Faatuatua, Lototoa, Faamalieina: O Se Feau mo Matua e Toatasi Na o Ia
Saunia e Elder David S. Baxter
O Le Fitugafulu
O loo e tauivi e tausi lau fanau i le amiotonu ma le upumoni, ma le iloaina e le mafai ona e suia le taimi ua tuanai, ae e mafai ona e faafuaitinoina le lumanai.
O la’u feau e mo mātua e toatasi na o ia, i totonu o le Ekalesia, o le toatele lava o tina e leai ni toalua—outou na tamaitai faatuatua, o ē ona o tulaga eseese o le olaga, ua outou tausia ai na o outou se fanau ma faatautaia se aiga na o outou. Atonu ua maliu lau tane pe ua tete’a foi. Atonu ua e feagai nei ma lu’i o le tulaga faamātua ua leai se toalua, o se taunuuga o le le tausia o le tulafono o le ola mama, a o lea ua e ola nei i mataupu o le talalelei, ua toe suia ai lou olaga. Ia faamanuia oe mo le aloese mai ituaiga o mafutaga o le a taofia ai oe mai le avea ma soo e amio mama. O se tau e sili lena ona maualuga e totogi.
Atonu e i ai ni taimi e te fesili ai, aisea ua tupu ai ia te au? ae e ala mai i faigata o le olaga tatou te ola aga’i atu ai i le faaleatua a o faafuaitinoina a tatou amio e ala i mafatiaga faigata, ma a o tutupu mea faigata o le olaga aua e le faalavelave le Atua i le faitalia a le tagata. E pei ona saunoa Elder Neal A. Maxwell, e le mafai ona tatou faia uma numera pe faaopoopo uma aua “e le o ia i tatou ia fuainumera uma.”1
Po o a lava o outou tulaga po o mafuaaga o na mea, e maeu lava lo outou lelei. O lea aso ma lea aso, e te feagai ai ma tauiviga o le olaga, o le faia o galuega sa tatau ona toalua e faia ae ua tele lava ona e faia na o oe. E tatau ona avea oe o se tamā faapea foi ma se tina. Ua faatautaia e oe lava ia sou aiga, leoleo lou aiga, o nisi taimi e te tauivi ai e tau faafe’a’ua’uta’i le faasoa, ae o se vavega lava lou mauaina o mea ma le tomai e auauna ai i le Ekalesia i ni auala maoae. E te faafaileleina lau fanau. E te tagi ma tatalo faatasi ma i latou. E te manao i le mea silisili mo i latou ae o po uma lava atonu o le mea silisili ia te oe, e le lava lea.
E ui ina ou tau musu ne’i sopo lo’u faapatino ia te a’u lava, ae o a’u o se fua o lena ituaiga o aiga. O le tele o lo’u olaga faatamaitiiti ma lo’u talavou, sa na o lo’u tina sa tausia i matou i ni tulaga mativa. Sa matuai faasoasoa ma le faaeteete ia tupe. Sa feagai o ia ma se loto mafatia, e matua manaomia i nisi taimi le lagolago ma se mafutaga faalesoa. Peitai, e ui i lea, sa i ai se uiga tamalii i lo’u tina, o se punavai tele o le naunautaiga ma o se uiga mausali o ona augatuaa Sikotilani.
Ae faafetai, o tausaga mulimuli ane o lona soifua, sa sili atu ona faamanuiaina nai lo le amataga. Sa faaipoipo o ia i se tagata faatoa liliu mai, o se ua maliu lona toalua; sa faamauina i la’ua i le Malumalu o Lonetona Egelani ma sa galulue mo sina taimi iina o ni faisauniga i le malumalu. Sa toeitiiti atoa le luasefululima tausaga o la mafuta—fiafia, faamalieina, ma faataunuuina o la valaauga seia oo ina maliliu.
E toatele outou na tamaitai lelei i le Ekalesia i le salafa o le lalolagi, o e o loo feagai ma tulaga faapena ma o loo faaalia foi lena lava agaga e tasi i lea tausaga ma lea tausaga.
E le o le mea tonu lea sa e faamoemoe i ai pe fuafuaina, pe sa e tatalo ai ma manatu i ai ina ua e amata i tausaga ua mavae. O lau faigamalaga o le olaga sa i ai patupatu, o auala ‘alo, o femilosa’iga, ma feliua’iga, o le tala lava o le taunuuga o le olaga i se lalolagi pa’ū, o se nofoaga e faamaonia ai ma tofotofo ai.
O le taimi nei, o loo e taumafai e tausia lau fanau i le amiotonu ma le upumoni, ma le iloaina e le mafai ona e suia le taimi ua sola, ae e mafai ona e faafuaitinoina le lumanai. I luga o le ala o le a e maua ai faamanuiaga o ni taui, o nisi lava e le vave ona tino mai.
Faatasi ai ma le fesoasoani a le Atua, e le tatau ona e atuatuvale mo le lumanai. O le a ola a’e lau fanau ma faaamuia atu ia te oe, ma o mea taitasi o le anoanoai o mea o le a latou faataunuuina, o le a avea o se saafiafiga mo oe.
Faamolemole aua lava nei e manatu o loo e i ai i se fogafale lona lua, o se soāvaega o le faitau aofai o le Ekalesia, faapea e itiiti se aia tatau mo faamanuiaga a le Alii nai lo isi. I le malo o le Atua, e leai ni tagatanuu e i se faavasegaga lona lua.
