Kongei e Klikiid el mo Mesiou
Mla er a President Thomas S. Monson
A ongasireng a debetik er a ngii de el ker se el dodengelii a priesthood, a klischel a de kulii e ousbech er ngii er a meral rolel, el ulsiseb er ngii a klaumerang.
Betik er a renguk el rodam, ng mera lungil a rengud el deluut el me kasues. Se el ta el kmei er a klou el ongdibel er a repriesthood, e ak mo omdasu a osisechakl er a rebebil er a melemalt el mengeteklel a Dios el mla mengedecheduch er a klou el ongidbel er a priesthood er a Ikelesia. Betok a mla merael el mo nguu se el diak a ulebengelel omeksullir, meng ngara llemesel a rengrir, e kmal ngara rengrir, me a mekekeald er a rengrir, e te mla meskid a ulekrael el rael. Ak mo melekoi a bebil rengii leko er kemiu er chelechal kesus el kirel a priesthood.
A mla er a Prophet Joseph Smith: “A Priesthood a diak a ulebengelel osisechakl, e mlar ngii lobengkel a Dios er a cherechar, el mo er a diak a ulebengelel, el diak a uchelel sils me a rak.”1
Me ngara tekingel a President Wilford Woodruff, e kede siluub: “A Chedaol Priesthood a rael el Dios a mengedecheduch e meruul a ngii di el ngera lobengkel a chad er a bluulechad; me a oderuchel el ngar a babeluades el mle oldingel er a beluulechad el me mengedecheduch er a chad a rechad el mle urekodel e mle kulii a priesthood er a lengara tech; me a rokui el tekoi el Dios a mla meskid el mo meruul el kirel osebelel a chad, er a le kot el mei chad er a beluulechad el mo er a osobelel a beluulechad, a mle okiu e mo okiu a kldung er a diak a ulebengelel el priesthood.”2
A President Joseph F. Smith a liluut el smodii: “A priesthood a … klisichel… a Dios el ulterkeklii er a chad me bo loruul er a beluulechad a osebelel a telungalek er a rechad, el ngara ngklel a Chedam me a Ngalek me a Chedaol Reng, el ngara meral rolel; el diak el lorredel er a ngerachel, e diak loleng er ngii er a mla momerek el telecheroll el mla mad e remiid, e ng di a ngerachel el mla moterkokl er chelecha el taem el ngii a doltirakl er a rolsisechakl el anghel me a reng er bab, el melemalt el mei el mla er a osengel a Mesisiich el Dios.”3
A mong me ngulebongel a mla er a President John Taylor: “Ngera priesthood? … Ng kabelment er a Dios, el ngara beluulechad malechub e ng ngara baleluades, ngokiu ngii el klisiich, e a omelilt, me a lechub a osisechaklel el kmo a rokui el tekoi a ngar cheungel a llach a le ngara beluulechad me a le babeluades, ngokiu tia el klisiich e a rokui el tekoi a ngar ngii e melemolem. A rokui el tekoi a ngar cheungel—ngomekreal a rokui el tekoi—e telil a rokui el tekoi—e kirel tebechedel a rokui el tekoi el Dios me a klemerang el tekoi a ngarngii.”4
Ke de meral ngeltengat el ngar tia er chelechal uriul el klebesei, el priesthood er a Dios a ngar a beluulechad. E meral klou el techall el merkid el urekodel er a priesthood. A priesthood a diak el sal kmal sengk e bai ureror el mo mesiou, e techall el mo melikou a klengar, e techall el mo omekngeltengat a klengar er a rebebil.
Me a ika el betok el techall obengkel a ngerachel. Ng meral soak e mengeluolu er a klemera el tekoi el ngerachel me a ikel rokui el telengtengil.
