Mauaina o le Mana o Iesu Keriso i o Tatou Olaga
O le talalelei a Iesu Keriso ua faatumulia i Lona mana, lea ua avanoa i afafine po o atalii uma o le Atua e saili atu ma le naunautai.
Ou uso e ma tuafafine pele, ua tatou ola i se tisipenisione ua sili ona faigata. O luitau, feteenaiga, ma faigata ua siomia ai i tatou. O nei taimi faigata na muai vaaia lava e le Faaola. Na Ia lapataia i tatou e faapea i o tatou aso o le a faaoso ai e le fili le ita i loto o tagata ma taitai ese atu ai i latou. Ae, sa lei faamoemoe lava lo tatou Tama Faalelagi o le a tatou taulimaina na o i tatou lava ia fenumiaiga o faafitauli faaletagata lava ia ma faafitauli faalemalo.
E matua alofa lava le Atua i le lalolagi ua Ia auina mai ai Lona Alo e Toatasi na Fanauae fesoasoani ia i tatou. Ma o Lona Alo, o Iesu Keriso, na foai maia Lona soifua mo i tatou. Ina ia mafai ai ona tatou maua le mana faaleatua—le mana lea ua lava e taulimaina ai avega, faafitauli, ma faaosoosoga o o tatou aso. O le asō, ou te fia talanoa atu ai e uiga i le auala e mafai ona tatou maua ai i o tatou olaga le mana o lo tatou Alii ma le Matai, o Iesu Keriso.
Tatou te amata e ala i le aoao e uiga ia te Ia. “E le mafai lava ona faaolaina [i tatou] i le lē iloa” o se mea. O le faateleina o lo tatou iloa e uiga i le galuega ma le misiona a le Faaola—o le faateleina lea o lo tatou malamalama i Lana aoaoga faavaema le mea na Ia faia mo i tatou—o le faateleina foi lena o lo tatou iloaina e mafai ona Ia auina mai le mana lea tatou te manaomiaina mo o tatou olaga.
I le amataga o lenei tausaga, sa ou talosagaina ai talavou matutua o le Ekalesia ia faapaiaina se vaega o lo latou taimi i vaiaso taitasi e suesue ai i mea uma na fetalai ai Iesu ma fai e pei ona tusia i tusitusiga faavae. Sa ou valaauliaina i latou ia avea ia mau o tusitusiga paia e uiga ia Iesu Keriso o loo i le Taiala i Tusitusiga Paia ma a latou mataupu aoaoina autu faaletagata lava ia.
Sa ou tuu atua lena lu’i ona ua uma ona ou taliaina e a’u lava ia. Sa ou faitauina ma vase lalo o fuaiupu uma o loo ta’ua ai Iesu Keriso, e pei ona lisiina i lalo o ulutala autu ma soa ulutala e 57 i le Taiala i Tusiusiga Paia. Ina ua ou faamaeaina lena galuega, sa fesili mai lo’u toalua ia te a’u po o le a se aafiaga ia te au o lena mea. Sa ou ta’u atu ia te ia, “O a’u o se tagata ua sui!”
Sa ou lagonaina se tuuto ua faafouina ia te Ia a o ou toe faitauina i le Tusi a Mamona le fetalaiga a le Faaola lava Ia e uiga i Lana misiona i la le tino. Sa Ia tautino mai:
“Ua ou sau i le lalolagi e fai le finagalo o lo’u Tama, aua na auina mai a’u e lo’u Tama.
“Ma na auina mai au e lou Tamā ina ia sii ae au i luga o le satauro.”
I le avea ai ma tagata o le Au Paia o Aso e Gata Ai, tatou te faasino atu i Lana misiona o le Togiola a Iesu Keriso, lea ua mafai ai ona avea le toetutu o se mea moni mo tagata uma ma ua mafai ai ona maua le ola e faavavau e i latou o e salamo i a latou agasala ma taliaina ma tausia ia sauniga ma feagaiga taua.
E le atoatoa le aoaoga faavae pe a tautalagia le taulaga togiola a le Alii e ala i fasifuaitau pupuu e pei “o le Togiola,” po o “le mana gafatia o le Togiola,” po o le “faaaogaina o le Togiola,” po o le “faamalosia e ala i le Togiola.” O nei faaupuga e aumaia ai se tulaga lamatia o le taitaiseseina o lo tatou faatuatua e ala i le taulimaina o le mea na tupu e peiseai na i ai sona lava ia ola ma gafatia e tutoatasi ai mai lo tatou Tama Faalelagi ma Lona Alo, o Iesu Keriso.