Matou te faamoemoe a e auai i sauniga faale-Ekalesia ma e vaaia ni aiga e foliga mai ua atoatoa ma fiafia, pe faalogo foi i se tasi o lauga e uiga i atoaga o aiga, o le a e lagonaina le fiafia i le avea ai o se vaega o se ekalesia o loo taulai atu i aiga, ma aoao atu i la latou matafaioi tupito i le fuafuaga a le Tama Faalelagi mo le fiafia o Ana fanau; ma i le totonugalemu o mala faalelalolagi ma le faaleagaina o amioga mama, o loo i ai a tatou aoaoga faavae, pule, sauniga, ma feagaiga o mea silisili ia mo le lalolagi, e aofia ai mo le fiafia i le lumanai o au fanau ma aiga o le a latou foafoaina.
I le sauniga a le Aualofa ia Setema 2006, na faamatala ai e Peresitene Gordon B. Hinckley se aafiaga na faasoa atu e se tina nofo toatasi ua tetea ma le toalua e toafitu le fanau e amata mai i le 7 tausaga e oo i le 16 i le taimi lena. Na alu o ia i le isi ituala e ave se mea ma sona tuaoi. Fai mai a ia:
“Ina ua ou faliu e toe savali atu i le fale, sa ou vaaia moli o lo’u fale o ola mai. Sa ou manatua mea sa fai mai ai la’u fanau a o ou savali ese mai le faitotoa i nai minute ua mavae. Sa fai mai: ‘Mama, o le a le tatou meaai nanei’ ‘E mafai ona e aveina au i le faletusi’ ‘E fia maua ni a’u pepa tusiata nanei.’ Sa ou vaivai ma lē lava, ae sa ou tilotilo atu i lena fale ma vaaia le ola o moli i potu taitasi. Sa ou mafaufau i na tamaiti sa faatalitali mai i le fale mo au, ma mea sa latou manaomia. Sa atili ai ona mamafa la’u avega nai lo le mea sa ou gafataulimaina.
“Ou te manatua lo’u tilotilo a’e i le lagi a o maligi o’u loimata, ma faapea atu, ‘Lo’u Tama e, ua le mafai ona ou faia i le po nei. Ua ou matua le lava lava. Ua le mafai ona ou pupula i ai. E le mafai ona ou alu i le fale ma tausia na o a’u na fanau. Pe mafai lava ou alu atu ia te Oe ta te nonofo ma Oe tau lava o se po se tasi? …’
“Ou te lei faalogo moni i upu o le tali, ae sa ou lagonaina i lo’u mafaufau. O le tali o le: ‘Leai, la’u pele, e le mafai ona e sau nei. … Ae e mafai ona ou alu atu ia te oe.’”2
Faafetai atu, tuafafine, mo mea uma o loo outou faia e tausia ai o outou aiga ma faatumauina ai se aiga e alofagia, lea e i ai le agalelei, filemu, ma le avanoa.
E ui o le tele o taimi e lagonaina ai le tuulafoaiina, ae o le mea moni lava e le tuua a’ia’i lava na o oe. A o e agai atu i luma ma le onosai ma i le faatuatua, o le a oulua faatasi pea ma le Atua; o le a faaee mai e le lagi ana faamanuiaga manaomia.
O le a suia lau vaaiga ma lau tilotilo i le olaga pe a e tepa a’e i le lagi, ae le o le lotovaivai ma faanoanoa.
O le toatele o outou ua iloaina le upumoni maoae e liua ai, pe a e ola e si’i a’e avega a isi, o le a māmā au lava avega. E ui lava atonu e le suia tulaga, ae ua suia ou uiga faaalia. Ua mafai ona e feagai ma ou lava tofotofoga ma e matua taliaina, ua i ai se loto malamalama, ma se agaga faafetai loloto i mea ua e maua, nai lo le faananau i mea e te le o maua.
Ua e iloaina foi a tatou faamafanafana atu i e o faanoanoa, e faamafanafanaina foi i tatou ma faamauoaina; e moni lava o le a “taumasuasua” la tatou ipu (Salamo 23:5).
O le ola amiotonu, o le a olioli ai oe ma lau fanau i faamanuiaga o le avea o se vaega o se aiga atoa, e faavavau.
Le au paia e ma taitai, pe i ai ea se isi mea e mafai ona outou faia e lagolagoina ai aiga e na o le taitoatasi matua e aunoa ma le faamasinosinoina pe faitioina foi faalilolilo po o luma o tagata? Pe mafai ona outou fautuaina talavou o nei aiga, aemaise ia tuuina atu i alii talavou ni faataitaiga o mea e faia e alii lelei ma pe faapefea foi ona ola ni alii lelei? Ona o le leai o ni tamā, pe o outou tuuina atu ea ni faataitaiga e aoga ona faataitai i ai?
E moni e i ai ni aiga e na o le tamā se matua o i ai. Uso e, matou te tatalo foi mo oe ma avatu foi le faamalo ia te oe. E faatatau foi lenei feau mo oe.
Matua nofo toatasi, ou te molimau atu a outou faia le mea sili i lu’itau faaletagata e sili ona faigata, o le a fiafia mai le lagi ia te outou. O le mea moni, e le tuulafoaiina lava outou. Tuu atu i le mana togiola agaalofa o Keriso e faamalamalamaina lou olaga i le taimi nei, ma faatumuina oe i le faamoemoe o le folafolaga e faavavau. Ia e lototele. Ia e faatuatua ma ia i ai le faamoemoe. Mafaufau i le taimi nei ma le lototoa ma vaavaai atu i le lumanai ma le mautinoa. I le suafa o Iesu Keriso, amene.