Ahkostwen Use Mwe Insewowo Uh
Sel Prestuhn Thomas S. Monson
Sie etwacack ke ma pwacye ac top nuh ke kihsen siyuck yohk lasr tuhkuh nuh sesr ke kuht ahkostwen nuh ke masap luhn God.
Tamuhlwel ac tahmtahel wolacna wiyuck an, fuhkah kulohlacna luhk in wi kowos olutu se inge uh. Nga oruh nguhsr se ke luhlahlfongi kuh ac pruhe lowos an nuh ke pacl wo luhk in sramsram nuh suwos.
Ke matwac nuh kwewa, mukul ac muhtwacn uh suk ke etuh ac kahlwem nuh ke moul se inge ac ma kunaclos ac srihpac kac uh, oacyacpac nuh ke inkacnek in eis mihslac ac engan. Kais sie sesr wi ke kain sukok se inge.
Etuh ac kahlwem se inge oasr yurin mwet nuh kwewa. Ma inge nwekyucklac ke ma pwacye suc pa ma pahtpaht. Ke Doctrine and Covenants section 1, fuhs ahk 39, fwackyuck muh, Leum pa God, ac lah Nguhn el suhmuhslah, ac ma sihmihsyucklac uh pwacye, ac ma pwacye uh ma ne tok ma pahtpaht.
Mwet sihm pohloh kahs usrnguck pwengpweng se suhmuhslah:
Finne ma inkuhsrao ac facluh uh enenuh in wacngihnlac kuh kuhnanuclac,
Ma pwacye, luhpan ma oasr uh, fah kutong ma koluk na pwacye ma kuh in sikyak uh,
Ma pahtpaht, tiac kuh in eklac, pacl nuh kwewa.1
Kuhtuh kuh in siyuck, “Kain ma pwacye inge e sukokyak oyac, ac kuht ac akihlen fuhkah?” Ke sie fwackyuck ituckyang nuh sel Mwet Pahluh Joseph Smith fin acn Kirtland, Ohio, ke Mei yac 1833, Leum El fahkwack:
Ma pwacye pa etuh ke ma uh inge, ke pacl met ah, ac ke pacl fahsruh uh. …
Nguhn luhn ma pwacye uh ma sin God. …
Ac wacngihn mwet eis nohfohn ne ke na el karihngihn masap Lal uh.
El suc karuhnganwacng masap luhn God eis ma pwacye ac kahlwem, nuh ke na el kaksyakihnyucklac ke ma pwacye ac etuh ma nuh kwewa.”2
Fuhkah kaksyakihnyacn olwelah uh! “El suc karuhnganwacng masap luhn God eis ma pwacye ac kahlwem, nuh ke na el kaksyakihnyucklac ke ma pwacye ac etuh ma nuh kwewa.”
Nga kuh kom tiac enenuh ke pacl se inge ke yohk etuh lasr ke fohnlah luhn wosasuc uh fohlohkyak uh, in suk ke ma pwacye ke ohiyac ma soenna oreklac met. Pahpah pahkotwen Inkuhsrao se El orwaclah tari inkacnek in fahsr lasr uh ac sang tari mwe kolyuck tiac kuh in tahfonglac se—finne ahkostwen. Etuh se ke ma pwacye ac top ke kihsen siyuck wowo lasr uh tuhkuh nuh sesr ke kuht ahkostwen nuh ke masap luhn God.
Kuht lutlutkihn ahkostwen ke lusacn moul lasr uh. Muhtwacwacack ke kuht fuhsr na pwacye ah, kunohkohn ingacn nuh ke karihngihnyacsr orwaclah mwe kolyuck ac masap in liyacacng in wona sesr. Moul uh kuh in fihsrwacsr liki nuh sesr nuh kwewa kuht fin kuh in ahkos in wo kain masap uh. Puhs sesr, tuhsruhktuh, etwaclah ke puhlakihnyacn etuh ke ahkostwen uh.
Ke nga mahtuhyak ah, kais sie suhmuhr ke muhtwacwacyacn Julahe ne ke muhtwacwacyacn Septempuh, sucu luhk ah muhta ke lwac lohm se sesr ke Yen in Muhtwacta Vivian ke Fuhluh Provo fin ac Utah.
