Filifili ma le Atamai
Saunia e Elder Quentin L. Cook
O Le Korama a Aposetolo e Toasefululua
“Tetee atu i le leaga ae filifili i le lelei” (Isaia 7:15).
Ou uso pele, o lo’u manao i lenei afiafi ia faasoa atu nisi o fautuaga e uiga i faaiuga ma filifiliga.
A o avea au ma se loia talavou i le Talafatai o San Francisco, sa faia e lo matou ofisa ni galuega faaloia mo le kamupani na gaosiina le polokalama faapitoa a le TV o le Charlie Brown mo aso malolo. Sa oo ina ou fiafia ia Charles Schulz ma lana fatufatuga—Peanuts, faatasi ai ma Charlie Brown, Lucy, Snoopy, ma isi tagata lelei.
O se tasi o tala ou te fiafia i ai i le ata komi lea sa aofia ai Lusi. E pei ona ou manatuaina, sa taaalo le au peisipolo a Charlie Brown i se taaloga taua—Sa taalo Lusi i le itutaumatau o le malae, ma sa ta atu se polo maualuga i le pito o loo i ai. Sa tofu uma tulaga e tolu ma tagata o au o loo faatalitali ai, ma o le ta mulimuli foi lea o le taamilosaga lona iva. A sapoia e Lusi le polo, o le a malo lana au. A pa’u ia Lusi le polo, o le a malo le isi au.
E pei lava e na o ata komi e tupu ai, sa siomia e le au atoa ia Lusi a o sauni e sapo le polo. Sa mafaufau Lusi, “A ou sapoina le polo, o le a avea au ma toa; ae a leai, o le a avea au ma se moa.”
Sa pa’u mai le polo i lalo, ma a o vaavaai atu ma le naunautai lana au, sa pa’u ia Lusi le polo. Sa togi i lalo e Charlie Brown le ufilima sapo polo i le le fiafia. Ona tepa atu lea o Lusi i lana au, ma tuu ona lima i lona gutu, ma fai atu, “E faapefea ona outou faamoemoe ou te sapoina le polo a o lea ou te popole i aiaiga a le tatou atunuu i le va ma isi atunuu i fafo?”
O se tasi lea o le tele o polo na pa’u ia Lusi i le aluga o tausaga, ma sa i ai lava sana ‘alofaga fou i taimi uma. E ui sa malie i taimi uma, ae o ‘alofaga a Lusi sa faamaonia ai lona toilalo; ma o ni mafuaaga le moni ia mo lona toilalo e sapo le polo.
I le taimi o le galuega a Peresitene Thomas S. Monson, na te aoao atu ai lava e faapea o faaiuga e fuafua ai le taunuuga. I lena lagona, o la’u fautuaga i le po nei o le aloese lea mai soo se ‘alofaga e taumafai ai e faamaonia se mea sese lea e taofia ai i tatou mai le faia o ni faaiuga amiotonu, aemaise lava pe a faatatau i a tatou auaunaga ia Iesu Keriso. Ia Isaia o loo aoaoina ai i tatou, e tatau ona tatou “tetee atu i le leaga, ae filifili i le lelei.”
Ou te talitonu e matuai taua lava i o tatou aso, i taimi ua matua tafilisaunoa ai Satani i loto o tagata i le tele o auala fou ma taufaavalea, ia faia ai ma le faaeteete a tatou filifiliga ma faaiuga, ia ogatusa ma sini ma faamoemoega ia ua tatou tautino atu tatou te ola ai. E manaomia lo tatou tuuto atoa i poloaiga ma le usiusitai a’ia’i i feagaiga paia. A tatou faatagaina ni ‘alofaga e taofia i tatou mai faaeega paia o le malumalu, agavaa mo misiona, ma faaipoipoga i le malumalu, o le a matua faatamaiaina lava [i tatou] e nei ‘alofaga.
