21:4

Amá Yázhí Sąní Rose éí Shį́įgo bił Kéhojíít’įįd

Naat’áanii Dieter F. Uchtdorf Áyiilaa

Ałtsé Naat’áaniiji’ Naaki góne’ Akéé’dasidá

Ní ohóoł’aahí be’atįįngóó adindíingo yinááł, shí eíí t’áá nihi dołtááłgóó oodlą’ bee niłdzil dooígíí biká sodiszin.

Ááshinee’ shík’is dóó ałhéehoniilziníí, dííjį́ baa shił hózhǫ́ǫgo nihił honishłǫ́h, dóó bá yáłti’í kwǫ́ǫ́ naagáhii baa ahééh nísin, Naat’áanii Thomas S. Monson. Naat’áanii, ayóó’adaníi’ní. Táá’ bił k’é da’ahidii’nínee dah nidiikáigo baa yinííł daniidlį́įdoo aTaa’ ts’ída bá naazį́nee. Bidahwiilzááh Naat’áanii Packer, Eldir Perry, dóó Eldir Scott; ayóó’adéiinii’nínee. Yił dabighan dóó dabík’is bá sodadiilzin.

Shí díí nitsáago áłah néidleeh bich’į’ náás dinísh’į́į́’ łeh—nizhǫ́nígo dahojitááł dóó sáanii saad Diyin Íi’sizį́įnii yinahjį’ yee ndanhíneezt’ą́ą́’. Shí éí binahjį’ yá’at’éehgo bee ch’ídeeshááł.

Shí dííjį́ ha’íí lá bee hádeesdzih nísin, Yisda’iinííł yee na’neezt’ą́’ę́ę baa ntsídekees. Hane’ t’áa’aaníí adaat’éii dóo nanitł’agóó hane’ yázhí adéiile’go yee na’neezt’ą́ą́’. Bikéé’ naakaiígíí kot’áo hane’ bíni’di déidiizts’ą́ą́’ dóó bijéí biyi’di ałdó’ dóó hool’áágóó bee’iinánii yaa akó daniizį́į́’.¹ Nihá Diyin bich’į’ yáłti’í Naat’áanii Monson ałdó’ nizhǫ́nígo t’áabí hane’ yee na’nítingo eíí ajéí yee yidadeeshchid.²

Dííjį́, shí ałdó’ hane’ baa tsidékézii dóó na’íiłnánii ła’ bee nihił hodeeshní. Diyin Íi’sizį́įnii nihił hółǫ́ǫgo yísinółts’ąą’. Diyin Íi’sizį́įnii nihiká adoolwółgo díí hane’ bee ’éé’diitįįh t’áa nihi baa akó dinóosįįł.

Amá-yazhí sąní Rose

At’éé Eva wolyéego ga’ baa hane’. Naaki ałkéé’ haz’ą́ǫ éí Eva ts’ída bee bééhódoosį́į́ł. At’éé eíí ła’ts’áadah bináahaigo baa hane’. Dóó ła’ígíí eíí at’éé ts’ída, t’áa’aaníí dóo bimá yazhí-sąní Rose dóo bił shighan da doolééł nízin. Ts’ída dóoda.

Ndi Eva bimá azee’íl’į́įdi baa ni’díínishgo eíí t’áá’ áadi lą’í biidoołkááł. Éí biniinaa Eva biniséii bimá-Yazhí sąní Rose shį́įgo bił jizkéego haa áhalyą́ą doo.

Eva bini’dí, díí nahat’áhígíí dimį́į́l yazhígóó dóo bił yá’at’éeh da. Jó ałtséii, éí bimá dóo yił bighan da. Éí yił haajéé’ dóó dabík’is ałdó’yits’ą́ądi naagháa doo. Dóó shį́į́, bimá-yázhí sąní Rose dóo yééhósin da. T’áá hooghangi sidáo t’éiyá, bił yá’ahoot’ééh.

