Ana Burabeti te Atua
E aki tei te burabeti i marenara ma te tia Kamaiu. Ma e tei irarikira, ni kaota te kawai nakon te tia Kamaiu.
I reita au butimwaai nakon Unimwaane Gerrit Gong ao Unimwaane Ulisses Soares nakoia taari aika kakaokoro n te Kooram n te Tengaun ma Uoman.
Ni kamatoaakin Beretitenti Russell M. Nelson ae ana burabeti te Uea ao te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira, boni ngaira kaain te bootaki ae tabu are e a kaman taekinaki—te tai ae tabu ibukina bwa kanoan te aoa ae nako e a kaman kariariaaki i karawa ma imwaain te aonaaba. Te Uea Iesu Kristo, ae e kaira Ana mwakuri, e a tia n te bong aei rinanon Beretitenti Eyring ni kaota ana burabeti, ana tia kairiiri ae katabuaki, nakoira, ngaira ae ana aomata inanon te berita ae tabu, n anganiira te kona ni kaota ara tatauraoi ni kamatoa te burabeti ao ni iriira ana reirei.
Nakoia mirion n aomata aika tiaki raora n te tai aei n te Tienta ni Maungatabu, I tangiria ni kaotia nakoimi bwa Tamnein te Uea n te kateitei aei n tain kamatoaan Beretitenti Nelson boni ngaia raoi are ko na kantaningaia bwa e na riki—e onrake ni mwaakan te tamnei. Ma ara bootaki ae kairaki mai ieta tiaki tii man te Tienta ni Maungatabu aei, ma ni kabuta te aonaaba—inanon umwantabu i Atia, Aberika, ao Amerika Maiaki; inanon mweenga i Amerika Nuka ao Meang ao i Eurobe; iaan bwaranta n te Betebeke ao i aban marawa. Te bootaki aei e roko n taabo nako ni mwakoron te aonaaba ae ko mena iai, tii ngkana am reitaki e riaon riki ae tii te bwanaa man am tareboon. Katean baira a bon aki warekaki irouia ara bitiobi, ma a bon tauaki mwiia i karawa, bwa ara berita ae tabu ma te Atua, ao ara mwakuri a koreaki n te boki ni kamaiu.
Te Uea E Rinea Ana Abotoro
Rinean te burabeti e bon karaoaki iroun te Uea. Akea te anainano, akea te kaetieti, akea te baka n raoiroi ibukin te nakoa, akea te kauntaeka, te nanokokoraki, te kamangaongao, ke te waaki ni kakeru. I kamatoa naba bwa mwaakan karawa e mena irarikira n ruun te tembora are ieta ngkana ti tataro mwaaka ni katobibia Beretitenti Nelson ao n namakina ana kariaia te Uea ae koaua iaona.
Rinean Beretitenti Nelson ni beku bwa ana burabeti te Atua e karaoaki n taai ake ngkoa. Ana taeka te Uea nakon e kaineti naba nakon Beretitenti Nelson: “Ngke I tuai karikiko inanon te birito ao I ataiko; ao ngke ko tuai n otinako mai inanon te birito ao I tabuiko, I motika bukim bwa te burabeti nakoia botanaomata”1 Tii tenua te ririki n nako, Unimwaane Nelson ngke 90 ana ririki, boni ngaia te kaaman ni maan n te nakoa, ma uoman mai ibuakoia Abotoro ake teniman a bon uarereke riki aia ririki nakoina. Te Uea, are e taua mwiin te maiu ao te mate, e rinea ana burabeti. Beretitenti Nelson, ai 93 ana ririki, e bon rianako marurungina. Ara kantaninga bwa e na mena i rarikira teuana ke uoua riki te ririki, ma n te tai aei ao ti kataia n anaa nanona bwa e nang aki roroko n tabo ni katikera iaon maunga.
