Mo Chuarm
Mla er a Elder Dallin H. Oaks
Er a Chelechad er a Teruich me a Terung el Apostol
A klengar er kid er a omesiou me a mo chuarm a kot el bedochel el olchotel a blak el reng el mo mesiou er a Mastang me a rebebil.
Se el meringel el tngakireng er a Jesus Kristo a okedongall el “kot el ngar er bab el ringel er a uchelel a beluulechad el mo er a diak a ulebengelel.”1 Tiaikid el ringel a ngii a moktek er a klemechir a rokui el profet. Ng ulemuchel er a uchelel el okiu a omelenget er a charm el oltirakl a llach er a Moses. A profet a millekoi el kmo a klou el belkul tia el omelenget a “melutk el kirel a klou e ulebongel el omelenget [er a] … Ngelekel a Dios, oi, ng diak a ulebengelel el mo cherechar”(Alma 34:14). A Jesus Kristo a mlo chuarm er a diak el sebeched el smodii el ringel el Ngii a ml uchul a tengetengel a rokui el kngterir a rechad. Tiaikid el ringel a odersii a ngarbab el klungiaol—klikiid el diak a kngtil Ngalek—el kirel a kot el ngarbab el klengit—el kngtil a beluulechad el rokir. Chelsel a tekingel a Eliza R. Snow, e ng kmo:
A mekreos el Rsechel el mlechubel;
Me a klengar ngii a luldersii,
El diak a kngtil e mlo chuarm el kirel a klengit,
El mlo olsobel er a beluulechad.2
Tiaikid el ringel—el Tngakireng er a Jesus Kristo—a moktek er a chelsel a uldasu el kirel a diak a ulebengelel klengar.
Tia el diak a smodii el ringel el blo er ngii a Jesus Kristo a mlo ulebongel er a omelenget er a rasech, e ng di ng dimlak el seldii sel klou el ultutelel a mo chuarm er a chelsel a ebangkelio. A Osobel a melemolem el mengerechir kid el mo chuarm, e ng di sel Ngii a longerechir ngii er kid a mo “a mo melenget el mo er [Ngii] a ouchel a reng er a kngtid e mo ngariou a rengud” (3 Nephi 9:20). Ngii a dirrek el mla kmu er kid me bo dekaubeltik el reng e mesiou er a tang me a tang—el uaia, di olchotel a telkib er a ringel el Ngii a mlo er ngii el odars a sesei er a temed e mo diak di dolatk a soad. Chelsel a ta el chelitakl, e ng kmo, “A mo chuarm a meskid a klengeltengat er a babeluades.”3
Ak mo mesaod el kirel a ringel er tia el klengar el Osobel a mengerechir er kid. Tia diak el uldimukl a morimel el mo chuarm malechub el omerelled el okiu sel mo ungil er kid ng bai teletael er a mo chuarm el omesiou (mesa 2 Nephi 26:29).
I.
A Rekeristiano a ngar er ngii a reksi er tir el mlo chuarm, luldimukl er a ngarbab el ringel. Se er a uchelel a taem er a Klekeristiano, ea rechad er a Rome a ulemekeuad er a rebetok el chad el klaumerang er tir er a Jesus Kristo a uchul. Uriul, er a bocha le betok a kakerous el klechelid er a Rekeristiano, ea rebebil er a chelechad a uldechelakl e dirrek el ulemekeuad er a rebebil. A kodellir a rebebil er a Rekeristiano a ta er a kot el meringel el kodall er a chelsel a klaumerang er as Rekeristiano.
Betok el Keristiano a mla kongei el mo chuarm el ultuil er sel klaumerang er tir er a Kristo me a blak el reng el mo mesiou er Ngii. A rebebil a mla oterkeklii a klengar tir el rokir el mo mesiou er a Mastang. Tirkal chetengakl el chad a uldimukl er tir tirke el ngara chelechad er a Ikelesia er a Katolik me tirke el mla odersii a klengar tir el misionari er a Rekeristiano er a klechelid er a Berodestant. A okesiu er tir a meringel e melisiich a reng, e ng di oumesingd er tirke el oumerang er a Kristo a diak el sal odersii a rokir el klengar tir el mo ngara omesiou el kirel a di tekoi er a klechelid.
II.
