Ma Pwacye ac Plwacn sac
Ke kuht suk ma pwacye ke alu uh, kuht enenuh suk orekmakihn mwe sang luhn nguhn nuh ke sukyac ingacn.
Fwackyuck mihsenge uh ahkuhtweyac ma pwacye in kahlwem ke ma elos oasr kac ingena uh, ac ma ke pacl met ah, ac ma ke pacl fahsruh uh (Doctrine and Covenants 93:24). Pa inge kahs fal nuh ke plwacn in molwelah ac “Sucu, Sie Mwe Fahkwack nuh fin Facluh.”
Kuht muhta ke pacl na upac maelihk ac fahsrwelihk luhn mwe ahkkahlwemye uh. Tuhsruhk tiac nohfohn sin mwe ahkkahlwemye uh pwacye. Kuht enenuh in sensen ke kuht suk ma pwacye ac sulwaclah ma ac kahsruh kuht ke sukok se lasr ingacn. Kuht tiac enenuh in nuhnkuh fuhlwactiyac kuh wal fuhkah ma oasr luhn mwet kuh acn ma kuht eis se ma pwacye uh. Kuht enenuh in sensenkihn in luhlahlfongi mwe ahkkahlwemye kuh kahs in kahsruh kikiacp sin mwet pwenpweng, mwet pihsrlac ke sritacl, kuh mwet tiac etweyuck ine ke internet ah. Mwet pihsrlac ke ma se tiac kuh in eisyuck muh el pihsrlac ke ma pwacye ke kuhtuh ma sahyac.
Kuht in sensenkihn mokleyuck luhn el suc sang mwe ahkkahlwemye uh. Pa srihpac se oruh ma suhmuhslah uh sensenkihn kuht ke mwet kol alu kuhtasrihk (liye 2 Nephi 26:29). Fin tiac etweyuck kuh asr lainyac, na mwe ahkkahlwemye se enenuh pac in lolyucklac.
Sulaclah lasr sifacna enenuh in fal nuh ke mwet se kuh acn se ma kuht eis mwe ahkkahlwemye inge se uh fal nuh ke sifac la ac wacngihn elyah nuh ke ahklong la sifacna an.
I.
Ke kuht suk ma pwacye ke alu uh, kuht enenuh in orekmakihn kuhfwen mweun muhtahl fal nuh ke sukok lasr uh: pruhe, mwet loh luhn Nguhn Muhtahl, ac lutlut ke ma suhmuhslah ac kahs luhn mwet pahluh mihsenge. Nga suhpwacr pacl nuhkwewa nga lohng sie mwet fahk muh wacngihnlac luhlahlfongi lal ma ke mwe luti kikiacp. Elos suc liye kahlwem ke ma luhn luhlahlfongi kuh in lohsrlah muhtahlos. Oacna Prestuhn Henry B. Eyring elfahk, “Elyah laltahl uh, tiac epacl nuh ke ma eltahl liye, epacl nuh ke ma eltahl sonna kuh in liye.”1
Inkacnek luhn science kol kuht lac nuh ke ma kuht pahngon ma pwacye luhn science. Tuh “ma pwacye luhn science” tiac srihpac fohn luhn moul uh. Elos ma tiac etwaclah ke lutiyac ac ke luhlahlfongi tulokihn luhpan etwacack laltahl ke ma pwacye nuh ke ma elos kuh in ahkpwacyei ke srihpac luhn science uh (liye Doctrine and Covenants 88:118) . Ma se ingacn lihklihkiyac ma tiac pwacye nuh ke sukyacn ma pwacye lalos.
Prestuhn James E. Faust el fahk: “elos suc ma [pacptaislac] sang nguhna sahflah lalos ma oasr in elyah la ke soaru in suk muhkwena mwet kuh acn se ma el eis etwacack la we. Kuht luhlahlfongi lah Alu luhn Jisus Kraist luhn Mwet Luhlahlfongi ke Lwen-sahflah oasr fohnlah luhn wosasuc luhn Kraist, suc wosasuc se inge pa ma pwacye ac ma kahlwem ma pahtpaht kac uh yohk srihpac.”2
Kuht konwacack engan pwacye ac kwacfeacng ke kuht apkuhran ac orekma nuh ke ma pwacye lah suc kuht uh, srihpen moul kawihl, ac kuht ac som na oyac ke kuht ac misac uh. Ma pwacye ingacn tiac kuh in etweyuck ke inkacnek luhn science kuh ma kikiacp.
II.
