Kombertí den un Disípulo di Nos Señor Jesucristo
E konstelashon di karakterístikanan ku ta resultá for di fe den Kristu ta nesesario pa nos para fuerte den e último dianan.
Kiko ta nifiká di ta un disípulo di nos Señor Jesucristo? Un disípulo ta un ku a wòrdu boutisá i ku ta dispuesto na tuma riba dje e nòmber di e Salbador i siguié. Un disípulo ta hasi su esfuerso pa bira manera E ta i pa warda e mandamentunan den mortalidat, meskos manera un alumno ke bira manera su maestro.
Hopi hende ta skucha e palabra disípulo i ta pensa ku e ta nifiká “siguidó.” Pero disípulado genuino ta un forma di ta. Esaki ta sugirí mas ku solamente studia i apliká un lista di atributonan individual. Disípulonan ta biba di tal manera ku e karakterístikanan di Kristu ta bòrdá den kada fibra di nan ser, manera den un tapeit spiritual.
Skucha e invitashon na e Apòstel Pedro pa kombertí den un disípulo di e Salbador:
“Dunando tur diligensia, agregá na bo virtut fe; i na bo virtut konosementu;
“I na bo konosementu templanza; i na bo templanza pasenshi; i na bo pasenshi deboshon;
“I na bo deboshon bondat fraternal; i na bo bondat fraternal karidat.”
Manera bo por mira, bòrda e tapeit spiritual di disípulado personal ta rekerí mas ku un solo hilu. Den e dianan di e Salbador, tabata tin hopi ku ta proklamá ku nan ta rekto den un òf otro aspekto di nan bidanan. Nan tabata práktika loke ami ke yama obediensia selektivo. Por ehèmpel, nan ta warda e mandamentu di no traha riba e dia di reposo pero ta kritiká e Salbador paso e la kura hende riba e dia sagrado ei. Nan a duna limosna na e poder pero solamente nan a ofresé di loke nan tin di mas – dikon nan no a duna di nan mes. Nan a ayuno ku karanan largu. Nan ta hasi orashon pero solamente pa wòrdu mira dor di hende. Hesus a bisa,”Nan ta bin serka di mi ku nan lepnan, pero nan kurason ta leu for di mi.” Hendenan asina por enfoká riba dominá un atributo òf akshon spesífiko pero no nesesariamente bira manera E ta den nan kurason.
Di esakinan, Hesus a deklará:
“Hopi lo bisa mi den e dia ei, Señor, Señor, nos no a profetisá den bo nòmber? i den bo nòmber nos no a saka demoñonan? i den bo nòmber nos no a hasi hopi obra maravioso?
“I e ora ei lo mi profesá na nan, nunka m’a konosé bo: bai for di mi, boso hasidónan di maldat.”
E atributonan di e Salbador, manera nos ta persibié, no ta un guion ku mester wòrdu sigui òf un lista pa wòrdu marka. Nan ta karakterístikanan interkonektá, agregá un na otro, ku ta desaroyá den nos den un manera interaktivo. Den otro palabranan, nos no por optené karakterístikanan manera Kristu sin tambe optené otronan. Ora un karakterístika bira fuerte, asina tambe otronan.
Den 2 Pedroi den Doktrina i Konvenio sekshon 4, nos ta siña ku fe ta e fundashon. Nos ta midi nos fe pa medio di loke e ta guia nos pa hasi – pa medio di nos obediensia. “Si bo tin fe den mi,” Señor ta primintí, “lo bo tin poder pa hasi loke sea ta kumbiniente pa ami.” Fe ta e katalisado. Sin obra, sin un bida virtuoso, nos fe ta sin poder pa disípulado aktivo. En bèrdat, fe ta morto.
I asina, Pedro ta splika, “agregá na bo fe virtut.” E virtut aki ta mas ku puresa seksual. E ta limpiesa i santidat den mente i kurpa. Virtut tambe ta poder. Ora nos ta biba e evangelio fielmente, nos lo tin poder pa ta virtuoso den kada pensamentu, sentimentu, i akshon. Nos mente ta bira mas i mas reseptivo pa e indikashonnan di e Espíritu Santo i e lus di Kristu. Nos ta enkarná Kristu no solamente den loke nos ta bisa i hasi pero tambe den loke nos ta.
Pedro ta kontinuá, “Agregá na [bo] virtut, konosementu.” Ora nos ta biba nos bida virtuoso, nos ta bin konosé nos Tata Selestial i Su Yu den un manera spesial. “Si kualke hende hasi e boluntat di [e Tata}, e lo bin konosé e doktrina.” E konosementu aki ta testimonio personal, hañá dor di eksperensia personal. Ta e konosementu ku ta transformá nos, pa nos “lus gara na [Su] lus” i nos “virtut stima [Su] virtut.” Pa medio di nos bida virtuoso, nos por hasi e biahe di “mi ta kere” pa e destinashon glorioso di “mi sa.”