Oumesingd el tirkel loltirakl er a Kristo, ea omelenget el dorrul aike el ngii a mekedmokl er a bek el sils er a chelsel a di klechad er kid. Chelsel tiaikid el teletael e ng diak a ngodech el chelechad el kudengelii el uaia Ruriul-klebesei el Santo el meruul a betok el teletael er a omelenget. A omelenget el tir me a—omelenget er kemiu, a rodam me a rodos—a ngodech er sel ngii a teletael er a beluulechad el osiik er sel di mo ungil tir.
A kot el okesiu el kusbech er ngii a tirke el uchelir a re Mormons. A klemengetel a taem el tenget a klengar tir, deleuill er a telungalek, blai, a dodai er a mla moluut el ebangkelio. A Sarah Rich a milngedecheduch el kirel sel blak el reng er tirka el uchelel a ikelesia er a losaod el kirel a bechil er a, Charles, el mlokedong el mo er a mission: “Tia meral mle meringel el taem er ngak me a dirrek el bechik; e ng di a okedong el mle er ngii a uchul e a ki mlo chacheroid el telkib el taem el medengei el kmo a ki ultirakl er a soal a Rubak, ea ki mlo medengei el kmo ng kiram el mechei aike el soal a rengmam e mo olngeseu el mengedmokl er tia el ureor… el olngeseu el meleketek er a Rengedel a Dios er a beluulechad.”4
Chelechal sils e se el bleketakl el klisichel a Ikelesia er a Jesus Kirsto er a Uriul-klebesei el Santo aike el diak el mochur el omesiou me a omelenget er a rechedal. A uchei er a ongeru el oterkeklel a chimo er a templo er kid, e a oungerachel er a ta er a klechelid a uleker er a President Gordon B. Hinckley el kmo ngera uchul me ng diak a ko er a kerus, el ngii a kot el olengchelel a klaumerang er a Rekeristiano. A President Hinckley a ulenger el kmo a olengchelel a Klekeristiano er a klechelid er kemam a “klengar er a rechedemam.”5 Ng klemerang, a omesiou me a omelenget er a klengar kid a kot el ungil olchotel a blak el reng er kid el mo mesiou er a Mastang me a rebebil er a rechad.
III.
Kid a diak a resemmong el olisechakl malechub el udeudel er a chelsel a Ikelesia er a Jesus Kristo er a Uriul-klebesei el Santo. Seikid a uchul, ea rechad el mokedong el mo omekrael e mesiou er a rechedal a ikelesia a kaingeseu er a berraod er a chelsel aike el betook el mitelengel a Ikelesia, prokuram, me a omeruul. Tia mekedmokl er a chelsel a teruich me a eua el telael el cheldebechel er a rechad er a di chelsel a Beluu er a Merikel me a Canada. Meng klemerang, el kuk diak desal ngodech er a ulengeseuid el mesiou el sensei me a roungerachel er a rechedal a ikelesia. E ng di a klungel a taem el odars a rechedal a ikelesia el olisechakl e olngeseu er a tang me a tang a kmal klou. Se el blak el reng er kid el olngeseu er a dersta el telungalek el merael el oldingel er tir er a bek el buil me a redil el m oldingel er a rodos el ngara Relief Society er a bek el buil a okesiul tiang. Ng diak a dodengelii el chelechad el ngara beluulechad el mo mekesiur tiang.
Se el dodengelii el rokui el teletael er a omesiou me a omelenget er a Ruriul-klebesei el Santo a ureor er a misionari. Chelechal taem e te betok er a okeim el telael el ngeasek el sechal me a redil me a betok er a eim el telael el meklou el sechal me a redil. Te odersii a tal rak me a tedobech el mo eru el rak er a klengar tir el olisechakl er a ebangkelio er a Jesus Kristo e olngeseu er a rechad er a chelsel a kmeed el dart me a okolem me a eim el beluu er a beluulechad. A urerir a blechoel bol charm er ngii, luldimukl aike el rak el tir odars el kirel a urerel a Rubak me a ringel el di tir el osiik a udoud el kirel omesiungir.
