Pahpah ac Wen

Sel Elder Christoffel Golden

Ke Mwet Itngucul

Ke infulwacn wosasuc luhn Jisus Kraist ac kuh in molwelah pa kahlwem suwohs se ke Pahpah ac Wen.

Tamuhlwel ac tahmtahel, nga arlac srui in sramsram nuh sumtacl ke infulwacn lwen se inge ke arlac wo toeni se inge!

In sramsramkihn ke sifac se arlac sacohk, nga ke in ahkpwacye ke kuloh ke mwet Kristin suc kampare ke pacl met ah, oacyacpac mwet mahtuh met luhk suc mwet Pros luhn France ac Mwet Kahtlihk luhn Ireland. Ke srihpen luhlahlfongi lalos ac kaksakihn nuh sin God, puhkantwen elos kihsac ma elos oruh, orekma, oacyacpac moul lalos in loangi ke God lalos ac luhlahlfongi lalos.¹

Ke Mwet Luhlahlfongi Lal ke Lwen-sahflah ac oacyacpac Mwet Kristin, kuht pac oasr luhlahlfongi fokoko ac loal ke God Pahpah Ma Pahtpaht ac Wen se Nahtuhl, Jisus Kraist. Lohacng nuh sin God srackna fahsr ac arlac sacohk kais sie sesr ac Mwet Orwaclah se lasr.

Fuhfahsryucsr se lasr ke moul ma pahtpaht pa fuhfahsryucsr muhkwena in kahlwem suc pa God ac nuh sesr in fohlohk in muhta Yohrohl. Mwet Lahngo pruhe nuh sin Pahpah Tuhmwacl, “Ac pa ingen moul ma pahtpaht, lah elos kuh in etuh kom pa God nuh pwacye, ac Jisus Kraist, suc kom suhpwema.”²

In kahlwem fahk se inge sin Mwet Lahngo lasr, oasr ma pwengpweng ke ma mwet elos liye ke Pahpah ac Wen uh ke yac puhkantwen ac ma mwet fahk tiacna arlac fal ke mwe luti ke ma suhmuhslah muhtahl.

Kuht suhnakihn in fahk lah ke infulwacn wosasuc luhn Jisus Kraist ac kuh in molwelah pa kahlwem suwohs se ke Pahpah ac Wen.³

Ma yohk srihpac ke ip sacohk se inge ke wo sasuc luhn Jisus Kraist pa ahkpwacye ke Aruhrruhma Se Met luhn Mwet Pahluh Joseph Smith ke yac 1820. Mwet Pahluh sihm: “Nga liyacack luhman mwet luo, suc kahlwem ac wolacna lalos tiac kuh in ahkuhtweyucki, tu lucng likiyuc yen engyeng uh, Sie selos sramsram nuh sihk, pahngonyuc ke inek ac fahk, srihsrngi nuh sin mwet se sahyac ah—Pa inge Wen kuloh nuhtihk uh. Lohngohl!”⁴

Ma se inge ma tuhlihk mukul Joseph el puhlakihn ah, oacyacpac aruhrruhma ac fwackyuck sahyac, ahkkahlwemye lah God El oasr nuh pwacye; Pahpah Lucng ac Wen se Nahtuhl, Jisus Kraist, pa mwet luo sifacna; mwet uh oreklac ke atacn God; Pahpah Tuhmwacsr Inkuhsrao pa Pahpah tuhman Jisus Kraist; God El tahfwelah in ahkkahlwemyacl sifacna nuh sin mwet; God pa fototo nuh sesr ac nuhnkuh kacsr; ac El topuk pruhe lasr.

Tuh muhka ke Pahpah ac Wen ke ma suhmuhslah muhtahl tiacn arlac sikyak, Aruhrruhma Se Met arlac sun ke srihpen ma inge insese nuh pwacye ke ma lah sikyak met ke ma suhmuhslah muhtahl.

