Fahsruh, Mukul Nuh Kwewa nuhtin God
Sel Prestuhn Thomas S. Monson
Lwelah kais sie sesr in suk ma suhmuhslah uh ke oaru, pwlacni moul lal ke ma oasr srihpac, luti ma pwacye ke fahkwack luhlahlfongi, ac kuhlwacnsapuh Leum ke luhngse.
Pacl luo ke kais sie yac Conference Center kahto se inge oacna in fahk nuh sesr, ke puhsra pahtokyuck la, “Fahsruh, kowos wen nuhtin God suc eis pristut uh.”1 Oasr sie atac luhn nguhn ma fahsrwelihk ke miting luhlahp luhn pristut ke Alu uh.
Ofong oasr tausin puhkantwen sin mwet sruok pristut fin facluh nohfohn suc kuhlwacnsapuh Leum oacna misineri Lal uh. Oacna ke nga ahkkahlwemye ke pweng luhk olutu ah, puhs liki 65,000 misineri lasr lun field uh, oacyacpac oasr tausin muh suc sano in utyak nuh ke acn lutlut luhn misineri kuh pwepuh lalos orweyucklac ingena. Kuht luhngse ac ahkfuhlwactye elos suc kena ac rahrah uh in kuhlwacnsap.
Wacngihn mwe fahkwack yohk srihpac likina ma suhmuhslah muhtahl uh, wacngihn kunohkohn orekweni likina, wacngihn mwe kolyuck suwohs likina masap ma utuckuh sin Leum sifil moulyak oacna El sikyak Galilee nuh sin mwet tuhma lutlut singucul sie ah. El fahk:
“Kowos in som, ac luti muhtuhnfacl nuh kwewa, pacptaiseloslac ke inen Pahpah, ac ke Wen, ac ke Nguhn Muhtahl:
“Lotwelos in akihlen ma nuh kwewa nga sapkihn nuh suwos uh: ac, liye, nga wi kowos pacl nuh kwewa, finne nuh ke sahflahiyacn facluh.”2
Sap wolacna se inge, tuhkweni ke olwelah wolacna la uh, pa mwe kol lasr mihsenge uh oacna pacl met ah. Orekma luhn misineri uh pa sie atac in ahkkahlwemye luhn Alu luhn Jisus Kraist luhn Mwet Luhlahlfongi ke Lwen-sahflah uh. Pa na inge ohiyac uh, ac fah ohingacn ne tok. Oacna ke Mwet Pahluh Joseph Smith el fahkwack, “Tukun ma nuh kwewa ma fwacklac uh, kunohkohn wo ac yohk srihpac emet uh pa in fahkwack wosasuc.”3
Ke yac fototo luo, misineri pacl nuh kwewa tuhfahna kuhlwacnsap ke armi fuhlwact luhn God uh fah ahksahfyelah orekma lalos uh ac fah fohlohk nuh lohm selos ac mwet luhngse lalos an. Nuh sin elder an, aholyaclos sukokyak ofong inmahsrlon Aaronic Pristut ke Alu uh. Mukul fuhsr, yac kowos ahkolah in topuk? Yac kowos kena in orekma? Yac kowos ahkolah in kuhlwacnsap?
Ke liye wo kac, orekma luhn misineri uh enenuh mokleyuck pihsrpihsr nuh ke pactuhn in moul luhn mwet se. Ac enenuh orekma yohk ac kwacfweacng yohk, kihsackuhnlah pacl nuh kwewa ac pruhe fokoko. Oacna ma sikyak uh, kuhlwacnsap kampare luhn misineri uh sang sie mwe sang ke engan ma pahtpaht, ma tuhtahflah ke moul in mahno ac nuh tok ma pahtpaht uh.
Ma upac lasr uh pa in mwet kuhlwacnsap wowo ke imac luhn Leum. Ma inge kapsrweyuck nuh sesr nohfohn, finne fuhkah matwacsr, ac tiac nuh selos muhkwena suc ahkolah in kuhlwacnsap oacna misineri lwen nuh kwewa uh, tuh nuh sesr kais sie tuhkuh sap in akacsruhi wosasuc luhn Jisus Kraist.
