Na iSolisoli ni Loloma Vakalou
Mai Vei Peresitedi Dieter F. Uchtdorf
Karua ni Daunivakasala ena Mataveiliutaki Taumada
Nikua kei na veigauna kece mai muri sa vakarautaki tu na loloma vakalou ni Kalou vei ira kece na yalo sa raramusumusu kei na yalo sa bibivoro.
Ena Sigatabu ni Siganimate eda dau marautaka kina na soqo waraki balavu duadua ka lagilagi ena itukutuku kei vuravura.
Sai koya na siga ka veisautaka na veika kece sara.
A veisau na noqu bula ena siga oya.
A veisau na nomu bula.
A veisau kece sara na nodra icavacava na luve ni Kalou.
Ena siga veivakalougatataki oya, na iVakabula ni kawatamata, o koya ka kauta vei Koya na sinucodo ni ivalavala ca kei mate ka vesuki keda tu, a mai tagutuva na sinucodo oya ka vakagalalataki keda.
Ena vuku ni nona solibula na noda Dauveivueti lomani, sa sega kina na batigaga nei mate, sa sega na gumatua nei bulubulu, sa sega ni tudei na kaukauwa nei Setani, ka sa “vakatuburi … keda tale me noda nai nuinui bula me vaka na nona loloma levu ni sa tucake tale mai na mate ko Jisu Karisito.”
Sa dina sara, na iApositolo o Paula ena nona a kaya ni da rawa ni “veivakacegui vakataki keda ena vosa oqo.”
Nona Loloma Vakalou na Kalou
Eda dau veivosakitaka vakawasoma na Veisorovaki ni iVakabula—sa dina sara oya!
Ena vosa nei Jekope, “A cava meu sega ni vunautaka kina na i soro i Karisito, mo dou kilai Koya sara?” Ia ni da “tukuni Karisito, … rekitaki Karisito, … vunautaki Karisito, [ka] parofisaitaki Karisito” ena kena veimadigi kece, sa sega kina ni dodonu me yali vei keda na noda kurabui kei na vakavinavinaka cecekia ena i soro tawamudu ni Luve ni Kalou.
Sa sega kina ni rawa meda vakawalena na Veisorovaki ni iVakabula ena noda veivakavulici, veitalanoa, se e yaloda. E ka tabu ka vakalou, ni sai koya qo na “ilutua ka iotioti ni i soro” sa kauta mai kina o Jisu Karisito na “bula vei ira kece ga sa vakabauta na yacana.”
Au kurabui niu vakasamataka ni a siro sobu mai na Luveni Kalou me mai vakabulai keda, ena noda sega tu ni taucoko, dukadukali, dau cala rawarawa ka dau lecava wasoma na vakavinavinaka. Au sa dau tovolea meu kila vakavinaka na Veisorovaki ni iVakabula ena noqu vakasama vakaiyalayala, ka ivakamacala duadua ga au rawa ni dau yacova yani sai koya: ni Kalou e lomani keda sara vakatitobu, vakataucoko, ka tawamudu. Au sega mada ga ni rawa ni tekivu vakarautaka “na kena raraba, kei na kena balavu, kei na kena titobu kei na kena cecere … [ na] loloma i Karisito.”
E dua na ivakaraitaki kaukauwa ni loloma sai koya ka dau vakatoka na ivolanikalou me loloma vakalou ni Kalou—na veivuke kei na veivakalougatataki vakalou ni kaukauwa ka da tubu mai kina vakatamata cala, ka vakaiyalayala oqo, ka tamata vakalagilagi kina ena “rarama kei na dina, me yacova [ni da] vakavukui sara ka [kila] na ka kece ga.”
Sa dua dina na ka veivakurabuitaki, na loloma vakalou oqo ni Kalou. Ia edau sega tu ni kilai vinaka. O koya gona, sa dodonu meda kila na loloma vakalou ni Kalou kevaka eda vinakata meda rawata na veika sa vakarautaki tu vei keda ena Nona matanitu tawamudu.
Ena muana oqo au na via vosa kina ena loloma vakalou. Vakamatata, imatai, na sala e dolava kina na matamata kei lomalagi , kei na kena ikarua, na sala e dolava kina na katubaleka kei lomalagi.
Matai: E Dolava na Matamata kei Lomalagi na Loloma Vakalou
Me vaka ni da sa “ivalavala ca kece, ka sega ni yacova na ka e vakarokorokotaki kina na Kalou,” ka vakakina ni “sa sega ni rawa ni curu ki na matanitu ni Kalou e dua na ka sa tawa savasava,” eda sa tawakilikili kece meda lesu kina iserau ni Kalou.
