2010–2019
Faalatalata Atu i le Nofoalii o le Atua ma le Lototele
Oketopa 2014
10:23

Faalatalata Atu i le Nofoalii o le Atua ma le Lototele

Saunia e Elder Jörg Klebingat

O Le Fitugafulu

Official portrait of Elder Jorg Klebingat, First Quorum of the Seventy, 2014. Sustained 5 April 2014.

E ala i le faaaogaina o le Togiola a Iesu Keriso, e mafai ai ona e amata faateleina lou lototele faaleagaga i le asō pe afai e te naunau e faalogo ma galue.

I se fua o le 1 i le 10, e faapefea ona e fuaina lou lototele faaleagaga i luma o le Atua? E i ai sau molimau patino ua lava au foai ma galuega o loo faia i le taimi nei o se tasi o le Au Paia o Aso e Gata Ai e maua ai le ola e faavavau? E mafai ona e fai ifo ia te oe lava o loo fiafia le Tama Faalelagi ia te oe? O a ni manatu e oo mai i lou mafaufau pe afai e fai sou faatalanoaga patino ma lou Faaola i le tasi le minute mai le taimi lenei? Pe o le a pulea e agasala, faanoanoaga, ma vaivaiga ia foliga o lou lava tagata, pe o le a tau na ona e lagonaina o se naunautaiga fiafia? Pe o le a e tepa atu ia te Ia pe ‘alo mai Ona fofoga? Pe e te tūtū i le faitotoa pe savali atu ma le mautinoa ia te Ia?

Soo se taimi lava e le mafai ai e le fili ona faatauanauina le Au Paia lē atoatoa ae taumafai e pei o oe ina ia fulitua i ou talitonuga i se Atua patino ma alofa, na te faaaogaina ni togafiti matautia ina ia e taumamao ai mai le Atua. E iloa e le fili o le faatuatua ia Keriso—le ituaiga faatuatua lea e maua mai ai e le aunoa le alofa mutimutivale agamalu ma e oo lava i vavega tetele—e vaavaalua lea ma se lototele patino o loo e taumafai e filifili le mea sa’o. Mo lena mafuaaga o le a ia saili ai ina ia maua lou loto e ta’u atu ia te oe ni pepelo—ni pepelo faapea e le fiafia le Tama Faalelagi ia te oe, e le mafai ona e maua [faamanuiaga] o le Togiola, e leai se uiga o lau taumafaiga, e sili atu isi tagata ia te oe, e te le agavaa, ma le tele o faaupuga o lena lava autu leaga.

Afai e te faatagaina nei leo e faatamaia lou agaga, e le mafai ona e faalatalata atu i le nofoalii o le Atua ma se lototele moni. Po o a lava au mea e fai, po o a foi mea e te tatalo ai, po o a lava ou faamoemoega o i ai mo se vavega, o le a i ai pea lava le le mautonu faaletagata lava ia e faatamaia lemu ai lona faatuatua—e le na o lou faatuatua i le Atua, ae o lou lava foi lototele. O le ola ai i le talalelei i lenei tulaga e le malie, ma e le maloloina foi. O le mea e sili ai, e matua le talafeagai lava! O le faaiuga e sui e ā oe lava ia—na o oe lava.

Ou te fia faasoa atu ni fautuaga aoga se ono lea, afai e usitaia, o le a o ese ai nei leo leaga ma toefuatai mai ai ia te oe le ituaiga o faamautinoaga filemu ma le lototele faaleagaga e mafai ona e mauaina pe a e manao i ai. E ui i se fua faatatau sa e tuuina ia te oe i luga o lena fua o le 1 i le 10, ae e ala i le faaaogaina o le Togiola a Iesu Keriso, e mafai ai ona amata faateleina lou lototele faaleagaga i le asō pe afai e te naunau e faalogo ma galue. O le a ou tautala atu ma le lototoa, faamoemoe ia faagaeetia ai ae le o le faatiga.

1. E nafa oe ma le tiutetauave mo lou lava manuia faaleagaga. Soia le tuuaia fua o isi po o ou tulaga, tuu le fai ‘alofaga i lou faia o agasala, ma tuu le fai ‘alofaga mo le mafuaaga e te le o taumafai atoatoa ai e usiusitai. Ia iloa e te “saoloto … e tusa ma la le tino” ma “saoloto e filifili le saolotoga ma le ola e faavavau” (2 Nifae 2:27). E silafia lelei lava e le Alii ou tulaga, ae Na te silafia lelei foi pe sa na o lou filifili ia aua nei e ola atoatoa i le talalelei. Afai o le tulaga lena, ia lava lou faamaoni e ioeina ai, ma taumafai ia atoatoa i ou lava tulaga. E faateleina le lototele faaleagaga pe a nafa oe lava ma le tiutetauave mo lou lava manuia faaleagaga e ala i le faaaogaina o le Togiola a Iesu Keriso i aso uma.

