“Leum, Nga Luhlahlfongi”
Sel Elder Jeffrey R. Holland
Ke U luhn Mwet Sap Singucul Luo
Akihlen in suwohs kihsen siyuck ac elyah lom an, tuhsruhk ma se met ac ma pahtpaht ahkfokokoye luhlahlfongi srihsrihk lom an, ke srihpen ma nuh kwewa kuh in orek nuh selos suc luhlahlfongi.
Ke sie pacl ah Jisus El sun sie u suc akuhkuhin nuh sin mwet tuhma lutlut Lal. Ke topuk siyuck luhn Mwet Lahngo lah meac srihpen fohs se inge, pahpah tuhmwacn sie tuhlihk kweok el sis falkacl nuh met, ac fahk lah el som nuh yurin mwet tuhma lutlut lal Jisus elos in ahkkweyelah wen se nahtuhl ah, tuhsruhk elos koflahna. Ke tuhlihk mukul sac ngalseni wihsel, atinfihlack fahsr inwacluhl ye muhtahlos, pahpah sac kwacfe siyuck sel Jisus ac sahp puhsrwacl ahkkahlwemye kena yohk lal.
“Pahkomuhtahsr ac kahsrwe kuht,” el fahk, “ kom fin kuh.
“Jisus El fahk nuh sel, kom sifacna fin luhlahlfongi, ma nuh kwewa kuh nuh sel suc luhlahlfongi.
“In pacl sac na pahpah sac wowoyak ac fahk nuh sel, Leum, nga luhlahlfongi; kahsrweyuc ahkyohkye luhlahlfongi luhk uh.”1
Luhlahlfongi luhn mukul se inge, ke fahkwack lal sifacna, srihklac. Tuhsruhk el elyah, ke kena yohk ke srihpen tuhlihk sefanna nahtuhl. Fwack nuh sesr lah wo fal nuh ke muhtwacwacackiyac uh. Finne kom kena muhkwena in luhlahlfongi, ” Alma el fahk, kuht enenuh in lwelah kena se inge in orekma ke insiyacsr, ne ke na kuht luhlahlfongi.”2 Ke wacngihn finsrak luhlah, pahpah sac orekmakihn luhpan luhlahlfongi ma oasr lal ac kwacfe sin Mwet Lahngo luhn facluh, “Kom fin kuh in oruh kuhtwena ma,pahkomuhtahsr, ac kahsrwe kuht.”3 Nga riti kahs ingacn a upac ngan tiac tuhng. Kahs se kuht uh kahlwem lah orekmakihnyuck in oacyac. Mukul se inge, el fahk muh, “Sucu lasr uh kwacfe. Pacl upac lasr uh tiac tui. Kuht tohtohlah. Tuhlihk mukul se nahtuhsr puhtatyang nuh lun kof se. El puhtatyang nuh lun e se. El tiac tui ke sensenkihnyuck uh, ac kuht tiac tui ke sensen uh. Kuht tiac etuh lah meac sahyac kuht ac oruh. Yac kom kuh in kahsrwe kuht? Kuht ac tarilacna ke kuhtwena ma—finne sie mwe ahkinsewowo, finsrak srihsrihk, in eisyucklac kuhtuh srihsrihk ma toasr luhn ninac kiyacn tuhlihk mukul se inge ke lwen nuh kwewa in moul lal.”
“Kom fin kuh in oruh kuhtwena ma, ” fahkyuck sin pahpah sac, fohlohk nuh sel, “Kom sifacna fin kuh in luhlahlfongi, ” fahkyuck sin Mwet Luti .4
“In pacl sac na,” ma suhmuhslah uh fahk—tiac kahkahsrihk kuh tuhpwek kuh ahngon tuhsruhk “in pacl sac na”—pahpah sac ahkkahlwemye na pwacye kweok lal, ac wowoyak, “Leum, nga luhlahlfongi, tuh soenna fal; kahsrweyuc ahkyohkye luhlahlfongi luhk uh.” In topuk luhlahlfongi sasuc ac srihsrihk se, Jisus El ahkkweyelah tuhlihk mukul sac, apkuhran in oacna in muh El ahkmoulyaclwack liki misac oacna ke Mark el ahkuhtweyac ke ma sikyak inge.5
Nuhnkuh sramsram na ahkmokleyuck se ke ma suhmuhslah uh, nga kena sramsram suwohswohswacng nuh sin mwet fuhsr ke Alu uh—fuhsr ke matwac kuh fuhsr ke puhtahkah in mempucr kuh fuhsr ke luhpan luhlahlfongi. Ke sie inkacnek kuh siepacna inkacnek sahyac, kuht nuh kwewa wi ma sacn.
