Kuh se nuh ke Muhtweng
Sel Elder Richard J. Maynes
Ke Prestuhnsi luhn Mwet Itngucul
Pahkuhk lasr in muhtweng nuh ke sahflah ke ohiyac suwohswohs ac fah oacpacna kuh luhn fahkwack luhlahlfongi lasr ac ke loaliyacn eklac lasr.
Lututacng nuh kwewa ke kuht nguhtwaclihk, kuht liye sie lwen sasuc sesseslah ke ma upac luhn moul uh. Ma upac inge tuhkuh ke ohyiac pucspucs: tikuclkucl ke mahno, fohs ke mani, ma upac inmahsrlon mwet, fohs luhn nuhnak, ac finne tikuclkucl ke luhlahlfongi luhn sie.
Puhsiacn ma upac kuht sun ke moul inge kuh in ahkwoyeyucklac kuh kuhtangyucklac; ne ohinge, ma sahyac kuh in upac in kahlwem kac ac upac in kuhtangyucklac ac fah wi kuht nuh ke kuht misac. Ke kuht kahkahsrihk in muhtweng ma upac kuht kuh in ahkwoyelah ac ke kuht sikalweni in muhtweng ma upac ma kuht koflah in ahkwoyelah, yohk srihpac kuht in esam lah kuh in nguhn kuht muhsahi fah kahsrwe kuht in muhtweng ma upac nuh kwewa kuht sun ke moul uh.
Tamuhlwel ac tahmtahel, oasr Pahpah luhngse se tuhmwacsr Inkuhsrao suc orwaclah moul lasr fin facluh tuh kuht kais sie in lotwelah ke lesin kuht enenuh in luti in kuh in fal nuh ke moul ma pahtpaht Yohrohl.
Sramsram soko ke moul lal Joseph Smith use sie srihkasrak ke mwe luti se inge. Mwet Pahluh ac kuhtuh mwet weluhl muhta in presin fin acn Liberty, Missouri, ke kuhtuh mahlwem. Ke elos kweok ke iwen kaclpous, Mwet Pahluh Joseph el kwacfe nuh sin Leum ke pruhe puhsisacl lal tuh mwet luhlahlfongi ah in sukohsohklah liki kweok lalos in pacl sac. Leum El topuk in luti Mwet Pahluh Joseph, ac kuht nuh kwewa, lah ma upac kuht puhlakihn, fin kuht kuhtanglah ke muhtweng, ac fah ma ac wo nuh sesr sifacna. Leum El topuk kihsensiyuck lal Joseph ah in fahk muh:
“Nguhn lal enenuh in sesseslah ke mislac. Mwe lokoalok ac mwe toasr lal fah sahflah ke kihtin pacl na srihsrihk.
“Ac el fin muhtweng ma nuh kwewa, God El ac fah ahkenganyacl luhng.”1
Pahpah Inkuhsrao El oakiyac fuhfahsryucsr lasr ke moul in mwe srihke se nuh ke ohiyac wowo lasr. Ikacklah nuh sesr kwewana ohiyac wo ac fohkfohk na utuckuh sulaclah suwohs in sulaclah lah piac kac inkacnek kuht ac fahsr kac uh. Oacna ke mwet pahluh Samuel el luti, kuht sukohsohk in sifacna oruh ma nuh sesr, mweyen God El use nuh sesr etwacack ac El oruh kuht in sukohsohk.”2
Pahpah Inkuhsrao El oacyacpac akihlen lah ke srihpen kuht moul in mahno sulaclah lasr uh ac tiac pwacye kuh suwohs pacl nuh kwewa. Mweyen kuht tiac suwohs ac mweyen kuht orwaclah tahfonglac, kuht enenuh kahsruh in fohlohk nuh Yohrohl. Kahsruh enenweyuck inge tuhkuh ke mwe luti, srihkasrak, ac kihsac in iwaclah luhn Jisus Kraist. Kihsac in iwaclah luhn Mwet Lahngo acse molwelah ac engan nuh sesr ke pacl fahsruh ke ip yohk ke auliyak. Fin suwohs ac pwacye auliyak lasr, Iwaclah sac kuh in kahsrwe kuht in eklac nwacsnwacs, ekuhllah ohiyacsr, ac muhtweng kwewa ma upac nuh sesr.
