Klisiich er a Babeluades

Mla er a Elder David A. Bednar

Er a Teruich me a Terung el Apostol

A roba priesthood el mekekerei me a remeklou a ousbech er a ngerachel me a klisiich—el klou a belkul el kengei el kirel chedaol omeruul el omtechei er a Dios el kirel a ureor er a olsobel.

Kemiu el betik er a renguk el odam, ak kmal dmeu a renguk el mer kemui el rokui el mlo sebeched el me dmak el ngar tial ongdibel er a roba priesthood. Ng betik a renguk e dmeu a renguk el kiriu er a kmal ungil el blekerdelui me a klungioliu el mo er a beluulechad.

Ak mengemedaol er kemiu el rokui el mo omtab e omdasu el kmo ng mekerang omko kom mo onger el mo er tia el ker el mo er a rechedal a Ikelesia er a kmal mla memong er a temel a President David O Mckay: “Omko eng mlo er ngii a ta er a taem el ta er kemiu a mokedong el mo ouchais a chisel tia el Ikelesia er a Jesus Kristo er a Uriul-l klebesei el Santo, e ng ngera se el mo nger er kau?” (“The Mission of the Church and Its Members,” Improvement Era, Nov. 1956, 781).

Tia el nger el President McKay a dillii el kirel a keril a kmal “engedel a deruchall” er a priesthood. A Ikelesia er a Jesus Christo er a Uriul- klebesei el Santo a dechor er cheroid er a bebil er a klechelid el tir a oumerang el kmo a klisichir a mengai er a uldelid el deruchall, chedaol llechukl, me a lechub eng kuk di bebil er a osisechakl. Kid a ouchais er a lemuut el kmal ungil el cheledecheduch el kirel a ngerachel er a priesthood el kmo ng mloterkokl el mla er a osisechakl er a babeluades el me er a Prophet Joseph Smith.

A cheldechedechak a kmal di ultuil er a engedel a priesthood me a klisichel a babeludes. Ak

Klisiich me a Ngerachel er a Priesthood

A priesthood a deruchall el ngii a mla er a Rubak el me er a rengelekel sechal er tial beluulechad el kirel a diak a ulebengelel klengar el mo er a rebek el chad (mesa Spencer W. Kimball, “The Example of Abraham,” Ensign, June 1975, 3). A Priesthood a ta er a rollel e a Rubak a olsobel er a rengelekel lokiu a rengelekel sechal. A ta er a kmal klou a ultutelel er a Ikelesia er a Jesus Kristo, er a irechar me a chelechal sils, a sel Klisichel. Ng diak el sebechel ngarngii a klemera el Ikelesia a lak a chedaol ngerachel.

A chad a sebechel nguu a deruchall er a priesthood. Ng klikiid me a blak el reng—ng diak el duch, semmong, malechub el skuul—a lousbech el osiik er a chad el mo mechedaol el mo er a priesthood.

A teletelel tial ngerachel er a priesthood a obetik er ngii er a ongeim el tebechelel a klaumerang; “Aki oumerang el kmo a chad a kirel mokedong er a Dios, lokiu a ulaoch, me a lomor er a chim er tirkel loba klisiich, el mo omerk er a Ebangkelio e omtebechel e meruul aikel ruoll.” A leuaisei e ng sebechel a kekerel buik me a lechub eng klou el chad el nguu tial deruchall er a priesthood el tir a mla metutk el mo er a derta me a derta el obis er a ngkel ngii a di mla oba tial deruchall er a priesthood el olab a kiis er a priesthood.

Ng ke el oba a priesthood a kmal kirel el meruul er tia el chedaol el ngerachel el nga er kengei er a udesuel, klisichel, me a moktek er a Dios. Ng diak a ko er a mo klachechei. Tia el deruchall er a priesthood a kmal kirel el di usbechall el mo mesiou, omekngeltengat, e melisiich er a bek el chad.

A ngar bab el ngerachel er a priesthood a mengai loeak a mesisiich el klemerang el lokiu a klou el ngerachel el mor tia el deruchall (mesa D&C 68:8) mea obis (mesa D&C 107:99) el ngii a mla mengai. Se el de mesiungel a Dios el meruul aika el ngii a chedaol el urerel, e kid a kmal klou a ngercheled el mo meruul el diak debo domtok me a lechub e kede merob (mesa 2 Nephi 2:26). Tial priesthood a kmal kirel el oureor el diak el ko er a di uleksaik a teletelel.