Nga kuh in fahk sie ono ma ac ahkpwacyei orwaclah wo lasr uh: ma se met, suk ma suhmuhslah uh ke oaru; ahkluo, plwacni moul lowos ke oasr srihpac (ac nga kuh in sang, plwacni moul lowos finne fuhkah matwowos); ahktolu, luti ma pwacye ke fahkwack luhlahlfongi; ac ahkahkosr, kuhlwacnsapuh Leum ke luhngse.
Lwelah kuht in nuhnkuh kais sie sin ip ahkosr ke ono sac.
Ma se met, suk ma suhmuhslah uh ke oaru.
Ma suhmuhslah uh fahkwack ke God ac nein kahs ke moul ma pahtpaht. Elos eklac pwelucng ke pweng lasr uh.
Ahkuhtweyac wo ke pwepuh nuhtin Alu uh pa ma suhmuhslah muhtahl uh, oreklac ac ahksuwohsyeyuck ke pwacpwacni uh. Kuht ahkkweyeyuck, oacna, in lutlut ke ma suhmuhslah kais sie lwen kwewana kais sie ac yurin sucu lasr uh.
Nga ac sang muhkwena sie kahsruh ma kuh in orekmakihnyuck ingena ke moul lasr uh. Ke Puk luhn Mormon, sapta 17, kuht riti sramsram ke engan lal Alma ke el sifilpac liye wen nahtuhl Mosiah ac akihlen tu na kuh lalos ke ma pwacye uh. Ma suhmuhslah uh fahk lah wen nahtuhl Mosiah uh yohkwelihk etuh lalos uh ac elos mukul suhmaht. Elos oaru in suk ma suhmuhslah uh elos in muh kuh in etuh kahs luhn God.
Tuhsruhk tiac pa inge nohfohn, elos isaclosyang sifacna in pruhe ac lalo yohk; ke ma inge oasr nguhn in palye lalos ac nguhn in fahkwack. Ac ke elos luti, elos luti ke kuh ac wal luhn God.”4
Tamuhlwel, suk ma suhmuhslah uh ke oaru.
Ahkluo ke ma in oruh: plwacni moul ke oasr srihpac.
Sahp wacngihn fihl ke mwet fuhsr uh nuh sun kain sulaclah yohk sacn oacna mwet fuhsr mihsenge uh. Ahkolah uh enenuh in oreklac nuh ke lutlut, misin, ac pahyuck uh. Nuh sin kuhtuh, kuhlwacnsap ke military uh fah weacng pac.
Ahkolah nuh ke sie misin sa muhtwacwacack. Ke ma sahyacn ahkolah ke nguhn, pahpah ninac lahlmwetmwet se pa ohiyac se tuhlihk mukul fuhsr kuh in muhtwacwacack in sefiyac in moli ke misin lal sifacna an. El kuh in ahkkweyeyuck wo ke yac acn fahsr in luti kahs sahyac uh in muh, fin kuh, etweyacn kahs lal kuh in orekmakihnyuck. Na tuhkuh lwen wolacna sacn ke pisap ac stek prestuhn suli mukul fuhsr sac ke sie muhtwacta. Suwohswohs pa nuhnkweyuck uh; sie ahokkihnyucklac luhn misineri sahflah.
Wacngihn pacl sahyac ma sucu na fohn se rahrah in liye ac sano mwet utuck lwacta uh ac lwacta ma nein address fohlohk 47 East South Tempuhl, Salt Lake City, Utah. Lwacta uh ai; rahrah uh yohklaclac; pahng uh ritiyuck. Inkaiyacn pacl uh acn pakpucki in orekma uh loessuhlah nuh lohm uh. Macnsiskihn acn an, ke ma inge, top luhn misineri ahkolah ac ahkostwen uh oacna sie: “Nga fah kuhlwacnsap.”