Liye se met ke sramsram se inge pa ke el sun ma upac nuh sel ke luhlahlfongi, pahpah sac sang kuhiyacl emet ac na fah ahkkahlwemye muhnahs lal. Fahk se emet lal ah kuh na ac tiac ahlohloh: “Leum, nga luhlahlfongi.” Nga ac fahk nuh suwos nuh kwewa suc finsrak in ahkyohkye luhlahlfongi la, esam mwet se inge! Ke pacl sahngweng kuh ahlohloh kuh ke pacl ongaiyac, sruokyac na luhlahlfongi ma oasr tari yurum, finne luhlahlfongi uh srihklac. Ke kapkapwack ma kuht nuh kwewa enenuh in puhlakihn ke moul sukawihl, oasr ma ac sikyak nuh sesr ma ac fah oacna kweok luhn tuhlihk mukul se inge kuh fosrngah luhn ninac kiyacl ac pahpah tuhmwacl uh. Ke kain pacl se ingacn tuhkuh ac ongaiyac uh sikyak, ac top nuh ke ongaiyac ingacn tiacna sa in tuhkuh, sruokyac na ma kowos etuh tari an ac tu na kuh ne ke na etwacack uh tuhkuh . Ma ke srihpen ohiyac sikyak se inge, lah Jisus El fahk, “Luhlahlfongi lowos fin oacna luhman fihtacn mustard se, kowos ac kuh in fahk nuh sin eol soko inge, Fahsrot liki acn se inge nuh ingoh; na ac som; ac kowos ac kuh in oruh kuhtwena ma.”6 Luhpan luhlahlfongi lowos kuh etwacack lowos an tiac pa yohk srihpac uh—pwacyeiyacn oruh lom nuh ke luhlahlfongi ma oasr yurum ac ma pwacye ma kom etuh tari.
Liye ahkluo an siena liki ma se met ah. Ke ongaiyac uh tuhkuh ac kihsen siyuck uh mayak, nimet muhtwacwacack ke luhlahlfongi lom an ke kom fahk luhpan luhlahlfongi ma tiac oasr yurum, kuh muhtwacwacack ke “suhlahlahlfongi.” Oacna in muh kom ac nwacklah insiyacn sie won tucki ke inwacluhl. Lwelah nga in kahlwem ke ip se inge: Nga tiac siyuck kom in oruh in nuhmuh oasr luhlahlfongi lom ke wacngihn uh. Nga ac siyuck sum in pwacye nuh ke luhlahlfongi ma oasr yurum an. Kuhtuh pacl uh kuht oruh in nuhmuh sie fahkwack suwohs ke tahfuh luo uh pa sie ma ahkkahlwemye ohiyac puhlaik ma yohk srihpac liki na in fahkwack suwohs ke luhlahlfongi. Tiac na! Na, lwelah tuh kuht in esam pweng kahlwem ke sie sramsram ke ma suhmuhslah uh: Oruh in suwohs kihsen siyuck lom an oacna ke kom enenuh in oruh; moul uh sesseslah ke kain kihsen siyuck nuh kwewa. Tuhsruhk fin kom ac sucu lom an kena in onweyucklac, nimet lwelah kihsen siyuck ingacn in kosrwaclah luhlahlfongi ma ac oraclah ma usrnguck uh.