Ndi ch’ééh baa saa hojiłǫ́ǫ hanáá’ nijiyoo’nił ndi t’áá iidą́ą́’ bee nihoot’ą́. Akó Eva ’éé’ tsits’aa’ biih jíínil dóó hazhe’é bił nléí bimá yazhí sąní Rose bighangóó chidí beezhni’áázh.

Eva t’óó hooghan góne’ yah ’iiyáago, éí yijoshłáá’.

T’áa ałtsoní wóne’ da’ałk’i dą́ą́’yę́ę! T’áa ałtsogóó naaltsoos dóó tózis ał’ą́ą́’ ádaat’éii dóó ásaa’ łikǫnígíí háal’áo hadadeezbin.

Bimá-yazhí sąní Rose t’áa sáhi bighan; t’áadoo bá hast’įį hazlį́į’da. Masíł bahí léí’ bił bighan wodáhgo t’éiyá bił yá’ahoot’ééh, áádę́ę́’ nashdóí nahalíngo déez’į́į́’ łeh.

Azhą́ hooghangi dóo hats’íi da nahalin. Nízaadi t’éiyá ła’ hooghan naazníl. Eva yił nooséłígíí éí ałnií’ tsinsitą́ ánzháadi índa ła’ bighan. Éí biniinaa Eva dóo bił hats’íi da.

Ałtséii bimá-yazhí sąní Rose dóo yaa nat’į́į da. Bimá t’éí yaa ntsékees. Łahda, tł’éé’ biigháh deez’į́į łih, yáá sodilzinígíí eíí shimá yá’at’ééh nídoodleeł níigo. Dóo tsį́įłgo akó dzaa da, Eva éí Diyin God bimá yik’idéez’íí’ niizį́į́’.

Bimá bina’ashnishígíí baa hane’ yit’ą́ eíí yits’ą́ądóó yá’at’ééh naadleełíí, áko k’ad Eva éiyá t’oo há’jolniihgo shį́į́h hwee adooleeł. Ndi ha’jolnííhígíí jijoołáh!

Hamá yá’at’ééh náadleełgo dóo hozhǫ́ baah nitsíjíkees da, Eva bimá-yazhí sąní Rose hazhó’ó baa akózh niizį́į́’. Éí asdzaní nitsáaz—t’áá ałtsǫgóó nitsaaz: binéé’, bił hozhǫǫ at’éhígíí. Naagháo bá nantł’á, ndi bił hózhǫ́ǫ hatááł dóó anádlóhgo naalnish łeh, dóó hooghan góne’ hodíits’a’. T’áá tł’éé’ bik’eh bik’i dah asdáhi yikáá’ dasidáo, Diyin binaaltsoos háii’áa, dóó hodíits’a’go yółta’ łeh. Dóó łahda koníi łeh “Oh, dóo ázhdooníił da nt’ę́ę́’!” doodáo “Áádi nijigháa łe’!” dóó “Dooladó’ nizhǫ́nígo ha’oodzííd!” T’áa tł’éé’ bik’eh t’áa ajíłah Eva bitsék’éh biigháhgi nitsíjidigoh, hamá yazhí sąní nizhǫ́nígo sodilzin yee háadzih, ahéhee’ Yá’ąąshdi Shizhe’é nilį́į díí dólii dóó nidishchíí’ baa dóó e’e’áah dóó sǫ baa, dóó “iiná bee híjii nánigii.” Akó Eva iinídzǫ́ǫ éí Rose ayóó Diyin God bik’is lá.

Náás hoolzhíshdi, Eva yaa’ akó niizį́į́’: Bimá-yazhí sąní Rose daats’í ts’ídi aláadi asdzáni ayóó bił hózhǫ́.

Ndi haash yit’áo eíí akót’é?

Há’at’íísh bee hólǫ́ǫ yaa bił hózhǫ́?

T’áadoo bá haastįį hazłį́į́’da, ba’áłchiní ádin, mósił báhi t’éiyá bee hólǫ́, dóó bikee’ ye’etł’óogo bił nantł’áh dóó wodáhgo hanadáhígíí bá nantł’áh.