Ahkolah nuh ke oacyak uh muhtwacwacack. Mukul fuhsr, nga finsrak kowos in luhngse kihsackuhnlah ma pahpah ninac kiyowos orwaclah yohk nuh suwos an kowos in muh kuh in kuhlwacnsap. Orekma lalos uh fah ahkkweye kowos, luhlahlfongi lalos fah ahkkweye kowos, pruhe lalos ac sruhk kowos. Sie misin pa sie ohiyac luhn sucu. Finne kowos ac fahsrwelihk sie sin sie ke muhtuhnfacl kuh meoa uh, insiyac uh ma se na.
Tamuhlwel, ke kowos plwacni srihpac ke moul lowos an, esam lah pacl wowo ke misineri lowos an tiacna tulokihnyuck nuh ke pacl luhn sie pahng fal. Nuh suwos suc kuhlwacnsap ke military an, kain pacl ingacn kuh ac enenuh in fahlac wo. Kais sie yac mukul fuhsr lasr ma nukum uniform uh use nguhna pucspucs nuh ke tohkohsrahi luhn God ke ahkfuhlwactye pristut lalos, moulkihn masap luhn God uh, ac luti mwet sahyac uh kahs wolacna luhn Luem.
Tiac tuhpallah pacl wowo lowos in misineri an ke kowos suk lutlut wo fal lowos an. Srihkasrak lowos oacna sie Mwet Luhlahlfongi ke Lwen-sahflah fah tuniyuck, nuhnuhnkweyuck, ac inkaiyacn pacl uh ukweyuck.
Tamuhlwel, oacna sie matwac lowos, oacna sie ohiyac lowos, nga kwacfe kowos in plwacni moul lowos ke oasr srihpac.
Ingena ip ahktolu an ke ma in oruh: luti ma pwacye ke fahkwack luhlahlfongi.
Ahkos kahs in kahsruh lal Mwet Sap Peter, suc pahtok: “Ahkolah pacl nuh kwewa in sang top nuh sin mwet nuh kwewa ma siyuck sum sie srihpac ke finsrak ma oasr in kom uh.”5 Sruhkwack puhsrewos ac fahkwack ke ma pwacye ke Sifacn luhn God uh. Fahkwack mwe lohoh lowos ke Puk luhn Mormon. Kol ma pwacye wolacna ac kahto oasr ke plwacn in molwelah an.
Ke nga kuhlwacnsap oacna sie misin prestuhn fin acn Canada puhs liki yac 50 somlah ah, sie misineri fuhsr suc tuhkuh ke sie mura srihsrihk ac srwenglah lut ke luhpan acn Toronto. Luhpahl fototo tuhsruhk loes ke fahkwack luhlahlfongi uh. Tiac paht tukun ai lal ah, tuhkweni yurin companion lal an, el muhtwacta nuh lohm sel Elmer Pollard fin acn Oshawa, Ontario, Canada. Puhla koluk ke mukul fuhsr suc, ke sie pacl pahkah ke snow upac, fahsr ke lohm nuh ke lohm, Mr. Pollard el suli misineri an nuh lohm sel an. Elos sang nuh sel pweng lalos an. El tiacna puhla nguhn uh. Ke pacl fal el siyuck elos in som ac tiac fohlohk. Kahs sahflah lal nuh sin elder an ke elos tifoklac liki srucwuclsrihsr lal an fwack ke ahkkoluk: “Kom tiac kuh in fahk na nuh sihk lah Joseph Smith el sie mwet pahluh luhn God!”