Ngkai ti kamatoa te burabeti n aron ae e katabua te Uea, e riai ni mataata bwa ti bon tii taromauria te Atua, Tamara are i Karawa, ao Natina are rietaata. Bon tii rinanon ana mwakuri aika raoiroi, ana nanoanga, ao ana akoi ara Tia Kamaiu, Iesu Kristo, ae ti kona iai n te bong teuana ni manga rin i Mataia.2
Bukin Tera Ti Ira te Burabeti
Ma Iesu e reireia naba te koaua ae kakawaki iaon taekan te toro are E kanakomaia nakoira. “Ane máneingkami n akoingkami, E taku, e “akoai naba; ao ane akoai ao e akoa naba Teuare kanakomaiai.”3
Te kabanea ni kakawaki n ana mwakuri ana burabeti te Uea bwa e na reireiniira taekan te Tia Kamaiu ao ni kairiira Nakoina.
A mwaiti bukin ae ti iriira iai Beretitenti Russell M. Nelson. Naake kaain naba te aonaaba a aranna bwa e wanawana. E riki bwa te taokita ibukin kuakua ngke 22 ana ririki, kinakina ae taokitan te maamaa, ao atakina bwa te aomata ae kaira aron moan kabobongan te korokoro n te buro.
Angiia ana butimwaea wanawanana ma ana motikitaeka: ruaiwa te ririki ni kamatebwaia aron te maiu ao te mate, ni maiu n tii iangoia, n tangira ao n reireiniia natin te Atua ake a mena ni koonan te aonaaba, ma n ikawai ni karekeia 10 natina, 57 tibuna, ao 117 tibutoruna (te kabanea n nambwa e bibitaki nakon; 118 ngke bungiaki tibutoru te mwaane n te Katenibong aei).
Te koraki ake a kinaa raoi a na taekina Beretitenti Nelson bwa e kaitara ma kaangaangan te maiu ma te onimaki ao te ninikoria. Ngke e anaaki maiun natina te aine ae 37 ana ririki ni maiu man te kaentia, Emily, e kitana buna ae e tangiria ao niman natina aika uarereke, I ongo ae taku, “Ngai tamana, te taokita n te kuakua, ao ana Abotoro te Uea Iesu Kristo, ma N na riai ni kabaraaka atuu man taekina, “Ma akea au taeka, ma e na tauaki am taeka.’”4
Taan Taratara Iaon te Taua
E ngae ngke ti karinei aeka n anua aika karineaki aikai, bukin tera ti ira Beretitenti Nelson? Bukin Tera Ti Ira te Burabeti? Bukina bwa te Uea Iesu Kristo e a tia ni weteia ao ni kabongana bwa Ana tia Tararua iaon te taua.
Carcassonne bon te kaawa ae onaki iaon Buranti are e tei n tiku imwin taai ake rimoa. Tauana aika ririeta a birirake man kamanoaki n oona, a tei bwa neia tan taratara ake a tantani iaon taawa akane ni ngaina ao ni bong, ni kamataua raoi aia taratara n te raroa ibukia aia kairiribai. Ngkana te tia taratara e nooria bwa a waaki aia kairiribai, bwanaana ni katauraoi e riki bwa kamanoaia kaain Carcassonne man te kaangaanga are e nang riki are aki nooria.
Te burabeti bon te tia taratara n te taua, e kamanoira man kaangaangan te maiu n Tamnei ake tiaki noorii.