Kintahgóó ałnánadááh, Bich’ah tsoh, baa’ oodlóh hasiníí bik’idé’ą́ą. Ndi dóo diné baa daadlóh da. T’óó, diné baa hikáah dóó binás’áago bich’į’ hahádziih. Rose yee’ bá’olta’í niłį́į́ nt’ę́ę́’, dóó éí ła’ da’ííłt’a’—k’ad éiyá t’ábí ba’áłchiní dahólǫ́—ndaaltłi’go bił yádaałtih. Ahéhee’ nizhǫ́nigo nanhí nint’ą́ą́’. Łahda ándaadlóh. Łahda éí yił daacháh łeh.

Shį́ bił náás hoolzhishg, Eva éí Rose t’áa aghą́ąh yił naa’áásh. Niyáagóó tahdi’ash, dóó Eva eíí tsídii ałąą’ ádaat’éii yíhooł’ą́ą́’. Ch’il bilástsii’ daa bąąhígíí jiibį́į́’, dóó hwosh dajił béeshgo łiką́ngo ájiilaa. Nákidi hamásąní yaa íhooł’ą́ą́’ éí bikéyah ayóó’ayo’níídę́ę́’ dah diiyá, tó wonanídę́ę́’ tsé’naa bił ni’ní’éél, dóó atáh t’áa ni’ tsé’naa da’oodlą́nii yił yíkai.

Nááhodóo’na’go Eva yaa akóniizíí’: Bimá yazhí sąní Rose ayóó bił hózhǫ́ǫ t’áa hwó ałdó’ bił niji’aashgo hwił hózhǫ́ǫ łeh.

Kad éíyá shį́įgo tsįįłgo aneelkaah nahalin. Hamá-Yázhí sąní Rose áhałní, Eva kadę́ę hooghangóó dah nidiidááh baa hoolzhiish. Jó áłtsé aadą́ą́’ tsį́įłgo hooghandi nídeeshdááł jinídzin nt’ę́ę’, kad éí łáhgo at’áo nitsíjikees. Díí hamá-yázhí sąní Rose, dóó bimasí dóó bighan sąní bóhojisááh dooleeł.

Yiską́ǫ hazhe’é haká yigháah, Eva éí, “Shimá yazhí Rose, haash yit’áo ayóó nił hózhǫ́?

Hamá yazhí sąní Rose hazhó’ó honéł’į́į́’ dóó hooghan góne’ yaa honilóóz nizhǫ́nígo na’áshch’ąą’ léí’ yich’į’. Hamá yazhí sąní bik’is ła’ béiinitą́.

“Ha’íísh yini’į́?” níigo nahódiłkid.

Eva t’áa náyiiltsééh ndi, t’ahdóo yédigo jiłtséeh da. Ndi at’éé léí’ bi’éé’ yá gi’at’áo yii’ sit’į́įgo atįįngóó bił hozhǫ́ǫ hoochah. Binaagóó éí tł’oh dóó tsin dadóótl’izh. Eva aní, “Jó at’éé léí’ hoochah. Bił nihózhǫ́ǫgo.”

“Aoo’, éí at’éé bił oonéłígíí bił hózhǫ́ǫ hoochah,” Bimá yázhí sąní Rose nahwídéełkid. “T’áa’aaníí tse’ naajoonéełgo shį́į́ yéigo hach’į’ nidáhwiis’náá’. Be’íina’ nantł’áo ti’dahóoznii’—dóo nihił béédahózin da. Ndi díí na’ashch’ąą’ígíí, nizhǫ́nígo adindíín dóó chodahoo’į́įgo yiká. Díí at’éé dah náhacha’go náás dóó dégo.”

Eva t’áa íits’a’í sizį́, akó bimá yazhí sąní Rose anáadi’ní: “T’áa shį́į́ lą’í iiná dóo yá’at’éhii bii’ dahólǫ́, akó łahda shį́į́ iiná dóo yaa bił dahats’íi da. Ndi diné ła’ dóo iiná yaa ahéé danízin da, iiná baa hózhǫ́ǫgi t’éi deinéł’į́. Díí dine’é aláahgo bił dahózhǫ́.”

