Mwet Nuhkwewa Enenuh In Eis Nuh Faclos Ine Se Ituckyang Sin Pahpah

Sel Elder Paul B. Pieper

Ke Itngucul

Oasr kuh yohk ac enenweyuck ke inen Mwet Lahngo. Pa ine sefanna ma oruh molwelah kuh uh.

Wik ekahsr somlah ah, nga oasr ke pacptais luhn tuhlihk yac alkosr ekahsr. Elos muhtwacwack in eis etwacack ke wosasuc luhn Jisus Kraist sin pahpah ninac ac mwet luti uh. Fihtac luhn luhlahlfongi lalos Kacl muhtwacwack in kap. Ac inge elos kena fahsr Tohkohl nuh ke kof luhn pacptais in eklac mempucr ke Alu fohlohkyak Lal. Nga liye ahkwot ac, nga nuhnkuh lah oacna fuhkah kahlwem lalos ke sie ohiyac yohk srihpac ke olwelah ke pacptais lalos: muhtweng lalos in eis nuh faclos inen Jisus Kraist.

Eke muhtwacwack ah, God El fahk yohk srihpac ke inen Jisus Kraist ke plwacn Lal nuh sesr uh. Lihpufacn se luti pahpah se emet tuhmwacsr ah, Adam in oruh ma nuhkwewa ke inen Wen, ac in auliyak ac in pahng nuh sin God ke inen Wen netok.¹

Mwet pahluh se ke Puk luhn Mormon luti nuh sin mwet lal, “Ac fah wacngihn sie ine sahyac ac ituckyang kuh kuhtwena inkacnek kuh ohiyac ma molwelah kuh in tuhkuh.”²

Leum El kalweni ma pwacye se inge nuh sel Mwet Pahluh Joseph Smith ke El fahk nuh sel lah Jisus Kraist pa ine se suc ma utuckuh sin Pahpah, ac wacngihn ine sahyac utuckuh ma kuh in molwelah mwet uh.³

Ke pacl lasr uh, Prestuhn Dallin H. Oaks el luti kuht lah “elos ma orekmakihn luhlahlfongi ke ine muhtahl luhn Jisus Kraist … ac ilyak nuh ke olwelah Lal ac … eis suwohs lalos ke kihsac in iwaclah luhn Jisus Kraist.”⁴

Pahpah tuhmasr Inkuhsrao El kena oruh in kahlwem na pwacye lah inen Wen Nahtuhl, Jisus Kraist, tiac pa na ine se inmahsrlon ine puhs. Oasr kuh yohk ac enenweyuck ke inen Mwet Lahngo. Pa ine sefanna ma oruh molwelah uh kuh uh. In ahkuhtweyac ma pwacye se inge ke we nuhkwewa, Pahpah luhngse tuhmasr El oruh in kahlwem nuh sin tuhlihk Nahtuhl kwewa lah oasr inkacnek se in fohlohk nuh Yohrohl. Tuhsruhk te kalmacn oasr tari luhn soko inkacnek pa fohlohk lasr uh mwesahs tari. God El fahk muh enenuh se ke oruh lasr lah mukul [ac muhtwacn] nuhkwewa enenuh in eis nuh faclos ine se ma utuckuh sin Pahpah.⁵

In eis kuh in orekmakihn kuh in molwelah ma tuhkuh muhkwena ke inen Kraist, kuht enenuh in “ahkpuhsisaclyekuht sifacna ye muhtuhn God … ac tuhkuh ke sie inse muhsahl ac toasr in nguhn … ac [in] kena in eis nuh faclos inen Jisus Kraist” ac ahkfalye mwe enenuh, oacna kawuck yac alkosr luhk, in eisyuck ke pacptais nuh ke Alu Lal.⁶

Elos kwewa ma kena pwacye in eis inen Mwet Lahngo nuh faclos enenuh in ahkfalye ac eis akwuck ke pacptais in sie mwe loh ke mahno nuh sin God ke sulwaclah lalos.⁷ Tuhsruhk pacptais uh muhtwacwack se na.

Kahs se eis uh tiac kahs suhnuhnkuh se. Kahs in mukwikwi se ma puhs kalmeyac.⁸ Oacyacpac, otwelah lasr in eis nuh facsr inen Jisus Kraist uh enenuh mukwikwi ac oasr ma puhs kac.