Tirke el ngara rekeblirir—el chedam me a rechedil me a rechedal a telungalek—a dirrek el mo ngara ringel el oldurokl er a remisionari el mo mesiou. A okesiul tiang, e a ngeasek el buik er a Brazil a ngiluu okedong el mo er a mision er a taem el oureor el mesiou er a delal me a rebebil er ngii ruriul er a lemad a demal. A General Authority a silodii tia el mitelengel a telungalek el mlo dobedebek a osischeklel a mla mad el chedam el kmo ng kirir el blechoel kldmokl el mo mesiou er a Rubak. Ngika el ngeasek el buik a kilengei er a okedong, ea teruich me a elolem a rekil el ochellel a mlo oungerachel el oureor e mesiou er a telungalek.6 Betok er kid a medengei a lmuut el bebil er a okesiu el kirel a kengei el mo chuarm e mo er a mision malechub e kede olngeseu er a remisionari. Ng diak ngodech el dodengelii el teletael er a omesiou el ua tiang er a chelsel a ngii dil chelechad er a beluulechad.
A rechad a blechoel loker kid, “Ko mekera omongesuseu er a rengeasek er kemiu me a remeklou el chedal a ikelesia el mo mechei a skulir me a retirement er tir e mo ngara omesiou er tiaikid el teletael?” Ak mla rongesterir a rebetok el kmo: “Sel kulatk aike el riruul a Osobel el mei er ngak—sel klechubechub er Ngii el mlo er a ringel el kirel a kngtik e mlo mesisiich er a kodall me bol sebechek el muut el mo ngar—e a kumelchesiu el techellek el mo odersii a telkib el ringel el mo ngara omesiou el mor Ngii. Ng soak el mo ouchais el kirel a klemedengei el Ngii a mla meskak.” Ke de mekerang e mengesuseu er tirka el loltirakl er a Kristo el mo mesiou? Ng uaia tekingel a profet el kmo, “Aki [kmal] di olengit er tir.”7
A bebil er a ringel el ngii a rdechel a omesiou er a misionari aike el ringel el tirke el kongei e oltirakl osischeklir a remisionari e mo chedal a Ikelesia. Tirke el betok el obult, aikaikid el ringel a kmal meklou a belkul, luldimukl er ngii a bol cheroid er a resechelirir me a deleuill er a telungalek.
Betok el rak er a memong er tia el klou el ongdibel e kede rirngesii a ngeasek el chad el miltik er a mla moluut el ebangkelio er a taem el le ngara skuul er a Beluu er a Merikel. Ngika el chad er a bocha le temel muut el mo er a belual, e a President Gordon B. Hinckley a uleker ngii el kmo ngera mo duubech alsekum e ngelmuut el mo er a belual el mla obult el mo Keristiano. “A rechad er a blik a mo kesib a rengrir,” a mle nger ngika el chad. “Te locha mo odikak el omdasu er ngak el uaia blak mad. E a mo klechad er ngak er a ta er a klebesei, a ikel rokui el techall a mo mechesimer el kirek.”
“Ke kongei el mo chuarm el kirel a ebangkelio?” A President Hinckley a uleker.
Ng longelang ngika el chad e dula el kmo, “Ng merang, a dang diak?” A bocha lodengei, e ng dula el kmo, “Ngera lmuut el klou a belkul?”8 Tiaikid a reng er a ringel er a chelsir a rebetok el beches el chedal a ikelesia.
A bebil er a okesiul omesiou me a ringel a de betik er a klengar er tirke el tir a blak a rengrir el oureor er a chelesl aika el templo er kid. A ureor er a chelsel a templo a kmal klou a belkul el mo er a Ruriul-klebesei el Santo, e ng di a klou el belkul tia el ringel a kirel bo lungil medengelii a rokui el Keristiano. A Ruriul-klebesei el Santo a diak a teletael er a omesiou loruul er a chelsel a blil a nglunguuch, e ng di ng kired el mo medengei e mengull aike el omesiou er tirke el Keristiano el klechelid er tir a rulterir el mo tonget a klengar tir el kirel a omeruul er a kuk klechelid er tir.
