In Kuh in Eis Mihs in Lohm
Sel Elder Richard G. Scott
Ke U luhn Mwet Sap Singucul Luo ah
Sie mwe insewowo emet kuht kuh in sang nuh ke facluh pa kuh luhn sie lohm ma Kraist pa yohk srihpac ma wosasuc uh lutiyuck we, olwelah uh karihngihnyuckyang, ac luhngse pucspucs oasr we.
Puhsra pucspucs ke facluh se kuht muhta kac uh fahk nuh sesr lah kuht enenuh in moulkihn sie ohiyac pwacr ac inguri. Yohkna ma in orek ac yohkna ma in oreklac pacl nuh kwewa. Tuhsruhk loal nuh in kuht kais sie pa sie enenuh in eis sie moul mihslac ma mihs ac efahl kuhtanglah, sie acn ma kuht kuh in monglac ac sokwack in ahkoekuhtlac sifacna nuh ke ma upac fahsruh uh.
Acn na pwacye se nuh ke mihs sacn pa lun lohm sesr sifacna uh, ma kuht orwaclah ma nuh kwewa in oruh Leum Jisus Kraist pa ma yohk srihpac se emet.
Kuhtuh sucu uh oasr pahpah se in lohm uh ma pa sie mwet sruok pristut nwacsnwacs ac oacyacpac sie ninac yohk luhlahlfongi la ac oaru suc kwewana kol ke suwohswohs. Oasr kain in ma puhs sahyac ke ohiyacn sucu uh. Sahyacn ohiyac lowos an, kowos kuh in ahkfuhlwactye lohm suwos ac moul lowos ke Leum Jisus Kraist, tuh El pa kahsruh nuh ke mihs pwacye nuh ke moul se inge.
Kom enenuh in etuh na pwacye lah sulaclah nuh kwewa kom orwaclah, finne ma ip luhn mahno kuh nguhn, som yohk ke ma Mwet Lahngo El ke kom in oruh. Ke El pa yohk srihpac in lohm sum an, oasr sie mihs ac efahl. Oasr sie puhla ke etuh pwacye ma nwacklah lohm uh, ac puhlakihnyuck sin mwet nuh kwewa ma muhta we uh.
Tiac pahpah ninac uh muhkwena enenuh in ahkfalye kahs in kahsruh se inge, finne ma kunaclos in kol. Tuhlihk uh kuh in eis kunac ke ahkwoye kuhiyen moul in Kraist lun lohm uh. Yohk srihpac nuh sin pahpah ninac uh in luti tuhlihk uh in akihlen ohiyac ma mukwikwi lalos an puhsrallah kais sie mwet ma muhta lun lohm an. Tuhlihk ma oreklac in puhla eis kunac ke mukwikwi lalos uh, finne mukwikwi lalos suwohs kuh tiac, kapwack in oruh mwet luhlahlfongiyuck ke tohkohsrahi luhn God.
Nga etuh lah kom kuh in sokwack muhtwacwacyacn ip yohk ma yohk srihpac nuh in lohm sum ke Mwet Lahngo. Kahs in kahsruh luhn mwet pahluh in oruh pruhe lwen nuh kwewa luhn kais sie ac sucu, lutlut lwen nuh kwewa ke ma suhmuhslah luhn kais sie ac sucu, ac ekuh in toeni luhn sucu ke wik nuh kwewa pa enenweyuck, ac fihsracsr in orwaclah sie lohm ma ahkfuhlwactye Kraist. Fin wacngihn ahkpah ke lwen nuh kwewa inge ac upac in sokwack mihs luhngseyuck ac enenweyuck yohk ac acn in monglac liki facluh.
Ahkostwen nuh ke mwe luti luhn mwet pahluh ma Kraist El kena kom in ukwe uh. Nimet kihnacack engan pacl fahsr uh in ahkfototoyelah sahyacn orekmakihn ip yohk wowo ke wosasuc uh. Esam: ma srihsrihk uh kol nuh ke ma luhlahp uh. Atacn mukwikwi wacngihn srihpac tiac wo uh kuh lihnguhn kuh in kol nuh ke elyah yohk. Yohk srihpac liki nuh kwewa, elah fihsrwacsr, fal, ac wo uh kol nuh ke sie moul sesseslah ke mwe insewowo pucspucs.