“Ndi,” Eva aní, “dóo hwił hats’íídgóó dóo t’áá hooshch’į’ hoł hózhǫ́ jidooléeł da.”

“T’áa’aaníí shį́į́ akót’é,” Bimá yazhí sąní Rose eedló’, “ndi Diyin God dóo nihił hats’íigóó ánhiilaa da. Nihił hódoozhǫ́ǫłgo ánhiilaa!³ Akó yiniidlą́ǫ, nihiká adóolwołgo t’áa doole’é iiná biyi’ danizhǫ́nígíí baa akó diniidzį́į́ł. Dóó akó hodoonííł, nihokáá’ nizhǫ́nígo bii’ adindíín doo. Dóo ga’, t’áa hooshch’į ákonéeh da, ndiísh t’áa’aaníí hwó binjílnishgo t’éiyá akót’į́į́h? Íinisingo, bááh doodágo ch’il łitsooí bee ajiléego, ha’jolní dóó naanishgo t’éí biigháh.”

Eva ntsékeesgo hodíína’ dóó koní, “Dine’é dóo t’áá ałtsoní bee dah hólǫ́nígíí daats’í bá ndantł’áh.”

“Shich’e’é Eva, da’ she’íina’ísh nizhǫ́ní ninízin?” Amá yazhí Rose yee’ Eva yił bik’i dah asdáhi yikáá’ dah sikéego. “Ałk’idą́ą́’ t’áa íiyisíí dóo shił hatsíi da nt’ę́ę́’, ha’at’íísh biniiyé náásgóó yisháał doo niizį́į́’.”

“Níh?” Eva nǫ́ǫ na’ídiłkid.

Aoo’ ní bimá yazhí Rose. “T’óo ahayóí doole’é nísin ńt’ę́ę́’.” Yaah bíni’, nahalíngo haadzíi’go eíí Eva t’áhdoo yidiits’į́įh da. “T’óo ahayóí t’áadoo łá daadzáa da. Díkwiidi shį́į́ shijéí ałkéé’ niigáii. Nt’ę́ę́’ baa akó niizį́’ígíí eíí she’íina’ baa laanáa nísin yę́ę dóo shá bíigha da. Íídą́ą́’ dóo shił hats’íi da. Nichxǫ’ k’adí dóo shił hatsíi da.”

“Akóosh haindzááh?”

“T’áádoo íists’ą’í da. T’óó shá hachį’. T’áa ałtsoní bich’į’ shá hachį’.” Áádoo ch’ídeeldlo’, ndi dóo yéigo da, hooghan bii’ díits’a’ łeh. “‘Éí dóo yá’at’éeh da’ shitsííts’iin bii’dí bee hashtáałgo baa akó niizį́’ígíí bąą she’íina’ łáhgo íishłaa.”

“Eísh ha’íí at’é?”

“Oodlą’,” níigo bimá yazhí Rose yídloh. “Oodlą’ bik’í niyá. Dóó oodlą’ yaa shiníloos sih hásin. Sih hásin dóó oodlą́ binahjį’ shídziil selį́į’go eíí náás hoolzhishgóó ałtso yá’at’ééh doo, Yisda’iinííł éí biniinaa. Bikéédoo eíí atįįn nichxǫǫ’óo łeezh bił naayól nisinée. K’ad yágo dootł’izh, chil dootł’izh, dóó daalch’íí’ baa akó niizį́į́’, dóó t’áashí bee shóholnííh—t’óó shitsííts’iin yá’at’ée atíínjí t’áadoo shá’nidéel da nísingo yishááł, doodágo she’oodlą’ hólǫ́ǫ, shi’éé’ nizhǫ́níí biih deeshááł, ke’ biih dees’ís, dóó shił hózhǫ́ǫ hashtáał dóó ashzhísh doo.” K’ad éí biinéé’ na’áshchąą’ at’ééd bił hózhǫ́ǫgo akéé’ nahacha’ígíí nahalíngo yáłti’.