Chelsel a ta el deruchall malechub e ng chimong, me a kuk ta er a teletael malechub eng chimong, e ak mla ngara miting ra priesthood el 72 el rak—er ak kot el mechedaol el mo deacon er a le 12 a rekik. A taem a meral merael mong. A ngarachel a merael lomekesiu er tia lomerael. A ngerachel a diak el bolkekerei malechub e bo lak. A meklou el tellemall er a ultok a mei e merael, e ng di a mekemad a ngarngii el kirel a delbengir a rechad a melemolem el diak el meterob. El ua terombetang lomekedong el meskid a tekingel a Rubak el mor kau, me ngak, e mo er a urekodel er a priesthood er ker me ker: A bek el chad bo el suubii a ngerchelel, el blak a rengul er se el obis el ngii a mla metutk el ngar ngii.”5
A okedong er a ngerachel a mlo er a Adam, el mlo er a Noah, el mlo er a Abraham, el mlo er a Moses, el mlo er a Samuel, el mlo er a David. E mlo er a Prophet Joseph Smith me a ruleakullel. A okedong er a ngerachel a mlo er a buik el Nephi er se er a lenguu a odurch er a Rubak, lokiu a demal er a Lehi, el lemutu el mora Jerusalem ngii me a rubekul el mo melai a tiberberk el sintsu er a Laban. A rubekul a Nephi a milengeremrum, e melekoi el kmo ng kmal meringel el tekoi tial lolengit er ngii. Ngera mle nger er a Nephi? Ng dilu, “Ak mo meruul aike el tekoi el Rubak a mla meskemam a llach el kirel, le kmedengei el kmo a Rubak a diak le besterir a rengelekel a chad a ngii di le llach, alsekum eng diak le kedmeklii a mo rolel eng mo sebechel mo motirakl a llechul.”6
Se el le mei a osisiu lokedong el mo er kau me ngak, ngera mo nger er kid? Ke de mo mengiremrum, el ua Laman me a Lemuel, el kmo “tia kmal meringel el tekoi el mei er kid”?7 Malechub, e ke de mo, ua Nephi, el derta el melekoi el kmo, “Ak mong. Ak mo meruul”? Ke de kongei el mo mesiou e olengesenges?
A lebebil er a taem e a llemesel a Dios a domes el ual chelsengsang malechub e ng kmal meringel, e ng di a ta er a kot el klou a belkul el suobel el sebeched el subii er a klechad se el longedecheduch a Dios e a chad lolngesenges, e a chad a di mo blechoel el ngara meral tekoi.
Se el kumdasu er a tekoi elngerachel me se el doruul a ngercheled eng ngosukid er a klengar er kid me a rebebil, e ak dobedebek a tekoi el milluches er a merael a chisel el chad er omeluches:
Ak milechiuaiu e ulemerrous
El kmo a klengar a deureng
Ak milekiis e milsang
El kmo a klengar a ngerachel
Ak milruul, e mesang
A ngerachel a mle deureng.8
A Robert Louis Stevenson a millekoi er ngii er a kuk ta er a teletael. Meng dilu, “Ak medenge el kmo ngera deuil a reng, e le ak mla meruul a ungil ureor.”9
Me sel doruul a ngercheled e lokiu a priesthood, e ke de mo metik er a meral deureng. E mo chormii a klungiolel a rengud er a urered el mla mekedmokl.
Ke de mla mosisechakl er a kuk teletelel a ngerachel er a priesthood el dobang, alta e ng Aaronic malechub e ng Melkizedek Priesthood. Ak kmal ouldubech er kemiu el mo omdasu a ika el ngerachel e mo meruul el mo er se el kot el tkul rebab el sebechem el mo oltaut. Obo moruul, e ng kirem el mo klikiid. Mei me a chimad bol kldmokl, el klikiid, el kengei el mo obengkel tia el ureor el mo meruul aike el Demad er a Babeluades a kuk soal a rebebil a bo le ngai. Alsekum meng diak de klikiid, e ng sebechel a klisiich er a priesthood; el remiid e se el doridii, e kede mla metom er se el reng er a diak a ulebengelel. Klengar. Mei me bo de klikiid el mo mesiou.
A President Harold B. Lee, el ta er a ungil sensei er a Ikelesia, a millekoi: “A chad sel bocha lurrekodel er a priesthood, e ng mo choderchelel a Rubak. Ng kirel lomdasu er a okedong el mo er ngii el di ua loldurch er ngii a Rubak.”10
Se er a Ongeru el Mekemad, er a uchelel a 1944, ea dilubech el tekoi er a priesthood a mlo er ngii er a re morins er a Beluu er a Merikel er a le ngara Kwajalein Atoll, el tebedechel a Iuns er a Marshall el ngara Debel a Pacific el kmeed el ngara delongelel a Australia me a Hawaii. A dilubech er tia el basio a bla louchais er ngii lokiu a babier—ng diak el chad e ra Ikelesia—ng ka uluureor er a simbung er a Hawaii. Meng ngara simbung er a 1944 e ng milluches er tia el dilubech el tekoi, ng milsaod el kmo ngii me a rebebil er a rechad er a simbung a mle ngara ongerung el iuul rulir a re morins el ngara Kwajalein Atoll. Se er a belsiseb, e te milsa a ngeasek el morins el lombibechakl el chebecheb er a daod, e mle meringel el telemall. Tia el meched el daob a iliuekl er a bekerekard. E te milsa a ta er a morins el mirrael kirel ng kal telemall el chedal. Ng ka el ongeru el morins meng dirrek el mle telemall, e di mle cheloit tial katur a chimal. Ng kilderii a bdelul ngkal ombibechakl er a daob me lak el ros. Ng ulemritel oto er a ngerel er a lomekedo el kirel a ngesou. A chad er a simbung a ulemes er ngikal buik el lurrekodel er ngii e melekoi el mong, “Rungalek, ng diak a ngera el sebecham el rulii el kirel ng ka el buik.”
