Rekohementu di e Famia di Dios
Dios Tata ke pa Su yunan bin kas bek, den famia i den gloria.
Mi kerido rumannan, mi ta kontentu ku e oportunidat di por ta ku boso den e komienso di e seshon general di konferensia. Mi ta yama bo un kaluroso bon bini.
Konferensia general semper tabata un tempu di reunion pa e Santunan di Delaster Dia. Ya pa hopi tempu nos a krese dje tantu ei ku nos no por reuní mas físikamente den un kaminda, pero Señor a proveé maneranan pa e bendishonnan di konferensia general por yega serka bo sin importá unda bo ta biba. Miéntras ta impreshonante pa wak e reunion di Santunan den e Sentro di Konferensia grandi aki, nos ku ta para na e pulpito aki semper tin den e wowonan di nos mente e mionnan di hende ku ta reuní ku nos rònt mundu pa wak i skucha konferensia. Hopi di boso ta reuní ku boso famianan; algun por ta reuní ku amigunan òf rumannan di Iglesia.
Na unda ku bo por ta, i na ki manera bo ta skuchando mi bos, sa ku maske bo no ta ku nos den persona aki, nos ta sinti ku bo ta ku nos den espíritu. Nos ta spera ku tur di boso lo sinti unu ku nos – ku lo bo sinti e poder spiritual ku ta bin kada bia ku un grupo di kreyente ta reuní den nòmber di Jesucristo.
Mi a sinti impreshoná pa papia ku bo awe tokante un otro tipo di reunion. E tipo aki no ta pasa kada seis luna, manera ta ku konferensia general. Esaki a bin ta sosodé kontinuamente for di e tempunan di komienso di e Restourashon di e Iglesia, i el a bin ta haña mas velosidat den último añanan. Mi ta referí na e rekohementu di e famia di Dios.
Pa deskribí e rekohementu, kisas ta mihó pa kuminda for di promé ku nos a nase, promé ku loke e Beibel ta yama “e komienso” (Génesis 1:1). Durante e tempu ei, nos a biba ku nos Tata Selestial komo Su yunan spiritual. Esaki ta bèrdat pa kada persona ku a yega di biba na mundu.
Bo sa, e nòmbernan “hermano” i “hermana” no ta solamente un saludo kordial òf términonan di kariño pa nos. Nan ta un ekspreshon di un bèrdat eterno: Dios ta literalmente tata di hinter humanidat; kada un di nos ta parti di Su famia eterno. Pasobra E stima nos ku e amor di un Tata perfekto, E ke pa nos progresá i avansá i bida manera E. E a ordená un plan den kua nos lo bin na mundu, den famia, i tin eksperensianan ku lo prepará nos mes pa regresá bek serka djE i biba manera E ta biba.
E elemento sentral di e plan aki ta e promesa ku Jesucristo lo ofresé Su mes komo un sakrifisio, pa reskatá nos for di pika i morto. Nos tarea ta pa akseptá e Salbador su sakrifisio dor di obedesé e leinan i ordenansanan di e evangelio. Abo i ami a akseptá e plan aki. En realidat, nos ta regosihá den dje, maske e ta nifiká ku nos mester bandoná e presensia di nos Tata i hasta lubidá kiko nos a eksperensia einan ku n’E.
Pero nos no a wòrdu manda aki kompletamente den skuridat. Kada un di nos a risibí un porshon di Dios su lus, yamá e “Lus di Kristu,” pa yuda nos distinguí entre bon i malu, korekto i inkorekto. Esaki ta e motibu pakiko esnan ku ta biba ku tiki òf ningun konosementu di e plan di nos Tata ainda por sinti, den nan kurason, ku sierto akshonnan ta hustu i moral miéntras ku otronan no.
Nos sentido korekto i inkorekto ta mas skèrpi ora nos ta lantando nos yunan. Hinka den kasi kada mayor ta e deseo di siña nan yunan moralnan virtuoso. Esaki ta parti di e milager di e plan di Tata Selestial. E ke Su yunan bin na mundu den famianan, siguiendo e patronchi eterno ku ta eksistí den shelu. Famianan ta e unidat organisatorio básiko den e reino eterno, i su intenshon ta pa nan tambe tin e unidat básiko aki na mundu. Ounke famianan terenal ta leu for di ta perfekto, nan ta duna e yunan di Dios e mihó chèns pa bin na mundu ku e úniko amor na mundu ku ta yega serka di loke nos a sinti den shelu – amor di e mayornan. Famianan ta e mihó manera pa preservá i transmití e moralnan di virtut i prinsipionan berdadero ku mas probablemente lo hiba nos bek den presensia di Dios.
