Yac Kom Luhngse Kwelac?
Sel Elder Timothy J. Dyches
Ke Mwet Itngucul
Ke kuht auliyak ac eklac nuh sin Leum, kuht eklac fohnlah, ac mwacta lasr wacngihnlac.
Ke sie pacl engan in mongo fin acn Jerusalem, Mwet Lahngo El som liki un mwet an in suk mwet ma enenuh yohk emet. El konwaclosyak fin acn Bethesda, luhluh in kof ma oasr srucwuclsrihsr limekohsr kac sisken muhtuhnpot luhn sip ma mwet mas som nuh we.
Wosasuc lal John fahk nuh sesr lah sisken luhluh in kof sac “oasr mwet mas pucspucs oan fin srucwuclsrihsr inge, mwet kun, mwet maskihn niyac, ac mwet ul elos soano kof uh in noanoayak.
Mweyen kuhtuh pacl uh, sie lihpufacn luhn Leum ac oactui nuh in luhluh sac ac oruh kof uh in noanoayak. Mwet mas se ma ac sroacng emet nuh in luhluh uh tukun kof uh noanoayak uh ac kwelac liki mas lal uh.” (John 5:3–4).
Oasr petsac sroal kahto se sel Carl Bloch ke Mwet Lahngo El som nuh we ma sihmlac Kraist Ahkkweye Mwet Mas ke Luhluh in Kof luhn Bethesda. Bloch el srolwaclah Jesus ke El kahkahsrihk in ikucslah lohm nuknuk, in liye “mwet mas” (John 5:7) se suc oan sisken luhluh in kof, soano na. Inge kahs mas sramsram ke mwet se suc muhnahs ac ahkyohkye pahkomuhta ac kuhlwacng luhn Mwet Lahngo, suc tuhkuh kahkahsrihk in kahsruh nuh sin mwet suc tiac kuh in kahsrwelos sifacna.
Ke sroal sacn, mukul mas sac oan ten ke nguhna uh, ullac ac ahkkolukyeyuck tukun el kweok ke mas lal ke yac 38.
Ke Mwet Lahngo El ikucslah lohm nuknuk ke paho se, El suli ke paho se sahyac ah ac siyuck sie kihsen siyuck loal: “Yac Kom Luhngse Kwelac?”
Mukul sac topuk, “Leum, wacngihn mwet luhk in fihliyucwi in luhluh uh ke pacl se kof uh noanoayak uh. Pacl nuh kwewa nga ac srihke in sroacng nuh kof uh, oasr na mwet ac sroacng mwet likiyuc” (John 5:6–7
Nuh ke ma upac emet luhn mukul sac, Jisus El topuk ke top kuh ac lut:
“Tuhkahkwack, sruhkwack mwe oan kiyom, ac fahsr.”
“Na mukul sac kwelac in pacl sacna. El sruhkwack mwe oan kiyacl ac muhtwacwacack in fahsr” (John 5:8–9).
Ke sie srihkasrak sahyac, Luke el fahk nuh sesr lah Mwet Lahngo, ke El fahsr nuh acn Jerusalem, El ohsun nuh sin mwet lepa 10. Ke srihpen mas lalos, elos “tu acn loes” (Luke 17:12). Elos mwet srisrilac—fohkfohk ac sruhngwacyuck.
“Jisus, Leum, Pahkotwen nuh sesr,” elos tuhng (Luke 17:13)—, ke kahs sahyac, “Oasr kuhtwena ma Kom kuh in oruh kacsr?”
Mwet Ono Suhmaht sac, sesseslah ke luhng kuhlwacng, srwackna etuh lah luhlahlfongi enenweyuck met liki usrnguck ac na fahk nuh selos, “Fahsrot ac fahk mwet tol uh in liye kowos” (Luke 17:14).
Ke elos som ke luhlahlfongi, usrnguck an sikyak. Yac kowos kuh in nuhnkuh ke ohiyacn engan elos puhla ke fahsr ac liye mahnolos ahknwacsnwacsyeyuck, ahkkweyeyuck, ac fohlohkihnyuckyak ye muhtahlos?
“Ke sie selos liye lah el nwacsnwacslah, el fohlohkoh ac kaksakihn God ke puhsra luhlahp,
“El faksucfi sisken nien Jisus ac sang kuloh nuh sel. …
“Ac Jisus el fahk nuh sel, Tuyak ac som: luhlahlfongi lom ahkkweyekomlac.” (Luke 17:15–16, 19).