Te Uea e taku nakon Etekiera, “I kateiko ba te tia tantani nakon te bata are Iteraera, ma ngaia ae ko na ongo te taeka [mai] wiu, ao ko na tuangia n reireia mai Rou.”5
Ti aki toki n taekina kainnanoakin iriiran te burabeti, ma uringa rawawatan te beku aei are e katikua te Uea i aoia ana burabeti. “Ao ngkana tao ko aki taetae n tuanga te aomata ane buakaka … , [ao] te aomata ane buakaka I buakon ana buakaka, … ma N na ukoukora bon rarana ni baim.”6
Te Koaua Bon Ibukim Ae Korakora Riki
Ti butimwaea Beretitenti Nelson n ai aron ae ngke ti butimwaea Mote ngke ti maiu n ana tai. E taku te Atua nakon Mote, “N na mena I wim, ma n reireiko am taeka.”7 Ti ongo iroun ana burabeti te Uea ma te onimaki bwa ana taeka bon “man oin wiin [te Uea].”8
Aio te koaua ae mataki? Tiaki, bon tiaki. Ngaira n tatabemaniira iai ara kakoaua ae e onoti n kakoauan Kaokan Ana euangkerio Iesu Kristo. Man oin nanora ao ara rinerine, ti katei baira ngke ingabong, ni kaoti nanora bwa tina boutoka ana burabeti te Uea n “ara kamatoa man nanora, ara onimaki, ara [ta]tataro”9 ao n toua mwiin ana reirei. Iai inaomatara ngaira Aika Itiaki ni Boong aika Kaitira n karekei oin ara kakoaua bwa wetean Beretitenti Nelson bon mai iroun te Atua. E ngae ngke kaainabau, Kathy, e kinaa raoi Beretitenti Nelson ni koaua n te maan ae kaniia tenua te ririki ao akea ana nanokokoraki ibukin weteana mai iroun te Atua, ngke e kamatoaki, e a moana warekan ana kabwarabwara n te maungatabu ni kabuta inanon 34 te ririki n nako, ao n tataro bwa e na reke kamatoan koauan weteakina ni burabeti. I berita bwa e na reke korakoran kakoauana iroum ngkana ko nanorinano ao n tau ni karekea.
E aera ngkai ti rang n tauraoi n iriira bwanaan ara burabeti? Ibukiia naake a beku mwaaka n ukoukora te maiu ae akea tokina, bwanaan te burabeti e uota te kamaiu n tamnei inanon taai aika mangaongao.
Ti maeka iaon te aonaaba ae karongoa ma aomata aika mwaiti ae a kaririira ni karaoi bwaai aika bati. Te intanete, ara tarebon, ara bwai ni kakukurei n aekaia nako a bane n roko korakoraia iaora, ma te kantaninga bwa ti na kaboi aia bwai ao n iri aia karinan.
N tarakina ae akea tokin karekean rongorongo ao iango tia kauringaki man koroboki aika tabu ae ti “katiotioaki, ”10 “n te angi nako ae te reirei nako,”11 n rangi ni kairoroaki n te “nanowanawana,” irouia naake a.“a kairaki nakon te kamaneaki are te burebureaki.”12
Kamatoan tamneira nakon bwanaan te Uea Iesu Kristo e kainnanoa te kakauongo irouia naake E kanakomaia. Iriiran te burabeti n te aonaaba ae e kamangaongao titebo ma ti niroaki ni kabuebuen te burangketi n tain te kamaitorotoro.
Ti maeka n te aonaaba ae iai bukin bwaai nako, kaetieti, kauntaeka, te eti, ao te kawbarabwara. Te titiraki ae “Bukin tera?” e bon rang n tamaroa ni mwaitin nako anuan maiura, n anganira te korakora ni wanawanara ni kairii angiin rinerine ao babaire ake ti kaitara ma ngaai n te bong koraki.
Ma bwanaan te Uea e aki toki n roko n akea kabwarabwaraana.13 Imwaain ngkoa kamatebwai n reirei iaon mwiin aia kakaonimaki ma onimakinaia bumwaane ao aine imarenaia ao ataein, e kabwarabwara te Uea, ““Ko na tai wene ni bure.”14 Ae e riaon te wanawana n tii ngaia, ti kawakina te bwaintituaraoi ae te Tamnei ae Raoiroi.
Tai Maaku
Bwanaan te burabeti, ngkana e taetae ma te tangira, e na riki n tainako bwa te bwanaa ni wewete bwa tina bitaki, n rairi nanora ao n oki nakon te Uea. Ngkana e kainnanoaki te kaetieti, tai kawaeremwea. Ao tai tabeaianga ngkana bwanaan te burabeti ni kaetieti e kaitarai iango aika rang ni kabonganaaki ngkai. Ake aki kakoaua aika taan kakaniko n taainako ao a bwanikiriniia burabeti n te tai are a nang taetae iai. Ngkana ko nanorinano n toui mwiin ana reirei ana burabeti te Uea, I berita nakoim bwa a na reke kakabwaia n te kawakinaki ao te rau.