E tautino mai nisi tagata talavou o a latou sini o le faaipoipo i le malumalu, ae le tafafao faamasani ma ni tagata o loo agavaa i le malumalu. O le mea moni, o nisi e le taitai tafafao faamasani! Outou na alii nofofua, o le umi e te nofofua ai, i le mavae ai o se taimi talafeagai ma le matua, o le tele foi lena o lou fiafia i le le faaipoipo. Ae o le mea moni e tatau ona e le fiafia i le le faaipoipo! Faamolemole ia “auai ma le naunautai” i gaoioiga faaleagaga ma faaagafesootai e tutusa ma lau sini o se faaipoipoga i le malumalu.
O nisi e tolopo le faaipoipoga seia maea le a’oga ma maua se galuega. E ui e taliaina lenei mea i le lalolagi atoa, ae o lenei mafaufauga e le o faaalia ai le faatuatua, e le ogatusa ma le fautuaga a perofeta o aso nei, ma e le tutusa foi ma le aoaoga faavae atoa.
Talu ai nei sa ou feiloai ai i se alii talavou lelei. O ana sini o le alu i se misiona, ia aotauina, faaipoipo i le malumalu, ma ia maua se aiga fiafia ma faamaoni. Sa ou fiafia tele i ana sini. Ae i nisi o a ma talanoaga, sa manino mai ai o ana amio ma filifiliga sa ia faia sa lei ogatusa ma ana sini. Sa ou lagonaina lona manao faamaoni e alu i se misiona ma sa aloese mai agasala matuia ia o le a taofia ai o ia mai se misiona, ae o ana amioga i aso uma sa lei saunia ai o ia mo luitau faaletino, faalelagona, faaleagafesootai, faaleatamai, ma faaleagaga o le a la fetaiai. Sa lei aoao o ia e galue malosi. Sa lei manatu mamafa o ia i le a’oga po o le seminare. Sa ia auai i le lotu, ae sa ia lei faitauina le Tusi a Mamona. Sa ia faaaluina se taimi tele i taaloga vitio ma le initoneti. Sa foliga mai na ia manatu o le tau na ona alu i lana misiona o le a lava lea. Alii talavou, faamolemole ia toetuuto atu i amioga agavaa ma sauniuniga faamaoni e avea ai ma sui o lo tatou Alii ma Faaola, o Iesu Keriso.
O lo’u popolega e le na o faaiuga ia e iloa ai le itu tatou te agai i ai, ae faapena foi faaiuga ia e tele na faavasegaina ai o tatou olaga—faaiuga masani o aso uma ia tatou te faaalu ai le tele o lo tatou taimi. I nei tulaga, e manaomia ai lo tatou faamamafaina o le lotopulea, paleni, aemaise lava le poto. E taua le aloese mai le fai ‘alofaga ae fai ni filifiliga sili ona lelei.
O se faataitaiga lelei o le manaomia o le loto pulea, paleni, ma le poto o le faaaogaina lea o le Initoneti. E mafai ona faaaogaina e faia ai galuega faafaifeautalai, e fesoasoani ai i tiutetauave faaleperisitua, ia saili ia tuaa pele mo sauniga paia o le malumalu, ma anoanoai o isi mea. E tele lava le gafatia mo le lelei. Ua tatou iloa foi e mafai ona auina atu ai le tele o mea leaga, e aofia ai ponokalafi, uiga mataga i luga o ala o fesootaiga, ma talanoaga faalilolilo. E mafai foi ona oo ai i faiga ma manatu faavalevalea. E pei ona aoao mai ma le mamana e Brother Randall L. Ridd i le konafesi aoao talu ai, a o talanoa e uiga i le Initoneti, “E mafai ona saisaitia ai oe i le anoanoai o mea e leai se taua lea e ma’umau ai lou taimi ma faaitiitia ai lou gafatia (e fai mea lelei).”
