2010–2019
“Kevaka Dou sa Lomani Au, Dou Talairawarawa ki na Noqu Vunau”
Okotova 2015
11:9

“Kevaka Dou sa Lomani Au, Dou Talairawarawa ki na Noqu Vunau”

Mai vei Carole M. Stephens

Matai ni Daunivakasala ena Mataveiliutaki Raraba ni Soqosoqo ni Veivukei

Official portrait of Carole M. Stephens, sustained at the April 2012 general conference as first counselor in the Relief Society general presidency, October 2012. Released April 2017 General Conference.

Na Nona ivunau e sa ivakaraitaki ni Nona loloma kivei keda kei na talairawarawa ki na Nona ivunau e sa ivakaraitaki ni noda loloma ki Vua.

Ni kauta mai vale na luvei keirau yalewa qase duadua, o Jen, na ikatolu ni luvena mai valenibula, au a lako ki na nona itikotiko me’u laki veivuke. Ni oti na nona talaci luvena yalewa qase duadua ki koronivuli, keirau a navuca ni ka e gadreva vakalevu o Jen oya na vakacegu. Ia na veivuke vinaka duadua au rawa ni vakayacora oya me’u kauti luvena yalewa o Chloe ki vale me rawa ni rau toka vagagalu o tinana kei na tacina gonedramidrami vou.

Au a vakabeletitaki Chloe ki na nona idabedabe ni motoka, vakadreta donu na noqu beleti ni idabedabe, ka draiva tani mai na nodratou ikelekele ni motoka. Ia, ni bera ni keirau yacova na icava ni gaunisala, sa sereka o Chloe na beleti ni nona idabedabe ka sa duri cake tu, vakararai voli, ka vosa tiko vei au! Au a vakelea na motoka ena yasa ni gaunisala, curu ituba, ka vakabeletitaki koya lesutale ki na nona idabedabe.

Keirau a tekivu tale ia a toso vakalailai ga ki liu ni sa taluva tale mai na nona idabedabe o koya. Au a tokaruataka na ka vata ga, ia na gauna oqo ni bera ni’u curuma lesu na motoka ka vaqaqacotaka na noqu beleti ni idabedabe, sa tucake tale tu o Chloe!

Au sa mani dabe voli ena motoka, ka kele toka ena yasa ni gaunisala, ka vakasa kaukauwa voli vata e dua na yabaki tolu. Ka sa qaqa tiko o koya!

Au vakayagataka na veivakasama au nanuma rawa me’u rawai koya ni tiko vakadua ena nona idabedabe e sa ka vinaka. E a sega ni rawai o koya! Au sa qai navuca me’u tovolea na imoimoi ni kevaka/qai.

Au kaya, “Chloe, kevaka o na vakabeleti tikoga ena nomu idabedabe, ni gauna daru yaco kina ki na vale nei Bubu, daru na qai qito buli tete.”

Sega na kauwai.

“Chloe, kevaka o na vakabeleti tikoga ena nomu idabedabe, daru na qai buli madrai ni daru yaco ki na vale nei Bubu.”

Sega na kauwai.

Au a tovolea tale. “Chloe, kevaka o na vakabeleti tikoga ena nomu idabedabe, daru na qai kele ena makete me voli na vakalomavinaka!”

Ni oti e tolu na sasaga, au sa vakila ni na sega ni cakacaka na imoimoi oqo. E sa dei na lomana, ka sega na iwiliwili ni kevaka/qai e rauta me rawai koya ni vakabeleti voli ena nona idabedabe.

Keirau na sega ni rawa ni dabe voli ga ena siga taucoko ena yasa ni gaunisala, ia au a via rokova na lawa ka sa sega ni donu na draiva voli ni duri cake tu o Chloe. Au a cabora e dua na masu lo ka rogoca na Yalotabu ni vakasolokakana, “Vakatavulici koya.”

Au vuki me’u qara vua ka dreta laivi mai vei au na noqu beleti ni dabedabe me rawa ni raica o koya. Au kaya, “Chloe, au sa daramaka tiko na beleti oqo baleta ni na taqomaki au. Ia o iko o sega ni daramaka tiko na nomu beleti, ka na sega ni o taqomaki. Ka’u na rarawa saraga kevaka o na mavoa.”

A vakaraici au o koya; au sa voleka ni raica rawa na iuli ni cawiri voli ena nona mona lailai ni’u wawa ka namaka voli na nona vosa mai. Kena itinitini, a serau mai na matana karakarawa levu, ka kaya, “Bubu, o vinakata me’u daramaka na noqu beleti baleta ni o lomani au!”