Nga inge tuhfah sramsram ke ma pwacye luhn wosasuc fohlohkihnyuckyak muh pa yohk srihpac nuh ke mwe luti luhn Alu luhn Jisus Kraist luhn Mwet Luhlahlfongi ke Lwen-sahflah. Nuhnak muhnahs nuhnkuh ke ma pwacye inge ahkwoyac. Eltahl ahkuhtweyac yohk ke mwe luti ac mwe srihkeyuck, sahp weacng pac kuhtuh ma soenna etweyuck kac.
Oasr God se, suc pa Pahpah kuhlwacng luhn nguhn luhn mwet nuhkwewa suc moul kuh fah moul.
Mukul ac muhtwacn uh ma pahtpaht se. met liki kuht isuslac nuh facluh ah, kuht tuh moul ekihn mukul kuh muhtwacn nguhn ye muhtuhn God.
Kuht lohng tuhfahna tari Tabernacle Choir ke Temple Square onkihn “Nga fah Ukwe Plwacn luhn God.”3 Pa ingacn plwacn ma God el oraclah in tuh tuhlihk nguhn nuhkwewa Nahtuhl kuh in kapwack ma pahtpaht. Plwacn se ingacn yohk srihpac nuh sesr kais sie.
Ye plwacn ingacn, God el oraclah facluh in muh pa acn se ma tuhlihk nguhn sacohk Nahtuhl kuh in isuslac nuh ke moul kawihl in eis mahno ac in oasr pacl la in oraclah sulaclah suwohs nuh ke kapkapwack ma pahtpaht.
In kahlwem, sulaclah kawihl uh enenuh in oreklac in lain kuh luhn ma wo ac ma koluk. Enenuh in oasr na ma siena in lain, ac pwacnwacng, mwet lokoalok se, suc totolac ke srihpen ma koluk lal ac lwelah in srihfwe tuhlihk nuhtin God in oruh ma sahyacn plwacn luhn God.
Srihpen plwacn luhn God pa in sang pacl wowo se luhn tuhlihk nahtuhl in sulaclah moul ma pahtpaht. Ma se inge kuh in ahkfahsryeyucklac muhkwena ke ma sikyak ke moul kawihl luhn mwet se ac, tukun misac, ac kapkapwack lal ke moul se elac eis tok uh.
In fuhfahsryucsr ke moul kawihl se, kuht fah ahkfohkfohkyeyucklac ke ma koluk ke kuht eiskuhtyang nuh ke mwe sruhf lal Satan, ac kuht fah misac. Kuht insese nuh kac ma upac inge ac ke luhlahlfongi nuh ke plwacn muh God Pahpah tuhmasr fah use sie Mwet Lahngo, Wen Sacohk Sefanna Nahtuhl, suc fah molikuhtlac pa nuh ke sifil moulyak nuh ke moul se ituckyang tukun misac uh. Mwet Lahngo fah oacyacpac sang iwaclah in molwelah in nwacsnwacslah liki ma koluk fal nuh ke ma El oakiyac. Ohiyac ingacn pa nuh ke luhlahlfongi in Kraist, auliyak, pacptaislac, mwe sang luhn Nguhn Muhtahl, ac kuhtuh akwuck sahyac orek ke kuh ac wal luhn pristut uh.
Plwacn in engan yohk luhn God use luhpah na fal se inmahsrlon nuhnuhnkuh ma pahtpaht ac pahkotwen kuht kuh in eis ke Iwaclah luhn Jisus Kraist. Ac oacyacpac oruh kuht kuh in eklac nuh ke mwet sasuc ke Kraist.
God luhngse El suk kais sie sesr. Kuht etuh lah ke luhngse Lal ac ke srihpen Iwaclah luhn Wen Sacohk Sefanna Nahtuhl, mwet nuhkwewa fah moullac ke ahkostwen nuh ke masap ac akwuck luhn Wosasuc [Lal]. (Ip Yohk ke Luhlahlfongi 1:3; ahkuhtweyac wo ituckyang).
