Ia Faafetaia le Atua

Saunia e Elder Russell M. Nelson

O Le Korama a Aposetolo e Toasefululua

E matuai sili atu le lelei o le a i ai pe afai e mafai ona manatunatu atili ia tagata uma i le tausiga ma le alofa o le Atua ma faailoa atu lena agaga faafetai ia te Ia.

Uso e ma tuafafine pele, matou te faafetai atu mo la outou fesoasoani lagolagosua ma lo outou tuuto. E faailoa atu lo matou alolofa ia te outou uma taitoatasi.

E le’i mamao atu, sa ma fiafia ai ma Sister Nelson i le matagofie o i’a o le moana i se koneteina laitiiti mo i’a. O i’a felanulanua’i ma e foliga eseese sa femasaua’i solo. Sa ou fesili atu i le tagata faigaluega sa latalata mai, “O ai e aumaia meaai mo nei i’a matagofie?”

Sa tali mai o ia, “o a’u.”

Ona ou fesili atu lea, “Pe ua latou faafetai atu ea ia te oe?”

Sa ia tali mai, “E leai!”

Sa ou mafaufau i nisi o tagata ou te iloa o e e faapena foi le le magafagafa i lo latou Foafoa ma lo latou “areto [moni] o le ola.”¹ Latou te ola i lea aso ma lea aso e aunoa ma se manatunatu i le Atua ma Lona agalelei ia i latou.

E matuai sili atu le lelei o le a i ai pe afai e mafai ona manatunatu atili ia tagata uma i le tausiga ma le alofa o le Atua ma faailoa atu lena agaga faafetai ia te Ia. Sa aoao mai Amona, “Ia tatou avatu le faafetai i [le Atua], ona ua faia e ia le amiotonu e faavavau.”² O le tele o lo tatou agaga faafetai o se fua lea o lo tatou alofa ia te Ia.

O le Atua o le Tama o o tatou agaga.³ Ua ia te Ia se tino faamamaluina, faaatoatoaina o aano ma ivi.⁴ Sa tatou nonofo faatasi ma Ia i le lagi ae tatou te le’i fananau mai.⁵ Ma ina ua Ia faia i tatou faaletino, sa faia i tatou i le faatusa o le Atua, ua tofu le tagata ma sona lava tino.⁶

Mafaufau i lo tatou tausiga faaletino. E auina moni mai lava i le lagi. O le manaomia o le ea, o meaai, ma vai tatou te mauaina uma o ni meaalofa mai se Tama Faalelagi alofa. Sa faia le lalolagi e lagolago ai lo tatou aumau i le olaga nei mo se taimi puupuu.⁷ Sa tatou fananau mai ma se gafatia e tuputupu ae, alofa, faaipoipo, ma fausia ni aiga.

O le faaipoipoga ma le aiga ua faauuina e le Atua. O le aiga o le iunite taua lautele lea i le olaga nei ma le faavavau. I le fuafuaga sili o le fiafia a le Atua, e mafai ai e aiga ona faamauina i malumalu ma sauniuni ai e toe foi atu e mafuta i Lona afioaga paia e faavavau. O le ola e faavavau lena! E faataunuuina ai faanaunauga loloto o le tagata soifua—o moomooga masani mo le fegalegaleaiga e le muta faatasi ma e e pele o le aiga o se tagata.

O i tatou o se vaega o Lona faamoemoega e faavavau: “O la’u galuega ma lo’u mamalu,” na Ia fetalai ai, o le “ia aumaia le tino ola pea ma le ola faavavau o le tagata.”⁸ Ina ia mafai ona ausia na faamoemoega, “Ua faapea lava ona alofa mai o le Atua i le lalolagi, ua ia au mai ai lona Atalii e Toatasi, ina ia le fano se tasi e faatuatua ia te ia a ia maua e ia le ola e faavavau.”⁹ O lena faatinoga o se faaalia faalelagi o le alofa o le Atua. “Aua [Na te] lei auina mai lona Atalii i le lalolagi ina ia faasala i le lalolagi; a ia faaolaina le lalolagi ia te ia.”¹⁰

E tutotonu i le fuafuaga e faavavau a le Atua le misiona a Lona Alo, o Iesu Keriso.¹¹ Sa afio mai o Ia e togiola le fanau a le Atua.¹² Ona o le Togiola a le Alii, ua moni ai le toetu (po o le tino ola pea).¹³ Ona o le Togiola, ua avea ai le ola faavavau ma se mea e mafai e tagata uma o e o le a agavaa ona maua. Sa faamalamalama mai e Iesu:

“O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:

“O tagata ola uma o e faatuatua mai ia te au, e le oti lava e oo i le faavavau.”¹⁴

Mo le Togiola a le Alii ma Lana meaalofa o le toetu— mo lenei savali musuia o le Eseta—ia faafetaia ai le Atua!