Pedro ta eksortá nos pa agregá “na konosementu templanza; i nan templanza pasenshi.” Komo disípulonan modesto, nos ta biba e evangelio den un manera balansa pero stabil. Nos no ta “kore mas lihé [ku nos} forsa.” Kada dia nos ta bayendo dilanti, indiferente dilanti di e retonan di refinashon di e mortalidat.
Siendo modesto den e manera aki, nos ta desaroyá pasenshi i konfiansa den Señor. Nos lo tin e oportunidat di konfia den Su diseño pa nos bidanan, maske nos no por mir’e ku nos wowonan natural. P’esei, nos por “ta trankil i sa ku [E ta] Dios.” Ora nos ta enfrentá tormentonan di tribulashon, nos ta puntra, “Kiko lo bo ke pa mi siña for di e eksperensia aki?” Ku su plan i propósitonan den nos kurason, nos ta sigui pa dilanti no solamente perseverando den tur kos pero tambe hasiendo e ku pasenshi i bon.
E pasenshi aki, Pedro ta siña, ta guia nos na deboshon. Miéntras ku e Tata tin pasenshi ku nos, Su yunan, nos tambe ta haña pasenshi pa ku un i otro. Nos ta deleitá den e albedrio di otronan i e oportunidat ku e ta duna nan pa krese “liña pa liña,” “mas briante ten a e dia perfekto.”
For di templanza te pasenshi, i di pasenshi te deboshon, nos naturalesa ta kambia. Nos ta risibí e hermandat ku ta e marka di kada disípulo berdadero. Meskos ku e Bon Samaritano, nos ta krusa e kaya pa ministra na kien sea ku ta den nesesidat, hasta si nan no ta den nos sirkulo di amistat. Nos ta bendishoná esnan ku ta maldesi nos. Nos ta hasi bon na esnan ku usa nos malamente. Tin algun atributo mas piadoso òf manera Kristu?
Mi ta testifiká ku e esfuersonan ku nos ta hasi pa bira disípulonan di nos Salbador ta berdaderamente wòrdu añadí te ora nos ta “poseí” ku Su amor. E amor aki ta e karakterístika prinsipal di un disípulo di Kristu:
“Ounke mi ta papia ku lenga di hende i di angel, i mi no tin karidat, mi ta bira manera un gòng ku ta resoná, òf un bèl ku ta zona pa loko.
“I maske mi tin e don di profesia, i mi ta komprondé tur e misterionan, i mi tur konosementu; i maske mi tin tur fe, ku mi por move e serunan, i mi no tin karidat, mi no ta nada.”
Ta fe, speransa, i karidat ku ta kalifiká nos pa e obra di Señor. “I awó ta permanesé … e tresnan aki; pero esun mas grandi den nan ta karidat.”
Rumannan, awor mas ku nunka, nos no por ta “mitar disípulo”! Nos no por ta un disípulo di djis un punto di doktrina òf un otro. E konstelashon di karakterístikanan ku ta órbita rondó di fe den Kristu – inkluso esnan di kua nos a papia awe – ta nesesario pa nos para duru den e último dianan.
Ora nos ta buskando ku fervor pa bira disípulonan berdadero di Jesucristo, e karakterístikanan lo wòrdu interkonektá, agregá, i lo fortalesa den nos interaktivamente. Lo no tin disparate entre e bondat ku nos ta demostrá na nos enemigunan i e bondat ku nos ta otorgá na nos amigunan. Nos lo ta mesun honesto ora niun hende ta wak ku ora otronan ta wak. Nos lo ta mesun devoto na Dios den públiko manera nos ta den nos kuarto priva.
Mi ta testifiká ku kada ken por ta un disípulo di e Salbador. Disipulado no ta mara na edat, sekso, òf orígen étniko òf yamamentu. Pa medio di nos disipulado individual, nos, komo Santunan di Último dia, ta krea un fortalesa kolektivo pa bendishoná nos rumannan rònt mundu. Awó ta e tempu pa bolbe komprometé nos mes na ta Su disípulonan ku tur diligensia.
Rumannan, nos a wòrdu yama pa ta disípulonan di nos Salbador. Laga e konferensia aki ta bo oportunidat pa “kuminsá meskos ku den antigwedat, i bin na [dje] ku tur bo kurason.” Esaki ta Su Iglesia. Mi ta kompartí mi testimonio spesial ku E ta bibu. Ku e por bendishoná nos den nos búskeda eterno pa logra nos disipulado divino. Den nòmber di Jesucristo, amèn.