Winto Inkuhsrao

Sel Elder David A. Bednar

Ke U luhn Mwet Sap Singucul Luo

Mwe insewowo ke ip luhn nguhn ac mahno tuhkuh nuh ke moul lasr uh ke kuht moulkihn masap luhn sie tahfuh singucul.

Nga luhngse ahkuhtweyac lesin yohk srihpac luo nga lotwelah ke masap luhn sie tahfuh singucul. Lesin se met lohacng nuh ke mwe insewowo ma tuhkuh nuh sin kais sie ac sucu uh ke elos ahkos masap se inge ke luhlahlfongi. Ip yohk ahkluo ahkkahlwemye wo ma yohk srihpac ke masap luhn sie tahfuh singucul ke kapwack luhn Alu luhn Jisus Kraist luhn Mwet Luhlahlfongi ke Lwen-sahflah ke facluh nohfohn. Nga pruhe lah Nguhn Muhtahl ac fah ahkkweye nuh sesr kais sie ma pwacye ke ip yohk nga sramsramkihn.

Lesin Nacmpuh 1—Mwe insewowo Yohk Srihpac tuh Sramlacp

Ninac kiyacl Tahmtahel Bednar pa muhtwacn luhlahlfongi ac ninac moklweyuck se. Ke muhtacwackiyacn pahyuck lal, el taran in karihngihn ma sihmlac luhn mani ke lohm an. Ke yac pucspucs el karihngihn ma nohfohn ke mani ma eisyuck ac moliyuck ac orekmakihn pwepuh fihsracsr. Mwe etuh el oracni ke yac pucspucs pa sesseslah ac yohk.

Ke Tahmtahel Bednar el tuh muhtwacn fuhsr se ah, ninac kiyacl ah orekmakihn mwe etuh ke pwepuh fihsracsr in ahkuhtweyac ip yohk ke orekmakihn mani ke ohiyac suhmaht ac karihngihn lohm uh. Sie lwen ah ke elos tuhkweni liye kais sie luhn mani orekmakihnyuck, ninac kiyacl el liye mwe atac se. Molin taktuh ac ono luhn sucu lalos srihk liki motkweyac lalos. Na el luhlahlfongi muh ma el konwacack ma nuh ke wosasuc luhn Jisus Kraist ac ahkuhtweyac nuh sin tuhlihk muhtwacn se nahtuhl ah ma pwacye kuh se: ke kuht moulkihn masap luhn sie tahfuh singucul, kuht kwacna eis mwe insewowo yohk srihpac tuh sramlacp in liye ac kuht tiac eis pacl nuh kwewa ma kuht nuhnkuh kuht motko ac fihsracsr in tiac liye. Sucu an tiac eis mani yohk in kahsruh ke ma luhn lohm uh. Tuhsruhk, Pahpah Lucng El sang sie mwe insewowo fihsracsr ke ohiyac ma luhman fihsracsr. Tahmtahel Bednar el esamwack lesin yohk srihpac inge pacl nuh kwewa sin ninac kiyacl ke kahsruh ma tuhkuh nuh sesr nuh ke winto inkuhsrao, oacna olweyucklac sel Malachi ke Wuhlweacng Mahtuh (liye Malachi 3:10).

Kuht kwacna luti ac fahkwack ke masap luhn sie tahfuh singucul, kuht sramsram yohk ke mwe insewowo sa, yohk, ac ma fihsracsr in liye ke kuht eis. Ac pwacye mwe insewowo kuh in sikyak. Tuhsruhktuh kuhtuh mwe insewowo sahyac kuht eis ke kuht ahkostwen ke masap se inge pa yohk srihpac tuh sramlacp. Kain mwe insewowo inge kuh in ahkkahlwemyeyuck muhkwena kuht fin porongo ac suk ke nguhn (liye 1 Corinthians 2:14).