Bimá yazhí Rose bidiyin binaaltsóós hayií’ą́. “Dóo t’áa íiyisíí yéigo shił haz’ą́ą da nt’ę́ę́’—T’óó baa yáti’gi éí dóo bíighah da. Ndi dóo shił hats’ídígíí baa yáshti’go éí shił hasííd! Aoo’, T’áa’aaníí shiji yéego shich’į’ nahwíís’naa’, ndi baa shíni’ígíí dóo łáhgo she’íina’ nidoodléeł da—t’óó yiwóh yilééł. Yisda’íinííł binahjį’ síh shee hólǫ́ǫgo ná shineezt’ą́ą́’ éí ts’ída áhoot’įįd ndi, shá hane’ nizhǫ́níi bii’ hólǫ́ǫ doo.”

“Haash yit’áo nił bééhózin?” Eva na’ídiłkid.

Bimá yazhí Rose bínaaltsós ’ąą’ áyiilaa dóó koní, “Kwe’é akónǫ́ǫ bikáá’:

“‘Diyin God … yił kééhat’į́į doo, dóó bidine’é dajílį́į doo, dóó Diyin God t’áabí yił hólǫ́ǫ doo, dóó hwíDiyin God nilį́į doo.

“‘Dóó Diyin God éí biná k’eeshto’ ałtso yá yidoot’ół; aniné ádin doo, áádoo yinííł ádin doo, áádoo yichá ádin doo, índa adinííh ádin doo: haalá ałtsé dahólǫ́nę́ę bił yóó’ahodóógááł.’” ⁴

Bimá yazhí Rose yee’ Eva yinéłį́. Yidlóhgo koní, binéé’ ditłidgo, “Da’ díísh t’áa íiyisíí aláadi dísints’ą́ą́’?”

Dooládó’ nizhǫ́nígo, Eva yaa tsézkees.

Bimá yázhí Rose naaltsoos saad dah shijaa’ígíí yik’i díílniiłíí Eva yiyííłta’: “Anáá’ dóo hazhdil’įįh da, índa baa hozdiits’į́į da, índa hajéí dóo yaa nitsékees da, jó Diyin God ayóó’adabó’nínii yá hasht’e dáyiilaa.”⁵

Bimá yázhí sąní yee’ koní, “Naasgóó dooládó’ nizhǫ́ní doo,” ha’íísh biniiyé t’áá doole’é bináhoji’háii baa nijighą́ą’ doo?”

Eva na’ídeełkid. “Ndi ałtsé, da’ ił hozhǫ́ éí náasdi índa baa jighááh? Da’ ił hózhǫ́ éí hool’áadi t’éiyá hólǫ́? Da’ k’adísh éí ił hozhǫ́ǫ bíighah?”

“Oh, k’ad bíighah!” Bimá yázhí sąní Rose koní. “Shiyazhí, k’ad éí hool’áo hooghááł. Éí dóo dajitsáadoo índa bił háhalzhish da! Oodlą’ dóó ił hásin éí ił hózhǫ́ k’ad nináagoo hólǫ́ǫgo at’é.

“Saad dah shijáagi koní, ’Hool’áo—éí Dííshjį́įdoo bił wódees’á.’⁶ shí hool’áo éí dóo chahałheeł dóó nádzid bii’ yisháał dadoo. Dóó shá hach’į’go yisháłígíí dóoda, shiwoo’ níłdzilgo anéiish’į́į, shináá’ éí bee níishch’ił, dóó nihoolzíishjį’ she’íina’ ádinjį’. Oodlą’ shéiinilá sih hásin shi éí k’ad shił hózhǫ́o!”

“Áko shą́’ áádoo háiindzaa?” Eva na’ídiłkid.

“Diyin God t’áá’aaníí haadzí’ígíí yinishdlą́ǫ she’íina’ yá’adaat’éhígíí baa níndiisdzáh. Olta’góó niseyá, óhooł’ą́ą́’. Éí binajį’naanish shił nizhǫ́nígíí bik’i niyá.

