Mauaina o se Molimau o le Malamalama ma le Upumoni
Saunia e Peresitene Dieter F. Uchtdorf
Fesoasoani Lua i le Au Peresitene Sili
O lau molimau patino o le malamalama ma le upumoni o le a le gata ina faamanuiaina ai oe ma au fanau iinei i le olaga faitino, ae o le a faafeao foi ia te oe i le faavavau atoa.
I le avea muamua ai ma se pailate vaalele, sa ou feleleai ai i le anoanoai o itula i salafa o konetineta ma atuvasa e fia i le pogisa o le po. Sa ou matamata atu i le lagi i le po mai le faamalama o le pailate, aemaise lava le Aniva, sa masani ona ou maofa ai i le tetele ma le loloto o foafoaga a le Atua—lea e faamatalaina e tusitusiga paia “e le mafaitaulia lalolagi.”1
E itiiti ifo ma le seneturi talu ai sa manatu ai le toatele o le au suesue o le vateatea o lo tatou aniva e na o le pau lea o le aniva i le atulaulau.2 Sa latou manatu o mea uma i tala atu o la tatou aniva o se gaogao tele, e augapiu ma se mea—tuufua, malulu, ma e aunoa ma se fetu, malamalama, ma le ola.
A o faasolo lelei pea ona atiae mea vaai mamao—e aofia ai mea vaai ia e oo atu i le vateatea—sa amata ona maua ai e tagata suesue o le vateatea se mea moni mata’ina e toetoe lava a le mafai ona malamalama i ai: o le atulaulau e matuai telē lava i lo le mea na talitonu muamua i ai tagata lea ua faigata ai ona tatou malamalama i ai, ma o loo faatumulia ia lagi i aniva le mafaitaulia, lea e le matalitonuina le matuai mamao lava mai ia i tatou, ma e tofu na aniva ma le faitau piliona o fetu.3
I sina taimi puupuu, o le a suia ai e faavavau lo tatou malamalama e uiga i le atulaulau.
O loo mafai ona tatou vaaia i le taimi nei nisi o nei aniva mamao.4
Tatou te iloa o loo i ai iina.
Sa i ai lava mo se taimi umi.
Ae a o lei maua e tagata meafaigaluega ia e lava le malosi e ao mai ai sulu faaselesitila ma mafai ai ona iloa atu nei aniva, sa le mafai ona tatou talitonu e i ai se mea faapena.
O le telē tele o le atulaulau sa lei faafuasei ona suia, ae o lo tatou tomai e vaai ai ma malamalama i lenei upumoni sa vave ona suia. Ma e faatasi ai ma lena iloa sili atu, sa faalauiloa atu ai i tagata ia vaaiga mamalu sa tatou lei mafaufauina lava.
E Faigata mo i Tatou ona Talitonu i Mea e Le Mafai ona Tatou Vaai i ai
Mafaufau faapea e mafai ona e toe foi i tua i le taimi ma maua se talanoaga ma tagata na soifua i le afe po o se selau o tausaga ua mavae. Mafaufau i lou taumafai e faamatala atu ia i latou nisi o tekinolosi faaonapo nei ia o loo tatou le manatu mamafa i ai i le taimi nei. Mo se faataitaiga, o le a se mea e ono manatu i ai nei tagata e uiga ia i tatou pe a tatou faamatala atu i ai tala o vaalele tetele, ogaumu faavevela meaai, tamai masini feaveai ia o loo i ai potutusi faatekinolosi, ma vitio o a tatou fanau a fanau ia tatou te faasoa atu i le faitau miliona o tagata i le lalolagi atoa?
O nisi atonu e talitonu ia i tatou. O le toatele o le a latou aamu, tetee, pe masalo foi e saili lava e taofi i tatou mai le tautatala i ia mea pe faatiga mai foi. Atonu e taumafai isi e faaaoga manatu, mafuaaga, ma mea moni ona latou te iloa na mea e faaali ai le taitaiseseina o i tatou, faavalevalea, po o le matautia foi. Atonu latou te tuuaia i tatou i le taumafai e taitaisese isi.
Ae ioe, o nei tagata o le a faaseseina atoa. Atonu latou te taumafai e fesoasoani ma le faamaoni. Atonu latou te lagonaina lo latou sa’o atoa i o latou manatu. Ae o le a latou le mafai ona vaai manino ona sa latou le i mauaina lea lava malamalama sili ona atoatoa o le upumoni.