Petsac ke “winto” inkuhsrao orekmakihn sel Malachi kahsruh yohk. Winto uh lwelah kahlwem in utyak nuh in lohm uh. Ke ohiyac oacna sie, kahlwem luhn nguhn ac mwe etuh okwoki ke winto inkuhsrao me ac nuh ke moul lasr ke kuht ahkfuhlwactye masap luhn sie tahfuh singucul.

Nuh ke mwe srihkasrak, mwe insewowo sramlacp ac yohk srihpac kuht eis pa mwe sang ke nguhn luhn tarilacna ma tuh kahsrwe kuht in oasr kuloh ke ma kuht eis tari ac ahkfototoye kena lasr in moli ma kuht luhngse. Mwet tarilacna se pa kahsruhp ke puhla wo. Mwet suc tiac tarilacna kweok ke puhla koluk ke wacngihn sahflah (liye Luke 12:15).

Sahp kuht enenuh ac pruhe ke kahsruh in sokwack acn wo in orekma kac. Muhta ac insroac luhn luhlahlfongi (liye Ether 12:19) enenweyuck, tuhsruhktuh, in akihlen mwe sang luhn nguhn ke mwe akihlen tuh kuh in ahkfokokoye kuht in sohkwack ohiyac wo in orekma ma mwet sahyac tiac liye—kuh mwe insewowo in yohk kuh liki met ah in suk yohk ac loes liki met ke orekma se mwet sahyac kuh in oruh kuh luhngse oruh. Sahp kuht luhngse ac luhlahlfongi orekma se fah tuhkuh, tuhsruhktuh mwe insewowo ma tuhkuh nuh sesr ke winto inkuhsrao kuh in etwaclah in mukwikwi ac ekuhllah ohiyac sikyak lasr sifacna liki na in luhlahlfongi ohiyac sikyak lasr in eklac sin mwet kuh ma sahyac.

Kuht kuh in fal in kena ac orekma in eis kihluckyak luhn molosr ke orekma lasr uh in kahsruh sang mwe enenuh luhn moul uh nuh sesr. Muhta ac insroac luhn luhlahlfongi enenweyuck, tuhsruhktuh, in akihlen in kuht ma yohk ke nguhn ac mahno liki na met ah (liye Luke 2:52) in oruh yohk liki na met ah ke ma srihk, kuh se in orwacni ac ahkfihsracsrye, ac in kuh se in karihngihn ma kuht orekmakihn yohk liki na met ah. Kuht kuh in kena ac motko in eis yohk molosr, tuhsruhktuh mwe insewowo tuhkuh nuh sesr ke winto inkuhsrao kuh in koanong in eklac ohiyac sikyak lasr sifacna likina in motko ohiyac sikyak lasr uh in eklac sin sie mwet kuh ma sahyac.

Mukul fuhsr mweun ke Puk luhn Mormon (liye Alma 53; 56–58) pruhe yohk lah God El ac ahkfokokoye ac karihngihn elos in som liki inpoun mwet lokoalok lalos. Tahfuhn kahsiyac, top ke pruhe lalos tiac in oruh kuhfwen mwe mweun kuh ahkpuhsyelah mwet in mweun. Sahyacna, God El sang nuh sin mwet mweun luhlahlfongi inge ahkpwacye se lah El ac karuhnguhnuhlos, mihslac nuh nguhnalos, ac luhlahlfongi ac finsrak yohk ke moullac lalos Sel (liye Alma 58:11). Na, tuhlihk mukul nahtuhl Helaman eis puhlaik, oasr kena sefanna in itto, ac som ke kuh lalos nohfohn in lain Mwet Lamanites (liye Alma 58:12–13). Luhlahlfongi, mihslac, ac finsrak kuh in tiac luhman oa mwe insewowo mwet mweun ke mweun kuh in luhngse, tuhsruhktuh pa mwe insewowo suwohswohs mukul fuhsr puhlaik inge enenuh in ahkwot nuh met ac kampare ke ip luhn mahno ac nguhn.

