Fokoko ac Tu na Kuh ke Luhlahlfongi luhn Kraist

Sel Elder D. Todd Christofferson

Ke U luhn Mwet Sap Singucul Luo

In ahkkweye fokoko ac tu na kuh ke luhlahlfongi luhn Kraist oasr enenweyac lah wosasuc luhn Jisus Kraist ikacslah sie insiyac ac nguhna luhn sie mwet.

Sramsram mahtuh ke Olweacng Mahtuh, kuht riti ke puhlan pacl wowo se ma tuhlihk nuhtin Israel ah weluhl Jehovah ahkfuhlwactye olwelah lalos ac alu nuh Sel ke kuhtuh pacl ma elos ngwet liki olwelah sacn ac alu nuh sin ma sruhlwaclah kuh Baalim.¹

Ke pacl in kol lal Ahab pa sie puhlan pacl ma forlah liki ma pwacye ke lacyacn epang ke tohkohsrah luhn Israel. Mwet pahluh Elijah ke sie pacl ah fahk nuh sel Tohkohsrah Ahab in oracni mwet luhn Israel oacyacpac mwet pahluh kuh prist luhn Baal nuh Finohl Carmel. Ke mwet ah fahsrweni, Elijah el fahk nuh seltahl, “Kowos ac tia orala sulela lowos an nwe ngac? [kalmac pa, “Kom ac sulwaclah ngac ma sie pacl kuh nuh kwewa?”] Fin Leum God pa God, na kowos alu nu sel, a fin Baal, kowos alu nu sel. Na mwet uh tiana kas.”² Na Elijah el fahk lah el ac mwet pahluh lal Baal ah in sihpsihpihkyac, ac fihliyac fin etong ah ke srucwuclsrihsr lalos, tuhsruhktuh “nimet akosack.”³ Na, “Na lela mwet palu lal Baal in pre nu sin god lalos, ac nga fah pre nu sin Leum God, ac el su topuk ac supwama e, el pa God pwaye. Na mwet uh arulana insese nu kac.”⁴

Kom ac esamwack lah prist lun Baal uh wowoyak pahngon god lalos sun ao in suhpwacma e, tuh “wacnginna topken pre lalos, ac wanginna puhsra longyuk.”⁵ Na ke pacl lal Elijah, el ahkwoyelah mwe loang luhn Leum ma kuhnausyucklac, tahkuhnlah etong ac fihliyac mwe kihsac sac nuh fin mwe loang sac, ac na sap in ukiyuckyang kof nuh fwac, tiac pacl se fanna tuh in pacl tolu. Wacngihn tahfuh luo kac lah tiac el kuh kuhtwena mwet kuh in ahkosack e sac.

“Ke sun pacl in orek kisa ke tafun len tok, Elijah mwet palu el kilukyang nu ke loang sac ac pre ac fahk, ‘O Leum God, God lal Abraham, Isaac, ac Jacob, akpweyi inge lah kom pa Leum God lun Israel, ac lah nga mwet kulansap lom su orala ma inge nukewa ke sap lom. …

“Leum God el suweya e, ac esukak mwe kisa, etong uh, eot uh, infohk uh, ac akpaoyela kof in laf soko ah.

“Ac ke mwet uh liye ma inge, elos putati nu infohk uh ac fahk, Leum God El God. El mukena pa God.”⁶

Mihsenge Elijah elac sahp fahk:

Lah God, Pahpah Tuhmasr, El oasr, kuh El wacngihn, tuh fin El oasr, alu nuh Sel.
Lah Jisus Kraist pa Wen nuhtin God, Mwet in Molwelah sifil moulyak luhn mwet uh, kuh fin El tiac, tuh fin pa El, fahsr Tohkohl.
Lah Puk luhn Mormon pa kahs luhn God, kuh tiac, tuh fin pa, na “fototoyang nuh sin God ke el [lutlutkihn ac] muhta na ke mwe luti luhn ma inge.”⁷
Lah Joseph Smith el liyacack ac eklac wi Pahpah ac Wen k eke lwen in spring ke yac 1820, kuh fin el tiacna, tuh fin pa el, ukwe na nuknuk in mwet pahluh, weacng ki in sil ah nga, Elijah, ituckyang nuh sel.

