Olsisechakl er a Rengeleked el mo Medengei

Mla er a Cheryl A. Esplin

Ongerung el Counselor er a Primary General Presidency.

Olsisechakl er a rengelked el mo medengei a lmuut el klou er se el di melekoi er a tekoi. A ongeseu er tir el mo nguu osisechakl el mo er a rengrir.

Chelsel a mla mo merek el rak e ng betok el telengtengil a klengar er ngak a merael e mo nguemed, e ng di bebil er a ultebengek el kmal blecheol el bleketakl a cherellir a derta er a rengelekam. A Babeluades a ko er a kmeed, e alsekum e ak melasem, e ak mo sebechek el melchesuar a budech me a ongasireng el ngak a mlo medengei sel tal kurkedii a tolechoi er chimak.

A “Rengeleked a okedongall er a Rubak” (Psalm 127:3). Ngii a medengei e betik a rengul er a derta er tir loba cherrungel el beltik el reng (mesa Moroni 8:17). Ngera el chedaol el ngerachel a Chedam er a Babeluades a mla meskid a roungalek el mo Obengkel el olngeseu a ika el kesiokel el reng el mo er sel Ngii a medengelii el kmo ng sebecherir.

Tia el cheledaol el kengri el omekeroul er a rengalek a kmal mo klou el ngerachel el merkid alsekum e ng diak dousbech a ngelsuir a Rubak. Ngii a kmal lungil medengei a ike el rengelekel a kirir el mo medengei, ike el kirir el remuul, me a ike el kirir el mo uai ngii me ng mo sebecherir el lmuut el mo er medal a Rubak. Ngii a mesterir a rchedil me a rchedam a ulterekokl el osisechakl me a omekrael lokiu a chedaol llechukl, reprofet er Ngii, me a Chedaol Reng.

Chelsel a uriul klebesei el locholt lokiu a Profet Joseph Smith, a Rubak a mlo oked er a roungalek el mo olsisechakl er a rengelekir el mo medengelii e osisechakl er a ouchel reng, klaumerang er a Kristo, techolbchelid, me a sengk er a Chedaol Reng. A domtab e a Rubak a diak di lolekoi el kmo kid a mo “olsisechakl er a osisechakl”; Ngii a melekoi el merkid el mo olsisechakl er a rengeleked “el mo medengelii a osisechakl.” (Mesa D&C 68:25, 28; smisichii a belkul.)

Ngara Psalm e kede menguiu el kmo, “Beskak a klemedengei, e ak mo oterkeklii a llechum; uaisei, ak mo otireklii el loba mui el renguk” (Psalm 119:34).

Olisechakl er a rengeleked el mo medengei a lmuut el klou a belkul er se el di omiou a tekoi. Kede olngeseu er a rengeleked el mo nguu osisechakl el mo er a chelsel a rengrir el mo medechel e sebechel mo chemolt lokiu a teletelir me a blekerdelir el melemolem er a klengar er tir.

Nephi olsisechakl el kmo a chad sel longedecheduch loba klisichel a Edaol Reng, ea klisiichel Edaol Reng a “ngmai a ikel tekoi el mo er a rengrir a re chad” (2  Nephi 33:1). Ngerecheled a roungalek el mo er a tkul rebab el sebeched e rullii a basio el rengeleked a mo sebecherir el melchesuar er a ungil Reng e mereko olngeseu er tir el mo medengelii se el lomelchesuar er ngii.

Ak mo lotkii a dengua el mle er ngak er a mla me mong el rak el mla er a ngelekam el redil Michelle. Loba medemedemek el reng e ng dula el kmo, “Chedil, a kmal dirke mlo chobengelii a ungil e ultebengall el klemedengei el lobengkel a Ashley.” Ashley a ngelekel el mle eim a rekil er sei kid el taem. Michelle a ouchais er sel tutau el ta er a ike el ngar ngii a klautok er a delongelel a Ashley me a edei a rekil Andrew—a ta a diak el lorous e a ta a mengelebed. Uriul er a lolengeseu er tir el meruul er a budech, e ng milrael el mo omes er a tolechoi.

Ng dimlak el meketeket, e a Ashley a rirurt el mei, el kesib a rengul e le Andrew a diak el soal merous. Michelle a ulmeklatk er a Ashley er a yaksok el rirellii er a ongdibel er a telungalek el mo meruul a ungil mo er a tang.