Kuhtuh pacl uh kuht kuh in siyuck sin God ke ma forowosr, ac El use kuh luhn mahno ac nuhnkuh. Sahp kuht siyuck in eis mwe enenuh lasr nohfohn, na kuht eis mwe etuh luhlahp ac mong fihsracsr, kuh kuht siyuck ke kapwack ac kuht insewowo ke mwe sang luhn kuhlwacng. Sahp El use nuh sesr luhlahlfongi kuh ac puhlaik ke kuht suk in eis finsrak wo an. Ac ke kuht pruhe ke ahkmuhlahlahye liki ma upac luhn mahno, nuhnkuh, kuh nguhn, sahp El kahsruh kuht in kampare.

Nga olwelah ke kowos ac nga liyacng ac ahkos masap luhn sie tahfuh singucul, ma na pwacye lah winto inkuhsrao fah ikucslah ac mwe insewowo luhn nguhn ac mahno fah okwokuh na ac fah wacngihn acn fal in eis ma nohfohn (liye Malachi 3:10). Kuht oacyacpac fah esam fahkwack luhn Leum:

“Leum God El fahk, nuhnak luhk, tiac oacna nuhnak lowos, ac inkacnek luhk siena liki inkacnek lowos.

Oacna ke kuhsrao arulacna fuhlwact liki facluh, ohinge inkacnek luhk fuhlwact liki inkacnek lowos, ac nuhnak luhk liki nuhnak lowos.” (Isaiah 55:8–9).

Nga fahkwack lah ke kuht porongo nuh ke ma luhn nguhn, kuht ac ahkinsewowoyeyuck ke muhta ma kuh in liye kahlwem, insroac ma kuh lohng wo, ac insiyac etuh wo yohk srihpaciyac ac sramlacpiyacn ohiyac Lal, nuhnkuh Lal, ac mwe insewowo Lal ke moul lasr uh.

Lesin Nacmpuh 2—Ohiyac Fihsracsr luhn Leum

Met liki pahng luhk in kuhlwacnsap ke U luhn Mwet Sap Singucul Luo, nga riti pacl puhkantwen ke Doctrine and Covenants ke u in kahsruh in karihngihn ac sang mani ke sie tahfuh singucul. U in Kahsruh ke Akiyac luhn Sie Tahfuh Singucul akwucki ke fwackyuck ac mwet ke Prestuhnsi Se Met, U luhn Mwet Sap Singucul Luo, ac Pisap se ma Karihngihn pa mwet suc wi kac (liye D&C 120). Ke nga ahkolah ke Tisacmpuh ke yac 2004 in wi miting se emet luhk ke u se inge, nga rahrah in lotwelah ma yohk kac.

Nga srackna esam ma nga liye ac puhla ke u in kahsruh sac. Nga eis yohk mwe sruikihn ac efahl ke masap ke ip luhn mani luhn Leum nuh sin kais sie, sucu, ac Alu Lal. Prokracm ke mani luhn Alu luhn Jisus Kraist luhn Mwet Luhlahlfongi ke Lwen-sahflah—kwewana ke mani sang ac eisyuck—ahkuhtweyucki ke sapta 119 ac 120 ke Doctrine and Covenants. Pohloh fahkwack luo sukokyak ke fwackyuck inge orwaclah pwelucng ke ohiyacn mani luhn Alu.

Ke sapta 119, Leum El fahk lah mempucr nuh kwewa enenuh in moli sie tahfuh singucul ke ma nohfohn elos eis ke kais sie yac. Masap se inge fah oan ne tok (liye (fuhs 4).