In tahfwelah, oasr luhlahlfongi lom yohk liki na ma kom nuhnkuh muh oasr yurum ke srihpen ma Puk luhn Mormon pahngon mwe ahkpwacye yohk.”7 “Kowos ac akihlacnuhlos ke orekma lalos,” Jisus El fahk,8 ac ma sikyak ke moul fal nuh ke ip yohk luhn wosasuc uh kahlwem ke moul luhn Mwet Luhlahlfongi ke Lwen-sahflah fin acn nuh kwewa. Oacna ke Peter ac John elos fahk sie pacl ah nuh sin un mwet emet ah, nga fahk mihsenge, “Kuht tiac kuh in tiac fahk ma kuht sifacna liye ac lohng uh,” ac ma kuht tuh liye ac lohng uh pa “mwenmwen ma orek” ke moul luhn miliacn sin mempucr ke Alu se inge. Ma se ingacn tiac kuh in lahfwekihnyuck .9
Tamuhlwel ac tahmtahel, ma inge pa orekma muhtahl ma ac fahfahlacna, wi mwe insewowo ma liyeyuck kac uh fin acn nuh kwewa, na pwacnwacng nuhnak muhnahs nimet fosrngahlah fin ke pacl nuh ke pacl oasr elyah sikyak ma enenuh in liyeyuck, kahlwem kac, ac ahkwoyeyucklac. Elyah uh ac nuh sikyak na ac fah liyeyuck, kahlwem kac, ac ahkwoyeyucklac. Ke Alu se inge, ma kuht etuh uh yohk srihpac liki na ma kuht tiac etuh uh . Ac esam, ke moul sukawihl se inge, kuht nuh kwewa enenuh in moul ke luhlahlfongi.
Na oruh in kuhlwacng nuh ke muhnahs luhn mwet uh—muhnahs lom sifacna ac oacyacpac muhnahs lalos suc wi kowos kuhlwacnsap ke Alu se ma kolyuck sin mukul ac muhtwacn facluh ma sang ke pacl lalos. Sahyacn na Wen suwohs Sefanna Isuslac Nahtuhl, mwet sesuwohs pa elos nuh kwewa suc God El orekmakihn uh. Ma se ingacn sahp ma kohslah se nuh Sel, tuhsruhk El oruh na. Kuht enenuh in oruh pac na. Ac ke kom liye sesuwohs, esam lah ma suhfallac la uh tiac oasr ke muhtahliyacn orekma uh. Oacna ke sie mwet sihm wolacna el fahk, ke pacl se fohnlah luhn ma wacngihn sahflahiyac uh kahklac, tiac koluk luhn oil uh fin oasr ma kahklac wacngihnlac ke srihpen mwe nein uh suhfallac in nwacnwack nohfohn.10 Mwe nein suhfal uh pa kom ac nga, pwacnwacng kuht enenuh in mongfihsracsr ac kuhlwacng ac nuhnak muhnahs.
Liye sahflah uh: ke ahlohloh kuh ma upac uh tuhkuh, nimet sahngweng in siyuckyuck kahsruh. Kuht fin kena eis kahsruh, inse puhsisacl ac suwohs oacna pahpah se inge tuh oruh, kuht kuh in eis. Ma suhmuhslah uh ahkuhtweyac kena se inge in oacna inse pwacye, kena ke insiyom nohfohn, tiac mukwikwi ke wosonkahs ac tiac kikiacp ye muhtuhn God.”11 Nga fahkwack lah in topuk kain in kwacfeyuck se ingacn, God lac fah suhpuh in kahsruh ke kwewana lacfahl ke nien lihsrlihsr uh in ahkfokokoye luhlahlfongi lasr uh.