2. E nafa oe ma le tiutetauave mo lou lava manuia faaletino. E aofia i lou tagata lou tino ma le agaga (tagai MF&F 88:15). O le fafagaina o le agaga ae le amanaiaina le tino, o le malumalu lea, e masani lava ona taitai atu i ni feteenaiga faaleagaga ma tuuitiitia ai lou lava taua faaletagata. Afai e te le o maua le malosi faaletino, afai e te le maua le toafimalie i lou lava tino ma e mafai ona e faia i ai se mea, ia fai loa! Sa aoao mai Elder Russell M. Nelson e tatau ona tatou “mafaufau i o tatou tino o sa tatou lava malumalu” ma e tatau ona tatou “puleaina a tatou meatausami ma faamalositino mo le malosi faaletino” (“O I Tatou o Fanau a le Atua,” Liahona, Ian. 1999, 103).

Sa aoao mai Peresitene Boyd K. Packer o loo ua “tuufaatasia o tatou agaga ma tino i se auala o le a avea ai o tatou tino ma se meafaigaluega o o tatou mafaufau ma le faavae o o tatou tagata” (“The Instrument of Your Mind and the Foundation of Your Character” [Church Educational System fireside, Feb. 2, 2003], 2; speeches.byu.edu). O le mea lea, faamolemole ia faaaoga se faaiuga lelei po o a mea e ‘ai ma po o le a foi le tele o meaai e te ‘ai ai ma faamalositino soo ia maua ai e lou tino le malosi o loo manaomia. Afai e te malosi faaletino, filifili nei loa ia avea oe ma matai o lou lava tino ma amata se polokalama faamalositino masani ma umi, e fetaui ma lou gafatia, tuufaatasi ai ma le ‘ai i meaai paleni. E faateleina le lototele faaleagaga pe a pulea moni lava e lou agaga, faatasi ai ma le fesoasoani a le Faaola, lou tagata natura.

3. Ia talia ma le loto malie atoatoa le usiusitai o se vaega o lou olaga. Faailoa atu e le mafai ona e alofa i le Atua e aunoa ma le alofa foi i Ana poloaiga. E manino ma faigofie ia tulaga faatonuina a le Faaola: “Afai tou te alofa mai ia te au, ia outou tausi mai i a’u poloaiga” (Ioane 14:15). O le usitaia o poloaiga e te filifili i ai e aumaia ai faamanuiaga ua e filifilia, ma o le filifilia o se mea leaga nai lo se mea e sili atu ona leaga o le filifili lava lea o mea sese. E le mafai ona e matamata i se ata leaga ma faamoemoe ia maua se lagona mama ona e te lei matamata i se ata matuai leaga lava. O le usiusitai faamaoni i nisi o poloaiga e le faamaonia ai le le amanaiaina o isi. Sa fai mai tonu Aperaamo Linikone i le mea lea: “A ou faia se mea lelei ou te maua se lagona lelei, a ou faia foi se mea leaga, ou te maua se lagona leaga” (in William H. Herndon and Jesse William Weik, Herndon’s Lincoln: The True Story of a Great Life, 3 vols. [1889], 3:439).

Ia faia foi ni mea sa’o mo ni mafuaaga sa’o. Ua silafia e le Alii, o lē “manaomia … le loto ma le mafaufau malie” (MF&F 64:34) ma o “se ua ia silafia mafaufauga ma faamoemoega o le loto” (MF&F 33:1), le mafuaaga e te alu ai i le lotu—pe na o lou i ai iina i le tino po o e tapuai faamaoni. E le mafai ona e pese i le Aso Sa, “Papelonia, Papelonia, [I] tofa soifua” ona saili lea pe talia foi ana au i se taimi mulimuli ane (“Outou Faifeau o Isaraelu,” Viiga, nu. 198). Manatua o le faasamasamanoa i mea faaleagaga e lei avea lava ma fiafia. Ia avea le Ekalesia ma le talalelei toefuataiina ma ou olaga atoa, e le na o se vaega o lou olaga faaagafesootai po o fafo atu. O le filifili i le aso nei po o ai e te auauna i ai ua na o laugutu lava—seiloga ua e ola moni ai lava (tagai Iosua 24:15). E faateleina le lototele faaleagaga pe a e tauivi moni lava, mo mafuaaga sa’o, ina ia ola i se olaga faapaiaina, e ui i ni ou le atoatoa!

4. Ia matuai lelei lava i le salamo atoatoa ma ia vave. Talu ai o le Togiola a Iesu Keriso e matuai aoga lava, e tatau ona e faaaogaina ma le alofa i le 24/7, aua e le uma. Ia talia le Togiola a Iesu Keriso ma le salamo o ni mea e ao ona talisapaia ma faaaoga i aso uma e tusa ai ma faatonuga a le Fomai Sili. Ia faatulaga se uiga o le salamo fiafia ma olioli faifai pea, fiafia, olioli e ala i le avea ma ituaiga o olaga ua e filifilia. O le faia o lea mea, ia faaeteete i le faaosoosoga o le fai mea tuu, ma aua e te faamoemoe i le lalolagi e lagolago ia te oe. Ia taulai atu i le Faaola, ia popole atili i Ona manatu e uiga ia te oe, ma tuu atu i taunuuga e mulimuli mai. E faateleina le lototele faaleagaga pe a e salamo fiafia ma le loto i ai i agasala laiti ma tetele i le taimi e tutupu ai e ala i le faaaogaina o le Togiola a Iesu Keriso.