A vakatawana na motoka na Yalotabu ni’u vakaraitaka na noqu loloma kivua na yalewa lailai vakasakiti oqo. Au a cata ni vakayalia na vakanananu oya, ia au kila ni oqo sa dua na noqu madigi ka’u mani sobu ka vakabeletitaki koya ena nona idabedabe. Au qai taroga, “Chloe, kerekere e rawa ni o na tikoga ena nomu idabedabe?” Sa cakava vakakina o koya—vakadua ki na makete ena vakalomavinaka! Ka a vakabeleti toka vakadua o koya mai na makete ki na noqu itikotiko, me keirau mai buli madrai ka qito buli tete baleta ni sega ni guilecava o Chloe!

Ni’u draiva lesu ki na gaunisala ena siga oya, a votu vei au e dua na ivolanikalou: “Kevaka dou sa lomani au, dou talairawarawa ki na noqu vunau.” Sa tiko na ivakavuvuli meda vakatavulici, tuberi, ka taqomaki ira na gonelalai. Na vuna? Sa baleta na loloma levu e tiko vei keda me baleti ira. Ia me yacova ni sa kila vakamatata o Chloe ni sa noqu gagadre kivua me vakabeleti qaqaco voli ena nona idabedabe e sa baleta na noqu lomani koya, a sega ni via cuqena o koya na ka e a navuca me itatarovi. A nanuma o koya na nona beleti e yalana na nona galala.

Vakataki Chloe, sa rawa ni da digitaka na raici ni vunau me yalani keda. Eda na rairai vakila ena so na gauna ni sa itatarovi na veilawa ni Kalou ki na noda bula dodonu, kauta tani na noda galala ni digidigi, ka yalana noda tubu. Ia ni da vaqara na kila matata levu cake, ni da vakatara na Tamada me vakatavulici keda, eda na tekivu raica ni Nona lawa era sa ivakaraitaki ni Nona loloma kivei keda kei na talairawarawa ki na Nona lawa e sa ivakaraitaki ni noda loloma ki Vua.

Kevaka o raica ni o kele vakainaki voli ena yasa ni gaunisala, rawa beka ni’u vakatura e vica na ivakavuvuli ka, ke muri, na vukei iko ni tiko donu tale “ena sala ni vakabauta kei na talairawarawa”?

Matai, nuitaka na Kalou. Nuitaka na Nona ituvatuva tawamudu me baleti iko. O keda yadua sa “luvedrau tagane se yalewa lomani vakayalo na noda itubutubu vakalomalagi.” Na nodrau lomani keda e sa dei tu ena ivunau. Era sa idusidusi momona na ivunau me vakatavulici, tuberi, ka taqomaki keda ni da “vuli e vuravura.”

Eda a vakayagataka na noda galala ni digidigi ena “vuravura taumada” meda vakadonuya na ituvatuva ni Kalou, ka da vulica ni talairawarawa ki na lawa tawamudu ni Kalou e sa ka bibi ki na rawaka ni ituvatuva oya. E vakatavulica na ivolanikalou, “Raica sa virikotori tu mai lomalagi na ivakaro ni sa bera ni buli na vuravura oqo, ia sa vakayavutaki kina na veivakalougatataki kece ga.” Kevaka eda talairawarawa ki na lawa, eda ciqoma na veivakalougatataki.

Veitalia na levu ni cakacala, veisaqasaqa, kei na vuli e salamuria na ka eda sotava vakayago, na Kalou e sega ni guilecava na noda sasaga tawamudu, ni vaka tu kina o keda. Sa rawa ni da nuitaki Koya “baleta na Kalou e vinakati ira lesu tale na Luvena.” Ka sa vakarautaka o Koya e dua na sala mai na Veisorovaki ni Luvena, o Jisu Karisito. Na Veisorovaki “e sa usutu ni ituvatuva ni veivakabulai.”

Karua, nuitaki Jisu. Na icavacava ni ivakaraitaki ni talairawarawa kei na loloma sa uasivi sara sa ikoya na Veisorovaki i Jisu Karisito. A soli Koya me vakayacora na lewa i Tamana, a solia o Koya na Nona bula me baleti keda. E a kaya, “Kevaka dou sa talairawarawa ki na noqu vunau, dou na tiko ga ena noqu loloma; me vaka au sa talairawarawa ki na vunau nei Tamaqu, ka tiko ga ena nona loloma.”

A vakatavulica talega o Jisu:

“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.

“Ai matai ni vunau oqo ka levu.

“A sa tautauvata na kenai karua, Mo lomana na kai nomu me vaka ko lomani iko.”

Ena Sigatabu yadua sa noda na madigi meda vakananuma ka vakasamataka vakatitobu na loloma sa uasivi sara ni noda iVakabula ni da vakayagataka na ivakatakilakila ni Nona Veisorovaki tabu. Donuya na sakaramede, au sarava ni ra dodo yani na liga eso mera veivotayaka na madrai kei na wai. Ni’u dodoka yani na ligaqu me’u vakayagataka vakadoudou, au sa yalayala ni’u sa vakadonuya me’u taura na Yacana, dau nanumi Koya tikoga, ka muria na Nona ivunau. Ka sa yalataka o Koya “ni na tiko ga vata kei [keda] na nona Yalotabu.”

