O Mauga e A’ea
Saunia e Peresitene Henry B. Eyring
Fesoasoani Muamua i le Au Peresitene Sili
A tatou maua le faatuatua ia Iesu Keriso, o taimi sili ona faigata faapea foi ma taimi sili ona faigofie i le olaga e mafai ona avea ma se faamanuiaga.
Sa ou faalogo ia Peresitene Spencer W. Kimball, i se sauniga o se konafesi, o talosaga ia tuu atu e le Atua ia te ia ni mauga e a’ea. Sa ia saunoa: “E tele luitau tetele o loo i o tatou luma, o avanoa tetele e ao ona faafetaia’ia. Ou te taliaina lena faamoemoe ma manatu ai e fai atu i le Alii, ma le lotomaulalo, ‘Aumai ia te au lena mauga,’ aumai ia te au na luitau.”1
Sa musuia lo’u loto, i le iloa, ma sa ou iloaina, nisi o luitau ma mafatiaga sa feagai ma ia. Sa ou lagonaina se naunautaiga e avea atili e faapei o ia, o se auauna lototoa a le Atua. E lei leva talu mai lena taimi, sa ou tatalo ai i se tasi po mo se su’ega e tofotofo ai lo’u lototoa. E mafai ona ou manatuaina lelei. I le afiafi sa ou tootuli ai i lo’u potumoe ma se faatuatua sa foliga e toetoe a faatumulia ai lo’u loto toe a pa.
I totonu o se aso pe lua, sa tali mai ai la’u tatalo. O le tofotofoga aupito faigata o lo’u olaga sa faateia ma faalotomaualaloina ai au. Na aumaia ai ia te au se lesona e tafalua. Muamua, sa ou maua se faamaoniga manino sa faafofogaina e le Atua la’u tatalo o le faatuatua ma tali mai i ai. Ae o le lona lua, sa ou amataina se lesona, ma o loo ou aoaoina pea lava i le taimi nei e uiga i le mafuaaga na ou lagonaina ai lena mautinoa i lena po e faapea, e mafai ona oo mai se faamanuiaga sili mai mafatiaga, o le a sili atu lona taui nai lo se isi tau.
O faigata na ou oo i ai i lena aso ua leva, ua foliga laitiitī mai nei pe a faatusatusa i mea na oo mai talu mai lena aso—ia te au ma i latou ou te alofa i ai. O le toatele o outou o loo ui atu i tofotofoga faaletino, faalemafaufau, ma faalelagona lea e ono mafua ai ona e tagi atu e faapei ona faia e se tasi o auauna maoae ma le faamaoni a le Atua ou te iloa lelei. Sa faalogo lana tausisoifua o ia valaau mai i ona tofaga na ia lagona ai le tiga, “Sa ou taumafai i lo’u olaga atoa ia ou lelei, ae aisea ua tupu ai lenei mea ia te au?”
Ua outou silafia le tali a le Alii i lena fesili mo le Perofeta o Iosefa Samita i lona pa’usisi i le falepuipui:
“Ma afai e lafo oe i totonu o le lua, po o lima o e fasioti tagata, ma tuu mai le faaiuga o le oti i ou luga; afai e lafo oe i le loloto; afai e taupulepule galulolo o le sami e faasaga mai ia te oe; afai e avea matagi malolosi ma ou fili; afai e faapotopoto e le lagi le pogisa, ma aufaatasi elemene uma e pupuni le ala; ma i luga o mea uma, afai e tatala faamaga lautele mai e auvae lava o seoli le gutu ia te oe, ia e iloa, lo’u atalii e, o nei mea uma e te maua ai le poto masani, ma o le a avea mo ou lelei.
“Na afio ifo le Atalii o le Tagata i lalo o na mea uma. Ua sili atu ea oe ia te ia?