Ta el rak er a memong er a chelsel tia el ongdibel, e a President Thomas S. Monson a ulechais el kirel a ringel er a chelsel ureor er a templo. A mesisiich a klaumerang er ngii el chedam er a ta er a iuns er a Taiheio a mle meringel el oureor el elolem el buil er a cheroid el basio el mengereker a klebech a iidisel el udoud me bol sebechel nguu a bechil me a reteruich el ngelekir me bol moak el telungalek el mo er a ulebongel er a chelsel a Templo er a New Zealand. A President Monson a millekoi el kmo, “Tirke el medengei aike el diak a ulebengelel klengeltengat el mengai er a templo a medengei el kmo ng diak a ringel el kmal mesisiich, malechub el meringel el char, malechub el meringel el cheliseksikd el kirel aike el klengeltengat el mo mengai.”9
Ng dmeu a renguk el kirel aika el klebokel el okesiu er a beltik el reng er a Rekeristiano, omesiou, me a ringel el blak ues er a Ruriul-klebesei el Santo. A kumes er kemiu el meruul a ngercheliu er a Ikelesia, el ngara klou el ringel er a taem me a udoud me a ikel ngarngii er kemiu. Ng di kemiu el harau a mission er kemiu. Ko mousbech a duch er kemiu el olngeseu er a rebebil. Ko molngeseu er a remechebuul lokiu a klisichiu me a ngeso er a Ikelesia er a tekoi er a chelebuul.10 Aika el rokui a mla mocholt lokiu a omesuub er a beluulechad el mla oterkeklii el kmo tirke el mesisiich el chedal a Ikelesia er a Jesus Kristo er a Uriul-klebesei el Santo a “olngeseu lolab aike el ngar er ngii er tir er a chelsir a rokui el chad er a Merikel e kmal muut el bekerurau er a taem me a udoud el ngarbab er tirkel el [lluich el basent] el chedal a chelid el chad er a Beluu er a Merikel.”11
Aikaikid el okesiu a smisichid el rokui. Aika mekletkid er a osischeklel Osobel:
“A le ngarngii a chad el mei er ngak, e lak lolatk el ngii. …
“Ele ngike el di ngii lolsobel er a klengar ngii a mo choridii; e ngike el odersii a klengar ngii el kirek a mo metik er ngii”(Mateus 16:24–25).
IV.
Se el locha desal medengelii e klou a belkul el okesiul omesiou me a ringel a mekedmokl er a telungalek er kid. A rechedil a odersii a klengar tir el omechell e omekeroul er a rengalek. A rechedam a odersii a klengar tir el mesiou er a rebecherir me a rengalek. Aike el ringel el mekedmokl el kirel omesiou er a telungalek er kid a kmal betok el diak el mochur e kmal ungil dodengei me ng diak a ultutelel dosaod.
Ak dirrek el mesterir a Ruriul-klebesei el Santo el merodel er a rengalek, luldimukl er tirke el sechudel, e osiik a klungiaol el mo er a rengalek el ngara eungel a amt el mesterir a klungiaol me a techall el ngii a dimlak el ngai er a uchelel. Ko molngeseu er a rechedal a telungalek me a retonari el tir olab a secherir er a diil, secher er a uldasu me a bedengir, me a secherel a cheleuodel. A Rubak a dirrek el medengei, e Ngii a mla kmu er a reprofet er Ngii me louchais el kmo “sel bom charm el kirel a tang me a tang me a rengelekiu, e a Rubak a mo omekngeltengat er kemiu.”12
A kuumerang el kmo a Ruriul-klebesei el Santo el tir a mesiou e ngara ringel me a omengull el mo er a Osobel el oltirakl er Ngii a oltirakl aike el diak a ulebengelel llach el muut el ngaruchei er a ngii dil cheldebechel er a rechad. A Ruriul-klebesei el Santo a omes omesiungir er a temir me a ikel ngarngii er tir el uaia le telengtengil a skuul le ngarngii el kirel a diak a ulebengelel klengar. Tiaikid a klemerang el mlocholt er a chelsel a Lectures on Faith, el olisechakl el kmo “a klechelid a diak el longerechir omelenget er a rokui el tekoi el diak a klebech el klisiich el mekdebechii a klaumerang el kirel a diak a ulebengelel klengar. …Ng [okiu] tiaikid el ringel, el di tiaikid, e a Dios a mla chemedolii a chad el kirel mo ngara deurreng er a diak a ulebengelel klengar.”13
Meng di uaia tngakireng er a Jesus Kristo el ngii a moktek er a chelsel sel uldasu er a diak a ulebengelel klengar, e kid el oltirakl er a Kristo a kired el mo chuarm el kirel tia el uldasu el kired.
Ak medengei el kmo a Jesus Kristo a Di Chimol Sechal Ngelekel a Diak a Ulebengelel Chedam. Ak medengei el okiu sel tngakireng er Ngii, e kede mo mekiis er a kodall e nguu a techall el kirel a diak a ulebengelel klengar. Ngii a Rubak er kid, Osobeled, e Sebechekled, e a kuuchais el Kirel el ngara ngklel a Jesus Kristo, amen.