E le na o luga o le Initoneti e maua ai mea faalavefau ma mea faafeagai o le amiotonu; o loo i ai i soo se mea. E le na o le autalavou o aafia ai ae o i tatou uma. O loo tatou ola i se lalolagi ua matua malomaloa lava. O loo siomia i tatou e faaaliga le muta o “mea faafiafia ma taaloga” faapea ai ma olaga le mama ma soonafai. O nei amioga o loo faailoa i le tele o ala o faasalalauga o ni amioga masani.
Sa lapataia talu ai nei ma le faaeteete e Elder David A. Bednar le au paia ina ia faamaoni i le faaaogaina o ala o faasalalauga faaleagafesootai. O se taitai lauiloa faimafaufauga, o Arthur C. Brooks, sa faamamafaina le manatu lenei. Na ia matauina pe a faaaogaina ala o faasalalauga faaleagafesootai, tatou te faia se mausa o le faasalalauina o faamatalaga fiafia o o tatou olaga ae le o taimi faigata i le aoga po o le galuega. Ua tatou faaali atu se olaga le atoa—o nisi taimi i se auala e faafoliga mai e atoatoa. Tatou te faaali atu lea olaga, ona tatou matamata lea i “olaga toetoe lava a faafoliga atoa o a [tatou] uo i luga o ala o faasalalauga faaleagafesootai.” Na taua e Brooks, “E faapefea ona e le maua ai se lagona leaga i le faaalu ai o se vaega o lou taimi e faafoliga ai e te fiafia nai lo le mea moni o e i ai, ae o le isi vaega o lou taimi e te matamata ai i le fiafia tele o isi i lo oe.”
O nisi taimi e pei tatou te lagonaina ai le lofituina i le faavalevalea e leai se aoga, o mea faalavefau e leai se uiga, ma finauga faifai pea. Pe a tatou faaitiitia le malomaloa ma vailiili mea o loo siomia ai i tatou, o loo i ai sina mea o le a fesoasoani ia i tatou i la tatou sailiga e faavavau e agai atu i a tatou sini amiotonu. Sa tali mai ma le atamai se tasi tamā i lana fanau i a latou talosaga e tele ia auai i nei mea faalavefau. Sa faigofie lava lana fesili ia i latou, “Pe o le a avea ai outou ma ni tagata lelei atu i na mea?”
Pe a tatou faia ni ‘alofaga mo ni filifiliga sese, tetele pe laiti, ia e le ogatusa ma le talalelei toefuataiina, o le a tatou maumaua faamanuiaga ma puipuiga tatou te manaomiaina ma tele ina saisaitia ai i le agasala pe leiloa foi lo tatou auala e o ai.
O loo ou popole patino lava i le faavalevalea ma le faananau atu “i soo se mea fou lava.” I le Ekalesia tatou te uunaia ai ma viia ai le upumoni ma le malamalama o ituaiga uma. Ae a tuueseese le aganuu, malamalama, ma tu masani o agafesootai mai le fuafuaga o le fiafia a le Atua ma le matafaioi taua a Iesu Keriso, o le a i ai se tulaga masofa le maalofia o malo. I o tatou aso, e ui lava i mea tulaga ese ua ausia i le tele o nofoaga, aemaise lava i mea tau saienisi ma fesootaiga, ae o tulaga faatauaina autu ua faavaivaia ma o le fiafiaga lautele ma le tulaga manuia ua faaitiitia.