Ke toeni luhlahp se inge ah, Prestuhn Russell M. Nelson el fahk, “Kom tiac enenuh in nuhkanlah lah meac pwacye uh” [liye Moroni 10:5]. Kom tiac enenuh in nuhnkuh lah suc kom ac luhlahlfongi, kom kuh in eis fwackyuck lom sifacna lah Puk luhn Mormon pa kahs luhn God, lah Joseph Smith el mwet pahluh se, ac lah pa inge Alu luhn Leum. Lah mac ngac mwet sahyac fahk kuh oruh, wacngihn sie kuh in eislah mwe loh utuhkoht nuh lun siyom ac mwe nuhnak lom an ke ma pwacye.”⁸

Ke James el olwelah lah God elac “Sang yohk nu sin mwet nukewa” suc suk lahlmwetmwet Lal,⁹ el oacyacpac sensenkackihn:

“Ac ke pacl kowos pre, kowos enenu in lulalfongi ac in tiac alolo. Elos su alolo oana noa su tuhyak ac eng uh pahlela.

“Mwet ouinge in tiac nunku mu elos ac eis kutena ma sin Leum.

“Elos tafu luo in nunak lalos, ac seokak in ma nukewa.”¹⁰

Mwet Lahngo lasr, ke lacpo sahyac an, pa mwe srihkasrak suwohs se nuh ke okak. El fahk, Pahpah “El tiana filiyuwi nga in mukena, meyen pacl nukewa nga oru ma El insewowo kac.”¹¹ Motko ke ahkuhtweyacn ma suhmuhslah ke mukul ac muhtwacn suc, oacna Mwet Lahngo, ma fokoko ac tu na kuh:

Elos “forlah nuh ke luhlahlfongi pwacye; ac elos tuh tiacna som liki ma inge, tuh elos fokoko, ac tu na kuh, ac tiac mukwi, ahkolah in insacnweacng nohfohn in liyacacng masap luhn Leum.”¹²

“Nuhnak lalos kuh, ac elos likiyac luhlahlfongi lalos ke God pacl nuhkwewa.”¹³

“Ac liye, kowos sifacna etuh, tuh kowos liye ma inge, tuh elos suc utuckuh nuh ke etwacack luhn ma pwacye … elos fokoko ac tu na kuh ke luhlahlfongi, ac ke ma se ma oruh elos sukohsohklah.”¹⁴

“Ac elos arulana eisalosyang in porongo ac lutlut sin mwet sap uh, oayapa aengani yurin sie sin sie, ac wi pac ipeis ke kufwa in kunsalik bread, ac pre.”¹⁵

In ahkkweye fokoko ac tu na kuh ke luhlahlfongi luhn Kraist oasr enenweyac lah wosasuc luhn Jisus Kraist ikacslah sie insiyac ac nguhna luhn sie mwet, kalmac pa wosasuc tuhkuh tiac ke ma pucspucs ekuhllah moul luhn mwet se muhkwena, tuhsruhk tuh ahkuhtweyac yohk ke moul lal ac ohiyacl. Leum El fahk:

“Nga ac fah sot nu suwos inse sasu ac nunak sasu. Nga fah eisla liki kowos inse likkeke su oana eot, ac asot nu suwos inse akosten.

“Nga ac fah filiya ngunik in kowos, ac oru tuh kowos in fahsr tukun ma sap luk, ac liyaung ma nukewa ng asapkin nu suwos.

“Ac … kowos fah mwet luk, ac nga fah God lowos.”¹⁶

Pa inge olwelah se kuht oraclah ke pacptais lasr ac ke akwuck luhn tempuhl. Tuh kuhtuh selos soenna eis nohfohn wosasuc luhn Jisus Kraist nuh ke moul lalos. Ohinge, oacna ke Paul el fahk, elos “welul [Kraist] pukpuki,” elos muhlkuhnlah ip se ma “oana ke akmoulyeyukyak el liki misa … , finne ohinge kuht fah oayapa ku in moulkin sie moul sasu.”¹⁷ Wosasuc uh soenna ahkuhtweltahluh. Eltahl soenna infulwen ohiyacn Kraist. Eltahl oruh sol lalos ke mwet luti ac masap eltahl fah ukwe ac lah oyac kac kuh ngac ma pacl fal se in kuhlwacnsap ke Alu uh. Sahyacn ma inge, pa in liyacacng na pwacye olwelah lalos lah “elos ma sollac fal nuh ke olwelah”¹⁸ uh in lusrong ma kikiacp ac in tu na kuh ke luhlahlfongi luhn Kraist.