Kevaka mada ga eda qarava na Kalou ena yaloda taucoko, e sega ga ni rauta; ni da na “tamata tawayaga tiko ga.” Eda na sega ni rawa ni rawata vakaikeda na noda sala ki lomalagi; na gadrevi ni lewa dodonu sa noda ilati, ka da sa sega ni na rawata dina vakaikeda.
Ia e sa sega ni yali kece tu.
Sa noda inuinui levu ka tawamudu na loloma vakalou ni Kalou.
Sa mai saumi ena ituvatuva ni loloma veivueti, na gadrevi ni lewa dodonu, ena i soro i Jisu Karisito, “ka me [kauta mai] na vakabauta, veivutuni ka bula kina na tamata.”
Na noda ivalavala ca, ke sa vaka na ka kulakula, sa na rawa ni vulavula me vaka na uca-vulavula. Ena vukuni noda iVakabula lomani “ka soli koya me kedra ivoli na tamata kece ga,” me rawarawa vei keda na curu ki na matanitu tawamudu ni Kalou sa vakarautaki vei keda.
Sa dola tu na matamata!
Ia e sega ni vakalesui keda ki na keda ituvaki tawacala taumada na loloma vakalou ni Kalou. Kevaka e ibalebale walega ni vakabulai na bokoci ga ni cala kei na ivalavala ca, na vakabulai—ena kena totoka taucoko—ena sega ni vakayacora na ka a nakita kina o Tamada me baleti keda. E cecere cake na Nona inaki: E vinakati ira na Luvena tagane kei na yalewa mera vakataki Koya.
Mai na isolisoli ni loloma vakalou ni Kalou, sa sega kina ni lako i muri na sala ni bula vakatisaipeli; ia sa gole ga i lagi.
E gole kina veika cecere eda sega ni vakasamataka rawa! E liutaki yani kina vakalagilagi ena matanitu silesitieli ni Tamada Vakalomalagi, na vanua eda, wavoliti kina mai vei ira na noda daulomani, eda rawata kina “na nona lagilagi kei na nona iukuuku.” Sa noda na ka kece ga, ka da sa nei Karisito. Io, ena soli vei keda na ka kece ga sa tu vei Tamada.
Me noda na lagilagi oqo, eda sega ni gadreva walega na matamata sa dolavi tu; sa dodonu meda curuma na matamata oqo ena gagadre levu ni yaloda meda veisau—e dua na veisau ka sa vakasakiti ka vakatoka na ivolanikalou me “sucu tale; io, mera sucu tale vua na Kalou, saumaki mai [na ivalavala vakayago] kei na ivalavala ca, me ra ivalavala dodonu, a sa vakabulai ira na Kalou, ka ra sa yaco me luvena.”
Karua: E Dolava na Katubaleka kei Lomalagi na Loloma Vakalou ni Kalou
E dua tale na tiki ni loloma vakalou ni Kalou sai koya na dolavi ni katubaleka kei lomalagi, ka sovaraka mai kina na Kalou na nona veivakalougatataki ni kaukauwa kei na qaqa, ka vakatara vei keda meda rawata na veika eda sega ni na rawata vakaikeda. Sai koya mai na nona loloma vakalou veivakurabuitaki na Kalou era rawa ni ulabaleta kina na Luvena na uataletale kei na qelelolobo nei vunica, ulabaleta na ivalavala ca, “ka vinaka [sara] ena vuku i Karisito.”
Dina ga ni sa tu na noda dui malumalumu, eda na rawa ni vorati ira. Io, ena loloma vakalou ni Kalou, kevaka eda vakamalumalumutaki keda ka vakabauta, eda na vakaukauwataki ena noda malumalumu.
Ena noda bula taucoko, sa sovaraka vei keda na veivakalougatataki vakayago na loloma vakalou ni Kalou ka vakalevutaka na noda rawa-ka ka vakalevutaka ena noda bula na veisolisoli vakayalo. E vakasavasavataki keda na Nona loloma. E vukei keda meda yacova na keda vinaka duadua na Nona loloma vakalou.
Ocei ena Rawata?
Ena iVolatabu eda wilika kina na nona sikovi Saimoni na Farisi na Karisito ena nona vale.
E taudaku, a rairai tamata vinaka ka dodonu tu kina o Saimoni. E dau ilova vakawasoma na nona lisi ni veiqaravi vakalotu: e dau muria na lawa, sauma nona ikatini, rokova na siga ni vakacecegu, masu e veisiga, ka gole ki valenisoro.
Ia ena gauna a tiko kina kei Saimoni o Jisu, a gole mai e dua na marama, vuya na yava ni iVakabula ena wainimatana, ka lumuta na Yavana ena ilumu boi vinaka.
