E Ora ei Hesus a Mir’e i Stim’e

Dor di Elder S. Mark Palmer

Di e Setenta

Kada bia ku bo sinti ku ta pidi bo pa hasi algu difísil, pensa riba Señor mirando bo, stimando bo, i invitando bo pa siguié.

Algun aña pasa mi a wòrdu yama, huntu ku mi kasa, Jacqui pa presidí riba e Mishon Spokane Washington. Nos a yega den e kampo misional ku meskla di temor i emoshon pa ku e responsabilidatnan di traha ku asina tantu mishonero hóben remarkabel. Nan a bin di diferente ambiente i hopi lihé nan a bira manera nos propio yunan.

Maske hopi di nan tabata hasiendo hopi bon, algun di nan tabata lucha ku e ekspektativanan haltu di nan yamamentu. Mi ta kòrda un misionero ta konta mi, “Presidente, ami no gusta hende.” Vários di nan a bisa mi ku nan falta e deseo di sigui e reglanan basta estrikto di mishon. Mi tabata preokupá i ta puntra mi mes kiko mi por hasi pa kambia e kurasonnan di e poko misioneronan ku ainda no a siña e goso di ta obediente.

Un dia miéntras mi tabata manehá dor di e kamponan bunita di trigo na e frontera entre Washington i Idaho, mi tabata skucha un grabashon di e Tèstamènt Nobo. Miéntras mi ta skucha e historia konosí di e hóben riku ku a bai serka e Salbador pa puntr’e kiko e por hasi pa risibí bida eterno, mi a risibí un revelashon personal inesperá pero profundo ku aworakí ta un memoria sagrado.

Despues di a skucha Hesus resitá e mandamentunan i e hóben kontesta ku e la warda tur for di tempu ku e tabata chikitu, mi a skucha pa e Salbador su korekshon apasibel: “Un kos bo falta: … bende tur loke bo tin, i … bin, … sigui mi.” Pero pa mi asombro, mi a skucha seis palabra promé ku e versíkulonan ku parse ku nunka ma yega di skucha òf lesa promé. Ta manera nan a wòrdu agregá nan e eskrituranan. Mi a maravia na e entendimentu inspirá ku a sosodé e momentu ei.

Kiko tabata e seis palabranan ku tabatin un efekto asina profundo? Skucha pa wak si abo por rekonosé e palabranan ku ta parse asina normal, no ta wòrdu haña den otro relatonan di evangelio pero solamente den e Evangelio di Marko:

“A bin unu koriendo … i e la puntr’e, Bon Maestro, kiko mi tin ku hasi pa mi heredá bida eterno?

“I Hesus a bis’e. …

“Bo konosé e mandamentunan, No kometé adulterio, No mata, No hòrta, No lanta falsu testimonio, No kometé Froude, Honra bo tata i bo mama.

“I e la kontesta … , Maestro, tur e kosnan aki mi a warda for di mi hubentut.

“E ora ei Hesus mirando e a stim’e, i a bisé, Un kos bo ta falta: bai bo kaminda, bende tur loke bo tin, i duna na e pober, i lo bo tin tesoronan den shelu: i bin, karga bo krus, i sigui mi.”

“E ora ei Hesus mirando ea stim’e.”

Ora ma skucha e palabranan aki, un imágen bibu a yena mi mente di nos Señor tuma un pousa i mirando e hóben aki.Mirando – manera mirando profundamente i penetrante den su alma, rekonosiendo su bondat i tambe su potensial, i tambe por a diserní su gran nesesidat.

I despues den e palabranan simpel – Hesus a stim’e. E la sinti un amor grandi i kompashon pa e bon hóben aki, i pasobrae amor aki, i ku e amor aki, Hesus a puntr’e ainda mas di dje. Mi por imaginá mi kon e hóben aki lo mester a sinti pa ta yena ku e tipo di amor aki miéntras e ta wòrdu puntra pa hasi algu sumamente difísil manera bende tur loke e tin I duna na e pobernan.

Na e momentu ei, mi tabata sa ku no ta solamente e kurason di algun di nos misioneronan tabata tin mester di kambia. Tabata mi kurason tambe. E pregunta no tabata mas “Kon un presidente di mishon frustra por laga un misionero ku desafio komportá mihó?” Na su lugá, e pregunta ta “Kon ami por ta yena ku e amor di Kristu, yuda un misionero sinti e amor di Dios pa medio di mi i deseá pa kambia?” Kon ami por mir’e den e mesun manera ku Dios a wak e hóben riku ei, mirando nan pa loke realmente nan ta i kiko nan por bira, en bes di djis pa loke nan ta hasiendo òf no? Kon mi por ta manera e Salbador?

