Obult el mo er a Ebangkelio er Ngii lokiu a Ikelesia er Ngii

Mla er a Elder Donald L. Hallstrom

Er a Presidency er a Seventy

A moktek er a Ikelesia a ngosukid el mo oltirakl er a ebangkelio.

Ng soak a ebangkelio er a Jesus Kristome a Ikelesia er a Jesus Kristo er a Uriul-klebesei el Santo. Bebil er a taem e kede ousbech er a tekoi el ebangkeliome a Ikelesia el uai a losisiu, eng di ikang a diak losisiu. Aikang, a bai, kaukledem, e kid ousbech el erung.

A ebangkelio a klebokel el uldesuel a Dios, el kid el Ngelekel, a nguu a techall el mo ngmai aike el rokui el lolab a Chedam (mesa D&C 84:38). Tia okedongall el diak a ulebengelel klengar e kleuadel el kmo ng “kot el ngarbab el sengk er a Dios” (mesa D&C 14:7). Sel klou a belkul telengtengil tia el uldasu a klechad er kid er a beluulechad—el taem el domekeroul er a klaumerang (mesa Moroni 7:26), el ouchel a rengud (mesa Mosiah 3:12), e mo sumecheklid el obengkel a Dios (mesa Jacob 4:11).

Meng chelitechetud er tia el klengar a uchul me a “klautok er a rokui el tekoi” (2 Nephi 2:11) a rullii tia el klengar meng kmal meringel e diak el sebeched el di kid el mo klikiid er a kngtid, e a Osobel a mlo usbechall. A Elohim, el Diak a Ulebengelel el Dios e Chedam er a rokui el reng, e ulechotii a moktek er Ngii er a diak a ulebengelel klengar, e ng mla er ngii a Chimong el mle teloi er kid el dilu el kmo, “Ngak ke tiang, modureklak” (Abraham 3:27). A ngklel a mle Jehovah.

Me ngulchellel a Chedam, er a reng me a tech, e Ngii a uleba ngarbab el klisiich el mo mesisiich er a beluulechad. E ulechellel a delal er a beluuelchad, eng kirel mo obangel a ringel me a ongarm er a beluulechad. Ng kal ngarbab el Jehovah a dirrek el ulekedongall el Jesus e liluut el nguu a dui el Kristo, el belkul a Mesia malechub e ng Chimo el Klikiid. Sel kot el ngarbab el le kildmeklii a Tngakireng, el Jesus el Kristo a mlo er sel “kot e riou er a rokui el tekoi” (mesa D&C 88:6), el uchul eng mlo sebechel Ngii a tongetengii a klengar ngii el kired.

A Ikelesia a milchederoder er a le ngara beluulechad a Jesus Kristo, “el dechor er a dodai er a reapostol me a reprofet”(Efesus 2:20). Chelsel tiang, “el taem er a cherrengelel a rokui el tekoi” (mesa D&C 128:18), e a Rubak a liluut el lolutii, sel ngii a le dillii er a Profet Joseph Smith el kmo, “Ngii a mo kudmeklii a ikelesia el lokiu a chimal a Joseph” (mesa D&C 31:7). A Jesus Kristo a ngii a bdelul a Ikelesia er Ngii, e a romtechei er ngii er a beluulechad a re profet el tir oba ngerachel er a kleapostol.

Tia meang el Ikelesia. A cheldellel, urerel, me a cherrengelel a klungiolel a longull tirkel osiik el mo medengelii. A Ikelesia a ngar er ngii a prokuram er ngii el mo er a rengalek, rengeasek, sechal, me a redil. Ngar er ngii a klebokel el omekedecheraol er ngii el betok er a teruich me a eai el telael a iidisel. Klebokel el templo—er chelechang a dart me a okedei me a elolem—el berberiid er a beluulechad, e a okedei a merael a ureor er ngii. A chelechad er a remisionari el betok er a okeim me a elolem el telael, el rengeasek me a remeklou, el ngara chelsel a dart me a okeim el beluu. A teletael er a tekoi er a ngeso er a Ikelesia a klebokel el okesiu er a blekerurau er a rechedal a ikelesia. A teletael er a omesiungel a klechad a omekerreu er a rechedal a ikelesia e oldubech a tekoi er a di kid el mesiou er kid el ngii a diak di losisiu er a ngii dil ker. Chelsel tia el Ikelesia e te ngar er ngii a roungerachel me a Resanto el tir a semerirar el mesiou er a tang me a tang. Ng diak a ngera el ngara beluulechad el mo uai tia el Ikelesia.