Sruhnguhl uh kauli. Elder uh fahsryak inkacnek ah. Tuhlihk mukul country se nahtuhsr ah sramsram nuh sin companion lal ah: “Elder, kuht tiacna tohpohkohl Mr. Pollard. El fahk muh kuht tiac luhlahlfongi muh Joseph Smith el mwet pahluh pwacye se. Kuht fohlohk ac fahkwack luhlahlfongi lasr nuh sel.” Ma se met, misineri yohk etuh la sac tahfuh luo tuhsruhk el tari insese in wi companion se lal ah. Sesseslah ke sahngweng elos tui ke sruhnguhl se ma elos tifoklac liki ah. Elos tongtong, tulokihnilyac Mr. Pollard, tuhpan ke kihtin pacl, na ke kuh ituckyang ke Nguhn, misineri suhpah sac sramsram: “Mr. Pollard, kom fahk muh kuht tiacna luhlahlfongi lah Joseph Smith el sie mwet pahluh luhn God. Nga fahk nuh sum lah Joseph el sie mwet pahluh. El oruh luhngaslah Puk luhn Mormon. El liye God Pahpah ac Jisus suc Wen. Nga etuh.”
Kuhtuh pacl tok, Mr. Pollard, ingena Tamuhlwel Pollard, el tulac lun sie miting luhn pristut ac fahkwack, “Fong sac nga tiac kuh in mutul. Nga nuh lohng na kahs ‘Joseph Smith el sie mwet pahluh luhn God. Nga etuh. Nga etuh.’ Lwen tok ah nga pahngon misineri uh ac siyuck selos in fohlohk. Pweng lalos uh, tuhkweni wi fahkwack luhlahlfongi lalos uh, ekuhllah moul luhk uh ac moul luhn sucu luhk uh.” Tamuhlwel, luti ma pwacye ke fahkwack luhlahlfongi.
Ip sahflah ke ma kuht enenuh oruh pa kuhlwacnsapuh Leum ke luhngse. Wacngihn aholyacn luhngse. Misineri orwaclah wo uh luhngse tahfweyaclos, mwet kol misin lalos uh, ac mwet sacohk elos luti uh. Ke section ahkahkosr ke Doctrine and Covenants, Leum El orwaclah mukwikwi fal nuh ke orekma in luti uh. Lwelah kuht in nuhnkuh pohloh kahs ekahsr inge:
Ke misineri uh muhtwacwacack ke kuhlwacnsap luhn God, elos enenuh in liye lah elos kuhlwacnsapwacl ke insiyaclos, kuhiyaclos, nuhnkwaclos, ac kuhiyaclos nohfohn, elos in muh kuh in nwacsnwacs ye muhtuhn God ke lwen sahflah. …
“Luhlahlfongi, finsrak, luhngse pwacye, ac luhngse, lohacng muhkwena nuh ke wolacna luhn God, falisilyac nuh ke orekma uh.
“Elos enenuh in esam luhlahlfongi, suwohs, wo, mongfihsrwacsr, kuhlwacng, luhngse pwacye, puhsisacl, ac oaru.”6
Ke srihpac wo kais sie suwos ac lohngyuc sramsram siyuck sel sifacna kihsen siyuck uh “Mihsenge, yac nga kapwack ke luhlahlfongi, ke suwohs, ke etwacack, ke wo, ke luhngse?”
Ke kihsackuhnlah yohk lohm ah kuh acn sahyac uh, nguhna ingacn ma kowos kahsruh in molwelah uh kuh in pa kowos luhngse emet uh.
Yac pucspucs somlah ah kawuck sacohk se luhk, Craig Sudbury ac ninac kiyacl, Pearl, tuhkuh nuh lun ohfohs luhk ah yohkna nuh ke som lal Craig nuh ke Misin Australia Melbourne. Fred Sudbury, pahpah tuhmwacl Craig, akihlenyuck lah wacngihn. Yac longoul-limekohsr somlah ah, ninac kiyacl Craig ah pahyuckyak sel Fred, suc tiacna akacsruhi luhngse lal nuh ke Alu uh ac, pwacyena, el tiac sie mempucr.