Ina ua valaaulia le Aposetolo o Paulo e lauga atu i luga o le Mauga o Areopako i Atenai, sa ia iloa ai nisi o tautinoga lava ia e tasi o le atamai ma le leai o se poto moni lea o loo maua i aso nei. I le Galuega tatou te faitau ai i lenei tala: “Aua ua leai se isi mea ua faia e tagata Atenai uma atoa ma tagata ese e āumau ai, na ona tala atu ma faalogo mai sina tala faatoa iloa.” O le faamamafa a Paulo o le Toetu o Iesu Keriso. Ina ua iloa e le motu o tagata le natura faalelotu o lana savali, sa faatauemu nisi ia te ia; o isi sa vave ona le amanaiaina o ia ma fai mai, “Matou te toe faalogo atu ia te oe i lena upu.” Sa tuua e Paulo ia Atenai e aunoa ma le faamanuiaina. Sa tusia e Dean Frederic Farrar e uiga i lenei asiasiga: “I Atenai na te lei faatuina ai se lotu, i Atenai na te lei tusia ai se tusi, ma i Atenai, e tele na ia pasia ona tuaoi, ae na te lei toe tuvae lava i ai.”
Ou te talitonu o le savali musuia a Elder Dallin H. Oaks i le tuueseeseina o le “lelei, lelei atu, lelei silisili” ua maua ai se auala aoga e iloilo ai filifiliga ma mea e faamuamua. O le tele o filifiliga e le masani ona leaga, ae a alu uma ai lo tatou taimi ma taofia ai i tatou mai filifiliga silisili ona lelei, ona avea loa lea ma filifiliga matautia.
E oo lava i taumafaiga taua e manaomia lava ona iloiloina ina ia mafai ai ona fuafua pe ono avea ma mea faalavefau i sini silisili ona lelei. Sa i ai sa’u talanoaga e le galo ma lo’u tama a o ou talavou. Sa lei lava lona talitonu sa taulai atu le autalavou pe o saunia foi mo ni sini taua mo se taimi umi—e pei o galuega ma le tausiaina o aiga.
O suesuega anoa ma sauniuniga mo poto masani faalegaluega sa i ai lava i taimi uma i le pito i luga o mea e faamuamua fautuaina a lo’u tama. Sa ia taliaina o gaoioiga faatulagaina i fafo atu o taimi o le aoga, e pei o finauga tau mataupu faaleaoaoga ma tofiga faataitai o le aoga atonu e i ai se fesootaiga tuusao ma nisi o a’u sini taua. Sa lei popole tele o ia i le tele o le taimi sa ou faaaluina e auai ai i taaloga lakapi, paseketipolo, peisipolo, ma taaloga taamoe. Sa ia iloa o taaloga afeleti e mafai ona fausia ai le malosi, onosai, ma le galulue faatasi ae sa fautuaina masalo o le punouai i se taaloga se tasi mo se taimi puupuu atu atonu e sili atu. I lona manatu, e lelei taaloga ae le o le mea silisili lea mo au. Sa ia popole o nisi taaloga sa faatatau i le fausiaina o se tagata lauiloa i le lotoifale po o le ta’uta’ua ae afaina ai sini mo se taimi umi e sili atu ona taua.
Ona o lenei aafiaga na ou maua, o se tasi o mafuaaga ou te fiafia ai i le tala ia Lusi lea e taalo peisipolo ona i le manatu o lo’u tama e tatau ona ou suesueina aiaiga faaleva i fafo ae aua le popole pe o le a ou sapoina se polo. E tatau ona ou faamanino atu sa fiafia lo’u tina i taaloga. Na o le pau le taimi e ono misia ai e lo’u tina sa’u taaloga pe afai lea o taofia o ia i le falemai.