In mwe srihkasrak, sie kalmac ke kahs se eis uh pa in ip eis ke kuh eis nuh ke monun sie mwet, oacna ke kuht eis sie mwe nihm. In eis nuh facsr sifacna inen Kraist, kuht sulaclah in eis luti Lal, ohiyac Lal, ac yohk liki luhngse Lal, ke pwacye nuh lun mahnosr in eklac sie ipacsr. Ohinge yohk srihpac nguhsr lal Prestuhn Russell M. Nelson nuh sin mwet fuhsr ma mahtuh kuhtuh in pruhe ac ke kuh in mahno [suk] in kahlwem lah meac kalmacn kais sie sifac ac ine [Lal Mwet Lahngo] nuh [selos] sifacna,⁹ ac mongo ke kahs luhn Kraist ke ma suhmuhslah uh, yohk na ke Puk luhn Mormon.¹⁰

Sie pac kalmac ke kahs se eis uh pa in eis sie mwet ke sie sritacl ah kuh in insese nuh ke sie ma pwacye ke sie nuhnak kuh ip yohk. Ke kuht eis nuh facsr inen Kraist, kuht esacl oacna Mwet Lahngo se lasrac tahfwelah in eis mwe luti Lal tuh in mwe kol se nuh ke moul lasr. Ke sulaclah oasr kalmac nuhkwewa kuht oraclah, kuht kuh in eis wosasuc Lal muh pwacye ac ke ahkostwen moulkihn ke insiyacsr, kuh, nuhnak, ac kuhiyacsr kwewa.

Kahs se eis uh kuh in kalmac pa oruh in fal mwet se nuh ke inel kuh sie srihpac. Puhs sesr puhlakihn in eis sie kunohkohn in oruh kuh wi oruh sie srihpac kuh mukwikwi se. Ke kuht eis nuh facsr sifacna inen Kraist, kuht eis nuh facsr kunohkohn luhn sie mwet fahsr Tohkohl pwacye. Kuht inmahsrlon srihpac Lal, ac kuht “tu oacna mwet loh [Lal] ke pacl nuhkwewa ac ke ma nuhkwewa, ac ke acn nuhkwewa ma [kuht] oasr we.”¹¹ Prestuhn Nelson el pahngon “muhtwacn fuhsr nuhkwewa ac mukul fuhsr nuhkwewa … in weacng u in mwet fuhsr se luhn Leum in kahsruh oracni Israel.”¹² Ac kuht nuhkwewa engan in eis pahng se luhn mwet pahluh in fahkwack ine luhn Alu fohlohkyak Lal ma tuh fwackyak sin Mwet Lahngo sifacna. Alu luhn Jisus Kraist luhn Mwet Luhlahlfongi ke Lwen-sahflah.¹³

Ke oruh se ke eis inen Mwet Lahngo nuh facsr uh, kuht enenuh kahlwem kac lah srihpac luhn Kraist ac ke Alu Lal uh ma sefanna ac oacna sie. Elos tiac kuh in maelihk. In oacna, ekihn mwet tuhma lutlut nuh sin Mwet Lahngo ac mempucr oaru ke Alu Lal oacyacpac koflah maelihk. Fin kuht ahlohloh ke sulwaclah lasr nuh ke sie ma uh, na sulaclah lasr nuh ke ma se sahyac an ac srihkweni, pwacye oacna ke fong uh ukwe na lwen uh.

Kuhtuh mwet uh tena ke eis inen Jisus Kraist ac srihpac Lal uh mweyen eltahl nuhnkuh muh puhs ma tiac sukohsohk kac, karihngihnyuck, ac utuftuf ke ohiyac. Ma pwacye uh, eis nuh facsr inen Kraist ac kwewana ahksukohsohkye ac ahkyohkye. Ac okasack kena ma kuht puhlakihn pacl se kuht tuh eis plwacn luhn God ke luhlahlfongi ke Mwet Lahngo. Ke kena se inge moul na insiyacsr uh, kuht kuh in konwacack srihpac na pwacye luhn mwe sang ac talan ma utuckuh lasr lucng me uh, puhlakihn luhngse in ahkkuh Lal, ac kapwack ke nuhnak lasr ke onwacngwacn mwet sahyac. Ke kuht eis nuh facsr inen Mwet Lahngo lasr, pwacye kuht sruokyac ma wo nuhkwewa ac eklac oacna El.¹⁴

Yohk srihpac in esam lah eis inen Mwet Lahngo nuh facsr pa sie oruh nuh ke olwelah—muhtwacwack ke olwelah kuht oraclah ke pacptais ac. Prestuhn Nelson el luti, “sulwaclah [Lasr] in fahsr tukun Mwet Lahngo ke oraclah olwelah Yohrohl na liyacacng olwelah ingacn ac ikacslah sruhngluhl nuh ke mwe insewowo luhn nguhn nuhkwewa ac suwohs lasr ma oasr uh.”¹⁵ Sie sin suwohs lucng me in eis inen Mwet Lahngo nuh facsr ke pacptais pa kahsruh ma nuh ke akwuck se tok ke inkacnek luhn olwelah uh, pa ahkkweyelah. Ke nga siyuck sin kawuck yac alkosr luhk lah mac kalmacn eis inen Kraist nuh sel, el ana topuk, Kalmac pa nga kuh in eis Nguhn Muhtahl.” Pwacye sel.