Solamente un minoria chikí di e yunan di Dios ta optené, durante e bida aki, e entendimentu kompletu di e plan di Dios, huntu ku akseso na ordenansanan di saserdosio i konvenionan ku ta hasi e poder di e Salbador su ekspiashon kompletamente operashonal den nos bida. Hasta esnan ku e mihó mayornan por biba fielmente di akuerdo ku e lus ku nan a risibí sin nunka skucha di Jesucristo i su Ekspiashon òf risibí e invitashon pa wòrdu boutisá den Su nòmber. Esaki ta e bèrdat pa hopi di nos rumannan den hinter historia di mundu.
Algun lo por konsiderá esaki inhustu. Nan por hasta tum’e komo un prueba ku no tin ningun plan, ningun rekisito spesífiko pa salbashon – sentimentu ku un Dios hustu i amoroso lo no krea un plan ku ta na disposishon di solamente un porshon chikí di Su yunan. Otronan lo konkluí ku Dios lo mester a determiná for di komienso kua di Su yunan E lo salba i pone e evangelio na nan disposishon, miéntras esnan ku nunka a skucha e evangelio simplemente no a wòrdu “skohe.”
Pero abo i ami sa, pa medio di e bèrdat restourá dor di e Profeta Jose Smith, ku Dios su plan ta mas amoroso i hustu ku esei. Nos Tata Selestial ta ansioso pa reuní i bendishoná hinter su famia. Miéntras E sa ku no ta tur lo skohe pa wòrdu rekohé, Su plan ta duna kada un di Su yunan e oportunidat pa akseptá i rechasá Su invitashon. I famianan ta e kurason di su plan.
Siglonan pasa, e profeta Malakias a bida tokante di e dia benidero ku Dios lo manda Elias pa “bira e kurason di e tatanan na e yunan, i e kurason di e yunan na nan tatanan” (Malakias 4:6).
E profesia aki tabata asina importante, ku e Salbador a hasi menshon di dje ora e la bishita e Kontinente Amerikano despues di su Resurekshon (wak 3 Nefi 25:5–6). I ora e angel Moroni a bishita e profeta Jose Smith, e tambe a hasi menshon di e profesia tokante Elias i kurason, tatanan, i yunan (wakJose Smith-Historia 1:36–39).
Awe ta promé di Aprel . Dos dia despues, tres di Aprel ta marka e di 181 aña for di dia ku e profesia di Malakias a wòrdu kumpli. Riba e dia ei, Elias a bini, i e la duna Jose Smith e poder di saserdosio pa seya famianan eternamente (wak DyC 110:13–16).
For di e tempu ei, e interes pa eksplorá e historia familiar a krese hopi. Ku pasonan hopi grandi, ta parse manera hendenan ta wòrdu atraé na nan antepasado ku mas ku solamente kuriosidat kasual. Librerianan Geneologiko, asosiashonnan, i teknologianan a wòrdu krea rònt mundu pa apoyá e interes aki. E poder di internèt pa mehora komunikashon a duna famianan e oportunidat pa traha huntu pa buska nan historia familiar ku hopi velosidat i detayá manera nunka ántes.
Dikon tur e kosnan aki ta pasando? Pa falta di un mihó terminologia, nos ta yam’e “e Espíritu di Elias.” Tambe nos por yam’e e “kumplimentu di profesia.” Mi ta duna testimonio ku Elias a bin. E kurasonnan di e yunan –di abo i ami –a wòrdu bira na nos tatanan, nos antepasadonan. E sentimentu ku bo ta sinti pa bo antepasadonan ta parti di e kumplimentu di e profesia. E ta graba profundo den bo sentido di ken bo ta. Pero e tin mas di aber ku e DNA ku bo a heredá.