Inkaiyacsr sifacna konwacack pacl se inge in sulaclah inmahsrlon kain in wosasuc in wi mwet uh oruh ohiyac kuh mukwikwi luhn sie Alu an, ac in kihsackuhnuhllah ke ohiyacn Kraist ke sie pacna sahyac. Sie ma sikyak ke ma se inge pa, pweng wo ke wosasuc luhn Jisus Kraist ilyak nuh lun siyacsr ac nuhnuhnkuh ma oasr lun nguhnasr. Ac sahp tiac sikyak ke pacl sacn na, tuh kuht nuh kwewa enenuh in mukwiyak suwohslah nuh ke acn ahkinsewowoyeyucklac.

Upac tuhsruhk yohk srihpac in fokoko ac tu na kuh ke kuht konwekuhtyak sifacna lah kuht suleyucklac ke “fucnyuc luhn keok”¹⁹ sie ma ac sa kuh paht in sikyak nuh sesr ke moul kawihl lasr uh. Liki God, ohiyac lohsr inge pwacnlah nuh ke wacngihn finsrak, suhpwacr, ac finne mwen luhn sruhnga. Ke God, insewowo ahollah ngal, mihs ahollah tihkuclkucl, ac finsrak ahollah suhpwacr. Tu kuh ke luhlahlfongi luhn Kraist fah use kuhlwacng ac taptap wo lal.²⁰ El ac fah ekuhllah ma upac nuh ke mwe insewowo ac, ke kahs lal Isaiah, “oru … insewowo, ac tia asor.”²¹

Lelah ngacn fahk srihkasrak tolu suc ma ke etwacack luhk sifacna:

Oasr sie muhtwacn kweok ke wacngihnlac kuhiyacn, pahtlaciyacn mas lal pwacnwacng el tiac lohacng nuh ke ono lal, mwet ahkinsewowo lun pristut, ac lalo ac pruhe. Ne ohinge, luhlahlfongi lal ke kuh luhn pruhe ac luhngse pwacye luhn God nuh sel pa tiac wacngihnlac luhkwel uh. El kwacfweacng nuh met pengana lwen (ac kuhtuh pacl uh ao nuh ke ao) kuhlwacnsap oacna ke sapkihnyuck ke Alu uh ac, tuhkweni wi mukul tuhmwacl, liyacacng sucu lal, isracsr ke kuhiyacl. Kampare lal nuh sin mwet sahyac arulacna yohk, sukohsohklah liki kweok lal sifacna, ac el kwacna sislah pacl lal sifacna in kahsruh mwet sahyac. El kwacfweacng in tu kuh, ac mwet uh puhla engan ke weluhl uh.

Sie mukul mahtuhlah ke Alu uh, kuhlwacnsap ahksahfyelah misin la, ac pahyuckyak sin muhtwacn kahto se suc lut ke kuhtuh sin tuhlihk wiyacl muhtwacwacack in sramsram upac ke Alu uh ac Mwet Pahluh Joseph Smith. Tohkohyang, elos som liki alu uh ac kwacfwel elacn weluhlos. Kwacna sikyak kain atac se inge, elos tuhngaluhl ke sramsram in suhmaht, lain, ac petsac oreklac sin mwet ahkkoluk, inkaiyac ah suc pa mempucr ma tihllac liki alu uh. Tuhlihk wiyacl ah ahksruhksruhkye alu in luhlahlfongi lal, fahk nuh sell ah el tahfonglac ac luhlahlfongi lal muhtwacwacack in tahfuh luoyak sahyacn na ma sahyac. El nuhnkuh lah elac tui tiac sifil wi alu. El sramsram nuh sin muhtwacn kiyacl. El sramsram nuh sin mwet el luhlahlfongi. El pruhe. Ke el nuhnak ke fohsack luhn inmahngol, el esamwack ke pacl se ma el tuh puhla Nguhn Muhtahl ac tuh wi liye ke ma pwacye sin Nguhn Muhtahl ah. El ahksahfye fahk, “Fin nga suwohs nuh sihk sifacna, nga enenuh in fahk lah Nguhn puhsralyuclac puhs liki pacl se ac puhla luhk ke Nguhn uh pwacye.” El sifil ahksasucye engan ac mihs ma el akacsruhi nuh sin muhtwacn kiyacl ac tuhlihk nahtuhl.

