Ngwetoht nuh Met ac Luhlahlfongi

Sel Elder Edward Dube

Ke U luhn Mwet Itngucul

Ye muhtuhn Leum, tiac ma se pa lah meac kuht oruh met kuh lah kuht oasr oyac met tuhsruhk yohk pa lah kuht kena som nuh oyac.

Ke nga tuhlihk mukul orekma yurin ninac kiyuck ke imac, el luti yuc sie sin lesin ma yohk srihpac emet ke moul uh. Paht in lututacng, faht ah oasr lucng ac kuht orekmakihn o in imac ke pacl nga muh arulacna loes. Nga tui in ngwetlah nuh ke ma kuht orwaclah tari ah ac fahk nuh sin ninac kiyuck, “Ngwetwacng nuh ke ma nuh kwewa kuht orwaclah!” Ninac el tiacna topuk. Ke nuhnak muh el tiacna lohng yuh, nga sifilpac fahk ma nga fahk ah lihksreni kuhtuh. El srwackna tiacna topuk. Ahkyohkye puhsra kuhtuh srihk, nga sifilpac fahk. Sahflahiyac, el forma nuh sihk ac fahk, “Edward, nimet ngwetlah nuh tok. Ngwetoht nuh met nuh ke ma kuht srwackna enenuh in oruh.”

Tamuhlwel ac tahmtahel sacohk wiyuck, olwelah ma kuht orwaclah yurin Leum ke kuht pacptaislac ah, in mwet loh luhn God pacl nuh kwewa, ke ma nuh kwewa, ac in acn nuh kwewa ma kuht ac oasr kac (liye Mosiah 18:9), sie olweacng ke lusen moul uh. Prestuhn Dieter F. Uchtdorf el fahk: “Elos suc utyak nuh ke kof luhn pacptais ac eis mwe sang luhn Nguhn Muhtahl oakiyac niyaclos nuh ke inkacnek luhn mwet tuhma lutlut ac siyuckyuck in ukwe suwohs ac nohfohn ke falken niyacn Mwet Lahngo lasr” (“Mwet Luhlahlfongi ke Puhlan Pacl Nohfohn,” Ensign kuh Liahona, Septempuh 2013, 5). Sin mwet kuhlwacnsap Lal Leum el pahngon kuht in kuhlwacnsap ke kuhtuh kunohkohn, suc ma kuht eis ke insacnweacng nohfohn. Ke fihlfihllac se orek ac sie pahng nuh ke sie pac kunohkohn uh itucklac, kuht insese ke engan ke etuh, oacna mwet mahtuh lasr ah etuh, lah “ke kuhlwacnsap luhn Leum, tiacna acn kom kuhlwacnsap tuhsruhk ohiyac” (J. Reuben Clark Jr., ke Conference Report, Eprel 1951, 154).

Ohinge ke sie prestuhn luhn stek kuh pisap se fihlfihllac, el eis fihlfihllac lal ke engan, ac ke sie kunohkohn sifilpac itucklac in kuhlwacnsap ke kuhtwena ohiyac ma Leum, sin mwet kuhlwacnsap Lal, liye tuh fal (liye Mosiah 3:19), el tiacna kutongyucklac ke ma el oruh met ah, ac el tiac pac ngwet nuh tok ac nuhnkuh muh el kuhlwacnsap fal. El tiacna tohtohlah in oruh wo, mweyen el etuh lah el fihliyac pwelucng luhn orekma wowo ke liye kahlwem muh kain orekma inge ahkinsewowoye moul ke pacl ma pahtpaht. Ac ke ma srihk uh oasr ma yohk tuhkuh (liye D&C 64:33).

Kuht nuh kwewa enenuh in orekma ke insacnweacng in srihpac wo, in oruh ma pucspucs ke kena sukohsohk lasr sifacna, ac in ahkfalyelah suwohswohs yohk (liye D&C 58:27).

Elder Jeffrey R. Holland ke U luhn Mwet Sap Singucul Luo el luti: “Ma orek met ah enenuh in etweyucklac kac tuhsruhk tiac in muhta kac. Kuht ngwet nuh tok in etwaclah ke ip ma wo emet uh ke ohiyac wo tuhsruhk tiac in sifilpac moulkihn ma puhlweyuck tari ah. Ac ke kuht etwaclah ma kuht enenuh in etwaclah uh ac us yohrohsr ma wo emet suc kuht puhlakihn ah, na kuht ngwetoht nuh met ac esam lah luhlahlfongi uh pacl nuh kwewa srihsrsrihsr nuh ke ma ac orek tohkoh” (“The Best Is Yet to Be,” Ensign, Jan. 2010, 24; or Liahona, Jan. 2010, 18).

