Mwet Fahsr Tukun Kraist
Sel Elder Dallin H. Oaks
Ke U luhn Mwet Sap Singucul Luo
In ukwe Kraist tiac sie pracktis ana orek sie kuh ke kais sie pacl tuhsruhk pa olwelah ac ohiyacn moul se tuh kalweni ke pacl nuh kwewa ac acn nuh kwewa.
Sie puhsrwen on sacohk, oraclah sin Tabernacle Choir olutu, muhtwacwacack ke kahs inge:
“Na kom, fahsruh fahsr tukuk,” Mwet Lahngo el fahk.
Na lwelah kuht in ukwe srihkasrak lal,
Na kuht kuh in sie
Yurin wen kuloh sefanna, nuhtin God.1
Kahs inge, mokleyuck sin mwe suli emet luhn Mwet Lahngo nuh sin mwet tuhma lutlut Lal (liye Mattu 4:19), sihmlac sel John Nicholson, sie mwet etahwi Scotland. Oacna mwet kol pucspucs ke alu met ah, srihklac lutlut lal tuhsruhktuh oasr luhngse yohk nuh sin Mwet Lahngo ac plwacn in molwelah.2
Pweng nuh kwewa ke toeni sie inge kahsrwekuht in fahsr tukun Mwet Lahngo lasr, suc srihkasrak ac mwe luti uh ahksuwohsye inkacnek luhn mwet fahsr tukun Jisus Kraist nuh kwewa.
Oacna mwet Kristin nuh kwewa, mempucr ke Alu luhn Jisus Kraist luhn Mwet Luhlahlfongi ke Lwen-sahflah lutlut ke moul luhn Mwet Lahngo lasr ke puk luhn Wuhlweacng Sasuc ke Mattu, Mark, Luke, ac John. Nga ke sramsram ke kuhtuh srihkasrak ac luti oasr ke puk ahkosr inge lun Pwacpuhl Muhtahl ac suli kais sie sesr ac mwet Kristin nuh kwewa sahyac in motko ke Alu fohlohkihnyuckyak se inge ac kais sie sesr wi mwet fahsr tukun Kraist uh.
Jisus El luti lah pacptais pa enenweyuck in utyak nuh ke tohkohsrahi luhn God (liye Jon 3:5). El muhtwacwacack orekma Lal ke pacptaisiyucklac (liye Mark 1:9), ac El ac mwet fahsr Tohkohl uh pacptaiselah mwet sahyac uh (liye Jon 3:22–26). Kuht oruh oacna.
Jisus El muhtwacwacack mwe luti Lal ke suli mwet suc lohngohl in auliyak (liye Mattu 4:17). Srwackna pa inge pweng Lal nuh facluh.
Ke orekma Lal Jisus El sang masap. Ac El luti, “Kowos fin luhngse nga, kowos ac ahkos ma sap luhk” (Jon 14:15; liye pac fuhs 21, 23). El ahkkweye lah in ahkos masap Lal ac enenuh mwet fahsr Tohkohl in som liki ma El pahngon “ma suc mwet uh pahngon yohk srihpac selos” (Luk 16:15) ac “mwe luti luhn mwet uh” (Mark 7:8; liye pac fuhs 13). El oacyacpac kwacfe, “Kowos fuhnuh ma luhn facluh, na mwet facluh luhkuhn luhngse kowos oacna mwet lalos. Tuhsruhktuh kowos tiac ma luhn facluh, pa pwacnwacng mwet facluh sruhnga kowos” (John 15:19). Oacna ke Mwet Sap Piter el fahkwack tok, mwet fahsr tukun Jisus “pa mwet sielacna” (liye 1 Peter 2:9).
Mwet Luhlahlfongi ke Lwen-sahflah uh etuh lah kuht tiac kuh in wi “ma luhn facluh” kuh “mwe luti luhn mwet uh,” tuhsruhk oacna mwet fahsr tukun Kraist sahyac uh, kuhtuh pacl uh kuht konwacack upac in fahsrelihk ke ma ac ohiyacn facluh. Kuhtuh mwet uh moul ke ohiyacn facluh mweyen, oacna Jisus El fahk ke kuhtuh mwet El luti, “Elos luhngse tuh mwet uh in kaksakuhnuhlos, liki elos in eis kaksak sin God” (Jon 12: 43). Puhtatlac inge in tiac ukwe Kraist puhslac ac kuhpahtol in sang nuh inge. Ma inge weacng ma nuh kwewa luhn facluh oacna ohiyacn sramsram in tiac ahkkolukye kais sie u ac ma yohk ke nuknuk ac luhmah in som liki ma yohk emet oacna ma pahtpaht ac srihpac luhn sucu.