“Meng,” ng milluches ng ka el chad, “Ak milsa a dirkak a ta me kisa el tekoi.” Ng ka el buik, el kmal meringel el telemall, a ngiluu ng ka el rengud e ng mla mad el ta er ngii el morins el mo er a chelechol. Ng “ngiluu a bdelul ng ka el chedal lolia er chochil… Ng mera lungil siasing—tirka el teru el tellemall a bedengir—el terung … el beches, e ungil osenged er tir el ngeasek el chad, ngii me a lengar tia el meringel el tekoi. Me a ta er tir el buik a ngiluu a dbelul el meriou er a bebul ng ka el imong e millekoi, ‘Ak kmu er kau loba ngkel a Jesus Kristo ma klisichel a priesthood, me ke mo melemolem el ngar el di merko kngai a ngeseu er a ukeruul.’ Meng ka el chad er a simbung a mlo mengesimer er a omelchesel: “Kemam el tedei, [teru el morins me ngak] a ngara osbitar. A retoktang a diak lodengei [te milkerang e diak el mad], e ng di ak medengei.”11
A ongasireng a debetik er a ngii di el ker se el dodengelii a priesthood, a kilischel a de kulii e ousbech er ngii er a meral rolel, el ulsiseb er ngii a klaumerang. A klaumerang se el btechir oumededenger, e a omesiou loridii a omeruul el di kired, e seikid e a klisichel a Dios a mo kudmeklii se el moktek er Ngii.
A okedong er a ngerachel a sebechel mei el mekekokil me kid el urrekodel er a priesthood a onger el mo er a ngerachel el merkid. A President George Albert Smith, el ngariou a rengul e ng di ng kmal lungil loungerachel, a meilekoi, “Ng ngerchelem el kot el mo subii a soal a Rubak e okor e ngoeak a klisiich er a chedaol Priesthood er Ngii e ke [kmal] mo kudmeklii se el kot el tkul rebab tia lokedong el merkau er a mederir a rebebil re kau …me a rechad a mo ungil a rengrir el oltirakl er kau.”12
A uaika el okedong er a ngerachel—el diak el sal smiich lokedong eng ding olsobel a klengar—a mle er ngak er a 1950 er se er ak dirk beches el mo bisop. A ngerchelek el bisop a mle betok e kakerous, me ak millasem er se el tkul rebab el sebechek el meruul a ike el ngii a kirek el meruul. A Merikel a mla er a kuk ta er a bedengel a mekemad er tiaikid el taem. E le uchul a betok er a rechedad a soldau, e a ngerachel a mlei el mla er a obis er a rungerachel er a Ikelesia el mo er a rokui el bisop el mo mesterir a re bek el soldau a Church News me a Improvement Era, a ika a makezin er Ikelesia er se el taem. A lmuut el tang, e a bek el bisop a mlongit me bo loluches, a babilengir el mo er a bek el soldau el ngar a ward er tir. A ward er kemam a mlarngii a 23 el chad el soldau. A chelechad er a priesthood, el blak a rengrir, a uleltobed a udoud el mo er a ngeiul me a otebedel a ika el babier. Ak mlo nguu tia el ureor, el ngerchelek, el mo meluches a 23 el babilengek er a bek el buil. Meng mla mo betok el rak ruriul e ak dirk olab a llecheklel a betok er a ika el babier me a nger el mla er tir. Chiuosech a beot el ruebet sel donguiu a ika el babier. Ng deureng el muut el mo medengelii a telbilel a soldau el mo oltirakl er a ebangkelio, me a miltib el uldesuel a soldau el mo urrekodel er a klaumerang ngii me a telungalek er ngii.