Kuhtanglah el ip yohk se konweyuckyak ke mwe luti luhn Jisus Kraist. Arulacna yohk srihpac mweyen wolacna ke pacl fahsruh lasr uh luhmweyuck nuh ke kuh lasr in muhtweng ke suwohswohs.
Ke 2 Nephi 31 mwet pahluh Nephi el luti kuht lah tukun kuht eis tari akwuck muhtahl ke pacptais ma Jisus El eis ac eis mwe sang luhn Nguhn Muhtahl, kuht enenuh in kwacfeacng nuh met, ipeis ke kahs luhn Kraist, ac moniyuck nuh ke sahflah, Pahpah El fahk tari muh [kuht] ac fah eis moul ma pahtpaht.”3
Ohinge, in kuh in eis mwe sang se ma yohk emet ke mwe insewowo luhn Pahpah tuhmacsr Inkuhsrao, suc moul ma pahtpaht, kuht enenuh in ahksahfyelah orekma enenweyuck ke akwuck na tahfwelah in liyacacng olweacng kac. In kuhtuh pac kahs, kuht enenuh in kuhtanglah ke muhtweng.
Pahkuhk lasr in muhtweng nuh ke sahflah ke ohiyac suwohswohs ac fah oacpacna kuh luhn fahkwack luhlahlfongi lasr ac ke loaliyacn eklac lasr. Ke fahkwack luhlahlfongi lasr uh fokoko ac kuht eklac na pwacye nuh ke wosasuc luhn Jisus Kraist, sulaclah lasr uh fah mokleyuck sin Nguhn Muhtahl, ac fah nuhnak ke Kraist, ac fah ahkkweye luhngse lasr in muhtweng nuh ke sahflah ke ohiyac suwohswohs. Fin fahkwack luhlahlfongi lasr uh muhnahs, ac eklac lasr uh tiac loal, mwe sensen kac uh ac yohk oruh kuht ac srihfeyuck ke facsin kikiacp luhn facluh in sulaclah ma koluk.
Nga luhngse akacsruhi ke sie ma sikyak suc ahkuhtweyac kuh ma enenweyuck in muhtweng ke mahno na kapsruh nuh ke kuh enenweyuck in muhtweng ke Nguhn. Tukun nga fohlohk ke misin luhk ah oasr pacl wo luhk in sritacl pahsket pohl ye mwet kol ac mwet sihm ahkfuhlwactyeyuck se ke sie college fin acn California. Mwet kol sritacl se inge arlac nuhnkuh na pwacye tuhlihk sritacl lal inge in kuh in mahno met liki pacl in muhtwacwacack luhn sritacl inge. Sie sin ahkpah lal met liki na sie sesr kahlyac sie pohl ke acn in ahkpah pa in kahsruhsr cross country ke ohl soko sisken lutlut sac ke kihtin pacl na. Nga esam pacl se emet nga srihke in oruh pactuhn in kahsruhsr se inge ke nga fohlohk ke misin luhk ah: Nga pahngon ngwac misac.
Ac lusen wik ekahsr ke ahkpah upac in kuh in ahksahfyelah kahsruhsr ke pactuhn sac ke lusen pacl ma mwet kol sac el oraclah muh finsrak se. Puhla na wowo se in tiac kuh in kahsruhsr muhkwena ke pactuhn tuhsruhk in oacyacpac lihksrweniyak ke nga apkuhran nuh ke sahflahien lain ah.
In suhmaht ke sritacl pahsket pohl, kom enenuh in oruh in fokoko lomom. Mahno fokoko se oasr molo, ac molo sac pa kihsackuhnlah, insacnweacng, ac liyekomyang sifacna. Muhtweng in nguhn oacyacpac tuhkuh ke sie molo. Molo sac pacna: kihsackuhnlah, insacnweacng, ac liyekomyang sifacna.