Ngulker er a Ashley el kmo ng soal meluluuch el mo er a Cherdam er a Babeluades el kirel a ngeso, e ng di Ashley, el kmal dirk kesib a rengul, a ulenger e kmo, “Diak”. Se er a loker el kmo ngoumerang el kmo a Chedam er a Babeluades a mo onger a nglunguchel, e a Ashley a dilu el kmo ng diak lodengei. A delal a ulegnit er ngii me lolasem e mereko mekekokil lorkedii a chimal e mo outubaruach lobengkel.

Michelle a dula er a Ashley el kmo ng sebechel el lolengit er a Chedam er a Babeluades me le ngesuir a Andrew el mo soal merous—e dirrek el ngosukii el mo bekerurau. A uldesuel el kirel a Chedam er a Babeluades el olngeseu er a ochedal el mo merous a rirellii me ng mlo semeriar, me tia kid e ng mocha meluluuch, e a kot e ng ngulengit er a Chedam er a Babeluades me lengesukii a Andrew el mo merous. Me tia er a lolengit er Ngii me rellii el mo bekerurau, e ng mocha lmangel. Ashley a mlo merek er a nglunguchel e mlo ultuil er a ongelngelel a delal. A Michelle a ulurkedii e oker er ngii el kmo ngera me ke lmangel. Ashley a dilu el kmo ng diak lodengei.

A delal a kmo, “Ak medengei el kmo ngera me ke lmangel. Ke melchesuar a ungil er a chelsem?” Ashley a ulemitech er a bdelul, e a delal a melemolem el kmo, “Tia sel Reng el ngesukau el mo melchesuar el uai tiang. Ng teletelel a Chedam er a Babeluades el ouchais el kmo ng betik a rengul er kau e soal lolngeseu er kau.

Nguleker er a Ashley el kmo ngoumerang er tiang, e alsekum e ngoumerang el kmo Chedam er a Babeluades a sebechel ngosukii. Me ng mui a medal er a chiuosech, e a Ashley dula el kmo ngoumerang.

Bebil er a taem e sel kot el mesisiich el teletael el doba el olsisechakl er a rengeleked el mo medengelii a osisechakl a mo olsisechakl er tir er se el teletael el tir a ngar ngii er se el taem. A ika el taem a blechoel mo er ngii se el lak dodengelii a duubech er a omeruul er a chelsel a klengar er a telungalek. A ika mei e merael el di mereched, me ng kired el mo mereched a bdelud el mo medengelii a taem er a olsisechakl alsekum a rengelked a mei loba ker me a lechub e ng bekikl, sel ngar ngii a mongdai lobengterir a rebebil er ngii me a lechub e te kausechelei, sel bol kirir lorekedii a ngasechereng, se el rellii a cheleuid, me a lechub e ng kirir el melilt. (Mesa Teaching, No Greater Call: A Resource Guide for Gospel Teaching [1999], 140; Marriage and Family Relations Instructor’s Manual [2000], 61.)

Alsekum e kede kldmokl e mo mecherei a Reng me ngomekrael er a ikakid el teletael, e a rengeleked a mosisechakl el mo klou a lodengelii e mo bedochel.

Ng kmal di ua ikel meklou a ultutelel taem er a olsisechakl el merkid se el domdasu el melib a tekoi el blechoel doruul uai a telungalek el meluluuch, telungalek el mesuub er a chedaol llechukl, ongdibel er a telungalek, me a kuk bebil er a omeruul er a telungalek.

Chesel a bek el teletael er a olsisechakl e a rokui el desuub me a bo dodengei a kmal mo ungil mekedmokl alsekum a basio chelellakl er se el sebechel a Reng el ngar ngii.

Ng bekord el eru el buil er a rengelekel a bo el eai a rekrir, e a ta el chedam a mlo eklii a taem er a bek el sandei el mo mengedmokl el kirel a techolbchellid. A ngelekel el redil a dilu el kmo se el bo el temel, e a demal a msang a babier e mocha dengchokl, el kmal di tir el terung, e mo mesaod e dirrek el olecholt a ngar er a rengrir el kirel a ebangkelio er a osisechakl. Ng mecherei a ngelekel me ngousunga a siasing el bo lousbech el mesuub. Ngochotii a uchei er tia el klengar, klengar er tia el beluulechad, me a derta el bakes el ngii a ousbech me ng mo sebechel lmuut el mo kiei lobengkel a Chedam er a Babeluades. A demal a mlo olecholt a klaumerang er ngii el kirel a derta er a ika el bakes er a uldasu er a diak a ulebengelel klengar er se el lolsisechakl er ngii.