Kalmacn mwe luti luhn Jisus tiac ma in nuhnkuh kac. Pacl nuh kwewa enenuh in mukwikwi nuh kac. Jisus el luti, “Ke ma inge, kuhtwena mwet suc lohng kahs luhk inge ac ahkos, el oacna sie mwet lahlmwetmwet” (Mattu 7:24; liye pac Luk 11:28) Ac “Fuhkah luhpan insewowo luhn mwet kuhlwacnsap se inge leum lal el fin fohlohkoh nuh lohm sel ac konwacack lah el oruh ma inge” (Mattu 24:46) Ke sie puhsren on sacohk an kuht on:
Mwet Lahngo, lwelah nga in etwaclah fuhkah in luhngse kom,
Fahsr ke inkacnek ma kom ahkkahlwemye, ...
Mwet Lahngo, lwelah nga in etwaclah fuhkah in luhngse kom—
Leum, nga ac ukwe kom.3
Ke Jisus El luti, mwet suc Luhngsel fah karihngihn masap Lal. Elos ac ahkostwen, oacna Prestuhn Thomas S. Monson luti olutu. In ukwe Kraist tiac sie pracktis na orek sie kuh ke kais sie pacl tuhsruhk pa olwelah ac ohiyacn moul se tuh kalweni ke pacl nuh kwewa ac acn nuh kwewa. Mwet Lahngo El luti ip yohk sie inge ac ohiyac kuht in ahkacsmakihnyeyuck ac ahkfokokoyeyuck in ukwe ke El oraclah akwuck luhn kuhfa luhn Leum (pahng pac communion). Kuht etuh ke fwackyuck sasuc lah El sapkihn mwet Lal in ipeis akucl an in Esamuhl. (liye Joseph Smith Translation, Mattu 26:22 [in Mattu 26:26, footnote c], 24 [in the Bible appendix]; Joseph Smith Translation, Mark 14:21–24 [in the Bible appendix]). Mempucr ke Alu luhn Jisus Kraist luhn Mwet Luhlahlfongi ke Lwen-sahflah in ukwe masap se inge kais sie wik ke elos wi alu in ipeis flao ac kof ac olwelah in Esamuhl ac karihngihn masap Lal pacl nuh kwewa.
Jisus El luti lah “mwet enenuh in pruhe pacl nuh kwewa” (Luk 18:1). El oacyacpac orek srihkasrak se, oacna ke El “sislah fong nohfohn se we in pruhe nuh sin God” (Luk 6:12) met liki El pahngon Mwet Sap Singucul Luo Lal. Oacna mwet Kristin sahyac, kuht pruhe ke alu lasr nuh kwewa. Kuht oacyacpac pruhe ke kolyuck, ac kuht luti lah kuht enenuh in pruhe sifacna ac yurin sucu lwen nuh kwewa. Oacna Jisus, kuht pruhe nuh sin Pahpah tuhmasr Inkuhsrao, ac kuht oruh ke inen muhtahl Jisus Kraist.
Mwet Lahngo El pahngon Mwet Sap Singucul Luo in kahsruh Alu Lal ac sang ki ac wal in kalweni tukun El misac (liye Mattu 16:18–19; Mark 3:14–15, 6:7, Luk 6:13). Alu luhn Jisus Kraist luhn Mwet Luhlahlfongi ke Lwen-sahflah, ke Alu luhn Jisus Kraist ma fohlohkihnyuckyak, ukwe srihkasrak inge ke ohiyacn oracni ac ohiyacn sang ki ac wal nuh sin Mwet Sap.
Kuhtuh mwet suc Jisus El pahngon in Ukwacl tiac sa in ahkos tuhsruhktuh suk in eis pacl ke ma luhn sucu. Jisus El topuk, “Mwet se fin muhtwacack in pihkihn imac lal ke plaho, ac el tahpuhllac nuh tok, el tiac fal nuh ke Tohkohsrahi luhn God” (Luk 9:62). Mwet Luhlahlfongi Ke Lwen-Sahflah pucspucs ukwe mwe luti Jisus El luti ah. Misineri mahtuh tausin kuhtuh ac mwet sahyac wi srihkasrak inge in som liki tuhlihk nahtuhlos ac tuhlihk nuhtin nahtuhlos in som wi ma kunen misineri tuh elos pahngonyuck kac.
Jisus el luti lah God El oraclah mukul ac muhtwacn na mukul enenuh in som liki pahpah ac ninac kiyacl ac falyang nuh ke muhtwacn kiyacl (liye Mark 10: 6–8). Oaru lasr nuh ke mwe luti inge etweyuck na pwacye.