Por ehèmpel, ora bo ta sigui e indikashonnan pa siña tokante di bo historia familiar, bo por diskubrí ku un famia djaleu ta kompartí algun di e ekspreshonnan fasial mes kos ku bo òf bo interes den bukinan òf bo talento pa kanta. Esaki por ta hopi interesante i hasta hopi profundo. Pero si bo obra para aki, lo bo sinti ku falta algu. Esaki ta paso pa rekohé i uni Dios su famia ta rekerí mas ku sentimentunan kaluroso. E ta rekerí konvenionan sagrado hasi en konekshon ku e ordenansanan di saserdosio.
Hopi di bo antepasadonan no a risibí e ordenansanan aki. Pero den e providensia di Dios, abo si. I Dios tabata sa ku abo lo a sinti bo atraé na bo antepasadonan den amor i ku lo bo tin e teknologia nesesario pa identifiká nan. Tambe E tabata sa ku lo bo biba den un tempu kaminda akseso na e tèmpelnan sagrado; kaminda ordenansanan por wòrdu hasi, lo ta mas grandi ku kualke tempu den historia. I E sa ku E lo por konfia den bo pa logra su obra na bienestar di bo antepasadonan.
Di mes, nos tur tin hopi responsabilidatnan importante i urgente ku mester nos atenshon i tempu. Nos tur ta haña partinan di loke Señor ta spera di nos mas aleu di nos abilidatnan. Afortunadamente, Señor ta proveé un manera pa kada un di nos gana e konfiansa i satisfakshon den tur nos servisio, inkluyendo nos servisio di historia familiar. Nos por haña forsa pa hasi lo ke E ta pidi nos pa hasi pa medio di nos fe ku e Salbador no ta duna mandamentu “sin ku e prepará e kaminda pa [nos] por kumpli ku e kosnan ku e la manda nos hasi” (1 Nefi 3:7).
Mi sa ku esaki ta bèrdat dor di eksperensia. Hopi aña pasa, komo un estudiante universitario, mi a konosé un hòmber ku tabata traha pa un kompania grandi di kòmpiuter. Esaki tabata den e promé añanan di komputashon, i tabata kasualidat ku su kompania a mand’e pa bende kòmpiuter na e Iglesia di Jesucristo di e Santunan di Delaster dianan.
Asina leu ku mi por a sa e bendedó aki no tabatin ningun religion. Asina mes e la bisa ku asombro i sentimentu di iritashon, “Den e iglesia aki nan ta hasi e asina yama ‘genealogia,’ buskando nòmbernan di hendenan ku ta morto, trata na identifiká nan antepasado. Hendenan, mayoria di bia hende muhé, ta kore entre kashinan di fail, buskando den karchinan chikitu pa informashon.” Si mi ta kòrda korektamente, e la bisa ku e damanan tabata bisti kèts di deporte pa por kore un tiki mas duru E hòmber a sigui bisa, “Ora mi a wak e magnitut di loke nan tabata purba hasi, mi a realisá ku mi a diskubrí e motibu di e invenshon di kòmpiuter.”
Parsialmente e tabatin rason. Kòmpiuternan lo ta un parti importante pa e futuro di e obra di historia familiar –solamente no e kòmpiuter ku e tabata bende. Un lider inspirá di Iglesia a skohe pa no kumpra su kòmpiuternan. E Iglesia mester a warda pa e teknologia ku e tempu ainda no por a ni wòrdu imaginá. Pero mi a siña den e hopi añanan for di e tempu ei ku hasta e mihó teknologia nunka por ta un supstituto pa revelashon di shelu, manera e tipo ku e lider di Iglesia a risibí. Esaki ta un obra spiritual, i Señor ta dirigié pa medio di Su Espíritu Santo.
Djis algun siman pasa, mi tabata traha riba mi historia familiar ku un konsultor banda di mi i un otro asistente na telefòn. Riba e pantaya di kòmpiuter mi dilanti tabatin un problema fuera di mi alkanse mortal pa solushoná. Mi a mira dos nòmber, manda p’ami pa medio di e milager di teknologia, di hendenan ku por ta wardando riba nan ordenansa di tèmpel. Pero e problema ta ku e nòmbernan tabata diferente, pero tabatin un rason pa kere ku kisas ta e mesun persona. Mi tarea tabata pa determiná kiko ta e bèrdat.