5. Ia matuai lelei lava i le faamagalo atu. “O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” (MF&F 64:10). Faamagalo atu i tagata uma, mea uma, i taimi uma, po o le taumafai ia faia, ma o le a maua ai le faamagaloga i lou lava olaga. Aua nei i ai ni feitagai, aua nei maitaitagofie, ia vave ona faamagalo atu ma faagalo, ma aua nei e mafaufau e le aafia oe i lenei poloaiga. E faateleina le lototele faaleagaga pe a e iloa ua silafia e le Alii e leai ni ou lagona le lelei i se isi tagata.

6. Ia talia tofotofoga, faafitauli ma “mea e faateia ai” o se vaega o lou aafiaga faaletino. Manatua ua e i ai iinei ina ia aoaiina ma tofotofoina, “e vaai pe [e te] faia mea uma o soo se mea e poloaiina ai [oe] e le Alii [lou] Atua” (Aperaamo 3:25)—ma ou te fia faaopoopo atu, “i soo se tulaga lava.” E faitau miliona o outou uso ma tuafafine ua tofotofoina pe o loo tofotofoina, aisea la o le a tuusaunoa ai oe? O nisi o tofotofoga e oo mai i lou lava le usiusitai po o le faatamala. O isi tofotofoga e oo mai ona o le faatamala o isi pe ona o lenei lalolagi pa’ū. A oo mai nei tofotofoga, o le a amata ona faasalalau atu e autau a le fili sa e faia se mea sese, ma o se faasalaga lenei, o se faailoga o le le alofa o le Tama Faalelagi ia te oe. Aua e te amanaiaina! Ae, taumafai e fosi se ataata, tepa atu agai i le lagi, ma fai atu, “Ou te malamalama, le Alii e. Ou te iloa lenei mea. O se taimi e faamaonia ai lou lava tagata, e sa’o?” Ona galulue faatasi lea ma Ia ina ia tumau seia oo i le iuga. E faateleina le lototele faaleagaga pe a e taliaina e “masani ona faatagaina ia tofotofoga ma faigata e oo mai i [lou olaga] ona o le mea sa’o o loo [e] faia” (Glenn L. Pace, “Crying with the Saints” [Brigham Young University devotional, Dec. 13, 1987], 2; speeches.byu.edu).

A o pulefaamalumalu i le Misiona a Kyiv Iukureini, sa ou fesili atu i se tasi taimi i se tasi o au tamaitai faifeautalai sili ona faamaoni pe aisea e leai ai ni ona lagona lelei e uiga ia te ia lava, aisea na te faitio ai ia te ia i nai mea laiti. O lana tali o se faataitaiga masani lea o se tasi o loo faalogologo i se leo sese, a o ia tali mai, “Ina ia leai se tasi ma te tutusa.”

Uso e ma tuafafine, o lau fautuaga i lenei tamaitai faifeautalai o lau fautuaga foi lea ia te outou: ia iloa ona fetaiai ma ou vaivaiga, ae aua nei e toilalo ai, aua o le a fetaiai lava ma nisi o ia faigata seia oo ina e tuua lenei olaga faalelalolagi. E tusa lava po o le a lou tulaga o i ai nei, o le taimi lava e te filifili ma le loto i ai e te salamo ma le faamaoni ma le fiafia, i aso uma e ala i le taumafai e fai ma ia avea ma tagata sili ona lelei, o le a opoina oe e le Togiola a le Faaola ma mulimuli ia te oe, e pei ona i ai, i soo se mea e te alu i ai. O le ola ai i lenei tulaga, e mafai moni ona e “taofi pea le faamagaloina o a outou agasala” (Mosaea 4:12) i itula uma o aso taitasi, sekone uma o minute taitasi, ma ia mama atoatoa ma taliaina i luma o le Atua i taimi uma.

Ua ia te oe le avanoa, pe afai e te manao i ai, ina ia iloa mo oe lava, i le aso pe i se taimi vave, o loo outou faafiafiaina le Atua e ui i o outou vaivaiga. Ou te molimau atu i se Faaola alofa o le faamoemoe mai ia i tatou ina ia ola i poloaiga. Ou te molimau atu i se Faaola alofa o le ua matua naunau ina ia tuuina mai Lona alofa tunoa ma le alofa mutimutivale. Ou te molimau atu i se Faaola alofa o le e olioli pe a tatou faaaogaina Lona Togiola i aso uma ma le faamautinoaga toafimalie ma le fiafia o loo tatou faasaga atu i le itu sa’o. Ou te molimau atu i se Faaola alofa o le e naunau ma ina ia “solo malosi lou lototele i luma o le Atua” (MF&F 121:45). I le suafa o Iesu Keriso, amene.