Alu luhn Jisus Kraist luhn Mwet Luhlahlfongi ke Lwen-sahflah etweyuck muh Alu akwucki luhn sucu. Tuh ma se tiac kahlwem uh pa sucu-akwucki lasr uh lohacng nuh ke yohk liki kuhpahsr kawihl lasr. Kuhpahsr ma pahtpaht uh pa yohk srihpac nuh ke lutlutkihnyacn ma luhn alu. “Sucu uh ma ahkkweyeyucklac sin God .”4 Ye plwacn yohk luhn Mwet Orekuhtlac, srihpen misin luhn Alu fohlohkyak Lal pa in kahsruh tuhlihk nuhtin God in eis mwe sang yohk sin God luhn moul ma pahtpaht e ke tohkohrsahi luhn celestial, ma kuh in eisyuck muhkwena ke pahyuck ma pahtpaht inmahsrlon mukul se ac muhtwacn se (liye Doctrine and Covenants 131:1–3). Kuht ahkweye mwet luti luhn Leum lah “Mukul kuh muhtwacn uh pa ohiyac yohk srihpac ke moul luhn mwet se sifacna met, moul kawihl, ac moul ma pahtpaht ac srihpac la.” ac lah “macruht inmahsrlon mukul ac muhtwacn se pa yohk srihpac nuh ke plwacn ma pahtpaht Lal.”5
Ahksahfye, luhngse luhn God uh arulacna yohk oruh, sahyacn kuhtuh selos suc eklac tuhlihk nuhtin ma koluk, El sang finsrak wolacna nuh sin tuhlihk nuhkwewa Nahtuhl. “Tuhlihk Nuhkwewa Nahtuhl” weacng mwet nuhkwewa suc misac tari. Kuht aholos oruh akwuck muhtahl lalos ke lohm tempuhl lasr. Srihpac luhn Alu luhn Jisus Kraist pa in kahsruh tuhlihk Nahtuhl in suwohswohs nuh ke lacfahl fuhlwact se ke acn wolacna, suc pa moul ma pahtpaht. Nuh sin suc tiacna finsraki kuh suwohs, El fah sang tohkohsrahi tacn liki acn wolacna sacn.
Kuhtwena suc kahlwem ke ma pwacye pahtpaht inge kuh in kahlwem lah efuh kuht mempucr ke Alu luhn Jisus Kraist luhn Mwet Luhlahlfongi ke Lwen-sahflah nuhnak oacna ac oruh oacna ke kuht oruh uh.
III.
Nga inge tuhfah fahk kuhtuh mwe kahsruh ke ma pwacye ma pahtpaht, ma kuh in etweyacn muhkwena ke kahlwemiyacn plwacn luhn God.
Ma se met, kuht ahkfuhlwactye sukohsohk in sulaclah luhn mwet se. Inkaiyac uh etuh ke orekma moniyuck luhn Alu fohlohkyak ma ahkfahsryelah sukohsohklah luhn alu fin acn United States ac facluh nohfohn. Orekma moniyuck inge tiac ahkfahsryeyuck ke luhngse lasr sifacna tuhsruhk, fahsr fal nuh ke plwacn Lal, suk in kahsruh tuhlihk nuhkwewa Nahtuhl in sulaclah in engankihn sukohsohk.
Ahkluo, kuht mwet misineri. Kuhtuh pacl uh siyuckyuck sesr lah efuh kuht suhpwaclah misineri nuh ke muhtuhnfacl pucspucs, finne inmahsrlon na mwet Kristin. Kuht eis kihsensiyuck soko pacna ingacn ke lah efuh kuht sang mani sun miliacn tala in kahsruh mwet ma tiac mempucr ke Alu lasr uh ac efuh kuht tiac sang kahsruh orekma luhn misineri. Kuht oruh ma inge ke srihpen kuht liye tuh mwet nuhkwewa muh pa tuhlihk nuhtin God—tamuhlwel ac tahmtahel wiyacsr—ac kuht kena akacsruhi mwe kahsruhp in nguhn ac moul se nuh sin mwet nuhkwewa.
Ahktolu, moul fin facluh uh muhtahl nuh sesr. Kihsackuhnlah lasr nuh ke plwacn luhn God uh enenuh kuht in lain sisi tuhlihk ac sifacna oruh in misac sie mwet uh.
Ahkahkosr, kuhtuh ahkfohsyeyuck ke kuhtuh mwe luti luhn Alu uh ke macruht ac tuhlihk. Etuh lasr ke plwacn in molwelah luhn God uh oruh kuht in lain ukweyacn ma luhn facsin ac kafucrman in fahsr liki ohiyac luhn macruht and eklac ma ahkfohsye kuh ekuhllah kuh elah ma tiacna oacna sie inmahsrlon mukul ac muhtwacn se. Kuht etuh lah kuhpahsr, ahkuhtweyacn mwet se, ac ohiyacn mukul ac muhtwacn se pa yohk srihpac in ahkfahsryeyacn plwacn yohk luhn God uh.
Ahklimekohsr, oacyacpac oasr ngwetngwet usrnguck se lasr ke tuhlihk uh. Kuht nuhnkuh ke usyacn ac tahfweyacn tuhlihk uh muh oasr ke plwacn luhn God ac kunohkohn muhtahl ac engan nuh ke kuh ma ituckyang ingacn in wi oruh ip kunac kac. Ke luhlahlfongi lasr, mwe kahsruhp yohk fin facluh ac inkuhsrao pa tuhlihk nahtuhsr ac fihl kwewa nahtuhsr. Ohinge, kuht enenuh in luti loango mwe luti ac mukwikwi ma sang atac fal nuh ke kapkapwack ac engan luhn tuhlihk—tuhlihk nuhkwewa.