Ke lesin in ngwetoht nuh met luhn ninac kiyuck ah srihsrsrihsr nuh ke mah liyeyuck ke acn sac, ma upac sac srihk liki ma Mwet Luhlahlfongi met ah kutong. Elder Joseph B. Wirthlin el ahkuhtweyac arulacna wo: “Ke yac 1846 ah, pucs liki [mwet] 10,000 som liki acn kapkap [luhn Nauvoo] suc ma muhsahiyuckyak ke sisken Infacl Mississippi. Ke luhlahlfongi in mwet kol pahluh ah, mwet ke Alu met ah som liki ‘Acn Kahto’ lalos ac som nuh ke acn mwesis ke acn lihkihn acn Macrike. Elos nihkihn acn na pwacye elos ac som nuh ke, lah mael ekahsr luhlah in fahsr, lah ac puhtahkah fuhfahsryucsr lalos, kuh lah meac ac oasr in moul lalos tohkohyang. Tuhsruhk elos etuh lah elos kolyuck sin Leum ac mwet kol Lal” (“Faith of Our Fathers,” Ensign, Mei 1996, 33).

Elos etuh ohiyacn ngwetoht nuh met ac luhlahlfongi. Yac singucul limekohsr met liki, kuhtuh sin mempucr inge wi ke fwackyuck se eisyuck:

Leum el fahk muh elos nuh kwewa ahkinsewowoyeyuck suc ahkos masap Lal, finne in moul kuh in misac. Ke kuht oaru in pacl upac lasr uh, kuht ac eis opi yohk se ke tohkohsrahi inkuhsrao.

Kuht tiac kuh in liye ke muhtahsr sifacna uh—ke pacl ingena—plwacn luhn God lasr uh ke ma suc ac tuhkuh tohkoh ac wolacna ma ac tuhkuh tukun pacl upac yohk (liye D&C 58:2–3).

Kuht pac kuh in ngwetoht nuh met ac luhlahlfongi. Kuht kuh in ahokkuhnlah nohfohn solsol luhn Leum lasr, suc suli kuht ke paho ikack:

“Fahsruh nuh yuruk, kowos nuh kwewa suc orekma ac tohtohlah, ac nga fah usot nuh suwos monglac.

“Eis srenenuh luhk nuh fowos, ac lutlut sihk, mweyen nga fakpahp ac inse puhsisacl: ac kowos fah konwacack monglac nuh in nguhnuwos.

“Mweyen srenenuh luhk fihsrwacsr, ac mwe utuck luhk muhlahlah.” (Matthew 11:28–30).

Mwet pahluh kuhlwacng lasr uh, Prestuhn Thomas S. Monson; mwet in kahsruh lal; ac U luhn Mwet Sap Singucul Luo uh tahfwema solsol se nuh sesr kwewa in wi orekma luhn molwelah. Mwet eklac sasuc uh, mwet fuhsr, mwet fuhsr mahtuhyak, elos suc tilac oruh orekma lalos, ac misineri ke pacl nuh kwewa uh enenuh in tuhkweni orekma fal in ahkmuhiye orekma luhn molwelah uh.

Prestuhn Boyd K. Packer, Prestuhn luhn U luhn Mwet Sap Singucul Luo uh el tuh wi sie akuhtuhn ma kaho uh ul ma toasr, yen el etwaclah lesin se. El fahk ke ma sikyak ah: “Sie ipin sahk ahktoasryeyuck ke plak simacn: paun tausin singucul [4,535 kg]—tuhn limekohsr. … srihpac uh pa ke kaho ah in ollah ipin sahk sac fit tolu [91 cm]. … Nga akihlen siyacnyacn in kosro suc oacna sie luhpah suc arlac yohk, sienna kain tuhn, folfol-apact … kaho folfol luhlahp luhn pacl met ah.”