A President Ezra Taft Benson a ulsisechakl:

“Ng diak el ungil a lsekum e ke mla nguu a priesthood e mongiil er a chad el kmu er kau el mo meruul a ureor. Se el de nguu tial priesthood, e ngercheled el mo oureor e ngar ngii er a rengud el meruul a llemalt er tial beluulechd, ng uaisei el Rubak a kmung:

“‘… Ngke el ngii a diak a ngera el relii el ngii a mla mokedong, el ngii a mla ngmai a llach el ngar ngii a kora ngar ngii a rrau el reng er a renguul, me a lechub eng ko er a mesaul a rengul, e ngii ngike el mo diak el ngeltengat’ [mesa D&C 58:29]” (So Shall Ye Reap [1960], 21).

A President Spencer W. Kimball a dirrek el millekoi el kirel a urerel tia el priesthood: “A chad a tomall a telbiielel a priesthood alsekum e ng diak el loltirakl a llach—me a dirrek el diak el kedmokl a ngerchelel. Maleuaisei, e a mo telmellel tia el telbiil a sel sekum a chad a diak a ngera el relii ” ( The Miracle of Forgiveness [1969], 96).

Me se el bol blak a rengud el meruul aika el ngerachel er a priesthood, e ng sebeched el ngmai a klengeltengat er a klisichel a priesthood. Tial klisichel a priesthood a klisichel a Rubak el oureor el mo er a remeklou me a remekekerei el sechal el di uaikid el ngii a olchotel a llemalt, klaumerang, blekongesenges, me a duche el reng. A kekerei el sechal me a lechub eng klou el chad a mo nguu tial klisiich er a priesthood lokiu omor er a chim e ng di mo diak a klisichel a priesthood el obang alsekum e ng diak el lolngesenges, diak el klikiid, malechub e ng diak el soal mesiou.

“A llemalt er a priesthood a diak el kakeakl ngii me a klissich er a babeluades, e a … klisiich er a babeluades a diak el sebechel mutebechel a lak el ultuil er a melemalt el osisechakl.

“A klisiich er a priesthood a sebechel mei er kid, ng klemerang; e ng di sel domart a kngtid malechub a keldidiul a ngerud malechub e dosiik a klsuul el ngarbab el tekoi, malechub e dosiik el mo mengedereder er a rengelekel a chad, er a ngii dil mekngit e diak el melemalt el blekeradel, e ng uaisei, el babeluades a mechesimer; e a Reng er a Rubak a mo ngar er a klengit el reng; Ea Reng er a Rubak sel bol ngar er a klengit el reng, e ng Dikea a klisichel malechub a lemeltel” (mesaD&C 121:36–37; dochelii a belkul).

Rodam, kemiu el ngalek el sechal me a meklou el chad el mo melai er tial priesthood e diak bom ketmeklii el mor se el tkur bab el ngii a klisichel tial priesthood e ng kmal diak el kengei er ngii a Rubak. Kemiu el oba tial priesthood el mekekerei me a remeklou—a kmal ultuil er a klisiichel tial deruchall el mo omtechei el losobel aika el urerel a Dios.

Suobel el mla er a Demak

Ak mlokeroul er a blai el lobengkel a blak a rengul delak me a ungil demak. A delak a mle ta er a ruchelel el mlo chuarm el kirel a Ikelesia me a rengedel a Dios. A demak a dimlak el chad er a Ikelesa, e ng di se er a lekekerei el chad, e ng mle soal el mo prist er a Katolik. Meng mlo uaisei, el ngileltii el mo diak el ngar er a seminari e bai mlo soal el mo melemolm er a urerel el meruul a bek el bedengel a iro.

Ng klemengetel a chelbechielel, e a demak a ulemais el me er a bek el ongdibel er a Ikelesia er a Jesus Kristo er a Uriul- klebesei el Santo el obengkel a telungalek er ngii. N merang, el mle betok el chad er a ward a dimlak e lodengei el kmo a demak a dimlak el chad er tial Ikelesia. Ngii el demak a ulsisechakl el coach er a yakiu, e ulengeseu a bek el omeruul er Scout, e ulengeseu er a delak er a kakerous el okedong me a ngerchelel. Ng kmal di soak el ouchais er kemiu er a chimo el suobel el ksilubii er a demak el kirel a ngerachel me a klisichel a priesthood.

Se er a kekerei e ak kulker er a dmak el kmal mle betok el taem er a bek el sandei el kmo ng oingerang e ng mo metecholb. Ng ngulnger er ngak el kmal mle medemedek a omerelel se el bek el taem el kuker er ngii: “David, ng diak bok chad er a Ikelesia el delam a uchul, malechub e ng kau, malechub a ngii dil chad. Ak mo chedal a Ikelesia el ngii a kudengelii el kmo ungil.”