O Le Folafolaga o le Malamalama
E foliga mai o se faiga masani a tagata soifua le manatu tatou te sa’o e tusa lava pe tatou te sese. Ma afai o le tulaga lena, o le a la se faamoemoe o i ai iina mo soo se tasi o i tatou? Pe o le a tatou ola ea e aunoa ma le iloaina o le upumoni ona ua anoanoai manatu feteenai ae ua na o lo tatou lava malamalama ma talitonuga o loo tatou faalagolago i ai?
E mafai ea ona maua le upumoni?
O le faamoemoega o la’u tautalaga o le folafola atu lea o le savali olioli e faapea o le Atua lava Ia—le Alii o ‘Au o Le e silafiaina upumoni uma—ua Ia tuuina mai i Ana fanau le folafolaga e mafai ona latou iloaina upumoni mo i latou lava.
Faamolemole ia mafaufau i le taua o lenei folafolaga:
O le Atua e Faavavau ma Silisiliese, le Foafoa o lenei atulaulau tele, o le a fetalai mai ia i latou e faalatalata atu ia te Ia ma se loto faamaoni ma le faamoemoega moni.
O le a Ia fetalai mai ia i latou i miti, faaaliga, mafaufauga, ma lagona.
O le a Ia fetalai mai i se ala e le mafaaseseina ma e sili atu i lo o se aafiaga faaletagata. O le a Ia tuu mai ia i latou se taitaiga faalelagi ma ni tali mo o latou olaga patino.
Ioe, o le a i ai lava i latou o e faatauemu ma fai mai se tala faapena, e le mafai, e faapea a na i ai se Atua, semanu e sili atu ni mea Na te faia nai lo le faafofoga mai ma tali se tatalo a se tagata se toatasi.
Ae ou te tau atu ia te outou le mea lenei: E popole le Atua ia te oe. O le a Ia faafofoga atu ma o le a Ia tali atu i au fesili patino. O tali i au tatalo o le a oo mai i Lana lava ala ma i Lana lava taimi, ma o lea, e manaomia ai ona e aoao ia faalogo atu i Lona siufofoga. E finagalo le Atua ia e toe maua lou ala e toe foi atu ai ia te Ia, ma o le Faaola o le ala lea.5 E finagalo le Atua ia e aoao e uiga i Lona Alo, o Iesu Keriso, ma lagonaina le filemu loloto ma le olioli lea e sau mai le mulimuli i le ala o le avea ma soo paia.
A’u uo pele, o se faataitaiga talafeagai ma tuusao lenei, faatasi ai ma se faamaoniga mai le Atua, o loo maua i se tusi o tusitusiga paia anamua o loo avanoa mo tagata uma, tamaitai, ma tamaiti o loo loto e faataitai:
Muamua, e tatau ona e saili i le afioga a le Atua. O lona uiga o le faitauina o tusitusiga paia ma le suesueina o upu a perofeta anamua faapea ai foi ma perofeta o aso nei e faatatau i le talalelei toefuataiina a Iesu Keriso—ae ia aua nei i ai se faamoemoe e te masalosalo pe faitio ae ia faia ma se manao faamaoni ia iloa le upumoni. Mafaufau loloto i mea o le a outou lagonaina, ma saunia ai o outou mafaufau e talia le upumoni.6 “E tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe … e mafai ai ona e tuu ane o se avanoa mo [le afioga a le Atua].”7
Lua, e tatau ona e iloiloina, mafaufau loloto, taumafai ma le lototoa e talitonu,8 ma loto faafetai mo le alofa mutimutivale o le Alii i Lana fanau mai le taimi o Atamu e oo mai i o tatou aso e ala i le sauniaina o perofeta, tagatavaai, ma talifaaaliga e taitai Lana Ekalesia ma fesoasoani ia i tatou ia maua le ala e toe foi atu ai ia te Ia.