Kowos tuhlihk ke U luhn Tuhlihk Srihsrihk an, kowos mukul ac muhtwacn fuhsr ke prokracm luhn mwet fuhsr an, ac kowos misineri fokoko ma kuhlwacnsap ingena uh oruh ma wowo pucspucs likiyuc na ke nga matwac lowos ah. Ke moul se met ah, kom ahkpwacyei in yohk luhlahlfongi la, ahkostwen, ac nwacsnwacs. We, kom orekma upac in ahkyohkye talan ac kuhiyom in ahkoekomlac sifacna in sun moul in mahno uh ke puhlaik, suwohs, ahkfuhlwact, ac orwaclah wo.
Tiac paht pacl somlah ah kom tuhkuh nuh ke moul in mahno ke kain in kuhiyac wolacna wacngihn sahflahiyac uh. Tuhsruhk oasr sie sensen upac ke acn rauni komlac uh. Fokoko yohk lom ac kuhiyom kuh in srihkeyucki kuh kuhnausyucklac kom fin fuhlweack nuh ke mokleyuck koluk luhn setuhn raunikomlac an. Tuhsruhktuh, Setuhn el koflah kuhtanglah Mwet Lahngo. Sahflahiyacl Setuhn suleyucklac. El etuh lah el kuf, tuhsruhk el kena in kuhnahoslah mwet pucspucs ma el kuh uh. El ac fah srihke in kuhnahoslah wo ac kuhlwacna lom in mokle muhnahsiyom. Muhta na ke lwacyacn luhn Leum, ac kom fah itto ke pacl nuh kwewa.
Kom muhta ke sie facluh ma technology uh kihluckyak nuh ke sie luhpah na usrnguck muhi. Upac na pwacye nuh sin puhsiyacn fihl se luhk uh in orekmakihn ma inge. Wiwina orekmakihnyacn technology uh, etwacack inge kuh in oruh sie mwe insewowo kuh sie elyah. Technology, ke etweyuck ac orekmakihnyuck nuh ke srihpac suwohs uh, tiac enenuh in mwe ahkkoluk se tuhsruhk in sie mwe ahkyohk nuh ke aetuhi ke ip luhn nguhn.
Nuh ke mwe srihkasrak, inkaiyacsr oasr nahtuhsr mwe itact ma fal nuh lun pakiht lasr uh. Sessahlah kuht in tiac orekmakihn; kuht ac ke orekmakihn pacl puhkantwen ke lwen se. Koluk ohiyac, mwe itact inge kuh in oruh sie ohiyac ke ma koluk ac ispacl. Tuhsruhk, orekmakihn in wo, ma inge kuh in oruh sie kuhfa in karihngihn liki ma koluk mwet uh orwaclah uh.
Suc kuh in nuhnkuh lah yac suhpuhs somlah ah lah orekma ke ohiyac wo ac yac puhs ke pweng ke toeni luhlahp uh kuh in fal nuh lun pakiht lom an? In sang ma ingacn nuh lun pakiht lom an ac tiac karihngihn komyang, tuhsruhk lutlutkihn, motko, ac lohng ma ingacn ke pacl mihs ke kais sie lwen uh fah ahkyohkye aetuhi ke Nguhn.
Ahksuhmahtye kom ke orekmakihnyacn technology ke moul lom an. Mahkiyac ma suhmuhslah yohk srihpac an ke ma nuhtum an ac fohlohklac in liye in fusus. Fin kowos mwet fuhsr an liye sie fuhs ke ma suhmuhslah in fusus oacna kuhtuh suwos suhpweyuck text message uh, kowos ac kuh in sana esamyac pohloh kahs foko ke ma suhmuhslah uh. Pohloh kahs ingacn ac oruh sie kahsruh fokoko ke mokleyuck ac kolyuck sin Nguhn Muhtahl ke pacl upac uh.