“O lea, piimau i lou ala, ma o le a tumau le perisitua ia te oe; ona ua faatapulaaina o latou tuaoi, e le mafai ona latou sopo mai. Ua iloa ou aso, ma o ou tausaga o le a le faitauina itiiti mai; o lea, aua le mata’u i mea e mafai ona fai e tagata, aua o le a faatasi le Atua ma oe e faavavau ma faavavau lava.”2
E foliga mai ia te au e leai se tali e sili atu i le fesili pe aisea e oo mai ai tofotofoga, ma pe o le a le mea tatou te fai nai lo upu a le Alii lava Ia, o lē na uia tofotofoga uma mo i tatou, e sili atu ona matuia nai lo le mea tatou te mafaufauina.
Tou te manatua Ana upu ina ua Ia apoapoai mai e ao ia i tatou ona salamo, e ala i le faatuatua ia te Ia:
“O lea Ou te poloai atu ai ia te oe ia e salamo—salamo, ne’i Ou taia oe i le tootoo o lo’u gutu, ma i lo’u toasa, ma i lo’u ita, ma tiga tele ai ou mafatiaga—o le a le tetele o le tiga e te le iloa, o le a le malosi e te le iloa, ioe, o le a le faigata ona onosaia e te le iloa.
“Aua faauta, o A’u o le Atua, na mafatia i nei mea mo tagata uma, ina ia latou le mafatia pe afai latou te salamo;
“Ae afai latou te le salamo, o le a latou mafatia e pei lava o A’u;
“O le mafatia lea na oo ai ia te a’u lava, o le Atua lava lea, o le ua silisili i tagata uma, le gatete ona o le tiga, ma tafetoto ai i pu afu uma, ma mafatia ai i le tino atoa ma le agaga—ma manao ai ia Ou le inuina le ipu oona, ma ma’e’e’e—
“E ui i lea, ia i ai i le Tama le viiga, ma sa Ou inu ma faauma ai a’u tapenapenaga mo le fanauga a tagata”3
Ua ia te oe ma a’u le faatuatua o le ala e tulai a’e ai ma manumalo i tofotofoga o le talitonu lea o loo i ai se “pulupasama i Kiliata”4 ma ua uma ona folafola mai e le Alii, “Ou te le … tuulafoai lava ia te oe.”5 O le mea lena na aoao mai e Peresitene Thomas S. Monson e fesoasoani ai ia i tatou ma i latou tatou te auauna i ai, i mea e foliga mai o ni tofotofoga e tuufua ma lofituina.6
Ae sa aoaoina foi ma le atamai i tatou e Peresitene Monson e faapea, o se faavae o le faatuatua i le tino moni mai o na folafolaga, e alu se taimi o fausia. Atonu ua e vaai i le manaomia o lena faavae, e pei ona ou vaaia, i tafatafa o le moega o se tasi ua sauni e togi le solo ia tumau ai e oo i le iuga. Afai e le avea le faavae o le faatuatua ma se vaega o lou loto, o le a solovī le mana e tumau ai.
O lo’u faamoemoega i le aso o le faamatala atu lea o le mea ua ou iloa i le ala e mafai ona tatou faataatia ai se faavae e le maluelue. Ou te faia ma le lotomaulalo tele ona o ni mafuaaga se lua. Muamua, o mea o le a ou fai atu ai e ono faalotovaivaia ai nisi o loo tauivi i le lotolotoi o se mafatiaga tele, ma ua manatu ua solovī lo latou faavae o le faatuatua. Ma le lona lua, ou te iloa o loo i ai ni tofotofoga e sili atu o i o’u luma a o lei oo mai le iuga o le olaga. O le mea lea, o le fautuaga ou te ofoina atu ia te outou, e lei oo ina faamaonia i lo’u lava olaga e ala i le tumau e oo i le iuga.
I le avea ai o se alii talavou, sa faigaluega i se konekarate i le fausiaina o fusi faavae ma faavae o fale fou. I le vevela o le taumafanafana, o se galuega faigata le saunia o le eleele mo taiala e sasaa i ai le sima mo le fusi faavae. Sa leai ni masini. Sa matou faaaogaina se piki ma se suo. O le fausiaina o faavae mausali mo fale, o se galuega faigata i na aso.