A ngelekel redil er a le bo a lomelchesuar er tia el bla er ngii el tekoi er a le klungang, e ng dilu el kmo, “Ng diak el sebechek el obes er sel beltik el reng el kulechesuar er ngii el mla er a demak er se er a lechoit a temel lobengkek... a kumerang el kmo tia el blokudengelii a kmal klou luchul e ak mlo er ngii a chemolt el klaumerang er ngak er se er a kmetecholb” (mesa Teaching, No Greater Call,, 129).

Olsisechakl el mo medengei a ousbech a ducherreng me a tabesul el omeruul. Ng uldekial a olsisechakl lokiu a llemalt me a okesiu e tokuni el mo olngeseu er a rengeleked el mo kiei a ikel suub.

President Harold  B. Lee ulsisechakl, “Se el lak a klemedengei er kid el kirel a osiseckeklel ebangkelio el ngar omeruul, e ng uaisei... el mo meringel er kid el moumerang er se el osisechakl” (Teachings of Presidents of the Church: Harold  B. Lee[2000], 121).

Ng mle ketengek el mesuub el meluluuch e mlo outubaruach lobengkel a telungalek er a ngak er a chelsel a nglunguuch er a telungalek. Ak mlosisechakl a tekoi el dousbech er a nglunguuch er se er a kurrenges er a rechad er a blik el meluluuch e dirrek er se el lolengeseu er ngak el melekoi er a kot el nglunguchek. Ak silubii el kmo ng sebechek el mengedecheduch er a Chedam er a Babeluades e olengit me lomekrael.

Bek el tutau el diak el engelakl, a delak me a demak a mengudel er kemam el meliuekl er a tebel er a uchei er a blengur, e a ki moutubaruach e ngar er a nglunguuch el telungalek. A ki meluluuch er a bek el temel a blengur. Sel klebesei er a uchei er a cheliuaiu, e a ki moutubaruach el rokui er a belngel a blai e chosmerii a sils loba nglunguuch er a telungalek.

Me ng dimlak a kmal bo kudengei el kirel a nglunguuch er se er a kekerei, ng milrael el mo tebedechel a klengar e mla mo kiei lobengkek. Ak melemolem el mesuub, e a klemedengei er ngak er a klisichel a nglunguuch a dirk omekeroul.

Elder Jeffrey  R. Holland a dilu el kmo, “Kid el rokui a medengelii el kmo a siich er a klemechel ebangkelio a ultuil er ngii el mosisechakl e mo medengelii e mereko mo nguu lotungii er a klengar er kid el lokiu a teletael el mo rullid me de mo mtebengar se el yaksok el ngii a deurreng me a diak a ulebengelel klengar” (“Teaching and Learning in the Church” [miting er a osisecheklir a roungerachel el ngar er a rokui el beluu, Feb. 10, 2007], Liahona, June 2007, 57; Ensign,, June 2007, 89).

Omesuub el mo ungil medengelii a osisechakl er a ebangkelio a omerael er a klengar e mei el ngar er a blechebechel, kaiuetuil losisechakl, kekerei er tiang e kekerei er sei (2  Nephi 28:30). A rengalek se el losuub e loruul a ike el siluub, e a klemedengei er tir a merael mo klou, e mo mukrael mesuub a betok, meruul a betok, e lmuut el mo klou e betok a lodengei.

Ng sebeched el mo medengei el kmo a rengeleked a omuchel el mo medengelii a osisechakl se el desa el mo chemolt er a blekerdelir me a omeruul el ngar er ngii el diak se el omengetikaik. Me se el losuub el mo medengelii a ebangkelio, e tir a mo sebecherir el di tir e kmal mo bekengerachel. Tir a mo ta er a rael el mo mengedmokl a mondai er a telungalek e mo meruul a ungil el mo olngeseu er a blai me a telungalek.

Kid a mo olsisechakl er a rengeleked el mo medengei se el dousbech a rokui el teletael er a olsisechakl, e mengemedaol er a Reng, olecholt a ungil blekeradel, e olngeseu er tir el mo oltirakl e meruul a ike el siluub.

Se el domes a medal a kekerei el tolechoi, e kede mo lotkii sel chelitakl:

Ngak a ngelekel a Dios,

Me a ikel ngak ousbech a meklou;

Mngesukak el mo medengei a tekingem

Er a uchei er a lorael mo meioud.

Morolak, mo mekrael er ngak, morael er bita er ngak,

Mngesukak el metik er a rael,

Mosisecheklak er a ikel rokui el kirek el meruul

E mo kiei lobengkel er a ta er a sils.

(“I’m a Child of God,” Hymns,no. 301; smisichii a belkul)

Me bo doltirakl. Ngar er a ngklel a Jesus Kristo, amen.