Ke nga orekma ke taktuh se ac mwet laslas mah se ah, nga porongo nuh ke in ahkwoye ac ahksuwohsye mahno uh, Jisus Kraist ahkkweyelah mahno, nuhnak, ac nguhn, ac ahkkweyeyucklac Lal muhtwacwacack ke luhlahlfongi.
Yac kowos esam ke luhlahlfongi ac engan lowos sesseslah ne lucng? Esam pacl se kowos konwacack luhlahlfongi lowos kuh ke God El ahkpwacyei kowos pa mukul kuh muhtwacn Nahtuhl ac El luhngse kowos na pwacye—ac kom puhla fohnlah? Fin pacl se ingacn oacna in tuhlac, kuh in sifilpac konweyuckyak.
Mwet Lahngo El luti kuht ke ohiyac in kwelac, in fohnlah, kuh eklac kwelac:
“Fahsruh nuh yuruk, kowos suc orekma ac tohtohlah, tuh nga fah usot monglac nuh suwos.
“Eis srenenuh luhk nuh fowos ac lutlut sihk, tuh nga fakpahp ac inse puhsisacl; ac kowos fah konwacack monglac.
“Tuh srenenuh luhk fihsrwacsr, ac mwe utuck luhk muhlahlah” (Matthew 11:28–30).
“Fahsruh, fahsr tuhkuhk” (Luke 18:22) suli kuht in som liki moul mahtuh ac kena luhn facluh ac eklac nuh ke mwet sasuc nuh sin suc “ma mahtuh wacngihnlac, ac ma sasuc tuhkuh” (2 Mwet Korint 5:17), finne ke sie heart luhlahlfongi sasuc. Ac kuht sifilpac oreklac fohnlah.
El fahk lah kuht enenuh in fototoi nuh Sel ac El ac fototoi nuh sesr; kuht enenuh in oaru in Sokol ac kuht ac Konwaclwack; kuht enenuh siyuck ac kuht ac eis; kuht enenuh tongtong ac El ac ikucslah nuh sesr (liye D&C 88:63).
Ke kuht fototoi nuh Sel, kuht akihlen lah moul uh enenuh in upac ac lain ke ma nuh kwewa tiac ma koluk ke plwacn in molwelah (liye 2 Nephi 2:11). Lain, sahyac, pa ma enenuh se luhn moul ac ahkfokokoye kena lasr ac ahksuwohsye sulaclah lasr. Eklac luhn moul uh kahsrwe kuht in oraclah kuhpahsr yurin God—ac suhmuhslah petsac Lal ke luhmahsr ke kuht sang insiyacsr nuh Sel (liye Alma 5:19).
“Oruh ma inge in esamyuc” (Luke 22:19) pa ma Leum lasr El siyuck ke El oakiyac ma kuht pahng kuhfa luhn Leum. Akwuck inge ke fuhlao ac kof uh ahknwacsnwacsyelah olwelah muhtwacn kuht orwaclah yurin God ac suli kuh luhn Iwaclah nuh ke moul lasr. Kuht ahkkweyeyucklac ke in som liki mwe pahlah ac ohiyac ma ahkkwekweye insiyacsr ac inkwacwacsr. Ke kuht eslah kuhfwen mweun luhn lihkkeke lasr (liye Alma 23:7), kuht in eklac ac mwet sukohsohk in sulwaclah [sesr sifacna] (liye D&C 58:28), tiac sifil ahkkunyeyuck ke kuhtasrihk luhn Setuhn kuh sohlohnglah ke puhsra okahrkahr luhn facluh.
Ke kuht auliyak ac eklac nuh sin Leum, kuht eklac fohnlah, ac mwacta lasr wacngihnlac. Tuh kuht kuh in siyuck Leum, fuhkah ma inge sikyak. Leum El ac topuk lah ma inge sikyak ke srihpen luhlahlfongi lasr ke Kraist ac fahk nuh sesr in fahsr nuh met, luhlahlfongi lasr ahkkweye kuhtlac (liye Enos 1:7, 8).
Corrie ten Boom, sie muhtwacn Dutch Kristin oaru, konwacack ahkkweyeyuck se inge ke el wi camp in lohacng ke Mweun luhn Facluh Ahk Luo. El kweok yohk, tuhsruhk tiac oacna muhtwacn wiyacl Betsie, suc misac ke camp ah, Corrie el moullac.