Meaalofa Faaletino

E alofa lo tatou Tama Faalelagi i Lana fanau.¹⁵ Ua Ia faamanuiaina i latou taitoatasi i ni meaalofa faaletino ma faaleagaga. Se’i ou talanoa e uiga i na ituaiga meaalofa taitasi. A e usuina le pese “O A’u o se Atalii o le Atua,” mafaufau i Lana meaalofa ia te oe o lou lava tino faaletino. O le tele o uiga maoae o lou tino e faamaonia ai lau lava “amio atua.”¹⁶

O totoga taitasi o lou tino o se meaalofa tulaga ese mai le Atua. E tofu le mata ma se tioata e otometi ona taulai tonu ai le vaai. O neura ma musele e faatautaia mata e lua ia maua ai se ata se tasi e faatafa-tolu. O mata e fesootai atu i le faiai, lea e faamaumauina ia mea na vaaia.

O lou fatu o se pamu tulaga ese.¹⁷ E i ai ni ona afuala e faatautaia itu e fegasoloa’i i ai le toto. O nei afuala e matala ma tapuni e sili atu i le faa-100,000 taimi i le aso—36 miliona taimi i le tausaga. Ae, vagana ua afaina i faama’i, e mafai ona latou tatalia na ituaiga o galuega mamafa e toetoe lava e le gata.

Mafaufau i papupuni o le tino mo le puipuiga. Ina ia puipuia ai mai le faaleagaina, na te matauina le tiga. I le tali atu i siama, na te gaosia ni polotini e tetee atu i ai. O le tino e tuuina atu le puipuiga. E lapatai mai i manu’a e ono mafua mai i le malosi o le vevela po o le malulu.

O le tino na te faafouina ona lava sela ua le toe aoga ma faasoasoa le maualuga o ona lava elemene taua. O le tino e fofoina ona lava lavelavea, totolia, ma ponaivi gaui. O le mafai ona fanafanau o le isi lena meaalofa paia mai le Atua.

Ia tatou manatua o se tino lelei atoatoa e le manaomia ina ia maua ai se faasinomaga paia o se tagata. O le mea moni, o nisi o agaga e sili ona lelei o loo i totonu o ni tino faatauagavale pe le atoatoa. O le tele o le malosi faaleagaga e masani ona atiina ae e tagata e i ai luitau faaletino, o le mea moni lava, ona e matuai luitauina i latou.

Soo se tasi e suesueina ia galuega a le tino o le tagata ua ia vaai moni “i le Atua o femaliua’i i lona mamalu ma lona mana.”¹⁸ Talu ai o le tino o loo puipuia e le tulafono faalelagi, soo se faamalologa e oo mai e ala i le usiusitai i le tulafono ua faavae ai lena faamanuiaga.¹⁹

Ae ua manatu sese nisi o tagata o nei uiga ofoofogia faaletino e tutupu faafuasei po o le taunuuga o se fetoaiga tele i se mea. Fesili ifo ia te oe lava, “E mafai e se gapā tele i se fale lomitusi ona faia se tusi lomifefiloi?” E matuai leai se avanoa o se na mea. Ae afai e i ai, e le mafai ona ia faaleleia ona lava itulau masaesae pe toe faia ni ona lava lomiga e fou atu!

Afai o le gafatia o le tino mo faatinoga masani, puipuia, toe faaleleia, faafegasoloa’iina, ma le toe faafouina e tatau ona i ai e aunoa ma le faatapulaaina, o le a faavavau pea ona faaauau le olaga iinei. Ioe, o le a tatou paulia ai iinei i le lalolagi! O le mea tatou te faafetai ai, ua saunia e lo tatou Foafoa le soifua matua ma isi faagasologa lea o le a iu ai ina tatou oti faaletino. O le oti, e pei lava o le fanau mai, o se vaega o le olaga. Ua aoao mai tusitusiga paia e faapea “sa le tatau ona toe laveai o le tagata mai lenei oti faaletino, ona e faaumatia i lena mea le fuafuaga tele o le fiafia.”²⁰ O le toe foi atu i le Atua e ala i lena faitotoa ua tatou ta’ua o le oti o se fiafiaga lea mo i latou o e alolofa ia te Ia ma ua saunia e fetaia’i ma Ia.²¹ Mulimuli ane, o le a oo mai le taimi e “toe faatasia le agaga ma le tino i … foliga atoatoa; o lima ma vae ma soogaoivi o le a toefuataiina i ona tulaga e tatau ai,”²² e le toe mavavaeeseina. Mo nei meaalofa faaletino, ia faafetaia le Atua!

Meaalofa Faaleagaga

E pei o le taua o le tino, e avea o se nofoaga mo le agaga e faavavau o le tagata. Sa i ai o tatou agaga i le olaga i le muai olaga²³ ma o le a faaauau ona ola pe a oti le tino.²⁴ O le agaga e tuuina mai i le tino ia aafiaga o le olaga ma uiga patino.²⁵ I le olaga lenei ma le isi, o le agaga ma le tino, pe a faatasia, e avea o se tagata ola e faalelagi lona taua.