Oruh ma nuh kwewa kuht kuh in oruh in suli mokleyuck fihsrwacsr, kolyuck luhn Nguhn Muhtahl nuh ke moul lasr uh pa yohk srihpac nuh ke kuhiyacsr in ahkfuhlwactye lohm sesr uh ke Mwet Lahngo. Mukwikwi ahkostwen nuh ke ma nguhsrihk ingacn ahkkweye kuht yohk likina met ah.
Mihs yohk fah tuhkuh ke kom orwacni kuhiyom in ahkostwen ke kuhlwacnsap nuh sin mwet sahyac uh. Puhslaclac kais sie mwet ma eis ma elos liye muh talan uh puhsisacl srihk ac kuhlwacng in orekmakihn talan ingacn in ahkinsewowoye moul luhn mwet raunweloslac uh. Nakantwen pa okah luhn ma koluk yohk uh. Mwe onwe ma koluk sacn pa ahkkahlwemyeyuck ke moul luhn Mwet Lahngo. El ahkkahlwemye nuh sesr ohiyacn lohacng nuh ke moul lasr uh in mokle kuhlwacnsap tiac kuhtasrihk nuh sin mwet sahyac.
Nga lotwelah sie ma pwacye ma kalweniyuck pacl nuh kwewa ke moul luhk uh ma nga etwaclah oacna sie masap na fal uh. Ma ingacn ahkuhtweyac inkacnek nuh ke ahkostwen ac kuhlwacnsap kuhpahsr nuh ke kuh luhn God uh. Ke kuht ahkos masap luhn Leum ac kampare in kuhlwacnsapuh tuhlihk Nahtuhl uh in tiac nakantwen, fohlohkihnyac uh pa kuh sin God kuh in oruh yohk liki ma kuht kuh in sifacna oruh. Nuhnkwacsr, talan lasr, etuh lasr uh ac yohkwelihk ke srihpen kuht eis ahkkweyeyuck ac kuh sin Leum. Kuh Lal uh pa sie ip yohk srihpac ma orwaclah sie lohm sesseslah ke mihs.
Ke kom ahkfuhlwactye lohm sum an ke Mwet Lahngo uh, ac sifacna oruh sie acn in monglac tiac nuh sin sucu lom an muhkwena tuhsruhk nuh sin kawuck ma upac yohk pac nuh se an. Elos fah puhla nuh ke mihs elos puhla in lohm sum an. Pain kain in kawuck ingacn nuh in lohm sum an. Elos kapwack ac yohkwelihk ke acn ma Kraist pa yohk srihpac se an. Kawuckyak nuh sin kawuck luhn kawuck luhn tuhlihk nuhtuwos an. Oruh in sie srihkasrak nwacsnwacs nuh selos.
Sie mwe insewowo emet kuht kuh in sang nuh ke facluh pa kuh luhn sie lohm ma Kraist pa yohk srihpac ma wosasuc uh lutiyuck we, olwelah uh karihngihnyuckyang, ac luhngse pucspucs oasr we.
Yac somlah ah, tukun muhtwacta nuh ke sie misin, muhtwacn kiyuck uh, Jeanene, el fahk nuh sihk ke sie elder el ohsun nuh se. El lut ke mukul sac fahk lah wacngihn sucu lal ah. El tahfwelah in fahk lah ke isuslac lal ah, ninac kiyacl ah esaclwacng nuh sin ohfohs in tuhfahlah. El mukwiwot mukwime nuh lun kais sie lohm in nuht tuhlihk ke srihsrihkyak lal ah. Ahkinsewowoyeyuck el oacna sie mwet fuhsr in sokwack wosasuc uh. Sie sucu pahkotwen ke ward se kahsrwel in eis pacl wo se in kuhlwacnsapuh sie misin.