Ke puhpuhlyuck luhn sip tuhlac, Jisus El Luti lah kuht enenuh in oruh ma nuh kwewa kuht kuh in konwacack kuhtwena mwet suc tuhlac (liye Mattu 18:11–14; Luk 15:3–7). Mweyen kuht etuh, Prestuhn Thomas S. Monson El kwacfe yohk ke kolyuck inge ke srihkasrak ac mwe luti wolacna ke molwelah mwet tuhlan lasr.4
Ke orekma lasr in kahsruh ac kuhlwacnsap, kuht ukwe srihkasrak wolacna ac mwe luti puhsisacl luhn Mwet Lahngo lasr ke luhngse. “Kom fah luhngse mwet tuhlan lom oacna kom luhngse kom sifacna” (Mattu 22:39). El sap pac in luhngse mwet lokoalok lasr (liye Luk 6:27–28). Ac ke mwe luti yohk Lal ke sahflahiyacn kuhlwacnsap Lal, El fahk:
“Inge nga usot nuh suwohs sie ma sap sasuc, kowos in luhngse sie sin sie; oacna ke nga luhngse kowos, kowos in oacyacpac luhngse sie sin sie.
“Kowos fin luhngse sie sin sie, na mwet nuh kwewa ac fah etuh lah kowos mwet tuhmuhk lutlut” (Jon 13:34–35).
Ke ip ke luhngse nuh sie sin sie, Jisus El luti lah ke mwet uh ahkkolukye kuht, kuht enenuh in sang nuhnak muhnahs nuh selos (liye Mattu 18:21–35; Mark 11:25–26; Luk 6:37). Ke mwet pucspucs muhnahs ke masap upac se inge, kuht nuh kwewa etuh Mwet Luhlahlfongi ke Lwen-sahflah suc srihkasrak wo in ituckyang luhngse ac nuhnak muhnahs, finne ma koluk upac. Srihkasrak se, Chris Williams orekmakihn luhlahlfongi lal ke Jisus Kraist in sang nuhnak muhnahs nuh sin mwet kahsruhsr sruhi suc oruh muhtwacn kiyacl ac tuhlihk luo nahtuhl in misac. Ke lwen luo tokoh ac srackna ahsor na upac kac, mukul sesseslah ke nuhnak muhnahs, ke pacl el pa pisap se lasr, fahklah, “Ke sie mwet tuhma lutlut luhn Kraist, nga tiac kuh in sulwaclah ma sahyac.”5
Mwet Kristen pucspucs sang nuh sin mwet suhkahsruhp ac suc enenuh, oacna Jisus El luti (liye Mattu 25:31–46; Mark 14:7). Ke ukwe mwe luti luhn Mwet Lahngo lasr, Alu luhn Jisus Kraist luhn Mwet Luhlahlfongi ke Lwen-sahflah ac mempucr lal wi yohk. Mempucr lasr uh sang ma yohk nuh ke u in kahsruh ac sang pacl lalos in kuhlwacnsap ac mwe sang sahyac nuh sin mwet suhkahsruhp ac suc enenuh. Oacyacpac, mempucr lasr lalo ke pacl in mongo luo mahlwem nuh kwewa ac sang mani ke mongo inge nuh ke mwe sang luhn lalo, ma pisap ac pracns prestuhn lasr orekmakihn in kahsruh mempucr suc enenuh. Lalo lasr in kahsruh mwet masrinsracl pa mukwikwi ke luhngse pwacye ac, ke oruh ke luhngse suwos, ahkfokokoye nguhnasr.
Suhpuhs ma etweyuck ke kuhlwacnsap in kahsruh facluh luhn Alu lasr uh. Orekmakihn mani orekweni sin mempucr kuhlwacng uh, Alu luhn Jisus Kraist luhn Mwet Luhlahlfongi ke Lwen-sahflah in suhpwaclah mongo, nuknuk, ac mwe enenuh sahyac in kahsruh mwet mahtuh ac fuhsr suc kweok fin facluh nohfohn. Mwe kahsruh inge, wi tala yohklac foko million ke yac singucul ah, sang ke wacngihn nuhnak luhn alu, kain mwet, kuh muhtuhnfacl uh.
Kena lasr in kahsruh yohk tukun kusrusr ac sronot fin acn Japan ke yac 2011 sang mwe enenuh ac mani ma sun tala miliacn singucul tolu. Oacyacpac, yohk liki mwet 31,000 suc ke kahsruh yurin Alu sang yohk liki ao 600,000 in kuhlwacnsap. Kahsruh lasr nuh sin mwet uh ke Hurricane Sandy fin acn kuhtuhlacp ke United States wi mwe sang yohk, ac ao 300,000 ke kuhlwacnsap in ahknwacsnwacsye luhn mempucr 28,000 ke Alu uh. Inmahsrlon mwe srihkasrak puhs sahyac ke yac tari ah, kuht sang paun 300,000 (136,000 kg) ke nuknuk ac fahluhk nuh sin mwet sac ke muhtuhnfacl Africa fin acn Chad. Ke yac longoul limekohsr tari ah kuht kahsruh apkuhran mwet miliacn 30 ke muhtuhnfacl 179 .6 Pwacyena, mwet pahngpahng “Mormon uh” etuh ohiyac in kahsruh mwet suhkahsruhp ac enenuh.