Fahkwack luhlahlfongi se, oacna monum, enenuh in oakiyac ohiyac se kom fin luhngse muhtweng. Na kuht ac oruh fuhkah fahkwack luhlahlfongi lasr uh in akwuck? Kuht tiac kuh in oraclah mahnosr nuh ke atacn mwet pahsket pohl wowo se ke kuht liye pahsket pohl ke tv muhkwena. Oacpacna, kuht tiac kuh in oruh fahkwack luhlahlfongi lasr in akwuck ke kuht liye jacnuhruhl kanfracns ke tv uh muhkwena. Kuht enenuh in luti ac lotwelah ma yohk srihpac ke wosasuc luhn Jisus Kraist, na kuht enenuh in oruh kuhiyacsr nohfohn in moulkihn. Pa inge ohiyac kuht ac eklac mwet tuhma lutlut luhn Jisus Kraist, ac pa inge ohiyac kuht muhsahi sie fahkwack luhlahlfongi ke muhtweng uh.
Ke kuht puhlakihn ma upac in moul ac luhngse lasr pa in ukwe ohiyac luhn Jisus Kraist, arulacna yohk srihpac in ahkolah ke nguhn. Ke kuht ahkolah ke nguhn kalmac pa kuht ahkyohkyaclihk kuh kuh muhtweng—kuht ac fah puhla ohiyac wo ke nguhn. Kuht ac fah puhla wo na pwacye ke nguhn tuh kuht fah tiac tui in sulaclah ma wo. Kuht fah eklac tiac mukwikwi ke luhngse ac kuh lasr in moulkihn wosasuc. Oacna ke sie mwet sihm lukmac el fahk, “Kom enenuh in eklac yot se ma infacl ah tiac kuh in uslah.”
Ke srihpen kuht puhla ma upac lwen nuhkwewa, arlac yohk srihpac kuht in ahkkweye kuh luhn nguhn in kuht lwen nuh kwewa. Ke kuht muhsahelah kuh luhn nguhn, facsin kikiacp luhn facluh, oacpacna ma upac kuht puhlakihn lwen nuh kwewa, ac fah tiac arlac ahkmuhnahsye kuh lasr in muhtweng ke suwohswohs.
Mwe srihkasrak wowo ke kuh luhn nguhn tuhkuh ke sramsram mahtuh ke sucu lasr sifacna. Inmahsrlon sramsram pucspucs sin mwet mahtuh lasr, kuht ac kuh in konwacack srihkasrak ma fahkwack ohiyac wowo ke muhtweng.
Sie sramsram mahtuh ke sucu luhk ah ahkuhtweyac ip yohk se inge. Pahpah mahtuh tuhmacn pahpah tuhmuhk Joseph Watson Maynes el isuslac ke 1856 fin acn Hall, Yorkshire, England. Sucu lal ah welah Alu uh fin acn England na elos som nuh Salt Lake City. El pahyuckyak sel Emily Keep ke 1883, ac elos eklac ninac ac pahpah tuhmwacn tuhlihk alkosr. Joseph el tuh pahngonyuck in kuhlwacnsap ke misin fohn se ke Jun 1910, ke el yac 53 matwac. Ke kahsruh luhn muhtwacn kiyacl ac tuhlihk alkosr, el fohlohklac nuh ke acn sel England in kuhlwacnsap ke misin lal.
Tukun el kuhlwacnsap arlac fokoko ke apkuhran in yac luo, el kahsruhsr ke pacskuhl nahtuhl wi mwet se weluhl nuh ke toeni luhn Sacnri Skul fin acn Gloucester, England, ke wil nahtuhl ah fokwelihk. El srolah liki pacskuhl nahtuhl ah in liye lah luhpahkah ma muhsahllah. Ke el liye lah upac ma muhsahllah ac paht kuhtuh in oreklac, el fahk mwet se weluhl ah in som muhtwacwacack oruh Alu ah ac el ac fah som kihtin pacl. Ke na pacl se el fahk ma inge tari, el puhtatlac nuh in fohk ah. El misac ke kihtin pacl ah ke sie heart attack.