Sie sin kawuck wowo se luhk ke lwen mwesahs ingoh ke fuhluh sac pa Danny Larsen, suc ma sucu lal ah oasr pac se lwac lohm ke Yen in Muhtwacta Vivian. Kais sie lwen nga el foroht forma ke acn sac, ahyah ke infacl, til kainin yot ac mwe kahsruhp sahyac, fanfan finohl ah, fanfan sahk, ac pwacrkihn kais sie mihnit ke kais sie ao ke kais sie lwen.
Sie lututacng ah nga Danny sulaclah kuht in tanwack sie e ah ke ekuh sac wi kawuck lasr nuh kwewa ke fuhluh sac. Kuht enenuh na in sackuhnlah acn se ke yen mwesahs se apkuhran nuh we ma kuht nuh kwewa in fahsrweni nuh we. Mah ke Jun ma nwacklah yen mwesahs sac puhlamlamlah ac srihng, oruh yen mwesahs sac tiac wo nuh ke srihpac lasr ah. Kuht muhtwacwacack in fihs mah loeloes ah, plwacn in ahkmwesahsyelah acn na luhlahp ac raun se. Kuht ul ac tuhlakihn ke kuhiyacsr nohfohn, tuhsruhk pwacna ma kuht kuh in fuhsack pa mah srihsrihk nakantwen uh. Kuht etuh lah oruh se inge e sislah lwen na fohn se, ac lalosr ac engweyac sesr srihkweni.
Na ma se nga nuhnkuh muh pa wo emet in orek ah tuhkuh nuh in mwe nuhnak luhn matwac yac alkosr se luhk ah. Nga fahk nuh sel Danny, “Pwacna ma kuht enenuh in oruh pa in fuhrreack ma inge. Kuht ac fuhrreack na sie raun an ke mah inge!” El sana insese nuh kac, na nga kahsruhsr som nuh ke lwac lohm sesr ah in eis sie mactsis ac.
Oruh sac wacngihn suwos nuhnkuh muh lwelahkihnyucklac nuh sesr in orekmakihn mactsis ke matwac fuhsr yac alkosr. Nga ke in kahlwem lah nga Danny kwewa sruhngwacyuck in orekmakihn fin wacngihn mwet mahtuh wi kuht. Kuht kwewa sensenkackihnyuck nuh sesr pacl nuh kwewa ke e uh. Tuhsruhktuh, nga etuh acn ma sucu luhk ah fihliyac mactsis ac we uh, ac kuht enenuh in ahkmwesahsyelah acn sac. Met liki nuhnak se pac tuhkuh nuh sihk ac, nga yuclac nuh ke lwac lohm sesr ah ac sruhkwack koan mactsis ekahsr, in wacngihn mwet liye. Nga sana okanlah lun sie sin pakiht luhk ah.
Nga kahsruhsr fohlohk nuh yohrohl Danny, pwacrkihn lah lun pakiht luhk ah pa e orwaclah elyah se lasr ah. Nga esamwack in nuhnkuh lah e sac e fuhrreack muhkwena acn kuht luhngse ah ac e sifacna usrnguck in sifacna kunlac.
Nga kuhret mactsis sac fin yot se ac oruh mah puhlamlamiyacn ke Jun ac ngutyak. Mah ah fihrihr in muh sroksrokihnyucki ke kahsling. Muhtwacwacackiyac ah nga Danny pwacrack ke kuht liye mah ah wacngihnlac ah, tuhsruhk tiac paht e sac tiac kuh in sifacna kunlac. Kuht fosrngahlah ke kuht akihlacnwack lah wacngihn ma kuht kuh in oruh in konwelah ah. E ngweng sac muhtwacwacack in isihk mah innimac ah som nuh ke ohl soko ah, isihk sahk luhlahp ah ac ma nuh kwewa siskac ah.
Sahflahiyac ah wacngihn ma kuht kuh in oruh tuhsruhk in kahsruhsr som sukok kahsruh. Tiac paht mukul ac muhtwacn nuh kwewa ma oasr Yen in Muhtwacta Vivian ah yucwot yucme utuck pack nuknuk luhlahp ma sroksrok, sang puok e ah in konwelah. Tukun ao ekahsr kuniyucklac e ah. Sahk luhlahp mahtuh ah pain moullac, weacng pac lohm ma e sac kuh in sun ah.
