokiu a blak ues el kau a sebechem el remuul el ultuir er a klaumerang e sebechem el ousubes me ng kmal mo ungil omengemedaol er kau el mocha remei.”
Ng dirrek el ngarngii a mo melisiich a rengir tirke el oumededenger el kmo klaumera er tir er a Jesus Kristo ng mesisiich meng sebechir el outekangel el mo er a ulebongel. Ak mlo mukngeltengat el mlo medengelterir a rebebil er kemiu lorrenges er chelechang e sera omkekerei, e ko mle meses, e betok omeduch er ngii er tir ke el mla er a bita er kemiu, me ko mle melilt el meruul a ike el Osobel a mo moruul. Meng okiu a ika el betok el klungioliu e ng mlo sebechemiu lolngeseu e omekerreu er tirke el omko ngerang eng diak momekereu er tir e mekngit osengem er tir er a deruchelem er a klengar.
Se el mei a meringel ongarm, e a klaumerang el mo ungil el outekangel ongarm a mo er ngii, el mlukeroul meng sebechem el mes er chelechang e ng di ng dimlak er se el taem el moruul el okiu a klikiid el beltikereng er a Kristo, el mesiou e ousubes er a rebebil el di ua Osobel. Komekedechor er a dodai er a klaumerang el ngara beltikelreng el di ua Osobel a loubeltikelreng e mesiou el mo er Ngii. A klaumerang er kau er Ngii a rullau el mo mesiou e a ika a mo meskau a ike el moureng.
Ng diak el blal bol meoud el bo dolisiich er a dodai er a klaumerang. Ng blochoel el di ngar ngii a taem. Ngokiu a klaumerang er a Osobel, e kau a sebechem el mouchel e olengit a klausubes. Ngar ngii a sebechem el ousubes er ngii. Ngar ngii a sebechem el oureng a saul el mo er ngii. Ngar ngii a sebechem el mesiou er ngii. Ng sebechem el remuul a ika er a ngii di el ker el omngar ngii dirrek el sebechem el remuul se el omolchesuar er kau el sabisi me a omcheloit .
Ng diak el sebechek el yaksok er a mo terbengel a ongarm el merkau er tia el klengar. Ng diak el sebechek el kmu er kau el kmo ongarm lekor kau a di mo kedeb. A ta er a telengtengil ongarm er a klengar a blechoel el rulii a klok meng ua lemeoud e soal mo el stob.
Ngar ngii a uchul tiang. A momedengelii a uchul a diak el beskid ongelaod, e ngdi ng sebechel meskau a kllou el reng. A ika el uchul a mengai er tia el chimo el tekoi: Ngokiu a cherrungel el beltikereng el merkau, ea Chedam er a Babeluades me a Osobel a soal obom kldmokl el mo Obengterir el kiei er a telungalek el diak a ulebengelel. Ngdi tir ke el mo metecholb el beches el okiu a Tngakireng er a Jesus Kristo a sebecherir el mong.
A delak a mle kasinoma el kmeed el teruich el rak. Ukeruul me a botk me a chelitechut a bebil er a ongarm el mlo er ngii.
Ak dobedebekii a demak el melekoi er a lomes er ngii el mengoit er a ulebongel telil, “A kekere lekebil a mocha remei el mo er a ulengull.”
A ta er a milengedecheduch er a kemeldillel a bechil ochedal e sechelil el President Spencer W. Kimball. Me a bebil er a lullekoi, e ak dobedebekii a ua tia kid: “A bebil er kemiu a locha omdasu el kmo a Mildred a mlo chuarm el meketeket e le ng ngar ngii a rirelii el mle uker a ika el ongarm.” Ng liluut el melekoi, “Ng diak, ng Dios a mle soal el omtanget er ngii el telkib.” Ak melatk er seikid el taem e ulemdasu, “Alsekum me a redil el kmal ungil a ousbech er a choua tia el btanget, ng kol mo ua ngera el me er ngak?”
A le ngar ngii a klaumerang er kid er a Jesus Kristo, a kot el meringel me a beot el taem er a klengar a sebechel mo klengeltengat. A rokui el tekoi, a sebeched el melilt er a merang lokiu omekrael er a Reng. Ke doba evangkelio er a Jesus Kristo el omeob e omekrael er a klengar er kid alsekum e ke de ngiltii. Me ngokiu a reprofet el olecholt a de ngar ngii er a uldasu er a mo suobel e ng mo sebeched el kiei el oba cherrungel lurunguled e melchesuar a budech. Kele domdasu el kmo ng di kid e diak oubeltikelreng el me er kid se el de ngar omesiou er a Rubak, leng diak el uaisei. Ng sebeched el melchesuar a beltikelreng er a Dios e le ikakid a uchul. A Osobel a mla yaksok er a reanghel el ngara kadikm ma katur er kid, el mo olngeseu er kid.10 E Ngii a blechoel lotirakl a Tekingel.
A kuchais el kmo a Dios el Chedam a ngar me a Betik er a Rengul Ngelekel a Osobeled. A Chedaol Reng a mla ochotii a klemerang er tia el ongdibel e lmuut lochotii se el mosiik er ngii, me se el morrenges me sel bo mosuub ruriul a ika el klemechel a meral mesiungel a Rubak el ngar tiang. A President Thomas S. Monson a profet er a Rubak er a beluulechad A Rubak a mengkar er kemiu el rokir. A Dios el Chedam a ngar. A Betik er a Rengul el Ngelekel el Jesus Kristo, a Osobeled. A beltikelreng er ngii a diak bolak. Me ak melekoi a ika loba ngklel a Jesus Kristo, amen.