Sie Pwelucng Kuh
Sel Pisap Dean M. Davies
Mwet in Kahsruh Ahkluo ke U luhn Pisap ma Karihngihn
Lwelah kuht in insese nuh ke solsol luhn Mwet Lahngo in tuhkuh nuh Yohrohl. Lwelah kuht in muhsahi moul lasr fin pwelucng wowo ac kuh se.
Ke Ohktohpa 17, 1989, ke nga kahsruhsr nuh lohm ah tukun orekma, nga apkuhran in sun stoplight se ke ohsun luhn inkacnek Market ac Beale fin acn San Francisco, California. Ke pacl sac nga puhla stosah uh usrusr ac nga nuhnkuh muh, “oacna fuhrahrrahruh wil nuhtihk ac.” Ke stosah uh tiac tui in usrusr uh, nga liye lah puhs soko arulacna fototo nuh yuruk ac nga nuhnkuh muh, “Puhs soko ac fakisyucwi!” Na stosah ah yohkwaclihk usrusr la ah, ac nga nuhnkuh muh, “oacna wil ahkosr nuhtihk ac kwewa fuhrahrrahruh!” Tuhsruhk tiacna fuhrahrrahruh kuh ke puhs soko ah—kusrusr na upac se! Ke nga tui ke lahm sruhsrah, oasr noa ke inkacnek oacna noa meoa ma som ke Inkacnek Market. Nuh met likiyuc lohm ohfohs fuhlwact se mukwiwot mukwime, ac puhlak kac ah muhtwacwacack puhtat ke lohm mahtuh se nuh lacsac siskuck ke facluh tiac tui in usrusr na ah.
Kusrusr Loma Prieta uh orek ke Acn sisken Luhluh San Francisco ke ao 5:04 ke tahfuhn lwen tok ke lwen sac ac oruh in wacngihn lohm sin pihsen mwet 12,000.
Kusrusr uh arulacna kuhnahoslah Acn sisken Luhluh San Francisco, inkaiyac uh fin fohk fihsrwacsr ke acn San Francisco ac Oakland. Ke acn San Francisco, Tistrik Marina ah “muhsahiyuck fin acn in sisi kutkut oreklac ke puhk, fohk, fihkar, … ac kuhtuh pac kuhfa ma yohk kof kac. Kuhtuh ke koano ah fihkar ma sisilac nuh in Luhluh San Francisco tukun kusrusr San Francisco ke yac 1906 ah.”1
Ke apkuhran in yac 1915 ah, oasr lohm ren muhsahiyuck fin acn in sisi kutkut se. Ke kusrusr ke yac 1989, fohk fihsrwacsr ma oasr kof kac, puhkpuhk, ac fihkar ah eklac nuh ke fohk ma oacna kof, na oruh lohm ah ikori. Lohm ah tiac muhsahiyuck fin pwelucng kuh.
Kusrusr Loma Prieta ekuhllah moul puhkantwen, weacng moul luhk. Nuhnak ke ma orek ke lwen sac ahkpwacyelah ke insifuck ac insiyuck lah in lain wo eng luhlahp, kusrusr, ac ma upac ke moul uh, kuht enenuh in muhsahi fin pwelucng kuh.
Mwet Nephi se mwet pahluh Helaman el ahkkahlwemye wo ke yohk srihpen muhsahiyacn moul lasr fin pwelucng kuh, finne pwelucng luhn Jisus Kraist. El fahk muh kuht enenuh in muhsaheack moul lasr fin yot luhn Mwet in Molwelah lasr, suc pa Kraist, Wen nuhtin God, lah kowos enenuh in muhsahi pwelucng lowos; lah ke devil el ac suhpwacoht eng luhlahp, ahok, osra in fakfuck nahtuhl lun eng for, ahok, ke af srihngsrihng lal ac pahkah fokoko lal fah srihngihl kowos, ac fah wacngihn kuh la nuh suwos in ul kowosi nuh ke luhluh luhn ahsor upac wacngihn sahflahiyac, ke srihpen yot ma kuht muhsahiyucklac fac, suc ma pwelucng kuh se, pwelucng se ma mwet uh fin muhsahiyuck fac elos tiac kuh in puhtatlac (liye Helaman 5:12).
Ke muhsahiyacn tempuhl ke lwen mihsenge uh, nuhnak wowo ituckyang nuh ke atac, muhsahi, ac orekmakihnyacn kuhfwen muhsah. Fohk ac acn tusraciyuck ke acn ma tempuhl ac muhsahiyuck we. Etwacack ke eng, af, ac eklac luhn ohiyacn yen engyeng ke acn sac akihlenyuck in muh ke tempuhl sac tari uh ac kuh in lain tiac pahkah ac luhpan fol muhkwena ma fusus ke acn se, tuhsruhk tempuhl sac oreklac ac muhsahiyuck in lain kusrusr, pahkah, sronot, ac kuhtuh pac ma upac ma kuh in sikyak. Ke tempuhl pucspucs, oasr simacn kuh osra ma som loal nuh in fohk uh in ahkkweye pwelucng luhn tempuhl uh.