Nga fahk lah nga sramsram nuh sin mwet fuhsr uh. Nga srwackna. Tuhlihk mukul matwac yac (singucul ahkosr) 14 se el ahlohloh fahk nuh sihk, “Tamuhlwel Holland, nga soenna kuh in fahk muh nga etuh lah Alu uh pwacye, tuhsruhk nga luhlahlfongi muh pwacye.” Nga lihksreni apihsilyac. Nga fahk nuh sel ke kuhiyacn nguhnihk lah luhlahlfongi uh kahs na sacohk se, ac yohkna mukwikwi na sacohk se, ac el tiac enenuh in taltal koluk ke el “luhlahlfongi na.” Nga fahk nuh sel lah Kraist sifacna El fahk, “Nimet fosrngah, a luhlahlfongi na,”12 kahs uh lah Gordon B. Hinckley fuhsr el us ke misin lal.13 Nga fahk nuh sin tuhlihk mukul se inge lah luhlahlfongi pa step se emet nuh ke kuhtanglah ac lah ma sihmlac luhn luhlahlfongi ma ahkuhtweyac luhlahlfongi ma kuht akacsruhi kac uh pohloh kahs se “Kuht luhlahlfongi.”14 Ac nga fahk nuh sel luhpan kaksak luhk nuh sel ke el suwohs ke tikuclkucl lal in etuh lah Alu uh pwacye.
Inge, ke nga moul ac lotwelah apkuhran in sun lusen yac 60 ac ke pacl se nga tuh matwac yac 14 ac tuhfahna in luhlahlfongi, nga fahkwack ke kuhtuh ma nga etuh ingena uh. Nga etuh lah God El Pahpah luhngse, nuhnak muhnahs tuhmwacsr Inkuhsrao ke pacl nuh kwewa ac ke inkacnek nuh kwewa ac ke ohiyac nuh kwewa. Nga etuh lah Jisus pa tuhlihk suwohs sefanna nahtuhl, suc moul Lal ituckyang ke luhngse ke kena luhn kwewana Pahpah ac Wen nuh ke moliyucklac lasr nuh kwewa suc sesuwohs. Nga etuh lah El ahkmoulyeyuckyak liki misac sac in sifil moul, ac ke srihpen El oruh ah, nga kom fahk oruh oacna Nga etuh lah Joseph Smith, suc akihlen lah el tiac suwohs,15 el tuh suleyucklac in orekmakihnyuck ke poun God in fohlohkohnwack wosasuc ma pahtpaht nuh facluh. Nga etuh pac lah ke el oruh ohinge—yohk ke luhngasyacn Puk luhn Mormon—el lutiyuc yohkna ke luhngse luhn God, ke muhtahliyacn Kraist, ac ke kuh luhn pristut yohk liki na kuhtwena mwet pahluh sahyac suc nga riti emet kac, etuh kac, kuh lohng ke lusen moul in suk etwacack luhk. Nga etuh tuh Prestuhn Thomas S. Monson, suc insacnweacng ac engan ke fototo me yac ahk 50 ke lwen in akmuhsralah lal oa sie Mwet Sap, el pa mwet pwacye se in sruokyac pahng luhn mwet pahluh mihsenge uh. Kuht sifil liye pahng sacn nuh facl ke toeni se inge. Nga etuh tuh mukul 14 sahyac suc kowos ahkkweye oacna mwet pahluh, mwet liyactwen, ac mwet fwackyuck ma elos ahkkweyeyacl ke paholos, ke insiyaclos, ac ke ki in pahluh lalos sifacna.
Ma inge nga fahkwack nuh suwos ke luhlahlfongi kuh se suc Peter el pahngon “kahs se suc sulkackihnyuck sin mwet pahluh.”16 Ma se ma sie pacl ah tuh fihtac srihsrihk luhn luhlahlfongi nuh sihk uh kapkapwack nuh ke sahk in moul, na fin luhlahlfongi lom an fin srihkeyuck kuhtuhsrihsrihk ke pacl se inge kuh ke kuhtwena pacl, nga suli kowos in fungyang nuh ke luhlahlfongi luhk uh. Nga etuh lah orekma se pa ma na pwacye luhn God uh, ac nga etuh lah mwe sensen se muhkwena nuh sesr in lwelah ahlohloh kuh devil in oruh kuht in tiac moul fal nuh ke ip yohk ac mwe lutiyuck uh. Muhtweng. Finsrak. Fuhfasryuckwot. Akihlen in suwohs kihsen siyuck ac elyah lom an, tuhsruhk ma se met ac ma pahtpaht ahkfokokoye luhlahlfongi srihsrihk lom an, ke srihpen ma nuh kwewa kuh in orek nuh selos suc luhlahlfongi. Ke inen Jisus Kraist, amen.