Tolu, e tatau ona e ole atu i lou Tama Faalelagi, i le suafa o Lona Alo, o Iesu Keriso, ia faaali mai le upumoni e uiga i Le Ekalesia a Iesu Keriso o le Au Paia o Aso e Gata Ai ia te oe. Ole atu ma se loto faamaoni ma se manatu moni, ma le faatuatua ia Keriso.9
O loo i ai foi se laasaga lona fa ua tuuina mai e le Faaola ia i tatou: “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u.”10 I se isi faaupuga, a o e taumafai e faamaonia le upumoni o mataupu faavae o le talalelei, e tatau ona e ola muamua ai lava. Ia faaaoga aoaoga faavae o le talalelei ma aoaoga a le Ekalesia i lou lava olaga. Ia faia ma se manatu moni ma le faatuatua tumau i le Atua.
A e faia nei mea, o le a mauaina se folafolaga mai le Atua—lea ua noatia i Lana lava afioga11—e faapea o le a Ia faaali mai le upumoni ia te oe e ala i le mana o le Agaga Paia. O le a Ia faamatuu mai ia te oe le malamalama sili atu lea o le a mafai ai ona e vaai atu i le pogisa ma molimauina vaaiga mamalu e le i mafaufauina lea e le mafai ona malamalama i ai i se vaaiga faaletino.
Atonu e fai mai nisi, o laasaga nei ua faigata tele pe e le aoga ai foi se taumafaiga. Ae ou te fautua atu o lenei molimau patino o le talalelei ma le Ekalesia o le mea aupito sili lea ona taua e mafai ona e mauaina i lenei olaga. E le gata e faamanuiaina ma taialaina ai oe i lenei olaga, ae o le a i ai foi sona aafiaga tuusao i lou olaga i le faavavau atoa.
O Mea a le Agaga e Na o le Agaga e Mafai ona Malamalama i ai
Sa faigata i saienitisi ona malamalama i le telē o le atulaulau, seia oo ina faaleleia atili meafaigaluega e ao mai ai le malamalama sili atu ina ia mafai ai ona latou malamalama i se upumoni e atoatoa atu.
Sa aoao mai e le Aposetolo o Paulo se mataupu faavae tutusa e faatatau i le malamalama faaleagaga. “A e le talia e le tagata faaletino o mea a le Agaga o le Atua,” sa ia tusi atu ai i Korinito, “aua o mea valea ia ia te ia, na te le mafai foi ona iloa, aua e faamasinoina faaleagaga.”12
I se isi faaupuga, afai e te manao e iloa upumoni faaleagaga, e ao ona e faaaogaina le meafaigaluega sa’o. E le mafai ona e mauaina se malamalamaaga o upumoni faaleagaga i meafaigaluega e le mafai ona maua ai.
Sa fetalai mai le Faaola i o tatou aso, “O le mea e mai i le Atua o le malamalama lea; a o ia o le e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai.”13
O le faateleina o le liliu atu o o tatou loto ma mafaufau i le Atua, o le faateleina foi lena o le malamalama faalelagi e oo mai i o tatou agaga. Ma o taimi uma tatou te saili atu ai ma le naunautai ma le faamaoni i lena malamalama, tatou te faailoa atu i le Atua lo tatou saunia e maua atili le malamalama. E faasolosolo lava, o mea sa foliga mai e faanenefu, pogisa, ma mamao ese o le a oo ina manino, malamalama, ma tatou masani ai.
I lea lagona e tasi, afai tatou te aveesea i tatou lava mai le malamalama o le talalelei, o le a amata ona muitiiti lo tatou lava malamalama—e le i se aso se tasi po o se vaiaso ae e faasolosolo lava i le aluga o le taimi—seia oo ina tatou toe tepa i tua ma tatou le malamalama tonu ai pe aisea na tatou talitonu ai e moni le talalelei. O lo tatou malamalama sa i ai muamua atonu ua foliga mai ua faavalevalea ia i tatou ona o mea sa matuai manino muamua ua toe puaoa, faanenefu, ma ua mamao ese atu.
O le mafuaaga lea na mautinoa ai e Paulo o le savali o le talalelei o le valea lea ia i latou o e malaia, “a o le mana o le Atua ia te i [latou] ua faaolaina.”14
E Le o I Ai se Faailo Suesue e Mafai Ona Faamasino ai se Tasi
O Le Ekalesia a Iesu Keriso o le Au Paia o Aso e Gata Ai o se nofoaga lea mo tagata o ituaiga uma o molimau. O loo i ai nisi tagata o le Ekalesia o a latou molimau e mautinoa ma e matua malolosi lava. O isi o loo tauivi lava ia iloa mo i latou lava. O le Ekalesia o se aiga lea mo tagata uma e o mai faatasi ai, e tusa lava po o le a le malosi o i ai a tatou molimau. Ou te le iloa se faailoga i luga o faitotoa o a tatou falelotu o faapea mai, “O lau molimau e tatau ona malosi faapenei faatoa e ulufale mai ai.”