Oacna mwet muhsahi ke pacl lasr uh, Pahpah tuhmwacsr suc luhngse ac kuhlwacng Inkuhsrao ac Wen Nahtuhl Elos ahkolah plwacn, mwe orekma, ac kuhtuh pac kuhfa nuh ke orekma lasr kuht in muh kuh in muhsaheack ac ahkkweye moul lasr in kuh ac tiac mukwikwi. Plwacn sac pa plwacn in molwelah, plwacn wowo nuh ke engan uh. Plwacn sac ahkuhtweyac arlac kahlwem ke muhtwacack ac ke sahflah ac ke ip enenweyuck, weacng akwuck, suc ma enenweyuck nuh sin kais sie tuhlihk nuhtin Pahpah uh in kuh in fohlohk nuh ye Muhtahl ac muhta Yohrohl ma pahtpaht.
Luhlahlfongi, auliyak, pacptais, mwe sang luhn Nguhn Muhtahl, ac kwacfeacng nuh ke sahflah uh pa ip nuh ke plwacn in muhsahi moul lasr. Ma inge kahsruh in orwaclah kuhfa fal ac enenweyuck in ahkkweye moul lasr nuh ke Iwaclah luhn Kraist. Ma inge orwaclah atac ac muhsaheack ma in ahkkweye moul luhn mwet se. Na, oacna ke ma ahkkahlwemyeyuck ke plwacn luhn tempuhl ma ahkuhtweyac kahlwem ke atac ac orekmakihnyacn kuhfa enenweyuck uh, pruhe, riti ma suhmuhslah, ipeis ke kuhfa luhn Leum, ac in eis akwuck enenweyuck luhn pristut uh oacna ma ahkkahlwemyeyuck ma kahsruh orekmakihn ac kapsreni atacn moul uh.
In suwohs ke orekmakihnyacn ma inge arulacna yohk srihpac. Ke srihkasrak, ke oreklac luhn simacn, luhpah suwohs ke puhkpuhk, fihkar, simacn, ac kof orekmakihnyuck in oruh in kuh na pwacye. Fin tiac suwohs luhpah kuh fin wacngihn sie sin kuhfa inge na ac oruh simacn uh in muhnahs ac tiac kuh in oruh orekma yohk srihpac la.
Oacna ohiyac sac, kuht fin tiac sang pacl fal in moul lasr in sifacna pruhe lwen nuh kwewa ac lutlutkihn ma suhmuhslah uh, ahkkweye ke wik nuh kwewa ke kuht ipeis ke kuhfa luhn Leum, ac kwacna wi akwuck luhn pristut ma oacna akwuck luhn tempuhl, kuht sensen pac lah kuht ac muhnahslah ke kuh lasr in nguhn.
Paul, ke sie lwacta nuh sin Mwet Efesus, el fahk angwe ke enenuh se in suwohs ac orekmakihn nohfohn in orwaclah ohiyacsr ac nguhnasr: “Kacl muhsah se inge nohfohn orekwacni nuh sie ac kapkapwack nuh ke sie tempuhl muhtahl nuh sin Leum” (Mwet Efesus 2:21).
Pruhe pa sie sin mwe muhsahi ma fihsrwacsr ac yohk srihpac emet nuh ke luhlahlfongi lasr ac ohiyacsr. Ke pruhe kuht kuh in ahkkahlwemye srui, luhngse, ac insacnweacng nuh sin God. Ke pruhe kuht kuh in sang kena lasr nuh ke ma Lal ac eis pac kuh in oruh moul lasr in fal nuh ke mwe luti Lal. Pruhe pa inkacnek kuht kuh in ukwe in suk kolyuck Lal ke moul lasr, finne fwackyuck.
Alma el luti lah kuht enenuh in sramsram nuh sin Leum ke orekma lasr kwewa, ac El ac kol kuht wo. Ke kuht mutullac ke fong, kuht enenuh in mutullac nuh sin Leum, El in muh karihngihn kuht in mutul lasr. Ke kuht tuhkahkwack ke lututacng, kuht enenuh in lwelah insiyacsr in sesseslah ke kuloh nuh sin God. Kuht fin oruh ma inge, kuht ac sruhkyuckyak ke lwen sahflah (liye Alma 37:37).
In akacsruhi nuhnak, puhla, ac kena lasr nuh sin God ke pruhe pwacye ac ke insiyac uh enenuh in yohk srihpac ac fihsracsr nuh sesr kais sie oacna momong kuh mongo.
Lutlutkihn ma suhmuhslah lwen nuh kwewa uh ac ahkkweye pac luhlahlfongi lasr ac ohiyacsr. Oacna ke kuht enenuh mongo in sang kuh nuh in mahnosr, nguhnasr ac fah sifilpac nwacnwaclah ac ahkkweyeyucklac ke kuht lutlutkihn kahs luhn Kraist oacna oasr ke ma sihmlac sin mwet pahluh ah. Nephi el luti muh kuht enenuh in lutlutkihn kahs luhn Kraist, mweyen ma inge ac fahk nuh sesr ma nuh kwewa ma kuht enenuh in oruh uh (liye 2 Nephi 32:3).