Ke Wuhlweacng Sasuc, nuh ke mwe srihkasrak, kuht riti ke fahkwack luhlahlfongi sahflah lal Stephen ke acnwucki lal. El fahk, “Ngwetack liye, nga liye kuhsrao ikacklah, ac Wen nuhtin Mwet El tu lac po lacyot sin God.”⁵

Ke el oasr ke aruhrruhma fokoko se fin tuhka luhn Patmos, Mwet Sap John el liye “Leum God Kuhlacna”⁶ oacyacpac Nacni nuhtin God, suc “molwelah kuht … ke srah [Lal].”⁷

Ke Puk luhn Mormon, mwe luti pwacye se luhn Pahpah ac Wen tu kuh nuh pwacye ac wi fahkwack luhn Pwacpuhl Muhtahl. Puk luhn Mormon sramsram ke muhtwacta luhn Mwet Lahngo lasr nuh sin Mwet Nephi, na puhsren Pahpah, ke oasr yurin sahp Mwet Nephi 2,500, ahkkahlwemye Kraist suc moulyak ah: El inge Wen kuloh nuhtihk, suc nga insewowo kacl, suc nga kaksakihn inek—longuhl.⁸

Ke Wosasuc ahkosr, Kraist sifacna sramsram nuh sin Pahpah Tuhmwacl Inkuhsrao pacl 160, ke kuhlwacnsap fototo ke lwen-tolu Lal yurin Mwet Nephi, ke ma Puk luhn Mormon fahk, El sramsram ke Pahpah Tuhmwacl pacl 122.

Pa ingen srihkasrak se, ke Matthew, Jisus fahk, “Tiac mwet nuh kwewa ma pahngonyuc ‘Leum, Leum’ ac fah ilyak nu in Tohkohsrahi lun kuhsrao; a elos suc oruh ma luhngse luhn Pahpah tuhmuhk suc inkusrao.”⁹

Ke Jon, El fahkwack, “Wen el tiac kuh in oruh kuhtwena ma ke kuh lal sifacna, tuhsruhk ma El liye Pahpah oruh.”¹⁰

Ac ke Luk, El fahkwacl, “Pahpah! Nga usot nguhnihk nuh inpoum.”¹¹

Pacl nuh kwewa Leum lasr sramsram ke Pahpah Tuhmwacl Inkuhsrao, El oruh ma se inge ke ohiyac muhtahl ac inse puhsisacl.

In fahklah ma inge, nga finsrak wacngihn mwet fohs kac. Jisus Kraist pa Jehovah wolacna, God luhn Israel, Mwet Iwaclah olweyucklac, ac ke srihpen Iwaclah pahtpaht lal, El pa Mwet Lahngo ac Mwet Molwelah lasr luhn facluh. Mwet Sap Paul el fahk Kacl, “Na ac fah sahflah facluh. Kraist el fah kuhtanglah kuh nuh kwewa luhn nguhn koluk, oacyacpac mwet kol ac wal luhn nguhn inge, ac el ac fah sang Tohkohsrahi nuh sin God Pahpah.”¹²

Ke ekuh se ke Iwaclah luhn Mwet Lahngo, El sang Pruhe nuh sel Pahpah Tuhmwacl ke mwet luhlahlfongi Lal. El pruhe ah:

“Nga tiac pruhe kaclos inge [ke kahs sahyac, Mwet Sap Lal] muhkwena, a nga oacyacpac pruhe kaclos suc luhlahlfongi keik ke srihpen fahkwack lalos;

“Nga pruhe tuh elos nuh kwewa fah kuh in ma sefanna, Pahpah, lwelah elos in muhta in kuht, oacna ke kom muhta in nga ac nga in kom, tuh elos in ma se in kuht: tuh facluh fah luhlahlfongi lah kom suhpweyucme.

“Wolacna se ma kom tuh use nuh sihk, nga sang nuh selos, tuh elos fah kuh in ma sefanna, oacna ke nga kom ma sefanna.”¹³

Pahpah ac Wen pa mwet sienna liki sie sin sie, tuh Elos pa suwohswohs tuhkweni ke kuh ac srihpac sefanna. Sefanna Lalos tena ma Lalos muhkwena; tuh, Elos kena sefanna se inge nuh sin mwet nuh kwewa suc ac, lohacng, ukwe, ac ahkos nuh masap Lalos.