O le Ekalesia e le mo na o tagata atoatoa, ae e mo tagata uma ia “o mai ia Keriso, ma faaatoatoa ia te ia.”15 O le Ekalesia e mo tagata e pei o outou ma a’u. O le Ekalesia o se nofoaga e talileleia ai ma faafailele ai, ae le o le fevaevaea’i po o le faitio. O se nofoaga tatou te aapa atu ai e uunaia, siitia, ma lagolago e le tasi le isi a o tatou tulitulimatagauina a tatou lava sailiga taitoatasi mo upumoni paia.
I le iuga, o i tatou uma o tagata malaga o loo saili i le malamalama o le Atua a o tatou malaga i luga o le ala o le avea ma soo. Tatou te le tuuaia fua isi mo le aofaiga o le malamalama latou te ono maua pe ua le mafai foi ona maua; ae, tatou te faafailele ma uunaia le malamalama atoa seia oo ina manino, susulu, ma moni.
O Se Folafolaga i Tagata Uma
Sei o tatou faailoaina, o le toatele e masani ona mauaina se molimau e le o se galuega e tasi le minute, se itula, po o se aso e faia ai. E le o se mea e faatasi ona fai ona maea lea. O le faagasologa o le aoina mai o le malamalama faaleagaga o le sailiga lea o le olaga atoa.
O lau molimau o le Alo o le Atua soifua ma Lana Ekalesia toefuataiina, Le Ekalesia a Iesu Keriso o le Au Paia o Aso e Gata Ai, atonu e le oo mai i le vave e te manao ai, ae ou te folafola atu ia te oe le mea lenei: afai e te faia lau vaega, o le a oo mai lava.
Ma o le a ofoofogia.
Ou te tuu atu lau lava molimau patino o le a faatumulia lou loto i le upumoni faaleagaga ma aumaia le malamalama i lou agaga. O le a faaali atu ia te oe le atamai mama faatasi ma le olioli matagofie ma le filemu faalelagi. Ua ou tofo i lenei lava mea mo au lava ia e ala i le mana o le Agaga Paia.
E pei ona folafola mai e tusitusiga paia faaanamua, o le le mafaamatalaina o le afio ai o le Agaga o le Atua o le a mafua ai ona e pese i le pese o le alofa togiola,16 ma tepa atu ai ou mata i le lagi, ma sii lou leo i viiga i le Atua Silisili Ese, lou Maluapapa, lou Faamoemoe, lou Puipuiga, lou Tama. Na folafola mai e le Faaola afai e te saili atu, o le a e maua ai.17
Ou te molimau atu e moni lenei mea. Afai e te sailia le upumoni a le Atua, lea atonu ua tau le mumū i le taimi nei, ua le toe taulai atu i ai, ma ua mamao, o le a faasolosolo lava ina faaali mai, ma faamanino mai, ma oo ai ina latalata i lou loto e ala i le malamalama o le alofatunoa o le Atua. O vaaiga mamalu faaleagaga, ia e le vaaia e mata faaletagata, o le a faaali atu ia te oe.
O la’u molimau ia maua uma e fanau a le Atua lenei malamalama faaleagaga. O le a faamalamalamaina ai lou mafaufau ma aumai ai le faamalologa i lou loto ma le olioli i ou aso. Au uo pele, faamolemole aua nei faatuai le taimi e te saili atu ai ma faamalosia lau lava molimau e uiga i le galuega paia a le Atua, le galuega o le malamalama ma le upumoni.
O lau molimau patino o le malamalama ma le upumoni o le a le gata ina faamanuiaina ai oe ma au fanau iinei i le olaga faitino, ae o le a faafeao foi ia te oe i le faavavau atoa, i lalolagi e leai se mutaaga. Ou te molimau atu ai i nei mea ma tuu atu au faamanuiaga ia te outou i le suafa o Iesu Keriso, amene.