Joseph Watson Maynes el tiacna sifil liye muhtwacn kiacl ac tuhlihk alkosr nahtuhl ke moul se inge. Elos tuh fohlohkuhnlah mahnol ac oruh alu in mas lal ke Waterloo Assembly Hall mahtuh sac. Sramsram se tuh oreklac sel Elder Anthony W. Ivins ke U luhn Mwet Sap Singucul Luo luti kuht sie lesin yohk srihpac ke moul, misac, ac muhtweng. “Pa inge ma wosasuc el use nuh sesr—tiac mwe lain misac, tuhsruhk kuhtanglah fac ke finsrak ma oasr yohrohsr ke sifilpac moulyak wolacna. … Sikyak nuh sel [Joseph Maynes]. … Use nuh sesr mwe ahkengan, puhla wo, ac engan, in etuh lah mwet fihliyac moul lalos ke suwohswohs, ke luhlahlfongi, pwacye nuh ke luhlalfongi.”4
Sramsram soko luhn sucu luhk inge mokleyuc in srihke kuhiyuck nohfohn in ukwe srihkasrak ke muhtweng ac kuh luhn nguhn sruhmuhnyuck sin pahpah mahtuh tuhmacn pahpah tuhmuhk ah. Nga oacyacpac mokleyuck ke luhlahlfongi luhn muhtwacn kiyacl, Emily, suc moul lal tukun misac lal Joseph ah pwacye lah arlac toasrlacna. Fahkwack luhlahlfongi lal fokoko ac eklac lal fohnlah ke el sislah lusen moul lal in pwacye nuh ke luhlahlfongi ke el muhkwena kahsruh tuhlihk alkosr nahtuhl.
Mwet Sap Paul el fahk, “Lwelah kuht in fihliyac nuh sahyac ma toasr nuh kwewa, ac ma koluk suc fihsrwacsr in ahkkolukye kuht, ac lwelah kuht in kahsruhsr ke muhtweng akuhtuhn se oakiyucki nuh sesr.”5 Akuhtuhn se ma fihliyucki nuh ye muhtahsr fin facluh se inge el kahsruhsr loeloes ma srihke muhtweng luhn mwet kahsruhsr inge sesseslah ke mwe tikuclkucl. Mwe tikuclkucl ke kahsruhsr se inge pa ma upac kuht puhla ke lwen nuh kwewa kuht tuhkahkwek. Kuht oasr facluh in kahsruhsr ke akuhtuhn se inge, in orekmakihn sulaclah nwacsnwacs, ac in sulaclah inmahsrlon wo ac koluk. Fin kuh in ahkfuhlwactyeyuck ac ahksahfyelah kahsruhsr sac ac fohlohklac nuh yurin Pahpah tuhmwacsr Inkuhsrao, kuht ac enenuh in moli molin kihsackuhnlah, oaru, ac liyekomyang sifacna. Kuht enenuh in sroacng nuh ke ohiyac luhn nguhn. Kuht enenuh in ahkyohkye kuh ke nguhn. Kuht enenuh fahkwack luhlahlfongi fokoko ma ac kohllah nuh ke eklac, ac sahflahiyac kuht fah konwacack mislac in kuht ac kuh ma enenweyuck in muhtweng kuhtwena ma upac ma kuht sun.
Na oacna sie ma upac tuhkuh nuh sum ke kais sie lututwacng, esam—ke kuh luhn nguhn kom kapkapwack, weacng kahsruh luhn Leum, ke sahflahiyacn kahsruhsr sac kom ac fah kuh in engan ke fuhrkihn lah Mwet Sap Paul el ahkuhtweyac ke el fahk:
“Tuh nga ahkolah in kihsackihnyuck, ac pacl in som luhk apkuhran.
“Nga mweuni sie mweun wowo, nga ahksahfyelah ma kunuck, nga liyacacng luhlahlfongi:
“Muhtwacwacack inge oasr susu luhn suwohswohs ahkolah saneyuc, suc Leum, mwet nuhnuhnkuh suwohs, fah use nuh sihk ke lwen sahflah.”6
Nga fahkwack luhlahlfongi luhk ac mwe loh luhk ke ma pwacye luhn sie Pahpah Inkuhsrao suc luhngse ac plwacn wolacna luhn engan ma pahtpaht Lal, suc uskuhtme ke pacl se inge nuh facluh. Lwelah Nguhn luhn Leum in mokle kuht nuh kwewa in muhsahikuht sifacna ke kuh in muhtweng. Ke inen Jisus Kraist, amen.