Mwe sang luhn Nguhn Muhtahl ituck ke ahkkweyeyucklac tukun kuht eis akwuck luhn pacptais. Mwe sang se inge pa suwohs ac pacl wowo in eis Nguhn Muhtahl in sie kampacniacn pacl nuhkwewa. Fin kuht porongo ac ahkos puhsra srihsrihk ac fihsrwacsr Lal. El ac fihlikuhti na ke inkacnek soko ma kuht utyak kac ke pacptais ac, sensenkihn kuht pacl srihfeyuck in som liki ac ahkkweye kuht in auliyak ac eklac fin enenuh. Loh lasr tukun pacptais pa in srukyac na Nguhn Muhtahl pacl nuhkwewa yohrohsr kuht in muh kuh in kapkapwack na ke inkacnek in olwelah uh. Nguhn Muhtahl kuh in wi kuht muhkwena ke kuht liyacacng na moul lasr uh in nwacsnwacs ac in wacngihn ma koluk kac uh.

Ke srihpac se inge, Leum El use inkacnek se nuh sesr in srackna ahksasucye kuh in ahknwacsnwacsye ke pacptais lasr ah ke sie pac akwuck—pa sackracmacn. Kais sie wik kuht kuh in “ahkkahlwemye … tuh [kuht] insese in eis nuh [facsr] inen Wen nuhtum”¹⁶ sulpac, saplaklac ac eis ma ahol ikoac ac srahn Leum ke pahosr—bread ac kof—ac ip eis kac nuh ke nguhnasr. Fin kuht oruh, Mwet Lahngo El ac oruh usrnguck in ahknwacsnwacsye ac ahkfalye in eis pihrihkyuck luhn Nguhn Muhtahl. Pa inge pahkotwen wacngihn sahflahiyac ma konweyuckyak muhkwena ke inen Jisus Kraist. Oacna ke kuht eis Inel nuh facsr, El us ma toasr lasr. El eis ma koluk lasr ac ahsor lasr nuh Facl ac inge paho pahkotwen Lal srackna kolyucklac”¹⁷ in apihnkuhtlac ke paho luhngse Lal.¹⁸

Sackracmacn uh sie mwe ahkacsmak ke wik nuhkwewa ma use nuh facsr inen Jisus Kraist pa sie sulaclah ac fahsr na, ac tiac tui, tiac mukwikwi se na ma sikyak na ke lwen in pacptais lasr ah.¹⁹ Kuht kuh in tahfwelah ac kalweni in engankihn “mwe sang muhtahl, ma mwet uh tiac kuh in akihlen, in iyucklac ma koluk lasr ac eis ikwacl ac srahl.” ²⁰ Tiac mwe lut se lah ke pacl tuhlihk nuhtin God uh kahlwem ke mwe insewowo fokoko, ke nguhn ma kuh in tuhkuh ke eis nuh faclos inen Kraist, puhla lalos wacna ma ke engan ac kena lalos wacna utyak nuh ke sie olwelah nuh sin God lalos.²¹

Ke kuht ukwe inkacnek soko luhn olwelah ma akiyucki sin God inge, sulwaclah ac srihke lasr in eis nuh facsr inen Jisus Kraist ac use kuh nuh sesr kuh se “in sruokyacna [Inel] ma kwacna sihmlac ke [insiyacsr].”²² Kuht fah luhngse God ac mwet tuhlan lasr ac puhla sie kena in muhtwacta yohrohlos. Kuht ac ahkos masap Lal kena in fototo nuh Yohrohl ke utyak nuh ke olwelah sahyac Yohrohl. Ac pacl kuht konwekuhtyak sifacna muhnahs ac tiac kuh in oruh kena suwohs lasr uh, kuht ac pahng nuh Sel siyuck ke kuh ma tuhkuh muhkwena ke Inel na El ac kahsrwekuht. Ke kuht muhtweng ke luhlahlfongi, lwen se fah tuhkuh ke kuht ac liyacl ac weluhl, na kuht ac konwacack lah kuht eklac oacna El, ohinge fal in fohlohk nuh yurin Pahpah.

Mwet Lahngo El olwelah muh elos ma “luhlahlfongi ke inen Jisus Kraist ac alu nuh sin Pahpah ke inel ac kwacfweacng nuh ke sahflah ke luhlahlfongi ke Inel”²³ fah moliyucklac ke tohkohsrahi luhn God. Wi kowos, nga engan ke mwe insewowo inge oreklac kuh ke kuht eis nuh facsr inen Jisus Kraist uh, suc Kacl ac ke Inel nga fahkwack luhlahlfongi, amen.