Sa ou filifili e mulimuli i le fautuaga a lo’u tama ae aua le taalo i taaloga a le kolisi. Ona faailoa mai lea e le matou faiaoga o le au lakapi a le aoga maualuga ia te au o loo fia manao le faiaoga o le au lakapi a Stanford matou te fai ‘aiga faatasi ma Merlina Olsen. O outou na e laiti atonu tou te le iloaina Merlin. O ia o se tagata pu’e malosi ia Amerika atoa i le au lakapi a le Aoga Maualuga a Logan lea sa ou taalo ai i le laina i tua ma le puipuiga, sapo polo ma momo’e atu i le laina sikoa. A o i ai i aoga maualuga, sa tele au lakapi malolosi i le malo atoa na taumafai e faatauanau Merlin e taalo mo latou au. I le kolisi sa manumalo ai o ia i le Ipu a Outland o le tama numera tasi o le laina i totonu i le malo atoa. Mulimuli ane sa avea Merlin ma alii lona tolu sa piki e taalo i se au o le Liki Lakapi a le Malo (NFL) ma taalo ai ma le ofoofogia i liki faapolofesa sosoo e 14 (Pro Bowls). Sa ofi atu o ia i le Lisi o Tagata Tautaua o Polofesa o le Lakapi i le 1982 (Hall of Fame).
O le ‘aiga o le aoauli ma le faiaoga a Stanford sa faia i le faleaiga o le Bluebird i Logan, Iuta. Ina ua uma ona ma faatalofa, na te lei pupula sao mai lava ia te au. Sa ia talanoa sa’o atu ia Merlin ae le amanaia mai au. I le faaiuga o le ‘aiga, mo le taimi muamua, sa ia faliu mai ai ia te au, ae sa lei manatuaina e ia lo’u igoa. Ona ia faailoa atu lea ia Merlin, “Afai e te filifilia Stanford ma manao e aumai lau uo, o loo lava ona togi ma atonu lava e mafai ona fetuunai. Sa faamautu mai e lenei aafiaga ia te au e tatau lava ona ou mulimuli i le fautuaga atamai a lo’u tama.
O lo’u faanaunautaiga o le le faavaivaia o le auai i taaloga po o le faaaogaina o le Initoneti po o isi gaoioiga taua e fiafia i ai tagata talavou. O ituaiga na o gaoioiga e manaomia ai le loto pulea, paleni, ma le poto. A faaaoga ma le atamai, e faamauoaina ai o tatou olaga.
Peitai, ou te uunaia tagata uma, talavou ma matutua, e iloilo ai sini ma faamoemoega ma tauivi e faaaoga se loto pulea tele. O a tatou amioga ma filifiliga i aso taitasi e tatau ona ogatusa ma a tatou sini. E manaomia ona tatou aloese mai ‘alofaga ma mea faalavefau. E matuai taua lava le faia o filifiliga e ogatusa ma a tatou feagaiga e auauna atu ia Iesu Keriso i le amiotonu. E le tatau ona tatou tepa ese, pe pa’u foi le polo i soo se mafuaaga.
O le olaga nei o le taimi lea e saunia ai e feiloai ma le Atua. O i tatou o ni tagata fiafia ma olioli. Tatou te talisapaia se lagona lelei ma malie ma faatauaina taimi paganoa e faatasitasi ai ma uo ma aiga. Ae e manaomia ona tatou iloaina o loo i ai se faamoemoega taua lea e tatau ona avea ma faavae o le auala tatou te ola ai atoa ai ma a tatou filifiliga uma. O mea faalavefau ma ‘alofaga e faatapulaaina le alualu i luma e faamanua loto, ae a latou faaitiitia le faatuatua ia Iesu Keriso ma Lana Ekalesia, o le a nutimomoia ai loto.
O la’u tatalo i le avea ai ma totino o e umia le perisitua, o le a tatou faia ia ogatusa a tatou amioga ma faamoemoega malualii lea e manaomia mai ia i latou o loo auauna atu i le Matai. E tatau ona tatou manatua i mea uma o le “totoa i le molimau ia Iesu” o le tofotofoga sili lea e tuueseese ai tagata i le malo selesitila ma le malo teresitila. Tatou te mananao ia maua i le itu selesitila o lena vaevaega. I le avea ai ma se tasi o Ana Aposetolo, ou te molimau atu ai ma le naunautai i le moni o le Togiola ma le paia o Iesu Keriso, lo tatou Faaola. I le suafa o Iesu Keriso, amene.