Mukul sac ac muhtwacn kiyacl suc srwackna ac engan in ukwe kahs in kahsruh luhn Mwet Wiyaclos ke moul lalos ma elos puhlakihn ahsor ke upaciyac in oasr tuhlihk nahtuh uh. Elos ahkfalye in moli mwe enenuh ke ono kuh suk kahsruh sin taktuh pihsrlac, ac, tohkohyang, elos ahkinsewowoyeyuck ke sie tuhlihk mukul. Mwe ahsor, tukun sahp yac se, tuhlihk mukul sac puhtatyang nuh ke sie ongaiyac ma wacngihn sie mwet eis mwacta kac tuh lah el nuhkanuhl oasr in coma, mweyen muhsahllah puhrein lal ah. El eis kahsruh na yohk, tuh taktuh ah tiac kuh in palyeack lah meac e fah sikyak tok. Siyacnyacn se nahtuh tuhlihk se inge orekma ac pruhe na upac in fohlohkohnma tuhlihk sac nuh ke facluh se oacna in itucklac el, ac elos tiac etuh lah elac kuh in fohlohk nuh yohrohltahl. Elos kweoklacna in karihngihn elyah yohk luhn tuhlihk sac ke elos oruh pacna ma kunaclos sahyac. Ke pacl na upac se inge, elos foracng nuh sin Leum. Elos fungyang nuh ke “bread pengana lwen” ma elos eis Sel. Elos eis kahsruh sin kawuck ac sucu kuhlwacng ac ahkfokokoyeyuck ke mwe ahkinsewowo luhn pristut. Elos fototoyang nuh sin sie sin sie, kuhpahsr lalos ingena sahp loali, ac fal kuhtuh liki na in fihsrwacsr.

Ke Julahe 23, 1837, Leum El sapkihn fwackyuck se nuh sin prestuhn se ke U luhn Mwet Sap Singucul Luo ke pacl sacn, Thomas B. Marsh. Fahk ohinge:

Pruhe kacn Mwet Sap Singucul Luo. Ahkacsmakuhnuhltahl in kahlwem ke srihpen Leum, ahkacsmakuhnuhltahl ke ma koluk lalos, ac in luhlahlfongi kacn Leum.

Leum El fahk lah tukun mwe sruhf ac ma upac yohk, lah El ac fah puhla tohkohltahl, ac fin eltahl tiac na ahkupacye insiyaclos, ac tiac ahkkwekweye inkwacwaclos nuh sin Leum, eltahl ac fah eklac, ac fah onweyucklac.”²²

Nga luhlahlfongi lah mwe luti ahkkahlwemyeyuck ke fuhs inge ma nuh sesr kwewa. Mwe sruhf ac tihkuclkucl kuht puhlakihn uh, weacng kuhtwena mwe sruhf ma Leum El liye muh fal in srihkeyuck, kuh in kol kuht nuh ke eklac na pwacye ac onweyucklac lasr uh. Tuh ma se inge sikyak fin, ac fin muhkwena, kuht tiacna ahkupacye insiyacsr kuh ahkkwekweye inkwacwacsr nuh Sel. Fin kuht kwacfweacng in fokoko ac tu na kuh, lah meac ac fah tuhkuh, kuht eis eklac luhn Mwet Lahngo El oraclah ke El fahk nuh sel Peter, “Ac ke pacl se kom sifil foloko nu yuruk, kom fah akkeye mwet wiyom inge,”²³ eklac se tari ma tiac kuh in muhnahslah. Olwelah ke onweyucklac pa ahknwacsnwacsye ac ahkmuhtahlye ma koluk luhn nguhnasr, oruh kuht muhtahl.

Ahkacsmakihnyeyuck nga ke sramsram luhn ninac kiyuck: “Kang fukunsahk nohm; ac fah ahkwoye kom.” Pwacye sin ninac kiyacsr uh, ac ke mwe luti ke tu kuh ke luhlahlfongi, “kang fukunsahk nohm” pa in pruhe tahkuhnlah na, in mongo ke ma suhmuhslah pengana lwen, in kuhlwacnsap ac alu lun Lohm Alu, in suwohs in ipeis ke kuhfa luhn Leum kais sie wik, in luhngse mwet tuhlan lom, ac in sruhkwack sahkseng lom nuh sin God kais sie lwen.²⁴

Esam pacl nuh kwewa olwelah ke ma wo ac fah tuhkuh, kwewana ma ingena ac pacl fahsruh uh, nuh sin suc ma fokoko ac tu kuh ke luhlahlfongi luhn Kraist. Esam “moul ma pahtpaht, ac engan luhn mwet luhlahlfongi.”²⁵ “O kowos nuhkwewa suc nwacsnwacs sruhkwack insiowos nuh lucng ac eis kahs wolacna luhn God, ac ipeis ke luhngse Lal; tuh kowos fah, fin nuhnak lowos an kuh, ne tok ma pahtpaht.”²⁶ Ke inen Jisus Kraist, amen.