Craig el akacsruhi ke luhngse loal ac yohk lal nuh sin pahpah ninac kiyacl ac finsrak ma kuhtuh pacl uh, ke inkacnek sahyac, pahpah tuhmwacl an ac puhla mokleyuck luhn Nguhn ac ikacslah insiyacl nuh ke wosasuc luhn Jisus Kraist. Nga pruhe ke kolyuck ke ohiyac ma sie kena kuh in ahkfalyeyucklac. Kolyuck inge tuhkuh, ac nga fahk nuh sel Craig, “Kuhlwacnsapuh Leum ke insiyom kwewa. Ahkostwen nuh ke kunohkohn muhtahl lom. Kais sie wik suhmuhslah sie lwacta nuh sin pahpah ninac kiyom an, ac kais kuhtuh pacl, sihm nuh sel Pahpah sifacna, ac lwelah elan etuh luhpan luhngse lom nuh sel, ac fahk nuh sel efuh kom tarilacna in wen nahtuhl.” El kuloh nuh sihk ac, wi ninac kiyacl an, som liki ohfohs an.
Nga tiac enenuh in liye ninac kiyacl Craig ah ke mahlwem 18, ke el tuhkuh nuh lun ohfohs luhk ah ac, ke tuhng, fahk nuh sihk, “Apkuhran in yac luo ke Craig el som nuh ke misin lal ah. El tiac wi muhlkuhnlah in sihmihs sie lwacta nuh sesr ke kais sie wik. Pacl na tari ah, mukul tuhmuhk ah, Fred, el tuyak ke pacl se emet ke sie miting in fahkwack luhlahlfongi ac ahklutyeyuc ac ahklutye mwet nuh kwewa ma oasr we uh ke ahkkahlwemye lah el orwaclah sulaclah se in eklac sie mempucr ke Alu uh. El fahk lah el ac nga ac som nuh Australia in ohsun nuh sel Craig ke sahflahiyacn misin lal an in muh Fred el kuh in pa pacptais sahflah se lal Craig oacna sie misineri pacl nuh kwewa uh.”
Wacngihn misineri yuckihn in oruh pacptais uh luhkwel na Craig Sudbury ke, acn loeslac Australia, el kahsruh pahpah tuhmwacl ah nuh ke kof an infulwac ac, sruhlwack lacpoh lacyot lal nuh ke square, kalweni kahs muhtahl ingacn: “Fredrick Charles Sudbury, ke srihpen pahngonyuck sin Jisus Kraist, nga pacptaisi kom ke inen Pahpah, ac ke Wen, ac ke Nguhn Muhtahl.”
Luhngse eslah kuhtanglah la. Kuhlwacnsapuh Leum ke Luhngse.
Tamuhlwel, lwelah kais sie sesr in suk ma suhmuhslah uh ke oaru, plwacni moul lal ke srihpac, luti ma pwacye ke fahkwack luhlahlfongi, ac kuhlwacnsapuh Leum ke luhngse.
Mwet liyacng kosro suwohs lasr ke nguhna uh, misineri suc molwelah mwet uh, use nuh sesr ahkpwacye wolacna Lal:
Kuht fin orekma ke lwen nuh kwewa lasr uh in sruhmuhn auliyak nuh sin mwet inge ac use na sie nguhna nuh sin God, engan lasr uh ac yohk wi mwet sacn ke tohkohsrahi luhn Pahpah.
Ac fin engan lasr uh yohk ke nguhna se suc kuht use nuh sin Mwet Lahngo ke tohkohsrahi luhn Pahpah, fuhkah luhpan engan lasr fin kuht use nguhna puhs uh nuh Sel !”7
Kacl suc sruhmuhnyuck kahs inge nga fahkwack mwe lohoh luhk: El pa Wen nuhtin God, Mwet Molwelah lasr, ac Mwet Lahngo lasr.
Nga pruhe tuh kuht in kuh in topuk nuh ke solsol fihsrwacsr Lal, “Kowos ukweyuc.”8 Ke ine muhtahl Lal—finne ine luhn Leum Jisus Kraist—amen.