Yamá pa e Obra
Un asignashon pa traha den un lugá spesífiko ta esensial i importante pero sekundario na un yamada pa e obra.
Presidente Monson, nos ta konmoví pa skucha bo stèm i risibí bo instrukshon. Nos ta stima bo, nos ta sostené bo, i nos ta hasi orashon semper pa bo.
Mi ta pidi pa e asistensia di e Spiritu Santu miéntras nos ta konsiderá huntu e prinsipionan ku ta pertenesé na e gran obra di prediká e evangelio na tur nashon, tribu, idioma, i pueblo.
Yamá pa Sirbi i Asigná pa Traha
Tur aña míles di hóbennan adulto soltero i, hopi pareha di edat, ta spera ansioso pa risibí un karta spesial di Salt Lake City. E kontenido di e karta ta afektá e persona na ken e ta dirigí, i meskos miembronan di famia i un gran kantidat di otro hende pa semper. Na yegada, e ènvelòp por wòrdu habri nèchi i ku pasenshi òf ta wòrdu di sker ku eksitashon i ku masha purá. Lesa e karta spesial aki ta un eksperensia pa no lubidá nunka.
E karta ta firmá pa e Presidente di E Iglesia di Jesucristu di e Santunan di e Delaster dianan, i promé dos frasenan ta bisa: “Pa medio di esaki bo a wòrdu yamá pa sirbi komo mishoneronan di E Iglesia di Jesucristu di e Santunan di e Delaster dianan. Bo ta asigná pa traha den e Mishon ______ .”
Por fabor nota ku e promé frase ta un yamada pa sirbi komo mishonero di tempu kompletu den e Iglesia restourá di Señor. E di dos frase ta indiká un asignashon pa traha den un lugá i mishon spesífiko. E distinshon importante ekspresá den e dos frasenan aki ta esensial pa nos tur komprondé.
Den e kultura di Iglesia, hopi biaha nos ta papia di wòrdu yamá pa sirbi den un pais manera Argentina, Polonia, Korea, òf Estádos Unídos. Pero un mishonero no ta wòrdu yamá na un lugá; e ta yamá pa sirbi. Señor a deklará na José Smith na 1829 ku si bo tin deseo pa sirbi Dios, bo ta yamá na e obra.
Kada yamada i asignashon di mishon, òf un asignashon nobo, ta e resultado di revelashon mediante Señor su sirbidónan. Un yamamentu pa e obra ta bini di Dios pa medio di e Presidente di Iglesia. Un asignashon na un di e mas ku 400 mishonnan aktualmente habri rònt mundu ta bini di Dios pa medio di un miembro di e Quorum di e Diesdos Apòstelnan, aktuando ku outorisashon di Señor su profeta bibiente. E donnan spiritual di profesia i revelashon ta kompañá tur yamamentu i asignashonnan misional.
Sekshon 80 di e Doctrina y Convenios ta un registro di un yamamentu misional pa Stephen Burnett ekstendé pa Profeta José Smith na 1832. Studia e yamamentu aki por yuda nos pa (1) komprondé mas mihó e distinshon entre wòrdu “yamá na e obra” komo un mishonero i “asigná pa traha” den un lugá partikular i (2) apresiá mas kompletamente nos responsabilidat individual i divinamente asigná di proklamá e evangelio.
Versíkulo 1 di e sekshon aki ta un yamamentu pa sirbi. Señor a bisa na su sirbidó Stephen Burnett ku e mester bai den e mundu i prediká e evangelio na tur kriatura ku lo bini na e zonido di su stèm.
Ta interesante, ku den versíkulo 2 Hermano Burnett ta wòrdu informá di su kompañero di mishon asigná. Señor a bisé ku komo Stephen Burnett a deseá un kompañero, E lo dun’é su sirbidó Eden Smith komo kompañero.
Versíkulo 3 ta indiká unda e dos mishoneronan tin ku bai traha. Señor a bisé ku e mester a bai prediká e evangelio. Sea e bai nòrt, zùit, ost,ost wèst no ta importá, pasobra lo e no por faya. (no ta importá ki direkshon e bai)
Mi no ta kere ku e frase “no ta importá,” manera bisá pa Señor den e eskritura aki, ta sugirí ku no ta import’é unda Su sirbidó traha. Echo ta ku ta import’é profundamente. Pero pa motibu ku e trabou di prediká e evangelio ta trabou di Señor, E ta inspirá, guia, i dirigí Su sirbidónan outorisá. Ora mishoneronan ta hasi esfuerso pa ta instrumento kada biaha mas digno i kapabel den Su mannan i ta hasi nan esfuerso pa kumpli ku fielmente ku nan deber, i despues ku Su yudansa nan no por bai robes----unda ku nan sirbi. Kisas un di e lèsnan ku e Salbador ta siñando nos den e revelashon aki ta un asignashon pa traha den un lugá spesífiko ku ta esensial i importante pero sekundario na un yamada pa e obra.