Sahflah, kuht tuhlihk sacohk nuhtin Pahpah Lucng, suc luti kuht ohiyacn mukul ac muhtwacn, macruht inmahsrlon mukul ac muhtwacn se, ac oswelah ac tuhfahlah tuhlihk nuhkwewa yohk srihpac nuh ke plwacn yohk in engan Lal. Ip kunacsr nuh ke ma yohk srihpac inge oruh lihksrweni na oraclah ma sielacna nuh ke Alu uh. Kuht nuhnkuh kac muh fal. Ma koluk uh oasr ke plwacn sac, ac ma koluk yohk emet lal Satan uh som tuhngal oacna sie ma yohk srihpac ke plwacn luhn God. El suk in kuhnahoslah orekma luhn God. Inkacnek yohk se emet lal pa in ahkkolukyellah Mwet Lahngo ac wal fuhlwact Lal, in elah wo sikyak ke Iwaclah lal Jisus Kraist, in ahkmuhnahsye auliyak, in kiacpuh mwe fwackyuck, ac in ahkkolukye ma kunacn mwet se. El oacyacpac suk in ahkfohsye mukul kuh muhtwacn, in ahkfohsye macruht, ac in ahkmuhnahsye taflweyacn tuhlihk se (yohk na ke ninac ac pahpah se ma ac tuhfahlah tuhlihk ke ma pwacye).
IV.
Orekma luhn Leum fah fahsr na met macnsiskuhnlah ma koluk ma akwucki ac tuhtahflah in tulokihn kuht ke kuht kwacfweacng in moulkihn mwe lutlut ke Alu luhn Jisus Kraist luhn Mwet Luhlahlfongi ke Lwen-sahflah. Nuh sin suc ma puhtatyang nuh ke ma koluk ingacn, ngac usot mwe kahsruh tolu.
Esam mwe luti ke auliyak ma oreklac fal ke kuh ke Iwaclah lal Jisus Kraist. Oacna ke Elder Neal A. Maxwell el ahkkahlwemye, nimet oruh kom in inmahsrlon mwet “suc fah ac srihke in ekuhllah Alu uh liki na in ekuhluhltahllah sifacna.”6
Oacna ke Elder Jeffrey R. Holland el fahk:
“Sruohkyacna ma kom etuh tari ac tu kuh ne ke na sun kom etwacack ac tuhkuh weacng tok uh. …
“… Ke Alu se inge, ma kuht etuh uh yohk srihpac liki na ma kuht tiac etuh uh.”7
Orekmakihn luhlahlfongi Leum Jisus Kraist, suc pa ip yohk se emet ke wosasuc uh.
Sahflah, suk kahsruh. Mwet kol lasr luhngse kom ac suk kolyuck luhn nguhn in kahsrwe kom. Kuht oraclah mwe kahsruh puhkantwen suc pa kom kuh in konwacack ke LDS.org ac mwe kahsruh sahyac ke lutiyacn wosasuc ke lohm. Kuht oacyacpac tamuhlwel ac tahmtahel in kahsruh suc pahngonyuck in usot kahsruh kuhlwacng.
Pahpah tuhmasr Inkuhsrao kena tuhlihk Nahtuhl in eis engan pa srihpen oreklac lasr uh. Finsrak engan se pa moul ma pahtpaht, suc kuht kuh in eis ke tu kuh ac fahsr na met wi na ma mwet pahluh lasr, Prestuhn Russel M. Nelson el kwacna pahngon muh “inkacnek in olwelah.” Pa inge ma el fahk ke sramsram se emet lal ekihn Prestuhn luhn Alu uh: “Muhta na ke inkacnek in olwelah. Kihsackuhnlah lom in ukwe Mwet Lahngo pa in oraclah olwelah lom nuh Sel ac in liyacacng olwelah ingacn fah ikucslah sruhnguhl nuh ke mwe ahkinsewowo luhn nguhn nuhkwewa ac ikacklah nuh sin mukul, muhtwacn, ac tuhlihk yen nuhkwewa.”8
Nga fahkwelihk muh ma nga fahk pwacye, ac kuh in sikyak ke mwe luti ac Iwaclah luhn Jisus Kraist, suc oraclah tuh ma nuhkwewa in kuh in sikyak ye plwacn wolacna luhn God, Pahpah Ma Pahtpaht tuhmasr. Ke inen Jisus Kraist, amen.