10:14

Kalweni in Sruokyacna Kuh

Sel Elder Kevin S. Hamilton

Ke Mwet Itngucul

Lwelah kuht in kalweni in sruokyacna kuh nuh ke pohloh osra ma kol nuh ye muhtuhn Pahpah tuhmasr Inkuhsrao.

Pahpah tuhmuhk ah kuh in esam lwen sac na, finne se na, ma sucu lal—pahpah, ninac, ac tuhlihk ahkosr—som liki Alu uh, puhs selos tiacna ke sifil fohlohk ke moul se inge. El yac 13 matwac, sie tikin, ac ke lwen ingoh sucu uh wi Sacnri Skul ke lututacng na miting in kuhfa luhn Leum ke ekuh ah. Ke sie lwen na kahto ke spring, tukun fohlohk nuh lohm ah ke alu in kuhlwacnsap ke lututacng in Sacnri ac oruh sie tuhkweni mongo infulwacn lwen luhn sucu, ninac kiacl ah ngwetwacng nuh sin pahpah tuhmwacl ah ac siyuck, “Koacl, muhtwacn kiyuck, kom nuhnkuh tuh kuht enenuh in som nuh ke miting ke kuhfa luhn Leum oyekuh kuh kuht ac us sucu uh som muhtwacta fin acn uh?”

Nuhnak se ma oasr sie sulaclah nuh ke miting ke kuhfa luhn Leum tiacna sikyak nuh sin pahpah tuhmuhk ah, tuhsruhk el ac tuhlihk fuhsr tolu nahtuhl ah nohfohn tuhkahkwek ac lohacng ahkwoyac. Kahsruhsr ke ekuhn Sacnri sac nuh ke acn ah ac sahp sie mukwikwi na engan luhn sucu ah, tuhsruhk sulaclah srihsrihk sac eklac muhtwacwacackiyen sie kolyuck sasuc suc kohllah yohk sucu lal ah liki Alu uh ke ma in sef, karuhngangwacng, ac mwe insewowo uh ac nuh ke soko pacna inkacnek.

Ke sie lesin nuh sin mwet lasr mihsenge uh suc ma kuh in srihfeyuck in sulaclah soko pacna inkacnek, mwet pahluh Lehi ke Puk luhn Mormon el akacsruhi sie aruhruhma yurin sucu lal ah ma el fahk lah el liye kain in mwet puhkantwen, puhs selos suc fahsr nuh met, tuh elos kuh in eis inkacnek ma kol nuh ke sahk soko ma el tu kac.

“Ac mwet uh mukwiyak, ac fahsr sisken inkacnek ma kohllah nuh ke sahk soko ah.

“Ac mayak sie usrwen lohsrlohsr; … upaclac oruh mwet ma muhtwacwacack sisken inkacnek soko ah tuhlac inkacnek lalos, elos kuhflah ac tuhlac.”¹

Na Lehi el liye sie u ahkluo ma fahsr nuh met, ac elos tuhkuh nuh met uh ac sruokyacna kapihn osra suwohs soko ah; ac elos fahsr nuh met ke usrwen lohsrlohsr sac, sruokyacna osra suwohs soko ah, nuh ke na elos sun ac ipeis ke fukun sahk soko ah. Koluk ohiyac, tukun elos ipeis fukun sahk ke sahk soko ah elos ngwetlah liki oacna fin elos mwekihn ke srihpen mwet suc oasr ke lohm luhlahp mwesahs sac ma ataclos oacna in isrucn ac srihsrngi paholos nuh yurin mwet suc tuhkuh ac ipeis fukun sahk sac. Na mwet inge puhtatlac nuh ke inkacnek sruhngwacyuck ac tuhlac.”² Elos koflah, kuh sahp tiacna ke, in kampare nuh ke sahflah.

Oasr, finne ohinge, sie u ahktolu ma tiac orwaclah wo muhkwena in sun sahk in moul soko ah, tuhsruhk elos tohkoh tiacna puhtatlac. Ke u se inge, ma suhmuhslah uh fahk lah elos fahsr nuh met, kalweni in sruokyacna kuh nuh ke osra suwohs soko ah, nuh ke elos tuhkuh nuh met ac puhtati ac ipeis fukun sahk ke sahk soko ah.”³ Osra suwohs soko ah ahol nuh ke u in mwet se inge mwe sef ac karihngihnyuck muhkwena ma elos kuh in sokwack, ac elos kalweni in sruokyacna kuh; elos sruhnga in fuhlwelah, finne nuh ke kuhtuh ma fihsrwacsr oacna sie muhtwacta in ekuh ke Sacnri nuh fin acn ah.