Mwet ke inse pwacye kuh in orwaclah kuhpahsr se yurin Pahpah lucng ac Wen fuhkah? Mwet Lahngo lasr olwelah sesr, “Nguhn Muhtahl, … el fah luti kowos ma nuhkewa.”¹⁴

Ke Puk luhn Mormon, Nephi, ke el sramsram ke mwe luti luhn Kraist, fahkwack lah Nguhn Muhtahl loh ke Pahpah ac Wen. ¹⁵

Pwacye se pa ingen lah kuht kuh in puhla kuh luhn Nguhn Muhtahl kuhtuh pacl, ke luhngse luhn Leum, oacna sie mwet ac oacna luhlahlfongi luhn mwet kuh in puhla. Tuh puhla nohfohn se, tuh mwe sang, luhn Nguhn Muhtahl tuhkuh tukun mwet se eis, ke inse puhsisacl ac inse pwacye¹⁶ tukun akwuck luhn pacptais oacyacpac mwe sang luhn Nguhn Muhtahl¹⁷ ke fihliyac paho. Akwuck se inge ac akwuck muhtahl sahyac kuh in orwaclah ke kolyuck and kuh luhn pristut luhn God. Ke ma inge, kuht lutiyuck:

Kuht etwaclah lah pristut fuhlwact in oruh kuh in orwaclah ma se ke wosasuc ac sruok ki nuh ke lukmac luhn tohkohsrahi, oacyacpac ki luhn etwacack luhn God.

Kuh luhn God ahkkahlwemye ke akwuck inge.¹⁸

Ke kahlwem se inge, mwe luti luhn Pahpah ac Wen pa mwe luti luhn sucu ma pahtpaht. Mwet nuh kwewa moul met ah ke tuhlihk nguhn yurin pahpah ac ninac inkuhsrao, ¹⁹ ke Kraist pa Isuslac Emet nuhtin Pahpah ke sucu inkuhsrao se inge. ²⁰

Na kuht nohfohn pac. Kuht pa tuhlihk nuhtin Pahpah Tuhmwacsr Inkuhsrao.

Prestuhn Ezra Taft Benson ke kahlwem luhn mwet pahluh fahk, “Wacngihn ma fah ahklutye kuht liki ke kuht fohlohk nuh sin Pahpah lucng ac akihlen kuhpahsr se lasr yurin Pahpah Tuhmwacsr [Inkuhsrao] ac fuhkah kuht pah in liye muhtahl.”²¹

Nga lotwelah lah tiac fihsracsr in ahkuhtweyac suwohswohs ke kahs luhn mwet ma etuh sin Nguhn Muhtahl ac kuh luhn God muhkwena. Ke nguhn se inge nga fahkwack luhlahlfongi luhk ke pwacyeiyacn, fototoiyacn, ac woiyacn Pahpah Ma Pahtpaht tuhmasr ac Wen muhtahl Nahtuhl, Jisus Kraist. Ke inen Jisus Kraist, amen.

Mwe Kahsruh

1. Liye Kenneth Scott Latourette, A History of Christianity, Volume 1: Beginnings to 1500, rev. ed. (1975) ac A History of Christianity, Volume 2: Reformation to the Present, rev. ed. (1975); liye pac Diarmaid MacCulloch, The Reformation (2003).

2. Jon 17:3.

3. Liye Lectures on Faith (1985), 38–44.

4. Joseph Smith—History 1:17.

5. Orekma 7:56.

6. Fwackyuck 4:8.

7. Fwackyuck 5:9.

8. Liye 3 Nephi 11:7.

9. Mattu 7:21; ahkuhtweyac wo ituckyang.

10. Jon 5:19; ahkuhtweyac wo ituckyang.

11. Luk 23:46; ahkuhtweyac wo ituckyang.

12. 1 Mwet Korint 15:24. In ahkyohkye kahlwem ke Mwet Lahngo ac misin Lal, liye “The Living Christ: The Testimony of the Apostles,” Ensign kuh Liahona, Eprel 2000, 2–3.

13. Jon 17:20–22; ahkuhtweyac wo ituckyang.

14. Jon 14:26.

15. Liye 2 Nephi 31:18.

16. Liye 3 Nephi 9:20; Moroni 6:2.

17. Liye Jon 3:5; 3 Nephi 11:31–38.

18. Liye Doctrine ac Covenants 84:19–20.

19. Liye “Sucu: Sie Mwe Fahkwack nuh fin Facluh,” Ensign kuh Liahona, Nohfuhmpuh 2010, 129

20. Liye Mwet Kolosse 1:15; Doctrine and Covenants 93:21.

21. Ezra Taft Benson, “Jesus Christ—Gifts and Expectations,” ke Speeches of the Year, 1974 (1975), 313; liye pac “Jesus Christ—Gifts and Expectations,” Ensign, Tisacmpuh 1988, 6; Tambuli, Mei 1977, 24.