A ta er a kesus e ak ngilai el msa ta er a odos er a ward a chelludel el 23 el babier er tiaikid el buil. A urerel a mo oldurokl e meluches er a babier a basio er tir el ngii a di mengedengodech. Ng milsa imo er ngii el huto e, mlo klim, e oker, “Bisop, ng diak a tang me bol mesaul a rengum? Tia ta er a babier el mo er a Odam ra Bryson. Tia mong meng 17 el babier el moldurokl er ngii e dirkak a ta me loluches el mei.”
Me a kulenger, “Altang, locha mo meluches er chelechal buil.” Ng meral, mle seikid el buil. Meng kot el taem, lulenger el mo er a babilengek. A nger er ngii a ungil bo dobang, e le ng mekreos. Ng mle mesiou er a cheroid el beluu, cheloit, smecher a rengul kirel a rechad er a blil, e di ngii el tang. Ng milluches, “Alii e Bisop, ng diak sal chad er a omeluches el babier,” (Ng mle sebechek el kmu er ngiitiang er a ikal merko el buil.) Ng millemolem tia el babilengel, “Ke mesulang er a Church News me a makezin, e ng di a kot e ke mesulang er a ikel babier el mla er kau. Ak mla nguu a kuk ta er a bakes. Ak mla mechedaol el mo priest er a Aaronic Priesthood. A renguk a mui. Ngungil a renguk el chad.”
A Brother Bryson a dimlak lak lungil a rengul el ua bisop er ngii. Ak mla subii a ungil ulsbechall er tia el tekoi, “Moruul er a [ngerchelem]; el mo ungil; e beche [ikel] medechel me le bo er a Rubak.”13
Betok el rak ruriul, e ak mlo er a Salt Lake Cottonwood Stake er se er a James E. Faust a le merredel er ngii, e a kuluuchais er ngii el melasem el oldubech mel bol nga osengir el mo er a resoldau er kid. A uriul er a miting, e a kmal lungil osenged er ngii el chad a mlei. Ng urekedii a chimak, “Bisop Monson, ke dongchak?”
Me ak ko el mocha dongchii el kmo ngtechang. “Brother Bryson!” Ak millekoi. “Ke ua ngerang? Ke mekera er a Ikelesia?”
Me ng smiich e mekekeald a rengul, eng ulenger, “Ak kmal mesisiich. Ak ngar a omesiou er a omeredel er a chelechad er a re elders. Ke mesulang el melatk el kirek me a ike el babier el kau a uldurokl el kmal dirk kulab.”
Rodam, a beluulechad a ousbech er a ngelseuim. Kid kede meruul a rokui el kired el meruul? Kede lmatk a tekingel a President John Taylor: “Alsekum meng diak molisiich a okedong el omngilai, e a Dios a mo urrekodel er kau el ngerchelem tirke el tir a mle sebechem el losobel omrirelii a ngerchelem”? 14 Ngarngii a uach el dolkakl, chim el bo dorreked, uldasu el bo doldubech, reng el mo omekrael, me a reng el debo dolsobel. A klengeltengat er a diak a ulebengelel a mengiil er kau. Ng techall el kau a diak dim choeng e bai mo teloi er a rengara medal omesiou er a priesthood. Mei me dorrenges el mor sel lolekiis el uleklatk el debetik er ngii er a Babier er a Jakobus: “Bom ngar omeruul, e diak di morrenges el merkong, eleng di kau el mengeblad er kau.”15
Mei me bo dosuub e domdasu a ngercheled. Mei me de kengei e de klikiid el mo mesiou. Mei me a doruul el ngercheled bol oltirakl er a bekesel ochil a Mastang. Me se el kau me ngak a merael er a rael el Jesus a milrael er ngii, e ke de mo metik el kmo Ngii a imong er ngikel tolechoi el mla er a Bethlehem, ngimong er a ngelekel a daiksang, ngimong er ngikel kot el meduch el sensei el mla ngar. Ke de mo medengelii el kmo Ngii a Ngelekel a Dios, el Osobeled e Olsobel. Meng Ngii a ngiluu okedong er a ngerachel, me Ngulenger, “Chedam, aikel soam bol meruul, me a klebkall lekor kau el mo cherechar.”16 Mei me kid el rokui bo doruul el uaisei, ak meluluuch el ngara Chedaol ngklel, el ngklel a Jesus Kristo, el Rubak, amen.