Nga Danny lotwelah lesin upac tuhsruhk yohk srihpac ekahsr ke lwen sac—ip yohk se kac ah pa yohk srihpaciyacn ahkostwen.
Oasr masap in kahsruh moullac luhn mahnosr uh. Oacpacna ke, Leum El sang mwe kolyuck ac masap in kahsruh moullac ke ip luhn nguhn lasr uh kuht in muh kuh in kihfucs wo moul kwacna- kuhfkuhf se ac in kuh in fohlohk nuh yurin Pahpah tuhmasr Inkuhsrao.
Yac foko somlah ah, Samuel el fahkwacng na nuh sin fihl in mwet suc nuhnkuh kuh ke kihsaclah luhn kosro uh lah, “Ahkos wo liki mwe kihsac, ac porongo wo liki sip fact.”3
Ke fihl in pacl se inge, Leum El ahkkahlwemye nuh sel Mwet Pahluh Joseph Smith lah El enenuh insiyac ac nuhnak insese ac lah insese ac ahkostwen kuh in kanglah ma wo ke acn luhn Saion ke lwen sahflah inge.”4
Mwet pahluh nuh kwewa, omet ac in pacl inge uh, etuh lah ahkostwen yohk srihpac nuh ke molwelah lasr uh. Nephi el fahkwack lah el ac som ac oruh ma Leum El sapkihn.”5 Kuhtuh ne tikuclkucl ke luhlahlfongi kuh lalos ac ahkostwen lalos, Nephi el oruh ma Leum El siyuck sel uh pacl nuh kwewa. We pucspucs ahkinsewowoyeyuck ke oruh lal.
Sramsram soko kacl Abraham ac Isaac pa sramsram na mokleyuck soko ke ahkostwen. Ac luhman ngal upac nuh sel Abraham in ahkos masap luhn God, in usacl Isaac kuloh nahtuhl som nwe in facl Moriah in kihsackuhnuhllah. Kuh kuht kuh in luhma ahsoriyacl Abraham ke el fuhfahsryucsrlac nuh ke acn srihsrngiyucki se? Pwacyena lah kohslah ac nuh ahkngalye na upac kwewa mahnol ac nuhnak lal ke el kaprilyac Isaac ah, fihlilyac fin loang se, ac sruhkwack mitmit nahtuhl in unilyac. Ke luhlahlfongi kuh tiac ahlohloh ac luhlahlfongi pwacye ke Leum, el oruh fahk luhn Leum. Sulkackihnyac ah arulacna wo, ac Abraham lac nuh sruikihn na pwacye ke tuhkuh ah. “Nimet kom kahlyac tuhlihk sacn kuh oruh kuhtwena ma nuh sel: Inge nga etuh lah kom ahkfuhlwactye God ac ahkos ma El sapkihn, mweyen kom tiac sruokyac wen sefanna nuhtum an luhkwel.”6
Abraham el srihkeyuck ac sikengiyuck, ac ke luhlahlfongi na kuh ac ahkostwen lal Leum El sang nuh sel olwelah wolacna: “Muhtuhnfacl nuh kwewa ac fah ahkinsewowoyeyuck oacna ke Nga ahkinsewowoye fihtac lom; ke srihpen kom tuh ahkos ma nga sapkihn.”7
Kuht ne tiac siyuckyuck in ahkpwacyei ahkostwen lasr uh ke kain ohiyac upac ac emtucng na pwacye, ahkostwen enenweyuck pac nuh sesr.
Prestuhn Joseph F. Smith el fahkwack ke Ohktohpa 1873, “Ahkostwen pa masap se emet inkuhsrao.”8
Prestuhn Gordon B. Hinckley el fahk, “Mwe engan luhn Mwet Luhlahlfongi ke Lwen-sahflah sin God pa: In ahkostwen ke fahk luhn God pa yohk srihpac ke mwe engan, mihslac, kapkapwack, fahko luhn Mwet Luhlahlfongi ke Lwen-sahflah, ac molwelah ma pahtpaht ac enganwack luhn mwet inge.”9
Ahkostwen pa atac wowo se luhn mwet pahluh; ohiyac se sang kuh ac etuh nuh selos ke sramsram mahtuh me. Yohk na pwacye nuh sesr in akihlen lah kuht, pac, pa luhlahlfongiyuck nuh ke mwe kahsruh ke kuh ac etuh se inge. Fihsrwacsr in oasr lasr kais sie mihsenge ke kuht ahkos masap luhn God uh.