A kuumerang el kmo ng sel taem er a kngeasek e tiakid el cheldecheduch er a delongelek ngak me a demak a dilubech. A ki dirk mlo merek er a Ikelesa, e sola e ak mocha oker er a demak el kmo ng oingerang e ng mo metecholb. Ng mlo klikmechur e kmo, “Kau ngke el blechoel el di oker er ngak el kmo ng oingerang e ak mo metecholb. Chelecha ngar ngii a kerik el lekor er kau.” A kulereched e mle ungil a renguk le kulemdasu el kmo ngouchais el kmo ng mo oingerang!

A demak a milemolem, “David, a Ikelesia a olisechakl el kmo a priesthood a mlengai er a beluulechad er a irechar e mla moluut el mei lokiu a remesiungel a babeluades el mo er a Prophet Joseph Smith, uaisei?” A kulnger er ngii e dilu el kmo tilecha a kmal klemerang. Meng dula el kmo, “Tiakid a kerik. Bek el sandei er a ongibel er a priesthood e ak blechoel lorrenges er a bishop me a remengeteklel a priesthood el belechoel lomeklatk, olengit, er bek el meklou el sechal loba tial deruchall el mo meruul a ngerchelir er a priesthood. Me a lsekum e tia el Ikelesia er kemiu a mera el oba mla moluut el priesthood er a Dios, e ngera uchul me te betok el chad er a ikelesia er kemiu a diak a kuk kmal ngodech el loruul er tirke el kuk ngara ikelesia er ngak?” Ng di mlo diak a ngera el kudesuii. Ng dimlak a bleketakl el nger ngak el mo er a demak.

A kuumerang el kmo a demak a dimlak el melemalt a omerelel el merritel el kirel a Ikelesa er a teletelel a deruchelel a priesthood el kirel a kuk chelitecheterir a rechad er a ward se el obengterir. E ng di se el ngara chelsel a keril a mle melemalt el tirke el oba chedaol priesthood er a Dios a kirir el kuk ngodech er a rebebil er a rechad. Tirke el oba a priesthood a diak el belkul a kmo te kmal ungil er a rebebir er a rechad, e ng di ng kirir el ngodech a omerellir. Tirke el oba priesthood a diak el kirir el di nguu a ngerachel er a priesthood te dirrek el kirir el mo klikiid e blak a rengrir el kirel tia el klisichel a Dios. A Rubak a mla kmul kmo tirke el oltekau er a Urerel a kirir el klikiid (mesa D&C 38:42).

Ng kmal dirkak kubes er a suobel el kirel a priesthood me a klisichel el ksilubii er a demak, el ungil chad el diak el chedal a klechelid er kid, el ngii a mle klou a moktek er ngii el kirir a rechad el oba priesthood er a Dios. Tia el cheldecheduch er ngak me a demak er tiaikid el suelb er a Sandei a rirellak el soak el mo “kedung el buik.” Ng dimlak el soak el mo mekngit er a osengel a demak el kirel a omesubel er a mla moluut el ebangkelio. Ng di mle soak el mo kedung el buik. A Rubak a ousbech er kid el rokui loba tia el ngerachel er Ngii el mo chetengakl, klikiid, e mekedung el buik er a chelsel a rokui el taem me a rokui el basio.

Kom locha kmal semeriar el mo medengei el kmo chelsel a kmal betok el rak ruriul, e a demak a miltecholb. E ng mocha ungil taem, me ng mlo er ngii a techelek el omor er ngii a Aaronic me a Melchizidek Priesthood. Se el kot el mle ongasireng er a chelsel a klengar er ngak a se el taem el demak mlo nguu tial ngerachel, e mocha, nguu tia el klisiich er a priesthood.

A kuuchais er tial klou a belkul el suobel er a demak el luluchais el kirel a beot el klemerang. Se el denguu tial ngerachel er a priesthood el loeak a omor er a chim e ng kmal klou a ultutelel, e ng di ng dirk olngesonges. Omengedaol el mo er tia el deruchall, e ng di a llemalt a klou a ultutelel el kirel tial klisiich el melemolem el mesebechakl a klengar, olisechakl e ouchais, e omekngeltengat e mellach, e ngosechekel er tia el ureor el olsobel a klengar.