Katolu, nuitaka na vakasolokakana ni Yalotabu. Nanuma donuya na ka au sotava vata kei Chloe ni Yalotabu a vakasolokakanataka e dua na ivolanikalou vei au? Oya na Joni 14:15 “Kevaka dou sa lomani au, dou talairawarawa ki na noqu vunau.” Ka sa tarava na veitikina bibi oqo:

“Ia ka’u na masuti Tamaqu, ena solia vei kemudou e dua tale na Dauveivakacegui, me tiko ga kei kemudou ka sega ni mudu;

“A Yalo Tabu sa vu ni ka dina; ko koya era sa sega ni vakabauta rawa na kai vuravura, ni ra sa sega ni raici koya, se kilai koya: ia sai kemudou ga sa kilai koya; ni sa tiko vata kei kemudou ko koya, ka sa curumi kemudou.”

Na tamata kece e kilikili, ka vakadeitaki me lewe ni Lotu i Jisu Karisito ni Yalododonu Edaidai e sa tiko vua na dodonu ki na veitokani ni Yalo Tabu. Na lolo, masumasu, vuli ivolanikalou, kei na talairawarawa e vakavinakataka vakalevu na noda sasaga ni rogoca ka vakila na veivakauqeti ni Yalotabu.

Ni sa vakatawani na nomu vakasama ena vakatitiqa kei na veilecayaki, ena tala mai na Yalo Tabu na Tamada kei na Luvena me vakasalataki iko ka tuberi iko vakadodonu voli ena veika rerevaki ni itosotoso vakayago oqo. Ena vukei iko o Koya mo nanuma, vakacegui iko, ka vakasinaiti iko ena “nuinui kei na loloma levu sara.”

Kava, nuitaka na nodra ivakasala na parofita bula. E sa vakarautaka na Tamada e dua na sala meda rogoca kina na Nona vosa ka kila na Nona lawa mai vei ira na Nona parofita. A cauraka na Turaga, “Na noqu vosa ena … vakayacori vakaidina na vosa ka’u sa tukuna, se ra tukuna na noqu tamata.”

Era sa vakasalataki keda na parofita “mo nanuma na siga ni vakacecegu, mo vakatabuya,” ka bulataka na lawa ni lolo. Na talairawarawa ki na ivakasala vakaparofita oqo e sa vakarautaka na sala meda talairawarawa ki na ivakaro ni Kalou meda lomani Koya kei na wekada ena kena torocake tiko na noda vakabauti Jisu Karisito ka dodoka yani na ligada meda lomani ka karoni ira na tani.

Eda na taqomaki tiko ni da vakamuria na vosa ni Turaga mai vei ira na Nona parofita. Na Kalou e sa kacivi Thomas S. Monson, na daunivakasala ena Mataveiliutaki Taumada kei ira na lewe ni Kuoramu ni iApositolo Le Tinikarua mera sa parofita, daurairai, ka dauvakatakila. Ena vuravura oqo ka levu kina na rere, veisaqasaqa, dredre, kei na cudrucudru, sa rawa ni da rai vei ira na tisaipeli i Jisu Karisito—ka vakasinaiti tu ena loloma cecere—ka raica na irairai, irogorogo kei na nodra iwalewale ni sotava na leqa e rawa ni dau vakavu veitawasei. Era vakadinadinataki Jisu Karisito ka sausaumi ena loloma cecere, na loloma sa uasivi sara i Jisu Karisito, sa nona ivakadinadina o ira.

Ni oti na veika au sotava kei Chloe, au a vakasaqara na veitikina ena ivolanikalou ka tukuna me baleta na ivunau kei na loloma. Au kunea e levu sara. Na veitikina yadua oqo e vakananumi keda ni Nona ivunau e sa ivakaraitaki ni Nona loloma kivei keda kei na talairawarawa ki na Nona ivunau e sa ivakaraitaki ni noda loloma ki Vua.

Au vakadinadinataka ni da nuitaka na Kalou, na Tamada Tawamudu; nuitaka na Luvena, o Jisu Karisito, ka cakacakataka na vakabauta ena Nona Veisorovaki; nuitaka na vakasolokakana ni Yalotabu; ka nuitaka na nodra ivakasala na parofita bula, eda na kunea na noda sala mai na yasa ni gaunisala ka tomana voli vakavinaka—sega ena vosota ga ia ena kunei ni reki ena noda ilakolako ki vale. Ena yaca i Jisu Karisito, emeni.