“E ora ei Hesus a mirando e a stim’e.”

For di e momentu ei, mi a sinta rudia pa rudia ku un misionero hóben luchando ku e aspekto di obediensia, den su kurason mi a mira awor un hóben fiel ku a aktua riba e deseo di bin ku mishon. E ora ei mi tabata por a bisa ku tur mi sentimentunan meskos ku un mayor: “Elder òf Hermana, si mi no tabata stima bo, lo mi no lo a preokupá kiko lo pasa den bo mishon. Pero mi stima bo, i pasobra mi stima bo, mi ta preokupá pa loke bo ta bira. Kermen mi ta invitá bo pa kambia e kosnan ku ta duru pa bo i bira e loke Señor ke pa bo ta.”

Kada bia ku mi bai entrevista mishoneronan, promé mi ta hasi un orashon pa e don di karidat i ku mi por mira kada Elder òf Hermana manera Señor ta mira nan.

Promé ku konferensistanan di zona, ora Hermana Palmer i ami ta saludá kada misionero un pa un, mi ke wanta un momentu i wak nan profundo den nan wowonan, mirando nan – un entrevista sin palabra – i despues sin fayo, mi tabata yena ku e gran amor pa e presioso yunan di Dios.

Mi a siña hopi lèsnan ku ta kambia bida for di eksperensianan personal profundo ku Marko kapítulo 10. Akinan ta e kuater lèsnan ku mi ta kere lo yuda kada un di nos:

Manera nos ta siña wak otronan manera Señor ta wak nan en bes di wak nan ku nos propio wowonan, nos amor pa nan lo krese i nos asina tambe nos deseo pa yuda nan.Nos lo mira e potensial den otronan ku kisas nan mes no ta mira den nan mes. Ku amor manera di Kristu nos lo no tin miedu di papia ku grandesa, pasobra “amor perfekto ta kita tur temor.” I nos nunka lo entrega, kòrdando ku esnan ku ta mas duru pa stima ta nan tin mester di mas amor.
Ningun enseñansa berdadero lo sosodé si e wòrdu hasi den frustrashon òf rabia, i kurasonnan lo no kambia si no tin amor presente. Sea nos ta aktua den nos ròlnan komo pariente, maestro, òf lidernan, enseñansa berdadero solamente lo sosodé den un esfera di konfiansa i no kondenashon. Nos hogarnan lo ta semper un lugá di refugio pa nos yunan – no un ambiente hostil.
Amor nunka mester wòrdu kita for di un mucha, amigu, òf familiar ku ta faya na biba di akuerdo ku nos espektativanan. Nos no sa kiko a pasa ku e hóben riku despues ku e la bai ku tristesa, pero mi tin konfiansa ku Hesus ainda stim’e perfektamente hasta si e la skohe e kaminda mas fásil. Kisas despues den bida, ora e haña ku su gran pertenensianan ta bashí, e ta kòrda i aktua riba e eksperensia singular di ora Señor a mir’e, stim’e, i invit’é pa bin si sigui E.
Pasobra E stima nos, Señor ta spera muchu mas di nos. Si nos ta humilde, nos por risibí Señor su invitashon pa arepentí, pa sakrifiká, i pa sirbi manera ta evidente den Su amor perfekto pa nos. Despues di tur kos, e invitashon pa arepentí ta tambe un invitashon pa risibí e don maravioso di pordon i pas. P’esei, “no despresiá … e kastigu di Señor, tampoko desmayá ora bo ta wòrdu koregí dor di dje; pasobra esun ku Señor ta kastigá e stima.”

Mi rumannan, awor kada bia ku bo sinti ku bo ta wòrdu pidi algu duru pa hasi – deshasí di un kustumber malu òf un adikshon, pone un banda aktividatnan mundano, sakrifiká un aktividat faborito pasobra e ta riba dia di reposo, pordoná un hende ku a hasi bo algu malu – pensa riba Señormirandobo, stimando,bo, i invitá bo pa laga bai i sigui E. I gradisié pa stima bo sufisiente pa invitá bo pa hasi mas.

Mi ta testifiká di nos Salbador, JesuCristu, i mi ta spera e dia ku E lo pone su brasanan rondó di kada un di nos, mirandonos i rondoná nos ku Su amor perfekto. Den e nòmber di JesuCristu, amèn.