E siguiente versíkulo ta destaká kualifikashonnan importante pa tur mishonero. Señor a bisa ku nan mester deklará e kosnan ku nan a skucha, i kere realmente, i ku nan sa di ta bèrdat.
E delaster versíkulo a rekordá Hermano Burnett i nos tur na ken un yamamentu pa sirbi ta bini realmente, ku ta Señor Su boluntat i ku E a yam’é, i ku E ta su Redentor, Jesucristu. Amèn.
Superá Malkomprondementu
Algun di boso por ta puntrando boso mes di kon mi a skohe pa papia den un seshon di saserdosio di konferensia general di e distinshon aparentemente opvio entre wòrdu yamá na e obra i wòrdu asigná na un obra. Mi kontesta na boso pregunta ta bastante simpel: mi eksperensia a siña mi ku e prinsipionan aki no ta wòrdu bon komprendé pa hopi miembro di Iglesia.
E motibu di mas importante pa atendé e asuntu aki ta lokual mi a siña durante tempu di e preokupashon, i inkluso e kulpa ku hopi mishonero ta sinti ku pa vários motibu a wòrdu asigná di nobo na un diferente lugá pa traha durante nan tempu di sirbishi. E asignashon nobo aki tin biaha ta nesesario debí na eventonan i sirkunstansianan manera aksidente físiko i leshonnan, retraso, desafio den e hañamentu di visa, instabilidat polítiko, kreashon i kontratamentu di mishonnan nobo, òf e nesesidatnan rònt mundu ku ta keda kambia den e obra pa proklamá e evangelio.
Ora un mishonero wòrdu asigná di nobo na un kampo di labor diferente, e proseso ta eksaktamente meskos ku pa e asignashon inisial. Miembronan di e Quorum di e Diesdos Apòstelnan ta buska inspirashon i guia den hasimentu di tal asignashonnan di nobo aki.
Resientemente mi a papia ku un hòmber fiel ku a kompartí su sentimentunan di mas profundo di su kurason ku mi. Den un reunion, mi a kaba di splika e diferensia entre wòrdu yamá na e obra i asigná pa un obra. E bon hermano aki a duna mi man i ku lágrima den su wowonan a bisa mi, “E kosnan ku bo a yuda mi siña awe a aliviá un peso for di mi skouder ku mi a karga pa mas di 30 aña. Komo un mishonero hóben, mi asignashon inisial tabata pa obrá na Zùit Amérika. Pero mi no por a haña un visa, asina ku mi asignashon a kambia pa Estádos Unídos. Tur e añanan aki mi a puntra mi mes di kon mi tabata inkapas pa sirbi na e lugá pa kua mi a wòrdu yamá p’e. Awor mi sa ku mi a wòrdu yamá na e obra i no na un lugá. No tin palabra pa mi splika bo kon e komprondementu aki a yuda mi.”
Mi a sinti hopi tristesa pa e bon hòmber aki. Ora mi a siña e prinsipionan básiko aki rònt mundu, kantidat numeroso di hende a ekspresá den privá na mi e mes un sentimentu manera di e hòmber ku mi a kaba di deskribí. Mi ta atendé e tópiko aki awe pasobra ningun miembro di e Iglesia aki mester karga un peso innesesario di malkomprondementu, inseguridat, angustia, òf kulpa tokante di un asignashon pa obrá.
Señor a bisa Stephen Burnett ku e mester a bai prediká e evangelio. Sea e bai nòrt, zùit, ost,ost wèst no ta importá, pasobra lo e no por faya. (no ta importá ki direkshon e bai). Ora boso ta meditá riba e eskritura aki i habri boso kurason, mi ta spera i ta pidi ku boso lo invitá e Spiritu Santu pa hiba den boso kurason, e komprendementu, sanashon, i e restourashon ku boso por tin mester.
Un motibu mas ku mi a sinti impreshon pa papia di e tópiko aki ta mi eksperensia personal den asigná mishoneronan durante hopi aña. Pa e Diesdos, nada no ta konfirmá e realidat di revelashon aktual di delaster dia mas poderoso ku buska pa diserní e boluntat di Señor ora nos kumpli ku nos responsabilidat pa asigná mishoneronan na nan respektivo kampo di labor. Mi ta testifiká ku e Salbador konosé i ta kòrda riba kada un di nos “un pa un” i na nos nòmber.
Preparando pa un Yamamentu pa e Obra
Awor mi ke papia un tiki di un aspekto fundamental di preparashon pa un yamamentu pa e obra ku frekuentemente no ta wòrdu mirá.