Yac pucspucs nuh mihsenge, nga etwaclah kais sie mwet pucspucs suc ma luhlahlfongi yohk ac ahkostwen. Nga ahkinsewowoyeyuck ac mokleyuck selos. Nga luhngse akacsruhi nuh suwos sramsram soko ke luo sin mwet inge.
Walter Krause el mempucr yohk luhlahlfongi lal ke Alu uh suc, ke sucu lal, tuh muhta ke acn se ma etweyucklac muh East Germany tukun Mweun Ahkluo ah. Macnsis kuhnlah ma upac el puhlakihn ah ke srihpen srihklac sukohsohk ke acn sac fin facluh in pacl sac, Tamuhlwel Krause pa mwet se ma luhngse ac kuhlwacnsapuh Leum. El ahkfalye ke luhlahlfongi kuh ac taranwacng kais sie kunohkohn ituckyang nuh sel.
Mukul se sahyac ah, Johann Denndorfer, mwet Hungary se, tuh welah Alu uh fin acn Germany ac pacptaislac we ke yac 1911 ke matwac yac 17. Tiac paht tohkoh el fohlohk nuh Hungary. Tukun Mweun Ahkluo ah, el kapihri ke wacngihn mwacta ke acn el mahtuhlah we, ke siti Debrecen. Itucklac pac sukohsohk luhn mwet Hungary ah.
Tamuhlwel Walter Krause, suc ma tiac etwacl Tamuhlwel Denndorfer, eis kunohkohn se in oruh mwet luti luhn sucu lal ac in muhtwacta nuh yohrohl ke pacl nuh kwewa. Tamuhlwel Krause el pahngonwack mwet luti luhn sucu wiyacl ac fahk, “Utuckuh kunohkohn se lasr in muhtwacta nuh yohrohl Tamuhlwel Johann Denndorfer. Kom ac kuh in wiyuc som liyacl ke wik se inge ac sang sie pweng ke wosasuc?” Na el fahk pac lah, “Tamuhlwel Denndorfer el muhta Hungary.”
Mukul tuhfalwack se wiyacl ah siyuck, “Kuht ac som ngac?”
“Lutu,” pa top se lal Tamuhlwel Krause ah.
“Kuht ac fohlohk ngac?” mukul se wiyacl ac siyuck.
Tamuhlwel Krause el tohpohkohllah, “Oh, sahp wik se—kuht fin fohlohk.”
Mukul in luti luhn sucu luo ah som in muhtwacta yohrohl Tamuhlwel Denndorfer, elos wi train ac pas ke lwacyacn acir kuhtuhlacp Germany nuh Debrecen, Hungary—fuhfahsryucsr na loesloes se. Wacngihn mwet luti luhn sucu lal Tamuhlwel Denndorfer ac met liki na mweun ac. Inge, ke liyacack mwet kuhlwacnsap luhn Leum inge, el sesseslah ke kulohkihn lah elos tuhkuh. Muhtwacwacyac ah el sruhnga usrusr po nuh selos. Sahyacna, el som nuh ke infuckihl sel ah ac sruhkwack pohk se ke nien fihl srihsrihk se ma nein sie tahfuh singucul lal ma el sefi ke yac pucspucs. El sang nuh sin mwet in luti sucu lal ac sie tahfuh singucul lal ah ac fahk, “Ingena nga ahkfalyelah oruh ke sie tahfuh singucul luhk nuh sin Leum. Ingena nga puhla nwacsnwacs in usruk poun mwet kuhlwacnsap luhn Leum!” Tamuhlwel Krause el fahk nuh sihk tohkoh lah kahs uh tiac kuh in ahkuhtweyac luhpan emtucng el puhla ah in nuhnkuh lah tamuhlwel luhlahlfongi kuh se inge, suc tiac ohsun nuh sin Alu ke yac pucspucs, tuh ahkostwen ac tiac tui in eslah percent singucul ke mani lal in moli sie tahfuh singucul lal. El sefi ke el tiac etuh lah ngac kuh lah ac oasr pacl wowo lal in molwelah.