Tai kubanako ngkana am tai n namakin are i bon iroum aki bane ni boraoi ma ana reirei ana burabeti te Uea. Aikai bon taai n reiakinaki, te nanorinano ngkana ti nako ni katorobubua n tataro. Ti mwananga nako ma te onimaki, n onimakina te Atua, n ataia bwa n te taina tina karekei kamatata mai iroun Tamara are i Karawa. Temanna te burabeti e kabwarabwara ana bwai n tangira te tia Kamaiu ae akea kabotauana bwa “e na anaaki ana baire te Nati nakon nanon ana baire te Tama.”15 Kataenikaian ara baire nakon ana baire te Atua bon, koauana, tiaki taenikai ma moanakin te tokanikai ae e kakukurei.
Tabeman a na kataia n rinanoa ana taeka te burabeti, ni kabane korakoraia ni kakaea bwa e nga ae ana taetae ni burabeti ao e nga ae bon oin ana iango.
N 1982, uoua te ririki imwaain weteana bwa te Mataniwi ni Kabuta, e taku Te tari Russell M. Nelson: “I aki manga titirakinai , ‘N ningai ae taetae ni burabeti iai te burabeti ao ningai ae e aki iai?’ N au iango e kangai, ‘N na kanga n riki n ai arona?’” E reitia, “N [au rabakau] e na toki titirakinan rongorongo mai iroun te burabeti ma ti iangoa kakoroan nanoia.”16 Aio aron maiun te mwaane ae nanorinano ao n nim ma te Tamnei ae e rineia n iriiria. Ai 36 te ririki nako, ao ngkai ai ana burabeti te Uea.
Karikirakea Aia Onimaki Kairake iroun te Tia Kamaiu
Inanon maiu, I a tia ni kunea bwa ngkana I kamatebwaia ma te tataromwaaka ana taeka ana burabeti te Uea ao ni karaurau ma te taotaonakinnano, ni kaeta au baire ma ana reirei, au onimaki iroun te Uea Iesu Kristo e na rikirake.17 Ngkana ti rineia bwa ti na katinanikua ana reirei ao ni iangoia bwa ti na ataibwai riki, e na rotaki ara onimaki ao ara taratara ibukin te maiu ae akea tokina e na kamabubuaki. I berita nakoim bwa e na rikirake am onimaki iroun te Tia Kamaiu ngkana ko teimatoa n nene n ririmwiin te burabeti.
E taku te tia Kamaiu, “Ni kabane burabeti … a kakoaua ibukiu.”18
E aki tei te burabeti i marenara ma te tia Kamaiu. E bon ti tei irarikira ni kaota te kawai nakon te tia Kamaiu. Ana bwai n tangira te burabeti ae korakora nakoira bon ana kakoaua ni koaua, ana atatai ae nene bwa Iesu bon te Kristo. N ai aron Betero rimoa, ara burabeti e taekinna “[Bon] te Kristo Ngkoe, are Natin te Atua are e maiu.”19
N te bong ae na roko, n tanrikaaki iaon maiura ae mamate, ti na kimwareirei bwa ti nakonako n te aonaaba n ana tai te burabeti ae maiu. N te bong anne, I tataro bwa ti na kona n taekinna:
Ti ongo irouna.
Ti kakoaua.
Ti kamatebwaia ana taeka ma te taotaonakinnano ao te onimaki.
Ti tataro ibukina.
Ti Katiteuanaki ma Ngaia.
Ti bon nanorinano teutana n iriria.
Ti tangiria.
I katuka au kakoaua ae matoa bwa Iesu bon te Kristo, ara Tia Kabooira ao ara Tia Kamaiu, ao Beretitenti Russell M. Nelson bon Ana burabeti ae kabiraki iaon te aonaaba. N aran Iesu Kristo, amen.