Ona e taua tele le agaga o se tagata, o lona tuputupu ae e i ai lona taunuuga e faavavau. E faamalosia a o tatou fesootai i le tatalo faamaualalo ma lo tatou Tama Faalelagi agaalofa.²⁶

O uiga auaumama o le a faamasinoina ai i tatou i se aso e faaleagaga uma lava.²⁷ O nei uiga auaumama e aofia ai le alofa, amio mama, faamaoni, agaalofa, ma le auauna atu i isi.²⁸ O lou agaga, faatasi ai ma ua i totonu o lou tino, e mafai ona tuputupu ae ma faaali atu nei uiga i auala e taua i lou alualu i luma e faavavau.²⁹ O le alualu i luma faaleagaga e maua e ala i laasaga o le faatuatua, salamo, papatiso, o le meaalofa o le Agaga Paia, ma le tumau seia oo i le iuga, e aofia ai sauniga o le faaeega paia ma le faamauga i malumalu paia.³⁰

E pei foi ona manaomia e le tino ni meaai i aso uma lava ina ia ola ai, e faapena foi ona manaomia e le agaga le fafagaina. O le agaga e fafagaina e ala i upumoni e faavavau. O le tausaga ua mavae sa tatou faamanatuina ai le 400 tausaga o le faaliliuga a King James o le Tusi Paia. Ma ua toeitiiti 200 tausaga talu ona tatou maua le Tusi a Mamona. Ua uma nei ona faaliliuina le tusi atoa po o ni vaega i gagana e 107. Ona o nei tusitusiga paia ma isi tusitusiga paia faapelepele, ua tatou iloa ai o le Atua o lo tatou Tama e Faavavau ma o Lona Alo, o Iesu Keriso, o lo tatou Faaola ma le Togiola. Mo nei meaalofa faaleagaga, ia faafetaia ai le Atua!

Meaalofa o le Talalelei

Ua tatou iloa o perofeta i le tele o tisipenisione, e pei o Atamu, Noa, Mose, ma Aperaamo, sa latou aoao mai uma i le paia o lo tatou Tama Faalelagi ma Iesu Keriso. O lo tatou tisipenisione i le taimi nei sa faailoa mai e le Tama Faalelagi ma Iesu Keriso, ina ua Laua faaali mai i le Perofeta o Iosefa Samita i le 1820. Sa faavaeina le Ekalesia i le 1830. O le taimi nei, ua 182 tausaga mulimuli ane, o loo tatou tumau pea i lalo o le feagaiga ina ia auina atu le talalelei i “atunuu uma, ituaiga, gagana ma nuu.”³¹ A o tatou faia faapea, o le a faamanuiaina uma ai e e tuuina atu ma e e mauaina.

O lo tatou tiutetauave le aoaoina o Lana fanau ma fagua ia i latou se manatunatu i le Atua. I tausaga ua leva, sa saunoa ai le Tupu o Peniamina:

“Ia talitonu i le Atua; ia talitonu o loo soifua o ia, ma o ia na foafoaina mea uma, i le lagi ma le lalolagi; ia talitonu ua ia te ia le poto uma, ma le mana uma, i le lagi ma le lalolagi; …

“… Ia talitonu e ao ina outou salamo ia outou agasala ma lafoai i ai, ma outou faamaualalo outou lava i luma o le Atua; ma ole atu ma le faamaoni o le loto ia faamagaloina e ia outou; ma o lenei, afai tou te talitonu i nei mea uma, vaai ia outou faia.”³²

O le Atua e tutusa lava o ananafi, o le asō, ma le faavavau, ae o i tatou e leai. O aso taitasi, o lo tatou luitau ia maua le mana o le Togiola, ina ia mafai ona tatou liua moni, ia avea atili e faapei o Keriso, ma agavaa ai mo le meaalofa o le faaeaga ma ola e faavavau ma le Atua, Iesu Keriso, ma o tatou aiga.³³ Mo nei mana, faamanuiaga, ma meaalofa o le talalelei, ia faafetaia ai le Atua!

Ou te molimau atu o loo soifua o Ia, o Iesu o le Keriso, ma o Lana Ekalesia lenei, ua toefuataiina mai i nei aso e gata ai ina ia ausia ai lona faasinomaga paia. O loo taitaiina i tatou i lenei vaitaimi e Peresitene Thomas S. Monson, o lē tatou te alolofa i ai ma lagolagoina ma o tatou loto atoa, ma tatou te lagolagoina foi ona fesoasoani ma Aposetolo e Toasefululua o ni perofeta, tagatavaai, ma talifaaaliga. Ou te molimau atu ai i le suafa paia o Iesu Keriso, amene.