Tres palabra mutuo ta definí un patronchi di preparashon i progreso pa e yunan hòmber di Dios: saserdosio, tèmpel, mishon. Tin biaha komo mayornan, amigunan, i miembronan di Iglesia, nos ta konsentrá asina tantu riba e preparashon misional di e hombres Jovenes te ku nos ta neglishá na sierto grado e pasonan vital banda di e kaminda di kombenio ku tin ku kumpli ku n’é promé kuminsá ku servio misional di tempu kompletu. Traha komo mishonero bèrdat ta un elemento pero no esun di mas importante pa krea un fundeshi fuerte pa un bida di kresementu spiritual i sirbishi. Bendishonnan di saserdosio i tèmpel tur dos ta promé ku yega na un kampo di labor asigná, tambe ta nesesario pa fortifiká i fortalesé nos spiritualmente durante henter nos bida.
Hombres Jovenes, ora boso ta kumpli ku boso debernan den e Saserdosio Aaróniko òf Saserdosio menor i ta honra esaki, boso ta preparando pa risibí i magnifiká e huramentu i e kombenio di e Saserdosio di Melchizedek òf Saserdosio mayó. Dignidat personal ta un rekisito di mas importante pa risibí e saserdosio mas haltu. Henter un bida di sirbishi desinteresá di saserdosio ta boso dilanti. Prepará awor dor di duna sirbishi signifikativo. Por fabor siña pa stima di ta digno i keda digno. Sea digno. Keda digno.
Despues di risibí e Saserdosio di Melchizedek i un yamada pa sirbi, un hòmber hóben por ta ekipá ku poder mediante e kombenionan i ordenansanan di e santu tèmpel. Bai tèmpel i tin e spiritu di e tèmpel pasa den boso ta presedé sirbishi efektivo komo un mishonero di tempu kompleto. Dignidat personal ta un rekisito di mas importante pa risibí e bendishonnan di tèmpel pa boso hòmbernan hóben i pa tur miembro di Iglesia. Ora boso biba segun e normanan di evangelio, boso por drenta e kas di Señor i partisipá den ordenansanan sagrado durante boso añanan di teenager. Boso amor pa i komprendementu di e ordenansanan di tèmpel lo fortalesé i bendishoná boso durante boso bida. Por fabor siña pa stima di ta digno i keda digno. Sea digno. Keda digno.
Hopi hombres Jovenes i mujeres Jovenes ya tin un rekomendashon di tèmpel limitá. Komo poseedornan di Saserdosio Aaróniko boso ta hañando boso propio nòmbernan di famia i efektuá boutismo i konfirmashon pa miembronan di boso famia den tèmpel. Mantené boso rekomendashon pa tèmpel ta demostrá boso dignidat, i sirbi otronan den tèmpel ta un parti importante di prepará pa e Saserdosio Melchizedek.
Hombres Jovenes, kada un di boso ta un mishonero awor aki. Tur dia tin rònt di boso, amigunan i bisiña ku ta tene nan mes leu di e bèrdat solamente pasobra nan no sa unda pa hañ’é. Ora boso ta wòrdu dirigí pa e Spiritu, boso por kompartí un pensamentu, un invitashon, un teksto, òf tweet ku lo introdusí boso amigunan na e bèrdat di e evangelio restourá. Boso no tin ku warda pa boso yamada ofisial pa bira enbolbí ku anhelo den obra misional.
Komo saserdosio, bendishonnan di tèmpel i mishon ta reuní “huntu den un … den Cristu” i interaktuá den e kurason, mente, i alma di un mishonero hóben, e por kualifiká pa e obra. Su kapasidat ta oumentá pa kumpli ku e responsabilidat pa representá Señor Jesucristu ku outoridat. E kombinashon spiritual potente di honra e saserdosio i kombenionan di tèmpel, risibí e” poder di deboshon” mediante ordenansanan di saserdosio, sirbi desinteresadamente, i proklamá e evangelio eterno na e yunan di Dios ta abilitá un hòmber hóben pa bira firme i konstante den fe i ankrá i edifiká den [Cristu].”
Den nos hogar i na iglesia, nos por duna énfasis balansá na tur tres elemento di e patronchi di preparashon i progreso pa yunan hòmber fiel di Dios: saserdosio, tèmpel, mishon. Tur tres ta rekerí pa nos stima i permanesé digno. Sea digno. Keda digno.
Promesa i Testimonio
Mi kerido hermanonan, mi ta primintí e don spiritual di revelashon lo skucha na boso yamada pa e obra di proklamá e evangelio i boso asignashon na un kampo spesífiko òf kampo di labor. Ora boso prepará awor ku diligensia pa medio di sirbishi di saserdosio i tèmpel desinteresadamente, boso testimonio di Señor su realidat bibu lo wòrdu fortalesé. Amor pa E i Su obra lo yena boso kurason. Ora boso siña pa stima pa ta digno, boso lo bira un instrumento poderoso den e mannan di Señor pa bendishoná i sirbi hopi hende.
Ku alegria, mi ta testifiká ku nos Tata Selestial i Su Yu Stimá, Jesucristu, ta biba. Pa ta komprometé den Nan servisio ta un di e bendishonnan di mas grandi ku semper nos por risibí. Asina mi ta testifiká den e nòmber sagrado di Jesucristu, amèn.