Nga er tia el klou a ultutelel taem er a reksi er a beluulechad, e kau me ngak a kmal kired el mo melemalt el chad e mo ungil dongu er a chimal a Dios. Ng kired el ngosechekel el mor bab el chedal a Dios. Kau me a ngak a mo ungil el mesuub e orenges el diuaia teletelel a Nephi, el ngelekel a ngelekel a Helaman e mle kot el teruich me a terung e mlo kedong er a Osobel er a uchelel a Urerel er a delongelir a re Nephites. A Nephi a kildmokl a betok el tekoi el mo er a rechad, me a Ngii el Nephi a milngedmokl el obang a klisiich me a ngerachel (3  Nephi 7:17).

“A Kulengit e Mngesuir a Bechik el mo Medengei”

Se el mo meng ulebengelel a klasues er kemam el kirel a babier er a mo er a templo el ngak el mle bishop e president er a stake, e ak blechoel loker er a rebechiil redil el kmo ak mekerang e ngosuterir me a retelungalek er tir. A nger er tirka el kmal klou a klaumerang er tir el redil a klou a ultutelel me a belkul. Tirka el odos a diak el oumondai malechub e te melaes, e ng di te bai blechoel el kmul kmo: “A kulengit me mngeseuir a bechik el mo medengei a ngerchelel me a deruchelel a priesthood er a chelsel a delengcheklam. Ng kmal ungil a renguk el omuchel er a omesubel chedaol el llechukl, omeluluuch er a telungalek, me a ongdibel er a telungalek, e mo melemolem el meruul. E ng di a kuureng me a bechik bo el osisiu el sebechel kutmeklii se el ngerchelel er a priesthood. A kulengit e mngeseuir a bechik el mo bdelul a mengeteklel a priesthood er a blimam el ngii a oungerachel e omecheliu er ngii.”

Ak mo melatk e omes er tirka el odos me a ongterir. A roungerachel er a roba priesthood a orrenges a osisu el ongit er chelechal sils. Ng betok el bechiil el redil a kmal oureng er a rebecherir el diak el di loba tia el ngerachel er a priesthood te dirrek oba klisichel a priesthood. Te kmal oureng me bol losisiu loba klou el klaumerang er tir me a rebecherir lolemolem e lekaingeseu er a urerel a priesthood el meruul e omerk a tekingel a Kristo er a chelsel a telungalek.

Rodam, ak meral yaksok er kemiu el omko kemiu me a ngak a mo meluluuch e omtab a ika el ongterir a rodos, e a Chedaol Reng a mo ngosukid el mo ungil medengelkid (mesa D&C 93:24) e ngosukid el mo medengei aike el kired el mo melodech e kutmokl el mo ungil. E a taem el bo doruul a chelechang!

Bo Mokesiu er a Llemalt

Chelecha el kesus e ng soak el mo dulii se el tekingel a President Thomas S. Monson, el ngii a mla mengemedaol er kid a roba priesthood el mo “okesiu er a llemalt.” Ngii a mla omeklatk er kid el kmo ke denga er a teletelel me a urerel a Rubak e kired el ngmai a ngeso er Ngii sel de klikiid (mesa “Examples of Righteousness,” Liahona me a Ensign, May 2008, 65–68). Kau me a ngak a oba ngerachel er a priesthood el ngii a mla lemuut el me er tia el beluulechad lokiu a remesiungel a babeluades, el Johanes el Techolb me a Petrus, Jakobus me a Johanes. Maleuaisei e a bek el chad el nguu a Priesthood er a Melchizedek a sebechel el omdedelid er a teletelel tia el ngerachel er a priesthood el mo er a Rubak el Jesus Kristo. Ak kureng el ulekum eke de kmal mo ungil a rengud el kirel tia el klengeltengat el kired. Ak meluluuch el kmo me mo de klikiid el omtechei er a Rubak se el dolasm el oureor el oba chedaol el ngerachel er Ngii. Mei me bo el sebeched el mo nguu tia el klisiich er a priesthood.

Ng kuuchais el kmo tia el chedaol el priesthood a mla moluut el mer tial el beluulechad er chelechal taem e sebechem el metik er ngii er a Ikelesia er a Jesus Kristo er a Uriul- klebesei el Santo. Ak direk el sioning er a President Thomas S. Monson el kmo ngii a kot el ngarbab el priest er a chelsel a priesthood er a Ikelesa (mesaD&C 107:9, 22, 65–66, 91–92) e di ngii el tang er tial beluulechad a olab a ngerachel er a rokui el kiis er a priesthood . Aika el klemerang a kulekoi el ngara chedaol ngklel a Rubak el Jesus Kristo, amen.