Eva yaa nitsékeesgo hodíína’ dóó koni’, “Ndi t’óó nanilníshgo nił hozhǫ́o ániilaa da. T’óó ahayóó dine’é nidaalnishígíí dóo bił dahózhǫ́ǫ da.”

“Haash yit’áo ánii nanináo ayóó honiyą́?” Hamá yazhí sąní Rose nahwídeiiłkid. “T’áa’aaníí ádiní. Dóó lą’í diné dóo bił dahozhǫ́nígíí ts’ída aláadi bóholníhígíí yaa dayoosnáh—Jesus aníngii ts’ída bina’nitin bijéí at’é.

“Dóó éísh ha’íí at’é?” Eva hałní.

Hamá yazhí sąní koní, “Éí ayóó’ó’ó’ní—yee’ Christ yee nił tólí”, nół’į́, háálá t’áa’ałtsoní Diyin Biná’nitin biyi’—t’áa’at’é biká ajit’į́ dóó ajílééh dóó dóo daats’í— ayóó’ó’ó’ní yaa halóós. Diyin God ayóó’ajónóo, bá nijilnish łeh. Nihi bígi ádaniit’éii doo, Áádoo t’áa nihi t’éiyá ádaa ntsídeiikeesí doo ła’ diné biká anéiilwo’. ⁷

“Dá éiish bąą nihił dahózhǫ́?” Eva na’ídiłkid.

Hamá-yazhí sąní Rose binák’eeshto’ hólǫ́ǫgo yidlóh, “Aoo’, shiyazhí’. eíí binahjį’ nihił dahózhǫ́.”

Dóo Ałheełt’ée da

Biiskąní Eva bimá-yázhí sąní Rose yinázhchid dóó ahéhee’ t’áa’ałtsoní bóhooł’ą’ígíí. bighangóó yił haajéé’ dóó bik’is dóó hooghangi ánjidzáh.

Ndi ts’ída dóo ajit’é hę́ęgi ajíidzaa.

Eva biyaahoo’á, łáhda hamá-yazhí sąní Rose bizaa baa nitsíjíkees łeh. Eva náasdi bich’ooní, dóó ba’áłchiní hazłį́į́’, dóó nizáagoo dóó nizhǫ́nǫ́ǫ hiná silį́į́’.

Dóó ła’ajį́, t’áabí bighan góne’ sizį́įgo, naashch’ąą’ at’éé atįįn góyaa bił hozhǫ́ǫ akéé’ hoocháhígíí bináagoo éí yá dootłízhgo bik’izdiidíín, hamá-yazhí sąní Rose Shį́įgo bił jizkéhę́ę bééjoolníí’.

Díí bééjoolnįį’go, hajéí biyi’dí sozdilzingo hodíína’. Dóó Eva be’íina’ yaa ahéé niizį́į́’, ba’áłchiní, Jesus Christ bináhagha’ninályáii, dóó Hamá yazhí sąní Rose oodlą’⁸, sih hásin, dóó yóó’ó’ó’ní yee náhoneezt’ą́ą́’. ⁹

Ak’ihojídli’

Ááshinee’ shilahkéí, Christ bikéé’ wókáhígíi, t’ah nit’ę́ę́’ díí hane’ nihijéí dóó nihits’íís dóó nihíi’siz į́į yidodóólchił binahjį’ nihideesnáá’. Shi eíí Diyin God hináo shił bééhózin dóó t’áa ła’í nǫ́ǫzingo ayóó’anho’ní.

T’áá ní adindíín atįįn bikáá’ yináałgo Diyin bikéé’sinzį́, t’ah yinááłgóó ąą’ ádooniił áko niZhe’é Yá’ąąshdi Hólǫ́ǫnii kwǫǫ nizhónígíí nániinílaíí yiní’ į́įdoo; ne’oodlą’ bídziilgo atįįngóó yináal doo; dóó Diyin God dóó t’áa’ałtso bá’ałchiní eíí nihijéí biyi’doo ayóó’íínoh’ní. Diyin God bá sezį́, binahjį’ nihik’i dahojidlį́į doo, Jesus Christ bízhi’ binahjį’, áámen.