Tukun mweun an, el sramsram pacl puhs ke ma sikyak nuh sel ac ke ahkkweyeyuck ac nuhnak muhnahs. Ke sie pacl ah sie mwet topang Nazi suc wi in oruh ma upac nuh sel Corrie sifacna fin acn Ravensbrück, Germany, tuhkuh nuh sel, enganwack ke pweng lal ke nuhnak muhnahs ac luhngse luhn Kraist.
“‘Nga sruikihn pweng lom, Fraulein,’ el fahk. ‘In nuhnkuh lah, oacna kom fahk, El ahknwacsnwacsyelah ma koluk luhk!’
“Pahol kolyucklac in usrukyac pouk,” Corrie el esam. “Ac nga, suc fahkwack pacl puhspuhs … mwe enenuh in nuhnak muhnahs, fihliyac na pouk siskuck.
“Finne ke nuhnak foloyak, ac fohlohksahk tuhkuh nuh sihk, nga liye ma koluk kwaclos. … Leum “Jisus, nga pruhe, use nuhnak muhnahs ac kahsruh nga in sang nuhnak muhnahs nuh sel.
Nga srihke in isracsr, [ac] nga muhnahs in sang pouk. Nga tiac kuh. Wacngihn puhla luhk, wacngihn puhla fuhsr kuh luhngse pwacye. Na nga sulpac pruhe. Jisus, nga tiac kuh in sang nuhnak muhnahs nuh sel. Use nuhnak muhnahs Lom.
“Ke nga sruok pahol ma wolacna emet uh sikyak. Ke finpihsuck sisken pouk ac nuh lun pouk oasr puhla oacna sahromrom tuhkuh nuh sihk kacl, ac ke insiyuck nga muhtwacwacack in puhla luhngse nuh sin mwet se inge ma apkuhran in kuhtangyuclac.
“Na nga konwacack lah tiac ke nuhnak muhnahs kuh ohiyac wo lasr muhkwena pa facluh kuh in eklac, tuhsruhktuh Kacl. Ke El fahk nuh sesr in luhngse mwet lokoalok lasr, El sang, wi pac masap, luhngse pac.”1
Corrie ten Boom el ahkkweyeyucklac.
Prestuhn Thomas S. Monson el fahk, “Oasr moul sefanna ma ahkkweye mwet suc kweok kuh oasr mwe ahsor selos—El pa Leum Jisus Kraist.”2
Kowos fin tiac puhla nwacsnwacs, luhngseyuck, engan, kuh fal, esam “nohfohnna ma sesuwohs ke moul uh kuh in ahksuwohsyeyuck ke Iwaclah luhn Kraist.”3 Oruh in oasr luhlahlfongi ac mongfihsrwacsr ke pacl ac srihpac luhn Mwet Lahngo nuh sum. “Nimet fosrngah, ac luhlahlfongi na” (Mark 5:36).
Luhlahlfongi lah Leum El srwackna srihke in ahkwoye nguhnasr ac ahkkweyelah insiyacsr. El soano ke sruhnguhl ac tongtong. Lwelah kuht in topuk ke sifil muhtwacwacack ke pruhe, auliyak, nuhnak muhnahs, ac muhlkuhnlah. Lwelah kuht in luhngse God ac kuhlwacnsapuh mwet tuhlan lasr ac tu ke acn muhtahl ke sie moul oreklac nwacsnwacs. Mukul muhnahs se ke inluhluh Bethesda, mwet lepa wi fuhfahsryucsr nuh Jerusalem, ac Corrie ten Boom el oreklac fohnlah. “Yac Kom Luhngse Kwelac?” “Tuhkahkwack, ac fahsr. Tuh “pahkotwen Lal fal” (2 Corinthians 12:9), ac kom fah tiac muhkwena fahsr.
Nga etwaclah lah God El moul. Nga etuh lah kuht pa tuhlihk Nahtuhl ac El luhngse kuht ke kuht sifacna ac ma kuht kuh in sun. Nga etuh lah El suhpwaclah Wen Nahtuhl nuh facluh in iwaclah ke mwet nuh kwewa ac mwet suc sruok wosasuc Lal ac Ukwacl kuh in ahkkweyeyucklac ac fohnlah—ke pacl lal sifacna, ac ke inkacnek lal sifacna, ac fal nuh ke kena lal sifacna (liye D&C 88:68) ke luhngse pwacye Lal. Pa inge mwe loh luhk nuh suwos ke inen Jisus Kraist, amen.