Se er ak mechell, e kemam el telungalek a kiliei er a tumum el blai er a basio el dilechor ngii a ta er a klebokel el omekedecheraol er a Ikelesia, el Honolulu Tabernacle. A kulengit a klausubes er a resechelik el ngara Presiding Bishopric, el tir omes a omekedecheraol er a Ikelesia, e ng di se er ak kekerei el buik e ak melemiakl el ngmasech e metengel er a rokui el klalo, me a cheungel tia lorael a ralm er ngii el mo er bebul a chelsel tia el kedidai el talikerab. Aki ulemtar el (mesuub er a Tarzan) er a ikal mekemanget e meleksakd el meklou el kerrekar el mla er tia el basio.

A Ikelesia a mle rokui el tekoi er kemam. Aki mlo er a betok el miting, lmuut el betok er chelechal sils. Aki mlo er a Primary sel Ongeua el ureor er a sueleb. A miting er a Relief Society a mle sel Ongeru el ureor er a tutau. A Mutual er a rengeasek a sel Ongedei el ureor er a kebesengei. A Sabadong a mle temel aike el omilil er a ward. Sel Sandei, e a remeklou me a remekekerei el sechal a mo er a miting er a priesthood sel tutau. Ea le sueleb e a ki mo er a Sandei Skuul. Ea le kebesengei e a ki mo er a sakrament. Me a chelsel aika el mong me a mei, e ng uai a ki di mechesang er a tekoi er a Ikelesia el tal sils a le Sandei me a dirrek el di mitil a sils.

Meng mle soak a Ikelesia, er a taem el kekerei el buik, e ng mle ketengek, el mo omelchesiu el kmo ngar er ngii a lmuut el betok. Se er a leim a rekik, ea klou el ongdibel a mlo er ngii er a tabernacle. Me a ki mirrael er a rael er tia el ki bla er ngii el mo imuul er a kekerei el did el mo er tia el klebokel el omekedecheraol e mlo dengchokl er a locha ongeteruich el blechebechel a kingall er tia el klou el blai. A ulengerachel e milngedecheduch er tia el miting a David O. McKay, el Merredel er a Ikelesia. Ng diak debedebek a le dilung, e ng di a kungil medengei ak uiles me a kulmelchesiu. A President McKay a ulubail er a ko er a becheleleu el bail, e a ikal becheleleu el cheiul, a rirelii el kmal klebokel. Meng siukang er a iuns, e ng mle telcherakl a bekerekard el lei er ngii. Tia er a longedecheduch e ng mla er ngii a kmo ngera el mesisiich el kulmelchesiu er ngii. A uriul e ak mlo medengei el kmo ak ulemelchesiu er a Chedaol Reng. A ki mlo oiteklii a chelitakl el mengesimer.

Ng techa obengkel a Rubak? Ng techang?
Chelechang taem el dochotii.
Ng diak ki medakt loker:
Ng techa obengkel a Rubak? Ng techang?

(“Who’s on the Lord’s Side?” Hymns, no. 260)

Me a ika el tekoi er a chelsel el lulngitakl a kmeed el erul el telael chad a kumdasu e a ker a mlei er ngak, el mlo soak el mo dechor e kmo, “Ngak!”

A rebebil a mla mo omdasu el kmo a de meses el ngara Ikelesia eng kot el ngarbab el moktek. E ng di ngar er ngii a kengaol er a chelsel. Ng sebeched el meses el ngara Ikelesia e diak de sal meses er a ebangkelio. Msall ek beketeklii: a meses el ngara Ikelesia a kmal soad el moktek; eng di, ng diak el klebech. A meses el ngara Ikelesia a di olchotel a ikrel sel soal a reng. Alsekum e kede ngara ikelesia, e meruul aike el ngercheled er a Ikelesia, e mesiou er a rebebil, e kede meues er a buai.