I lalo o le fuafuaga sili o le faavavau a le Tama, o le Faaola na puapuagatia. O le Faaola na motusiaina noataga o le oti. O le Faaola na totogia le tau mo a tatou agasala ma solitulafono ma tafiesea ai e tusa ma tuutuuga o lo tatou salamo.O le Faaola na te laveai i tatou mai le oti faaletino ma le faaleagaga.
E leai se tagata noa ua ta’ua “o le Togiola” lea e mafai ona tatou valaau atu i ai mo se fesoasoani, faamalologa, faamagaloga, po o le mana. O Iesu Keriso o le puna lea! O faaupuga paia e pei o le Togiola ma le Toetu ua faamatala ai le mea na faia e le Faaola, e tusa ma le fuafuaga a le Tama, ina ia mafai ai ona tatou ola i le faamoemoe i lenei olaga ma maua le ola e faavavau i le lalolagi a sau. O le taulaga togiola a le Faaola—le faatinoga tutotonu o le talafaasolopito o tagata ola uma—e silisili ona malamalama ma talisapaiaina pe a tatou fesootaia ma le patino ma le manino ia te Ia.
O le taua o le misiona a le Faaola na faamamafa mai e le Perofeta o Iosefa Samita, o lē na tautino mai ma le malosi e faapea, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, e faapea na Ia maliu, ma tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”
O le saunoaga patino lava lenei a le Perofeta na maua ai se uunaiga mo perofeta, tagatavaai, ma talifaaaliga e toa 15 ia tuuina mai ma sainia la latou molimau e faamanatu ai le 2,000 tausaga o le soifua mai o le Alii. O lea molimau iloga ua faaulutalaina “O Le Keriso Soifua.” E toatele tagata o le ekalesia ua taulotoina ona upumoni. O isi e tau le iloaina o loo i ai. A o e saili e aoao atili e uiga ia Iesu Keriso, ou te uunaia oe e suesue i le “O Le Keriso Soifua.”
A tatou faaalu aoga le taimi e aoao ai e uiga i le Faaola ma Lana taulaga togiola, tatou te tosina atu e auai i se isi elemene autu o le mauaina o Lona mana: tatou te filifili ia maua le faatuatua ia te Ia ma mulimuli ia te Ia.
O soo moni o Iesu Keriso ua loto e tutu atu, tautatala atu, ma ia ese mai ai i tagata o le lalolagi. E le fefefe i latou, ae tuuto ma lototetele. Sa ou iloaina ni soo faapena i le taimi o se tofiga talu ai nei i Mekisiko, lea sa ou feiloai ai i ni taitai faalemalo faapea ai foi ma taitai o isi tapuaiga faalelotu. Sa taufai faafetai mai uma ia te au mo taumafaiga lototoa ma le faamanuiaina a o tatou au paia e puipui ma faasao ia faaipoipoga ma aiga malolosi i lo latou atunuu.
E le faigofie pe otometi le avea ma ni soo mamana faapena. O la tatou taulaiga e tatau ona tāmau i le Faaola ma Lana talalelei. E matua manaomia ai se taumafaiga tele faalemafaufau e vaai atu ai ia te Ia i mafaufauga uma. Ae a tatou faia, e o ese o tatou masalosaloga ma popolega.
Talu ai nei sa ou aoao ai e uiga i se tamaitai talavou le fefe o le Lora. Sa valaauliaina o ia e auai i se tauvaga faalesetete mo lana aoga maualuga i le afiafi lava e tasi sa ia tautino ai e auai i se fonotaga a le Aualofa a le siteki. Ina ua ia iloaina le feteenaiga ma faamalamalama atu i taitai o le tauvaga e ao ona ia vave tuua le tauvaga ina ia auai ai i se fonotaga taua, sa ta’u atu ia te ia o le a faalēaogaina o ia pe afai na te faia lena mea.
O le a le mea na faia e lenei Lora o le au paia o aso e gata ai? Sa ia tausia lana tautinoga ia auai i le fonotaga a le Aualofa. E pei ona folafola atu i ai, sa faaleaogaina mai le tauvaga a le setete. Ina ua fesiligia e uiga i lana faaiuga, sa faigofe lana tali, “Ia, e taua atu le Ekalesia, a ea?”