E manaomia ai foi le onosai. Ina ua uma ona sasaa le sima o le fusi faavae, sa matou faatalitali sei mago. Po o le a lo matou mananao e faagasolo le galuega, ae sa matou faatalitali foi ina ua uma ona sasaa le faavae a’o lei talaia taiala.
Sa sili foi ona faagaeetia loto i se tufuga fou le mea sa foliga mai o se faagasologa e le malie ma alu ai le taimi, e tuu ai ma le faaeteete u’amea i totonu o taiala e faamalosi ai le faavae ua mae’a.
I se auala foi faapena, e tatau ona saunia ma le faaeteete le eleele mo faavae o o tatou faatuatua ina ia tatalia ai afā o le a oo mai i olaga taitasi. O lena amataga mausali o se faavae o le faatuatua, o le amiosa’o o le tagata lava ia.
O lo tatou filifilia o le sa’o e le aunoa, i soo se taimi e tuu mai ai i o tatou luma se filifiliga, e fatuina ai le eleele mautu i lalo o lo tatou faatuatua. E mafai ona amata i le taimi o laitiiti talu ai o agaga uma lava ua fananau mai ma le meaalofa foaifua o le Agaga o Keriso. O lena Agaga e mafai ai ona tatou iloa pe a tatou faia le mea sa’o i luma o le Atua ma pe a tatou faia se mea sese i Lana silafaga.
O na filifiliga, e faitau selau i le tele o aso, e saunia ai le eleele mautu lea e fausia ai o tatou fale o le faatuatua. O le auivi uamea, lea e sasaa i ai le ‘anomea o lo tatou faatuatua o le talalelei lea a Iesu Keriso, faatasi ai ma ona feagaiga, sauniga, ma mataupu faavae.
O se tasi o ki i se faatuatua tumau, o le faamasino sa’o lea o le taimi e manaomia e maopo lelei ai. O le mafuaaga lena sa ou le poto ai e tatalo vave atu i lo’u olaga mo ni mauga maualuluga ou te a’ea ma ni tofotofoga sili atu.
E le otometi ona maopo pe mautu i sina taimi, ae e umi se taimi. O le faasolo ina matua e le tupu fua. O le auauna atu i le Atua ma isi i le loto atoa ma le agaga e liliuina le molimau o le upumoni e avea ma malosiaga faaleagaga e le matineia.
Nei, ou te fia fautuaina outou o loo i ai i le lotolotoi o tofotofoga faigata, o ē ua manatu atonu ua mou atu lo latou faatuatua ona o le faaatu i faigata. O le tofotofoga lava ia e mafai ona avea ma ou ala e faamalosia ai ma iu ai ina maua le faatuatua e le matineia. Sa ta’u mai e Moronae, le atalii o Mamona i le Tusi a Mamona, le ala e mafai ai ona oo mai lena faamanuiaga. Na ia aoao mai le upumoni faigofie ma le matagofie e faapea, o le faatinoina o sina mataua o le faatuatua e maua ai le avanoa e faatupuina ai e le Atua:
“Ma o lenei, o au, o Moronae, ou te fia tautala atu teisi e uiga i nei mea; ou te fia faaali atu i le lalolagi o le faatuatua o mea ia ua faamoemoe i ai ae ua le vaaia; o le mea lea, aua tou te masalosalo ona ua outou le vaaia, aua tou te le maua se molimau seia uma ona tofotofoina o lo outou faatuatua.
“Ona o le faatuatua na faaali mai ai e Keriso o ia lava i o tatou tama, ina ua uma ona toetu mai o ia mai le oti; ma sa ia le faaali mai o ia lava ia te i latou seia mavae ona latou faatuatua muamua ia te ia; o le mea lea, sa tatau ai ona i ai ni isi le faatuatua ia te ia, ona sa ia le faaalia atu o ia lava i le lalolagi.
“Ae ona o le faatuatua o tagata o lea na ia faaali mai ai o ia lava i le lalolagi, ma faamamaluina le suafa o le Tama, ma saunia se ala e mafai ai e isi ona tofusia i le meaalofa faalelagi, ina ia mafai ona latou faamoemoe mo mea ia latou te lei vaai i ai.