Mi a pidi mi konsultornan pa bisa mi. Nan a bisa, “No, ku ami mester skohe.” I nan tabata kompletamente sigur ku ami lo diskubrí e bèrdat. E kòmpiuter, ku tur su poder di informashon, a laga p’ami e bendishon di wak e dos nòmbernan riba e pantaya, evaluá e informashon disponibel, buska otro investigashon, hasi orashon silensioso, i diskubrí kiko ta e bèrdat. Miéntras mi ta hasi orashon, mi tabata sa ku siguransa kiko mi tin ku hasi –meskos ku mi a hasi den otro situashonnan ora mi mester a dependé di asistensia selestial pa solushoná un problema.
Nos no sa ki maravia Dios lo inspirá hende pa krea pa yuda de Su obra pa rekohé Su famia. Pero kual sea invento maravioso ku por bini, nan uso lo rekerí e Espíritu trahando den e hendenan manera abo i ami. Esaki no mester ta un sorpresa pa nos. Despues di tur kos, esakinan ta yunan stima di Dios. E lo manda kual sea inspirashon ku tin mester pa duna nan e oportunidat pa regresá bek serka dje.
Durante añanan resien, e hubentut di Iglesia a respondé na e espíritu di Elias den un manera masha inspirativó. Hopi di nan tin nan propio rekomendashon limitá di tèmpel i nan ta us’e hopi. Boutisterionan di tèmpel ta mas okupá ku nunka; algun tèmpel hasta mester a ahustá nan skema pa akomodá e number kresiente di hóbennan ku ta asistí e tèmpel.
Ántes tabata un bista masha skars pero agradabel pa mira e hóbennan trese nòmbernan di nan propio antepasado na e tèmpel. Aworakí esaki ta e norma, i hopi biaha ta e hóbennan mes ku a haña nan antepasadonan.
Adishonalmente, hopi hóben a diskubrí ku dunando di nan propio tempu hasiendo e investigashon di historia familiar a fortalesé nan testimonio di e plan di salbashon. E la krese e influensia di e Espíritu den nan bida i rebaha e influensia di e atversario. E la yuda nan sinti nan mes mas serka di nan famia i mas serka di Señor. Nan a siña ku e obra aki ta salba no solamente esnan morto; pero e ta salba nos tur (wak DyC 128:18).
E hubentut a gara e vishon atmirabel; awor nan mayornan mester hasi meskos. Tin hopi hende ku awor a akseptá boutismo den e mundu di espíritu, pa motibu di e obra ku a wòrdu hasi dor di e hubentut, i nan ta wardando pa e ordenansanan ku solamente e adultonan por hasi den e tèmpel den e mundu aki. E obra di rekohé e famia di Tata Selestial no ta solamente pa e hubentut, e i no ta solamente pa nan abuelonan. Ta pa tur hende. Nos tur tin ku rekohé.
Esaki ta e obra di nos generashon, loke e Apòstel Pablo a bisa “e dispensashon di e kumplimentu di tempu,” ora Dios lo “rekohé huntu den un tur kos den Kristu, ámbos lo ke ta den shelu, i loke ta riba tera: hasta den dje” (Efesio 1:10). Esaki ta wòrdu hasi posibel pa medio di e obra ekspiatorio di Su Yu Stima, Jesucristo. Pa medio di dje, nos famianan, “ku tin biaha tabata leu, pero a bin serka pa medio di e sanger di Kristu. Pasobra e ta nos pas, e a hasi nos unu i e la basha e muraya mei mei ku ta separá nos abou” (Efesio 2:13–14). Bo a sinti esaki, manera ami, ora bo ta eksperensia un kresementu di amor ora bo ta wak e portrèt di un antepasado. Bo a sintié den e tèmpel, ora e nòmber riba un karchi ta aparentá mas ku solamente un nòmber, i bo no por a yuda di sinti ku e persona ei sa di bo i a sinti bo amor.
Mi ta testifiká ku Dios e Tata ke pa Su yunan bin kas bek atrobe, den famia i den gloria. E Salbador ta bibu. E ta dirigí i bendishoná e obra aki, i e ta kuida i guia nos. E ta gradesí nos pa nos servisio fiel den rekohé famia di Su Tata, i ta primintí e ayudo inspirá ku bo ta buska i mester. Den nòmber di Jesucristo, amèn.