A sega ni taleitaka na iwalewale ni sokalou oqo o Saimoni, ka ni kila ni sai ivalavala ca na marama oqo. A nanuma o Saimoni ni kevaka me sega ni kila qo o Jisu, sa sega ni dua na parofita o Koya se ena sega ni vakatara na marama oya me tarai Koya.
Ena nona raica rawa na nona vakanananu, a vuki kina vei Saimoni o Jisu ka taroga. “A dua na dausoli dinau ka rua erau dinau tu vua, … dua e dinautaka tu e lima na drau na pene, kei na dua tale e limasagavulu.
“Ni rau sa sega [ruarua] ni sauma rawa, a yaco me sereki rau ruarua. Tukuna mada vei au, se o cei veirau ena lomani Koya vakalevu duadua?”
E sauma yani o Saimoni ni o koya ka sereki vakalevu cake.
Sa qai vakavulica kina o Jisu e dua na lesoni bibi sara: “Ko sa raica na yalewa qo ne? … A nona ivalavala ca sa vuqa, sa bokoci, a sa loloma vakalevu kina o koya: ia ko koya sa lailai ga na nona ka sa bokoci, sa loloma vakalailai.”
Ocei vei rau oqo eda sa vakataka cake vakalevu?
Eda sa vakai Saimoni li? Sa da yalodei li ka logaloga vinaka ena noda caka vinaka, ka vakararavi tiko ki na noda ivalavala dodonu? Eda sega beka ni vosoti ira era sega tiko ni bulataka na noda ivakatagedegede? Se eda sa dau vakamuri voli tu ga, rogoca tu ga na vakatutu, lako tu ga kina bose, talanoa tu ga ena kalasi ni iVunau ni Kosipeli, kei na vakaraica toka na noda talevoni ena gauna ni sakaramede?
Se eda vakataka na marama oqo, ka nanuma ni sa yali vakadua ka vakakina nona inuinui, ena ivalavala ca?
E da sa loloma vakalevu li?
Eda kila deivaki li na noda sa dinau tu vei Tamada Vakalomalagi ka kerea ena yaloda taucoko na nona loloma vakalou na Kalou?
Nida tekiduru meda masu, eda dau rogoca lesu li na rorogo cecere ni noda yalododonu, se eda vakatusa na noda malumalumu, ka masulaka na loloma veivueti ni Kalou, ka tagicaka ena vakavinavinaka na ituvatuva veivakurabuitaki ni veivueti?
Ena sega ni rawa me voli na veivakabulai ena ilavo ni talairawarawa; e voli ena nona dra na Luve ni Kalou. Na noda nanuma ni rawa meda veisolitaka na noda cakavinaka me isau ni noda ivalavala ca e vaka na volia e dua na tikite ni waqavuka ka qai nanuma tiko ni da itaukei ni kabani ni waqavuka. Se nanuma ni oti noda sauma noda rede ni vale, sa yaco kina meda taukena vakaoti na vuravura taucoko.
Ia na Cava meda Talairawarawa kina?
Kevaka me sa isolisoli ni Kalou na loloma vakalou, na cava na vuna e sa rui bibi kina na talairawarawa ki na ivunau ni Kalou? Cava meda kauwaitaka kina na ivunau ni Kalou—se veivutuni, ena ka oya? Vakacava meda vakatusa ga ni da ivalavala ca qai laiva na Kalou me vakabulai keda?
Se, me da na taroga ena vosa nei Paula, “Me da sai valavala ca tiko li, me tubu vakalevu kina na loloma?” E rawarawa ka matata sara na nona sauma o Paula: “E segai sara.”
Kemuni na taciqu kei na ganequ, eda talairawarawa ki na ivakaro ni Kalou—mai na noda lomani Koya!
Na tovolei tiko ni kila deivaki na isolisoli ni loloma vakalou ni Kalou ena yaloda taucoko kei na noda nanuma kece ga ena vakalevu cake kina na vuna, meda lomana ka talairawarawa vua na Tamada Vakalomalagi ena yalobibivoro kei na vakavinavinaka. Nida lakova na salatu vakatisaipeli, ena vakasavasavataki keda, vakavinaka caketaki keda, ena vukei keda meda vakataki Koya vakalevu cake, ka na kauti keda lesu yani kina Nona iserau. “Na Yalo ni Turaga [noda Kalou]” sa kauta mai “na veisau levu vei keimami, … ka keimami sa biuta tani na gagadre ca ka via kitaka tiko ga na ivalavala dodonu.”