Ke un mwet se inge, Elder David A. Bednar el luti: “Pohloh kahs yohk srihpac ke fuhs se inge pa ‘kalweni in sruokyacna kuh’ nuh ke osra suwohs soko ah. … Sahp mwet ke u ahktolu se inge lwen nuh kwewa rit ac lutlut ac suk kahs luhn Kraist. … Pa inge u se ma kom ac nga kampare in wi uh.”⁴

Kuhtuh sesr suc pa mempucr ke Alu luhn God mihsenge uh orwaclah tari olwelah in ukwe Jisus Kraist ac in ahkos masap luhn God. Ke pacptaislac ah kuht olwelah in tu oacna sie mwet lohoh luhn Mwet Lahngo,⁵ in kahsruh mwet muhnahs ac enenuh,⁶ in liyacacng masap luhn God, ac in auliyak ke enenuh uh, tuh oacna ke Mwet Sap Paul el luti ah, “Mwet nuh kwewa orek ma koluk, ac fototolac ke wolacna luhn God.”⁷

Kais sie wik oasr pacl wowo lasr in wi sie miting ke kuhfa luhn Leum, ma kuht kuh in ahksasucye olwelah inge ke ipeis ke fuhlao ac kof ke akwuck ke kuhfa luhn Leum. Mukwikwi fihsrwacsr inge lwelah kuht in sifilpac olwelah nuh sesr sifacna in ukwe Jisus Kraist ac in auliyak ke kuht puhtatlac uh. Olwelah luhn God nuh sesr in fohlohkihn pa Nguhn Lal oacna sie mwe kolyuck ac karihngihnyuck.

Ke Preach My Gospel, misineri lasr uh luti lah fwackyuck ac fahkwack luhlahlfongi uh tuhkuh ke kuht wi miting in Sacnri ke Alu uh. “Ke kuht wi kuhlwacnsap ke Alu uh ac tuhkweni ahkfuhlwact uh, kuht ahkkweye sie sin sie. Kuht ahksasucyeyucklac ke wi lasr yurin kawuck ac sucu uh. Luhlahlfongi lasr uh fokokoi ke kuht lutlutkihn ma suhmuhslah uh ac lutlut yohk ke wosasuc fohlohkyak uh.”⁸

Sie mwet kuh in siyuck lah efuh oasr kain in miting tolu lasr ke Sacnri ac efuh enenuh ke kais sie. Lwelah kuht in liye miting tolu inge:

Miting ke kuhfa luhn Leum use pacl wowo in wi ke akwuck ke kuhfa luhn Leum. Kuht ahknwacsnwacsye olwelah lasr uh, eis sie luhpah yohkwaclihk ke Nguhn, ac eis kuhtuht pac mwe insewowo ituckyang ke in kolyuck ac ahkkweyeyuck ke Nguhn Muhtahl.
Sacnri Skul lwelah kuht in luti sie sin sie mwe luti ke tohkohsrahi,”⁹ tuh mwet nuh kwewa kuh in ahkkweyeyuck ac tuhkweni engan0.”¹⁰ Kuh fokoko ac mihs la sifacna ac tuhkuh ke kuht etuh mwe luti ke wosasuc fohlohkyak uh.
Miting luhn pristut pa sie pacl nuh sin mukul mahtuh ac mukul fuhsr in lutlut ke kunohkohn lalos”¹¹ ac in “sapkihnyuck arulacna suwohs,”¹² ac miting luhn Rilif Sosaiti sang nuh sin muhtwacn ke alu uh pacl wowo in “ahkyohkye luhlahlfongi lalos …, ahkkweye sucu ac lohm [selos], ac kahsruh mwet suc enenuh.”¹³

Oacpacna, muhtwacn fuhsr ac tuhlihk nahtuhsr uh oasr miting ac kuhlahs lalos sifacna ma lutiyuck elos wosasuc uh ke elos ahkolah nuh ke kunohkohn yohk srihpac ma ac tuhkuh nuh selos uh. Ke kais sie miting na wolacna ac kuhpahsrweni inge, kuht lotwelah mwe luti, puhla Nguhn, ac kuhlwacnsapuh sie sin sie. Ke kuh pac in oasr lwelah nuh ke fahsr loeloes, molin forfor, kuh kuh in mahno, kuht enenuh in kampare in wi miting ke Sacnri nuh kwewa lasr uh. Nga olwelah lah mwe insewowo ke engan yohk ac mihs fah tuhkuh ke ahkfuhlwact ke ao tolu ke pacl in miting ke Sacnri lasr uh.

Sucu lasr uh olwelah in wi miting nuh kwewa ke Sacnri lasr uh. Kuht sokwack lah ma inge ahkkweye luhlahlfongi lasr ac ahkloalye etwacack lasr ke wosasuc uh. Kuht lotwelah lah kuht puhla wo ke sulaclah lasr in wi miting lasr ke Alu ah, yohkna ke kuht fohlohk nuh lohm sesr ah ac kalweni in akihlen lwen Sahpuht uh. Kuht wi pac nohfohn miting in Sacnri lasr ke kuht oruh vacation kuh forfor nuh sahyac uh. Sie sin tuhlihk muhtwacn nahtuhsr ah tuhfahna sihmme in fahk lah el wi alu ke sie city ma el forfor loeloes nuh we na el sulpac fahk, “Ahok, Pahpah, nga wi miting tolu nohfohn ke Sacnri ah.” Kuht etuh lah el ahkinsewowoyeyuck nuh ke sulaclah suwohswohs inge.