O le faatuatua ia Iesu Keriso e faaosofiaina i tatou e faia ni mea semanu tatou te le faia. O le faatuatua e uunaia i tatou i faatinoga tatou te maua atili ai Lona mana.
Tatou te faateleina foi le mana o le Faaola i o tatou olaga pe a tatou osia feagaiga paia ma tausia na feagaiga i le saolele. O a tatou feagaiga e fusia ai i tatou ia te Ia ma tatou maua ai le mana faaleatua. I le avea ai ma soo faatuatua, tatou te salamo ma mulimuli atu ia te Ia i le vai o le papatisoga. Tatou te savavali i le ala o feagaiga ina ia maua ai foi isi sauniga taua. Ma le lotofaafetai, ua saunia e le fuafuaga a le Atua na faamanuiaga ina ia oo atu i tuaa o e na maliliu e aunoa ma se avanoa e maua ai i le taimi o o latou olaga faaletino.
E saili e alii ma tamaitai tausi-feagaiga ia auala e tausia ai i latou lava ia lē pisia mai le lalolagi ina ia leai ma se mea e pupunia lo latou mauaina o le mana o le Faaola. Sa tusia e se tasi āvā ma tina lenei mea talu ai nei: “O taimi pagatia ma faigata nei. E maeu lo tatou faamanuiaina i le mauaina o se malamalama faateleina o le ata o le faaolataga ma le taitaiga musuia mai perofeta, aposetolo, ma taitai agaalofa e fesoasoani ia i tatou e folau atu ma le saogalemu i sami sousou. Ua taofia lo matou mausa o le kiina o le leitio i le taeao. Ae, ua matou faalogologo i se lauga o le konafesi aoao i a matou telefoni feaveai i taeao uma a o matou saunia i matou lava mo le aso.”
O le isi elemene i le mauaina o le mana o le Faaola i o tatou olaga o le aapa atu lea ia te Ia i le faatuatua. O sea aapa atu e manaomia ai se taumafaiga filiga ma tuuto.
Tou te manatuaina le tala faatusi paia o se fafine na mafatia mo le 12 tausaga i se faafitauli o le tino gagase ma le maasiasi? Sa ia faatino se faatuatua tele i le Faaola, ma alaga atu, “Afai ou te pa’i atu tau [lava] o lona ofu, ou te ola ai.”
Sa manaomia e lenei fafine faatuatua ma tuuto ona aapa atu i le mamao na te mafaia ia maua ai Lona mana. O lona aapa atu faaletino o se faatusa lea o lona aapa atu faaleagaga.
E toatele i tatou e alalaga atu ma lagona o’oo’o o o tatou loto i ni upu talitutusa ma upu a lenei fafine: “Ana mafai ona ou aapa atu faaleagaga ina ia maua le mana o le Faaola i lo’u olaga, semanu ou te iloa taulima o’u faafitauli ogaoga. Semanu ou te iloa le mea e fai. Ma semanu ou te maua le mana e fai ai.
Pe a e aapa atu i luga mo le mana o le Alii i lou olaga i le malosi atoa e tutusa ma se tagata o loo malemo ma tau’ā’ā pea mo le ea, o le mana mai ia Iesu Keriso o le a avea ma ou mana. A silafia e le Faaola e te fia manao moni lava e aapa atu ia te Ia—pe a mafai ona Ia lagonaina le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia.
A e aapa atu faaleagaga e sili atu i lo se isi lava mea na e faia muamua, o le a tafe mai Lona mana ia te oe. Ona e malamalama ai lea i le uiga loloto o upu o loo tatou usuina i le viiga “O Le Agaga o le Atua”:
O le talalelei a Iesu Keriso ua faatumulia i Lona mana, lea ua avanoa i afafine po o atalii uma o le Atua e saili atu ma le naunautai. O la’u molimau a tatou mauaina Lona mana i o tatou olaga, o le a tatou olioli uma faatasi ma Ia.
I le avea ai ma se tasi o Ana molimau faapitoa, ou te tautino atu o loo soifua le Atua! O Iesu o le Keriso! Ua toefuatai mai Lana Ekalesia i le lalolagi! O le perofeta a le Atua i luga o le fogaeleele i aso nei o Peresitene Thomas S. Monson, o le ou te lagolagoina ma lo’u loto atoa. Ou te molimau atu ai, faatasi ma le faailoaga o le alofa ma faamanuiaga mo outou taitoatasi, i le suafa o Iesu Keriso, amene.