Ea kuk bitang, e a tekoi er a ebangkelio a diak el sal meues e meringel a dolebodeb, eng di ng kmal meklou a belkul kirel a diak a ulebengelel. El uaia, ngua ngera klungel klaumerang a meral dobang? Ke de uangerang el kirel ouchel reng? Ng ua ngera belkul a chedaol ruoll er a klengar kid? Ngua ngera moktek er kid el kirel aike el chedaol telbiil?

A kelmuut: kid ousbech er a ebangkeliome aIkelsia. Ng klemerang, a moktek er a Ikelesia a ngosukid el mo oltirakl er a ebangkelio. Kede blechoel melchedech: Ng mekera chad e kmal mesisiich er a Ikelesia sel le ngeasek e a le klungang el chad eng dikeang? Ng mekera klou el chad el kmal mle blechoel ngara ikelesia e mesiou e mo diak lemei? Ng mekera chad el ngesechel a rengul er a remerreder malechub a ta er a chedal a ikelesia a uchul eng dikea el ngara Ikelesia? A kumdasu eng locha dimlak el sal mui el obult el mo er a ebangkelio—er a tekoi el melutk er a diak a ulebengelel.

A kmung edei el meklou a belkul tekoi el uchul e a ebangkelio a mo dodai er kid:

Smisichii a klemedengei er kid er a Dios. A mesisiich el klemedengei me a beltik el reng er tirke el tedei el chedal a Kledios a kmal klou a belkul. Mui el nglunguuch el mo er a Chedam, el ngara ngklel a Ngelekel, e osiik a ulekrael er a Chedaol Reng. A robekel el dmak el meluluuch e mesuub chedaol llechukl e melbedebek el melemolem el meleketek er a diak el mesim el klaumerang er a Jesus Kristo. “Ele kede mekerang e medengelii a mastang … el ngodech el chad er kid, el ngodech a uldesuel me a moktek er ngii?” (Mosiah 5:13).
A moktek er kau lolutk el kirel a chedaol ruoll me a telbiil.Alsekum e ngar er ngii a medechel el meklou a belkul ruoll el kirel kedmekill er a klengar kau, e bol blak a rengum el kudmeklau el kirel. E sola kired el kudmeklii a teletael el bo de kiei el oltirakl a telbiieled, el mui el ousbech er sel sengk er a sakrament. Betok er kid a dirkak desal mengodech lokiu a klisiich el omekbeches ele kid el diak desal ngara omengull el kirel tia el chedaol ruoll.
Mo dekiar a ebangkelio me a Ikelesia. A moktek er kid sel ngara ebangkelio, e a Ikelesia a mo klou el klengeltengat, e diak el uai a le kekerei el klengeltengat, er a klengar kid. Me sel de mei er a bek el miting el kldmokl “losiik a llomes, el lokiu omesuub me a klaumerang” (mesa D&C 88:118), ea Chedaol Reng a mo olisechakl er kid. Alsekum e ke de kuk di me milil, e ke de mo ngara klengit el reng. A President Spencer W. Kimball a mle ta loker ngii, “Ke mekerang sel obetik er kau el ngara chelsel a dolngellokl er ngii el miting er a sakrament?” A nger ngii a: “Ng diak kudengei. Ng dirkak a tal kngar ngii”(mildung er a Gene R. Cook, er a Gerry Avant, “Learning Gospel Is Lifetime Pursuit,” Church News, Mar. 24, 1990, 10).

Chelsel a klengar kid eng kired losiik er sel ngii a dilubech ruriul er a Rubak er a lemei loldingel er a rechad er a Beches el Beluulechad e le kedmkelii a Ikelesia er Ngii. A chedaol llechukl a kmo: “Me a ta er a klebesei e tir [tirkel rultirakl er Ngii] a mlo er a delongelir a rokui el chad er a Nephi, e ulisechakl er a ungil chais er a Kristo el mo er a rokui el chad el mla er tia el beluu; me te ulebult el mo er a Rubak, e mlo modak er a ikelesia er a Kristo, me a rechad er sel telcheroll a mlo ngeltengat”(3 Nephi 28:23).

A Rubak a soal a rechedal a Ikelesia er Ngii a bol mui el obult el mo er a ebangkelio er Ngii. Tiaikid a di chimo el meral rael el kirel a selbechakl el tekoi er a reng er chelechang me a deureng er a ulebongel. El ngara ngklel a Jesus Kristo, amen.