Koya gona, na noda talairawarawa ki na ivakaro ni Kalou, sa vuabale kina na noda loloma tawayalani kei na vakavinavinakataka na vinaka ni Kalou. Na ivakarau dina vakaoqo ni loloma kei na vakavinavinaka ena sema vata ena cakamana na noda cakacaka kei na loloma vakalou ni Kalou. Mo qarauna me savasava tikoga na nomu vakanananu, ena taucoko sara kina na nomu vakabauta ena mata ni Kalou.
Kemuni na taciqu kei na ganequ, na bulataka ena yalodina na kosipeli e sega ni dua na icolacola bibi. Sa dua na vakatovotovo rekitaki—na vakavakarau ni ciqomi ni lagilagi vakaitamera ni veigauna tawamudu. Eda gadreva meda talairawarawa vua na Tamada Vakalomalagi baleta na yaloda sa na qai salavata na veika vakayalo. Sa ra dolavi tu vei keda na veika cecere me kilai eda a sega tu ni kila. Ena yaco mai na veivakararamataki kei na kila ka, nida cakava na loma i Tamana.
Sa isolisoli ni Kalou na loloma vakalou, kei na noda gagadre meda talairawarawa ki na ivakaro yadudua ni Kalou, sai koya na dodole yani ni ligada vakatamata meda ciqoma na isolisoli vakalou oqo mai vei Tamada Vakalomalagi.
Na ka Ga eda Rawa ni Cakava
A vakaraitaka e dua na ka bibi me baleta na noda kila deivaka na loloma vakalou ni Kalou o Nifai ena nona kaya. “Eda sa cakacaka vagumatua … me da vakauqeti ira kina na noda kawa kei ira tale ga na wekada me ra vakabauti Karisito, ka veivinakati tale kei na Kalou; ia eda sa kila ni da sa sega ni vakabulai ena loloma walega, ka segai ena vuku ni cakacaka”
Koya gona, au kaya kina ni so beka na gauna eda dau nanuma cala na malanivosa “ni mai oti na ka ga eda rawa ni cakava.” Sa dodonu me da kila deivaka ni “oti” e sega ni tautauvata kei na “baleta.”
Eda sega ni vakabulai “baleta” na veika eda rawa ni cakava. Sa dua beka vei keda sa cakava kece sara na ka eda rawa ni cakava? E dau wawa li na Kalou me yacova nida sa vakayacora noda veisasaga ni bera ni qai dau takoso mai kei na Nona loloma vakalou ki na noda bula?
E vuqa na tamata era sa dau yalolailai baleta ni ra sa dau balebale rawarawa tu ga. Era kila matata sara tu ga ni “dina ga sa gu na yalo, ia na yago sa malumalumu.” Era vakarewa domo kei Nifai mera kacivaka raraba, “Sa rarawa na yaloqu ena noqu caka ca.”
Au vakadeitaka ni kila tu o Nifai ni loloma vakalou ni iVakabula e vakadonuya ka vakatara vei keda meda vorata na ivalavala ca. Oqo na vuna sa cakacaka sara kina vakaukauwa o Nifai me vakauqeti ira kina na nona kawa kei ira na tacina “mera vakabauti Karisito, ka veivinakati tale kei na Kalou.”
Me kena itinitini, sai koya oqori na ka eda rawa ni cakava! Ka sa ikoya oqori na noda itavi ena bula oqo!
Sa Vakarautaki Tu me Noda Kece Sara na Loloma Vakalou
Niu vakasamataka na ka sa vakayacora vei keda na iVakabula ka vakanamata yani ki na imatai ni Sigatabu ni Siganimate, au via kailavaka ena domolevu na noqu vakacaucautaka na Kalou Cecere Sara kei na Luvena, o Jisu Karisito!
Sa dolavi tu na matamata kei lomalagi!
Sa dolavi tu na katubaleka kei lomalagi!
Nikua kei na veigauna kece mai muri sa vakarautaki tu na loloma vakalou ni Kalou vei ira kece na yalo sa raramusumusu kei na yalo sa bibivoro. Sa vakagalalataka tu vei keda na sala o Jisu Karisito meda lamata ki na veivanua cecere sa sega ni vakasamataka rawa na tamata.
Sa noqu masu nida na raica ena dua na mata vou kei na yalo vou na yaga tawamudu ni solibula veisorovaki ni iVakabula. Sa noqu masu nida na vakaraitaka na noda lomana na Kalou kei na noda vakavinavinakataka na nona isolisoli ni loloma vakalou tawamudu na Kalou ena noda muria na Nona ivakaro ka reki ni da “lako [tiko] ena [dua] na bula vou.” Ena yaca tabu ni noda iVakavuvuli ka Dauveivueti, o Jisu Karisito, emeni.