Wo in riti ma suhmuhslah uh, tuhsruhk in riti muhkwena suhfal in liye nohfohn na loaliyacn mwe luti luhn Mwet Lahngo uh. In suk, motko, ac moulkihn kahs luhn Kraist oacna lutiyuck lun ma suhmuhslah uh ac use lahlmwetmwet ac etwacack ahluhkwelah kahlwem sukawihl lasr. Ma se inge ac ahkkweye insacnweacng lasr ac sang kuh luhn nguhn in oruh kuhiyacsr nohfohn ke ohiyac nuh kwewa.
Sie sin ip yohk ma yohk srihpac emet ma kuht kuh in oruh in ahkkweye moul lasr ac muhta fokoko na nuh ke pwelucng luhn Mwet Lahngo uh pa in moul fal in ipeis ke kuhfa luhn Leum ke kais sie wik. Akwuck ke kuhfa luhn Leum sang nuh sin mempucr nuh kwewa luhn Alu uh pacl wo in motko ke moul lal met, in nuhnkuh ke mukwikwi kuh ma elos tiacna mukwikwi ke ma ac sahp enenuh auliyak, na in ipeis ke flao ac kof oacna akucl muhtahl in esam mahno ac srah luhn Jisus Kraist, mwet loh se luhn Iwaclah Lal. Fin orek ke inse pwacye ac puhsisacl, kuht ahksasucye olweacng muhtahl, ahknwacsnwacsyeyucklac ac ahkmuhtahlyeyucklac, ac eis olwelah se muh Nguhn Lal ac oasr yohrohsr ac wi kuht, pacl nuh kwewa. Nguhn El oacna simacn se, sie kuhpahsr in kapsreni ma tiac ahkmuhtahl muhkwena tuhsruhk oacyacpac use ma nuh kwewa nuh in esam lasr ac sifil fahkwack luhlahlfongi kacl Jisus Kraist. Nwacsnwacs in ipeis ke kuhfa luhn Leum uh ahkkweye kuhpahsr lasr sifacna nuh ke yot in pwelucng, suc pa Jisus Kraist.
Ke orekma Lal Mwet Lahngo El luti ke luhngse ac kahlwem ke mwe luti, ip yohk, ac mukwikwi enenweyuck ma fah molwelah moul lasr ac ahkkweye ohiyacsr. Ke sahflahiyacn Mwe Luti Finohl ah, El fahk:
“Ohinge, kuhtwena mwet suc lohng kahs luhk inge ac ahkos, el oacna sie mwet lahlmwetmwet, suc muhsahi lohm sel fin yot kuh—
“Ac af uh kahklah, ac sronot uh tuhkuh, ac eng uh ukuk, ac arulacna upac nuh fin lohm sac; ac lohm sac tiac ikori, mweyen muhsahiyuck fin yot kuh.
“Ac kuhtwena mwet suc lohng kahs luhk inge ac tiac ahkos el fah oacna mwet lahlfon se, suc muhsahi lohm sel fin puhk uh—
“Ac af uh kahklah, ac sronot uh tuhkuh, ac eng uh ukuk, ac arulacna upac nuh fin lohm sac; ac lohm sac ikori, ac upac na pwacye ikori kac” (3 Nephi 14:24–27; liye pac Mattu 7:24–27)).
Tamuhlwel ac tahmtahel, wacngihn sesr suc ac muhsaheack lohm sesr, acn in orekma, kuh lohm alu muhtahl fin puhk, fihkar, kuh fin wacngihn plwacn kuh kuhfa fal. Lwelah kuht in ahokkuhnlah solsol luhn Mwet Lahngo in tuhkuh nuh yohrohl. Lwelah kuht in muhsaheack moul lasr fin sie pwelucng wo ac kuh.
Nga fahkwack luhlahlfongi ke puhsisacl lah ke kuht oruh moul lasr in akwucki fin Jisus Kraist ac Iwaclah Lal ac lihksreni ukwe plwacn Lal ke engan lasr uh, weacng pruhe lwen nuh kwewa, lutlutkihn ma suhmuhslah lwen nuh kwewa, ac ipeis kuhfa luhn Leum wik nuh kwewa, kuht ac ahkkweyeyucklac, kuht ac sifacna kapkapwack ac puhlakihn eklac na kawihl se, kuht ac ahkolah wo in lain ma upac ke moul uh, kuht ac puhlakihn pwacr ac engan ma uliyucklac, ac fah oasr puhlaik lasr lah moul lasr uh oreklac fin pwelucng kuh se—pwelucng se ma fah tiac puhtat. Ke ine muhtahl luhn Jisus Kraist, amen.