Tok Jeanene el siyuck sin muhtwacn kiyacn prestuhn luhn misin sac ke elder na wowo se inge. El etwacack lah mahlwem ekahsr met liki elder se inge oasr ke lohm in misin ke lwen ekahsr ke sie mas. Ke puhlan pacl sac ah el weluhltahl oruh sie ekuh in toeni luhn sucu. Met liki el fohlohklac nuh ke orekma uh, el siyuck sin prestuhn luhn misin fin el kuh in sifil eis lwen luo kuh tolu ke sahflahiyacn misin lal an lun lohm in misin sacn. El ke liye ohiyacn mukwikwi luhn sucu ma Kraist pa yohk srihpac we uh. El luhngse in kuh in orwaclah sucu lal an tukun sucu lalos an.
Oruh ma nuh kwewa kom in kuh in eis kain lohm sena inge. Kahsruh elos suc moulkihn ma upac uh. Oruh in sie kawuck pwacye. Kain in akwuck wacngihn sahflahiyac se inge ac kahsruh mwet sahyac uh kuhtanglah ma upac uh ac orwaclah moul uh arlac wo. Tiac enenuh in sie kahsruh orekmakihnyuck in eis fohlohkihnyac tuhsruhk sie ma sacohk in luhngkihn ac akacsruhi. Pain nuh lohm sum an mwet sahyac suc enenuh in ahkkweyeyuck ke oasr lun sie lohm ma Kraist pa yohk srihpac kac uh.
Nga sang kuhtuh nuhnak sahflah uh nuh sin mwet suc luhngse sie mwet ke sucu ma tiacna oruh sulaclah wowo uh. Ma ingacn kuh in srihke muhtweng ac kampare lasr uh. Kuht enenuh in luhlahlfongi Leum ac ke pacl Lal ma sie top wowo nuh ke pruhe ac kuhiyacn pain molwelah lasr kuh in sikyak. Kuht oruh ma nuh kwewa kuht kuh in kuhlwacnsapuh, in ahkinsewowoye, ac in efahl in akihlen kena luhn God ke ma nuh kwewa. Kuht ahkyohkye luhlahlfongi ac esam lah oasr kuhtuh ma ma enenuh in fihliyucki nuh sin Leum. El suli kuht in fihliyac ma toasr lasr uh nuh ten ke Niyacl. Ke luhlahlfongi kuht kuh in etuh lah mwet luhngse seahkostwen se inge tiac sisyucklac tuh el oasr in karihngihnyuck luhn sie Mwet Lahngo pahkotwen.
Akihlen ma wo ke mwet sahyac an, tiac ma koluk lalos an. Ke pacl uh sie ma koluk enenuh lohacng fal in nwacsnwacslah, tuhsruhk lohacng lwen nuh kwewa ac ahkkweye moul nwacsnwacs lal an.
Ke kom puhla lah oasr sie finsrak srihsrihk muhkwena uh, finsrak sacn tiacna srihklac tuhsruhk sie kuhpahsr na yohk, oacna sie kuhfa wowo in ahkkweye ac tahpuhk kom. Ac fah ahkkweye kom in kuh in tilac sahngweng. Kampare in moul suwohs ac fihliyac luhlahlfongi ke Leum.
Kuht tiac enenuh in elyah kuht fin tiac kuh in oruh kwewana ma nuh kwewa ma Leum el kena kuht in oruh uh. El fahk tari lah oasr pacl nuh ke ma nuh kwewa. In topuk pruhe muhtahl lasr nuh ke kolyuck, El fah kol kuht nuh ke ma enenuh in ahkyohkyeyuck ke kais sie ip ke moul lasr uh. Kuht kuh in lutlut, kapwack, ac eklac oacna El kais kuhtuh mukwi.
Nga fahkwack luhlahlfongi lah moulkihn sie moul ahkostwen, kapwack fokoko nuh ke wosasuc luhn Jisus Kraist, sang etuh na pwacye nuh ke mihs ac monglac in lohm sesr uh. Ac srwackna oasr ma upac kuh kweok yohk, tuhsruhk finne ke infulwacn ma upac uh, kuht kuh in engankihn mihs insiyac ac engan yohk uh. Nga fahkwack lah Iwaclah luhn Jisus Kraist pa kahsruh nuh ke mihs yohk sacn ke inen Jisus Kraist, amen.