Ke sramsram ke ma sikyak ke akuhtuhn sac, el fahk: “Tim ah sisilac kais sie. … Kaho folfol luhlahp an tiacna eis kuhtwena acn lalos ke akuhtuhn ah! Siyacnyacn in kosro srihsrihk, tiac akihlenyuck se, tiac arulacna oacna sie luhpah lalos, ollah ipin sahk ah pacl tolu nohfohn.”

Na el sang pac sie mwe ahkuhtweyac ke ma na ahklut ma sikyak ah: “Ma folfol luhlahp ah yohk liki ac oacna sie luhpah wo liki tim sahyac ah. Tuhsruhk kaho srihsrihk ah tuhkweni orekma ac tuhkweni mukwikwi wo liki. Eltahl tuhkweni pahtokyac srenenuh sac. Kwewana kosro lukwac ah kihluck nuh met ke pacl se pacna ac pahtok sac kihluckuhnlah ma toasr sac” (“Equally Yoked Together,” sramsram se ma ituckyang ke seminar luhn mwet ahol ipin acn, Eprel 3, 1975; ke Teaching Seminary: Preservice Readings [2004], 30).

Ke kuht ngwetoht nuh met ac luhlahlfongi, kuht enenuh kain tuhkweni orekma se pacna inge in ahkmuhiye orekma luhn molwelah ke kuht suli mwet ngiac in fahsruh nuh yurin Kraist. Ke kuh lasr sifacna uh, kuht enenuh in ukwe kahs in kahsruh luhn Prestuhn Dieter F. Uchtdorf in “tu fototo nuh sie ac sruhkwack ke acn kuht tu we” (“Lift Where You Stand,” Ensign kuh Liahona, Nohfuhmpuh 2008, 56). Kuht kuh in konwacack kuh nohfohn lasr, oacpacna liyeyuck sel Elder L. Tom Perry ke U luhn Mwet Singucul Luo ah: “Ke nga som muhtwacta ke Alu uh nga fwefwelac ke ma wo nuh kwewa ma orek. Tuhsruhk nga tiacna puhla muh kuht, ke un mwet, moul fal nuh ke kuh pwacye lasr. Puhla luhk pa lah kuht tiac tuhkweni orekma pacl nuh kwewa, lah kuht srwackna fosrngah yohk ke finsrak ke kaksyak ac wo ohiyac luhn kais sie, ac ahkkahlwemye fosrngah srihklaclac ke finsrak luhn mwet nuh kwewa in muhsaheack tohkohsrahi luhn God” (“United in Building the Kingdom of God,” Ensign, Mei 1987, 35).

Lwelah kuht nohfohn in tuhkweni nuh sie ke srihpac sefanna in oruh in oasr moul kawihl ac moul ma pahtpaht luhn mwet (liye Moses 1:39).

Mwet Lahngo lasr, Jisus Kraist, suc liye ke muhtwacwacack nuh ke sahflah, etuh arulacna wo inkacnek El ac ut nuh Gethsemane ac Golgotha ke El fahk, “Wacngihn mwet, fin muhtwacwacack in pihkihn imac lal ke plao, ac tapuhllah nuh tok, fal nuh ke tohkohsrahi luhn God” (Luk 9:62). Ye muhtuhn Leum, tiac ma se pa lah meac kuht oruh met kuh lah kuht oasr oyac met tuhsruhk yohk pa lah kuht kena som nuh oyac.

Mwe luti in kol lasr uh lutiyuck nuh sesr sin Mwet Pahluh Joseph Smith: “Mwe luti yohk srihpac ke luhlahlfongi lasr pa fahkwack luhlahlfongi luhn Mwet Sap ac Mwet Pahluh, kacl Jisus Kraist, muh El misac, pihkihnyucki, ac sifilpac moulyak ke lwen se ahktolu, ac sowack nuh lucng; ac ma nuh kwewa sahyac suc ma ke luhlahlfongi lasr uh ma na weacng” (Teachings of Presidents of the Church: Joseph Smith [2007], 49).

Nga fahkwack luhlahlfongi muh ke kuht ukwe srihkasrak luhn Mwet Lahngo lasr, Jisus Kraist, ac sruhkwack pahosr ke mukwikwi in ahkkweye mwet pahluh kuloh lasr, Prestuhn Thomas S. Monson, kuht ac konwacack mihs, ohiyac wo, ac engan, ac kuht fah kang ma wo luhn acn (Zion) ke lwen sahflah inge (liye D&C 64:34). Ke inen Jisus Kraist, amen.