Na, ke ohiyac lwelah in orekmakihn mani ke sie tahfuh singucul, Leum El fahk lah sie tahfuh singucul enenuh in kihtakatwelihk sin u in kahsruh ke Prestuhnsi Se Met ke Alu Lal ac ke pisap ac u in kahsruh lal, ke u in kahsruh luhlahp sin Leum, ac ke Puhsrel sefanna nuh selos (liye D&C 120:1). “Pisap ac u in kahsruh lal” ac “u in kahsruh luhlahp luhn Leum” ma sruhmuhnyuck kac ke fwackyuck se inge mihsenge etweyuck muh Pisap se ma Karihngihn ac Mwet Sap Singucul Luo. Mani muhtahl inge orekmakihnyuck ke alu ma sana kapwack in ahkinsewowoye kais sie ac sucu ke ip luhn nguhn in muhsahi ac karihngihn tempuhl ac lohm in alu, kahsruh orekma luhn misineri, luhngaslah ac orwaclah ma suhmuhslah, ahkkweye sramsram mahtuh ke sucu, kahsruh lutlut ac lutlut ke alu, ac ahkfalye srihpac puhspuhs sahyac luhn Alu ke kolyuck sin mwet kuhlwacnsap luhn Leum.

Nga lut ke kahlwem ac fototoiyacn fwackyuck luo inge ke kapsrai nuh ke mwe kolyuck upac ip luhn mani ac ohiyac ma ohfohs uh orekmakihn ke kain in u ac kafucrmacn fin facluh nohfohn. Oruh luhn facluh ke u luhlahp se ma oa Alu luhn Jisus Kraist fohlohkyak se oruh fuhkah in ahkfahsrye fin facluh nohfohn in orekmakihn mwe lutlut srihsrihk ohinge? Nuh sihk top se fihsracsr: pa inge orekma luhn Leum, El kuh in oruh orekma Lal sifacna (liye 2 Nephi 27:20), ac Mwet Lahngo El mokle mwet kuhlwacnsap Lal ke elos ukwe kolyuck ac orekma Lal ke srihpac Lal.

Ke miting in kahsruh se met ah nga lut ke ohiyac fihsracsr ke ip yohk ma kol nuhnkuh ac sulwaclah lasr uh. Ke fahsriyacn mani ke Alu, oasr ip yohk luo sikyak. Ma se met, Alu uh moulkihn muhkwena ma oasr yohrohlos ac tiac moli yohk liki mani eisyuck. Ahkluo, ip srihk se ke mani tuhkuh ke yac sac fihliyucki nuh sahyac in sefiyuck nuh ke pacl elyah ac tuhpan enenuh. Ke yac foko kuhtuh Alu uh luti mempucr uh ip yohk in fihliyac nuh sahyac kuhtuh mongo, kahsling, kacrisin, ac mani in fosrngahkihn pacl elyah ma kuh in sikyak. Alu uh pa u luhlahp se suc ukwe ip yohk ah pacna ma kalweniyuck in lutiyuck nuh sin mempucr uh.

Ke miting ac srwackna fahsr ah, nga konwacack lah nga finsrakihn mempucr nuh kwewa luhn Alu uh in liye ma fihsracsr, kahlwem, suwohs, luhngse pwacye, ac kuh ke ohiyac luhn Leum sifacna (liye D&C 104:16) in ahkfahsrye oruh luhn facluh ke Alu Lal. Ingena nga wi tari U in Kahsruh ke Akiyac luhn Sie Tahfuh Singucul ke yac pucspucs. Sruikihn ac efahl luhk ke atac luhn Leum uh kapkapwack ke kais sie yac, ac lesin nga etwaclah uh yohkyohkwelihk liki met ah.