Kais sie sesr oasr sulaclah puhkantwen la in orwaclah ke ohiyac in akihlen lwen Sahpuht. Ac fah oasr pacl nuh kwewa kuhtuh mukwikwi “wo” ma kuh ac enenuh in kihsackihnyucklac nuh ke sulaclah wowo liki ke wi luhn miting ke Alu uh. Ma inge pwacye lah sie inkacnek ma setuhn el kiacpwelah nguhnasr ac kol kuhtlac kahkahsrihk na liki wosasuc.”¹⁴ Setuhn el orekmakihn mukwikwi “ma wo” oacna aholyac nuh ke “ma wo liki” kuh finne mukwikwi “wo emet.¹⁵

Kalweni in sruokyacna kuh nuh ke osra soko ah kalmeyac tuh ke pacl kuh uh kuht in wi miting lasr ke Sacnri: miting ke kuhfa luhn Leum, Sacnri Skul, ac miting luhn pristut kuh Rilif Sosaiti. Tuhlihk nahtuhsr ac mwet fuhsr uh wi miting lalos ke U luhn Tuhlihk Srihsrihk, Mukul Fuhsr, ac Muhtwacn Fuhsr. Kuht tiac enenuh in sol lah miting oyac kuht ac wi uh. Kuht ac sruokyacna kuh nuh ke kahs luhn God ke ahkfuhlwactye ac wi miting lasr ke lwen Sahpuht uh.

Kalweni in sruokyacna kuh nuh ke osra soko ah kalmeyac tuh kuht in kampare in liyacacng nohfohn masap luhn God, in oruh pruhe luhn kais sie ac luhn sucu, ac in lutlutkihn ma suhmuhslah lwen nuh kwewa.

Kalweni in sruokyacna kuh pa ip ke mwe luti luhn Kraist ma lutiyuck lun Puk luhn Mormon uh. Kuht ahkyohkye luhlahlfongi ke Jisus Kraist, auliyak ke ma koluk lasr, ekuhllah insiacsr, ac na Ukwacl nuh ten nuh ke kof in pacptais uh ac eis mwe sang ahkkweyeyucklac luhn Nguhn Muhtahl, ma orekma oacna sie mwe kol kuh mwe ahkkweye. Ac na, ke Nephi el luti ah, kuht fahsr nuh met, eis yohk ke kahs luhn Kraist, ne ke na sahflahiyen moul lasr uh.¹⁶

Tamuhlwel ac tahmtahel wiyuck, kuht pa mwet olwelah uh. Kuht kena in orwaclah ac liyacacng olwelah uh, ac mwe insewowo uliyuckme uh pa kuht fah eis ma nuh kwewa ma Pahpah El fah acse nuh sesr uh.”¹⁷ Ke kuht kalweni in sruokyacna kuh nuh ke osra soko ah ke liyacacng masap lasr uh, kuht fah ahkkweyeyuck in lain mwe sruhf ac ma koluk luhn facluh. Kuht ac kuh in liye moul suhkawihl se inge ke ma upac nuh kwewa kac nuh ke kuht sun na pwacye sahk soko ma fukun sahk kac uh pa sacohk emet ac emwem likina fukun sahk nuh kwewa sahyac uh.”¹⁸

Pahpah tuhmuhk ah wo nuh se in pahyuckyak sin sie muhtwacn na wowo suc ahkkweyacl in fohlohk nuh ke alu uh ke pacl fuhsr lal ac sifilpac muhtwacwacack in orwaclah wo nuh ke inkacnek uh. Moul yohk luhlahlfongi lalos ahkinsewowoye tuhlihk nuh kwewa nahtuhlos uh, fihl in tuhlihk nuhtin fihl se tok ah, ac ingena tuhlihk nuhtin nuhtin nahtuh.

Oacna ke sulwaclah fihsrwacsr se in wi kuh tiac wi sie sin lwen in ahkfuhlwactye miting in Sahpuht orwaclah sielacna yohk srihpac se ke moul luhn sucu luhn ninac ac pahpah mahtuh kiuck ah, sulaclah lasr lwen nuh kwewa fah pahtok moul lasr uh ke inkacnek yohk srihpac uh. Sie sulaclah ma oacna in srihk ke in wi kuh tiac wi sie miting ke kuhfa luhn Leum kuh in eis ma fohlohksahk loeloes, finne ma pahtpaht.

Nga finsrak tuh kuht in sulaclah in oaru ac eis mwe insewowo yohk ac karihngihnyuck ma tuhkuh ke tuhkweni fahsrweni ac liyacacng olwelah uh. Lwelah kuht in kalweni in sruokyacna kuh nuh ke pohloh osra ma kol nuh ye muhtuhn Pahpah tuhmasr Inkuhsrao pa mwe pruhe luhk ke ine muhtahl luhn Jisus Kraist, amen.