Ke mwe luti sahflah Lal ke pwacpuhl uh, Mwet Lahngo lasr el kaifwe mwet fahsr Tohkohl in us mwe luti Lal nuh ke muhtuhnfacl nuh kwewa ac mwet nuh kwewa. Ke muhtacwackiyacn Fohlohkihnyuckyak sac, Alu luhn Jisus Kraist luhn Mwet Luhlahlfongi ke Lwen-sahflah srihke in ukwe mwe luti se inge. Finne ke kuht sie alu sasuc suhkahsruhp ac tikuclkucl ke mempucr tausin ekahsr na, mwet kol met lasr ah suhpwaclihk misineri uh ahluhkwelah meoa uh, kuhtuhlacp ac rohtoh. Oacna mwet uh, kuht kalweni in luti pweng Kristin nuh ke mihsenge ke prokracm usrnguck luhn misineri uh puhs liki full time misineri 60,000, weacng tausin ekahsr pac suc kuhlwacnsap ke kais kuhtuhna pacl. Oasr misineri lasr ke yohk likina muhtuhnfacl 150 fin facluh nohfohn.
Ke sahflah luhn Mwe Luti Yohk Lal ke Finohl ah, Jisus el luti, “Kowos enenuh in suwohsna, oacna ke Pahpah tomowos inkuhsrao El suwohsna” (Mattu 5:48). Srihpac luhn mwe luti se inge ac srihpac in ukwe Mwet Lahngo lasr pa in tuhkuh nuh sin Pahpah, suc Mwet Lahngo lasr pahngon “Pahpah tuhmuhk ac Pahpah tuhmalos, God Luhk ac God lalos.” (Jon 20:17).
Ke fwackyuck mihsenge uh, usrnguck ke wosasuc fohlohkihnyuckyak uh, kuht etuh lah masap in suk suwohswohs pa ip ke plwacn luhn Pahpah God nuh ke molwelah luhn tuhlihk Nahtuhl. Ke plwacn sacn kuht pa usru nuhtin pahpah ac ninac kiyacsr inkuhsrao uh. “Kuht tuhlihk nuhtin God,” Mwet Sap Paul el luti, “ac ke kuht ma nahtuhl, mwe insewowo suc El ahkolah nuh sin mwet lal ac fah ma lasr, ac kuht fah oacyacpac ipeis yurin Kraist ke ma God El ahko nuh sel” (Rome 8:16–17). Kalmac ke ma inge pa, ke sruhmuhnyuck ke Wuhlweacng Sasuc, ac kuht pa “usrui moul ma pahtpaht” (Titus 3:7) ac kuht fin tuhkuh nuh sin Pahpah, kuht ac “ma inge nuh kwewa” (Fwackyuck 21:7)—ma nuh kwewa Lal—ma se kuht tiac kuh in kahlwem kac. Tuhsruhktuh kuht kuh in kahlwem lah in eis moul ma pahtpaht yurin God kuht enenuh in ukwe Mwet Lahngo lasr, Jisus Kraist, suc luti lah “wacngihn mwet som nuh yurin Pahpah fin tiac ke nga” (Jon 14:6). Kuht suk in Ukwacl ac oruh oacna El, ingena ac nuh tok. Pa inge ke fuhs sahflah ke puhsrwen on lasr “Come, Follow Me,” kuht on:
Fal in etuh muhkwena
Lah kuht enenuh in ukwacl ten,
Ke kuht kweok ke moul uh?
Moh, ma inge som nuh ke acn muhtahl tok. ...
Ke siyah luhng, kuh luhn acn, tohkohsrahi, ac kuh,
Ac wolacna ac mihslac pa ma lasr,
Kuht fin, nuh ke ma pahtpaht,
Ahkos kahs lal, “Fahsruh, ukweyuc.”7
Nga fahkwack lah Mwet Lahngo lasr, Jisus Kraist, suc mwe luti ac srihkasrak la kuht enenuh in suk ac ukwe. El suli mwet nuh kwewa suc oasr ma toasr la in tuhkuh nuh Sel, in lutlut Kacl, in Ukwacl, na sokwack monglac nuh ke nguhnasr (liye Mattu 4:19; 11:28). Nga fahkwack ke ma pwacye luhn pweng Lal ac ke misin ac wal luhng me ke Alu fohlohkihnyuckyak Lal ke inen Jisus Kraist, amen.