Tamuhlwel Walter Krause el misac ke yac yuc somlah ah ke matwac yac 94. El kuhlwacnsap luhlahlfongi kuh ac ahkostwen ke lusacn moul lal ac tuh oruh sie ma mokleyuck nuh sihk ac nuh sin mwet nuh kwewa ma etwacl. Ke ngihsreyuck in ahkfalye kunohkohn uh, el tiac wi kihsen siyuck, tohrkahskahs, ac el tiac wi sukok srihpac uh.
Tamuhlwel ac tahmtahel wiyuck an, srihke yohk ke moul se inge pa ahkostwen. God El fahk lah elos ac srihke kuht in liye lah kuht ac kuh in oruh ma nuh kwewa ma Leum God lasr ac sapkihn nuh sesr uh.”10
Mwet Lahngo El fahkwack, “Elos nuh kwewa ma kena ke mwe insewowo luhn Leum enenuh in ahkos masap ac ohiyac ma srihsrngiyucki nuh ke mwe insewowo sacn, ke lutiyuck met liki pwelucng luhn facluh.”11
Wacngihn mwe srihkasrak wowo ke ahkostwen yohk likina ma luhn Mwet Lahngo. Paul el fahk kacl:
“Tuhsruhktuh El ne Wen nuhtin God, El lotwelah in ahkos ke kweok Lal:
“Ke El ahksahfyelah ma nuh kwewa suhpweyuckme El nuh kac, El pa kuh in sang molwelah nuh selos kwewa suc ahksol.”12
Mwet Lahngo El orwaclah luhngse wo liki nuh kwewa luhn God in moulkihn moul fas se, in ahkfuhlwactye misin muhtahl Lal. El tiac wi inse fuhlwact uh. El tiac wi sang nuh fac uh. El tiac wi nakantwen. El puhsisacl pacl nuh kwewa. El inse pwacye pacl nuh kwewa. El ahkostwen pacl nuh kwewa.
El ne tuh srihfeyuck El sin mwet srihfeyuck fuhlwact sac suc devil, El ne muhnahslah mahnol ke lalo ke lwen 40 ac fong 40 ac masrinsracllah, tuh ke mwet orekma koluk sac fahk nuh sel Jisus nuhnak na wowo ac srihfeyuck ah, El use nuh sesr mwe srihkasrak na muhtahl ke ahkostwen in sruhnga kuhflah liki ma El etuh muh pwacye uh.13
Ke El puhlakihn kweok ke Gethsemane, ma El kutong kain ngal se inge ma fiyoh kacl uh tultul oacna srah nuh infohk uh,”14 El pa mwe srihkasrak wowo se ke Wen ahkostwen se in fahk, “Pahpah fin oa luhngse lom, eslah kuhp in kweok se inge likiyuc. Tuhsruhktuh in tiac oa luhngse luhk, ac lwelah ma luhngse lom in oreklac.”15
Ke ohiyac se ma Mwet Lahngo El ahkuhtweyac nuh sin Mwet Sap Lal met ah, El ahkuhtweyac nuh sihk kom pac: “Fahsr tukuk.”16 Kuh kuht insese in ahkos?
Etuh se ma kuht suk uh, top ma kuht kena uh, ac kuh ma kuht kena mihsenge in sun ma upac luhn facluh ma tiac fihsrwacsr ac ekyek uh kuh in ma lasr kuht fin insese in ahkos masap luhn Leum. Nga sulpacna kalweni kahs luhn Leum ke El fahk lah: Mwet se ma karihngihn masap luhn God uh eis ma pwacye ac kahlwem, ne ke na el kaksyakihnyucklac ke ma pwacye ac etuh ma nuh kwewa.”17
Pa pruhe puhsisacl se luhk tuh kuht in kuh in ahkinsewowoyeyuck ke opi yohk uliyucklac nuh ke ahkostwen. Ke inen Jisus Kraist, Leum ac Mwet Lahngo lasr, amen.