Painyuck nuh ke Toeni
Sel Prestuhn Thomas S. Monson
Pruhe luhk tuh kuht in kuh in sesseslah ke Nguhn luhn Leum ke kuht lohng ac lutlutkihn.
Fuhkah woiyac, tamuhlwel ac tahmtahel wiyuck, in sifilpac ohsun nuh sie. Tuhfahnah in ahluhkwelah lusen yac 183 ke Alu uh tuh akwucki sel Mwet Pahluh Joseph Smith, ye kolyuck luhn Leum. Ke miting sac ke Eprel 6, 1830, oasr mempucr ohnkohsr ke Aluh uh.
Nga engan in fahk lah wik luo tari ah pihsacn mempucr ke Alu uh sun miliacn 15. Alu uh fahfahlacna in kapkapwack ac ekuhllah moul luhn mwet pucspucs ke yac nuh kwewa. Ma inge osrwaclihk fin facluh ke un misinacri lasr uh suk elos suc suk ma pwacye.
Tuhfahnah in ahluhkwelah yac se ke nga tuh sulkackihn kihlyucki luhn matwacn misinacri ma kuhlwacnsap. Ke pacl sac me, pihsacn misinacri pacl nuh kwewa ma kuhlwacnsap uh yohkwaclihk liki 58,500 ke Ohktopa 2012 nuh ke 80,333 misenge. Fuhkahwolacna ac mokleyuck luhn top kuht liye uh!
Wacngihn mwe fahkwack fal liki na ma oasr ke ma suhmuhslah muhtahl, wacngihn kunohkohn enenweyuck yohk liki, wacngihn mwe ahkuhtweyac suwohs liki na masap ma utuckuh sin Leum suc moulyak ke El tuh sikyak e Galilee nuh sin mwet tuhma lutlut singucul sie ah. El fahk, “Ke ma inge kowos som nuh yurin mwet in muhtuhnfacl nuh kwewa fin facluh, pacptaiselos ke Inen Pahpah, ke Wen, ac Nguhn Muhtahl.”1 Mwet Pahluh Joseph Smith el fahk lah tukun ma nuhkwewa fwacklac, kunohkohn se ma wo emet ac yohk srihpac emet uh pa in luti Wosasuc.2 Kuhtuh suwos suc wi misenge ac fah srwackna esam kahs lal Prestuhn David O. McKay, suc oraclah pohloh kahs ma akihlenyuck muh “Mempucr nuhkwewa in misinacri!”3
Nga tahfwelah sang kahs luhk sifacna nuh ke kahs lalos. Pa inge pacl ma mempucr ac misinacri uh in tuhkweni nuh sie, in tuhkweni orekma, in orekma ke imac in grape luhn Leum in acse mwet uh nuh Yohrohl. El ahkolah inkacnek uh nuh sesr tuh kuht in akacsruhi ke wosasuc uh ke kain in inkacnek pucspucs, ac El fah kahsrwe kuht ke orekma lasr kuht fin mukwikwi ke luhlahlfongi in oruh orekma Lal.
In kahsruh karihngihn pihsacn un misinacri puhsacni lasr uh, nga tuh siyuck sin mempucr lasr ke pacl somlah ah in sang, ke ma elos kuh in oruh, nuh ke mani luhn misinacri ke ward kuh nuh ke Mani luhn Misinacri Nuh Kwewa ke Alu uh. Top nuh ke nguhsr se ingacn arulacna wo ac sang kahsruh tausin ke misinacri suc ohiyacn moul upac uh tiac lwelah nuh selos in sifacna kahsrwelos. Nga fahk kuloh nuh suwos ke mwe sang na yohk lowos an. Enenuh luhn kahsruh uh srwackna fahsr, tuh sahp kuht in kuh in fahfahlacna in kahsrwelos suc kena yohk in kuhlwacnsap tuhsruhk elos tiac, sifacna, kuh in oruh.
Inge, tamuhlwel ac tahmtahel, kuht tuhkuh nuh inge in lutiyuck ac mokleyuck. Pweng pucspucs, ma fahk ke kain in sifac ke wosasuc, fah utuckuh ke lwen luo fahsruh uh. Mukul ac muhtwacn suc fah sramsram nuh suwos an tuh suk kahsruh luhn inkuhsrao ke pweng ma elos fah usot.
Pruhe luhk tuh kuht in kuh in sesseslah ke Nguhn luhn Leum ke kuht lohng ac lutlutkihn. Ke inen Mwet Lahngo lasr, Jisis Kraist, amen.