“O le mea lea, ia mafai ai foi ona outou maua o le faamoemoe, ma avea ma e e mauaina le meaalofa, pe afai e na o na outou faatuatua.”7
O lena iota o le faatuatua e sili ona taua ma lea e tatau ona e puipuia ma po o le a lava le ala e te faaaogaina ai, o le faatuatua i le Alii o Iesu Keriso. Sa aoao mai e Moronae le mana o lena faatuatua i le ala lea: “Ma pe sa i ai se taimi na faia ai e se tasi na vavega seia mavae ona latou faatuatua muamua; o le mea lea sa muamua ona latou talitonu i le Alo o le Atua.”8
Sa ma talanoa ma se fafine sa mauaina le vavega o le lava o le malosi e onosaia ai maliu na te lei mafaufauina, i se gafatia faigofie e fai faafia ai upu, “Ou te iloa o loo soifua lo’u Faaola.”9 O lena faatuatua ma na upu o le molimau, sa i ai pea iina i le puao na punitia ai, ae e le’i tafia ese ai manatua o lona laitiiti.
Sa ou ofo foi i le iloa o se tasi tamaitai sa faamagaloina se tagata sa faia se sese ia te ia mo ni tausaga. Sa ou ofo lava ma fesili atu ia te ia pe aisea ua ia filifili ai e faamagalo ma faagalo le tele naua o tausaga na sauaina ma agaleagaina ai o ia.
Sa ia fai mai lemu, “O se mea aupito sili ona faigata lea ua ou faia, ae sa na ona ou iloa lava e tatau ona ou faia.” O lona faatuatua faapea o le a faamagalo o ia e le Alii pe afai na te faamagalo atu i isi, na saunia ai o ia ma se lagona o le filemu ma le faamoemoe a o lata ina maliu i ni nai masina talu ona uma ona ia faamagalo i lona fili lē salamo.
Sa ia fesili mai ia te au, “Pe a ou oo atu i ai iina, o le a faapei le lagi?”
Ma sa ou fai atu, “Ou te iloa mai le mea lea faatoa ou vaai i ai i lou malosi e faatino le faatuatua ma faamagalo atu, o se toefoi atu ma le matagofie lena i le aiga o le a i ai mo oe.”
E i ai se isi a’u faamalosiauga ia i latou o loo tau mafaufau nei pe ua lava lo latou faatuatua ia Iesu Keriso e tumau lelei ai e oo i le iuga. Sa faamanuiaina au i lo’u iloaina o nisi o outou, o loo faafofoga mai nei, a o outou talavou, malolosi, ma sili atu ona faamanuiaina nai lo le toatele o i latou sa vagaia outou, ae sa outou filifili e fai le mea e finagalo le Faaola tou te faia. Mai o outou mau faamanuiaga, sa outou maua lava ni auala e fesoasoani ai ma tausia i latou semanu tou te le amanaiaina pe vaai maulalo i ai mai o outou tulaga i le olaga.
A oo mai tofotofoga faigata, o le a i ai iina le faatuatua e onosaia lelei ai, e fausia e pei ona e matauina nei ae atonu e le o le taimi na e faatino ai i le alofa mama o Keriso, o le auauna atu ma le faamagalo atu i isi e pei ona sa faia e le Faaola. Sa e fausia se faavae o le faatuatua mai le alofa atu e pei ona alofa mai le Faaola ma auauna atu ia te Ia. O lou faatuatua ia te Ia na taitai atu ai i faatinoga o le alofa mama lea o le a aumai ai le faamoemoe ia te oe.
E le o tuai lava ona faamalosia le faavae o le faatuatua. O loo i ai pea le taimi. Faatasi ai ma le faatuatua i le Faaola, e mafai ai ona e salamo ma aioi atu mo se faamagaloga. O loo i ai se tasi e mafai ona e faamagaloina. O loo i ai se tasi e mafai ona e faafetai atu i ai. O loo i ai se tagata e mafai ona e auauna atu i ai. E mafai ona e faia i soo se mea e tusa lava pe o le a le tuuatoatasi ma le tuulafoaiina atonu o e lagonaina.