Insiyuck sesseslah ke luhngse ac mwel ke mempucr luhlahlfongi ac ahkostwen ke Alu se inge ke muhtuhnfacl, sucu, kahs, ac mwet nuh kwewa. Ke nga forfor fin facluh nohfohn uh, nga lotwelah ke finsrak ac mwemwe lowos, ohiyacn kain moul ac ohiyac sikyak nuh suwos, ac ma upac lowos. Nga wi kowos ke toeni luhn Alu ac muhtwacta yurin kuhtuh lohm suwos. Luhlahlfongi lowos ahkfokokoye luhlahlfongi luhk. Oaru lowos ahkoaruye yuc yohk likina met ah. Ac ohiyac wo ac kena lowos in ahkostwen nuh ke masap luhn sie tahfuh singucul mokleyuc in oa sie mukul, mukul pahyuck, pahpah, ac mwet kol ke Alu uh wo likina met ah. Nga esam kowos ac nuhnkwekowos ke kais sie pacl nga wi U in Kahsruh ke Akiyac luhn Sie Tahfuh Singucul. Kuloh ke ohiyac wo ac luhlahlfongi lowos ke kowos ahkfuhlwactye olweacng lowos.

Mwet kol ke Alu fohlohkyak luhn Leum puhla kunohkohn yohk in karihngihn fal mwe sang sin mempucr ke Alu. Kuht etuh nuh pwacye ke ma muhtahl ke mani srihk luhn muhtwacn katinmas sac.

“Ke Jisus el muhta apkuhran nuh ke nien eisacni mani in Tempuhl, el tuni ke mwet uh ac fihliyac mani lalos uh. Mwet kahsruhp pucspucs elos fihliyac mani na yohk.

“Na sie katinmas suc suhkahsruhp el tuhkuh ac fihliyac luo ipin mani srihsrihk, suhnuhnna cent sruhsrah se.

“Na Jisus el pahngon ma mwet tuhmal lutlut ac fahk nuh selos, Pwacyena nga fahk nuh suwos, mwe sang ma katinmas suhkahsruhp se inge el fihliyac in nien mani uh arulacna yohk liki mwe sang luhn mwet ngiac nuh kwewa.

Tuh elos nuh kwewa fihliyac ma elos srelah liki ma pucspucs lalos, ac el, el nwe suhkahsruhp, el sang ma lal nuh kwewa, ahok nohfohn ma oasr yohrohl.” (Mark 12:41–44).

Nga etuh ke mukwikwi luhk lah U in Kahsruh ke Akiyac luhn Sie Tahfuh Singucul taranwacng in karihngihn mani srihk luhn muhtwacn katinmas sac. Nga sang kuloh nuh sel Prestuhn Thomas S. Monson ac mwet in kahsruh lal ke kolyuck suwohs lalos in ahkfalye orekma muhtahl se inge. Ac nga akihlen puhsra (liye D&C 120:1) ac poun Leum ma ahkkweye mwet kuhlwacnsap Lal akmuhsraiyuck in ahkfalye ma kunac in Aholuhl.

Mwe Solsol se ac Fahkwack luhlahlfongi se

Moli in pwacye sie tahfuh singucul uh yohk likina ma kunac se; pa oruh yohk srihpac se ke ahkmuhtahlyeyacn kais sie. Nuh sin mwet suc moli sie tahfuh singucul lowos tari, nga kaksyakihn kowos.

Nuh sin mwet suc soenna ahkos masap luhn sie tahfuh singucul, nga suli kowos in nuhnkuh ma kowos oruh an ac auliyak. Nga fahkwack lah ke ahkostwen lowos nuh ke masap se inge luhn Leum, winto inkuhsrao fah ikucslah nuh suwos. Nuhnak muhnahs tiac soano nuh ke pacl lowos in auliyak.

Nga fahkwack lah mwe insewowo ke ip luhn nguhn ac mahno tuhkuh nuh ke moul lasr uh ke kuht moulkihn masap luhn sie tahfuh singucul. Nga ahklohoh kac lah kain mwe insewowo inge pa yohk srihpac tuh sramlacp. Nga oacyacpac fahk lah fihsracsr ke ohiyacn Leum kahlwem na pwacye ke oruh luhn facluh ke Alu Lal sang atac ma kuh in kol kuht kais sie ac sucu uh. Nga pruhe kais sie sesr in kuh in lotwelah ac eis woiyac ke ip yohk inge, ke ine muhtahl luhn Leum Jisus Kraist, amen.