E le mafai ona ou folafola atua se mutaaga i ou faigata i lenei olaga. E le mafai ona ou faamautinoa atu ia te oe o ou tofotofoga o le a foliga mai ua na o sina taimi itiiti. O se tasi o uiga o tofotofoga i le olaga e tai foliga mai latou te faatelegeseina le alu o le taimi ma e toetoe lava a tu.
O loo i ai ni mafuaaga mo lena mea. O le iloaina o na mafuaaga e le aumaia ai le tele o se mafanafana, ae latou te aumai ia te oe se lagona o le onosai. O na mafuaaga e o mai uma mai lenei mea moni e tasi: i Lo la alolofa atoatoa mo oe, ua finagalo ai le Tama Faalelagi ma le Faaola ia saunia oe e faatasi ma i Laua ma ola ai i aiga e faavavau. E na o i latou o e faamamaina atoatoa e ala i le Togiola a Iesu Keriso e mafai ona i ai iina.
Sa tauivi lou tina ma le kanesa mo le toeitiiti atoa le 10 tausaga. O togafitiga ma taotoga ma mulimuli ane ai faataotolia i lona moega, o nisi na o ona tofotofoga.
Ou te manatua le tala a lou tama a o ia vaavaai atu i lana toe manava, “Ua toe foi atu se teineitiiti i le aiga e malolo ai.”
O se tasi o failauga i lona falelauasiga o lona tuagane faaletulafono ma se uo o, Peresitene Spencer W. Kimball. O se tasi o mea sa ia faamamaluina, ou te manatua se mea faapenei: “Atonu o loo mafaufau nisi o outou ua mafatia Mildred mo se taimi umi ma le tele o tiga ona o se mea sa sese ona ia faia na manaomia ai ia tofotofoga.” Ona ia fai mai lea, “E leai, sa finagalo le Atua ia faaleleia atili o ia.” Sa ou manatuaina i lena taimi ma mafaufau, “Afai e manaomia e lena tamaitai lelei lena faaleleiga tele, o le a la se mea o i luma atu mo au?”
A tatou maua le faatuatua ia Iesu Keriso, o taimi sili ona faigata faapea foi ma taimi sili ona faigofie i le olaga e mafai ona avea ma se faamanuiaga. I tulaga uma lava, e mafai ona tatou filifili le mea sa’o i le taitaiga a le Agaga. Ua ia i tatou le talalelei a Iesu Keriso e faafuaitino ai ma taiala o tatou olaga pe a tatou filifili i ai. Ma faatasi ai ma perofeta o loo faaalia mai ia i tatou o tatou tulaga i le ata o le faaolataga e mafai ai ona tatou ola ma se faamoemoe atoatoa ma se lagona o le filemu. O le a tatou le manaomia ai lava ona tatou lagonaina le tuuatoatasi pe ua le alofaina e le auaunaga a le Alii, ona e le o tuua lava na o i tatou. E mafai ona tatou lagonaina le alofa o le Atua. Sa folafola mai e le Faaola ia agelu i lo tatou agavale ma lo tatou taumatau, e sapasapai i tatou i luga.10 Ma Na te tausia lava Lana upu i taimi uma.
Ou te molimau atu o loo soifua le Atua le Tama ma o Lona Alo Pele o lo tatou Togiola. Ua faamautinoa mai e le Agaga Paia ia upumoni i lenei konafesi ma o le a toe faamautu mai foi a o e saili atu i ai, ma faalogo, ma a o e suesueina mulimuli ane ia savali a auauna faamaonia a le Alii o loo i ai iinei. O Peresitene Thomas S. Monson o le perofeta a le Alii i le lalolagi atoa. O loo leoleo le Alii ia te outou. O loo soifua le Atua le Tama. O Lona Alo Pele, o Iesu Keriso, o lo tatou Togiola. E le muta Lona alofa. Ou te molimau atu ai i le suafa o Iesu Keriso, amene.