Kuht Ma Se Na
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Nga pruhe tuh acn nuh kwewa kuht oasr we ac orekma nuh kwewa lasr ke pristut luhn God, kuht ac fah tuhkweni nuh sie ke oruh se in use wosasuc nuh facluh nohfohn.
Leum El ahkkahlwemye wo ke na muhtwacwacyacn fihl in pacl se inge lah kuht in use wosasuc se nuh facluh nohfohn. Ma El fahk nuh sin mwet sruok pristut puh ke yac 1831 El fahk nuh sin mwet puhs mihsenge. Oacna sie matwac, kuhiyac, pahng luhn Alu, kuh acn muhta we, kuht ma se na pahngonyuck nuh ke orekma se in kahsrwel ke kosracni luhn nguhna uh ne ke El sifil tuhkuh. El fahk nuh selos mwet orekma met ke nien krep sac:
El sapkihn nuh selos mwet orekma emet ke nien grape sac elder, prist, titsucr nuh kwewa ac oacyacpac mwet mempucr in sramtweack kuh Lal ac orekma ke pahol in ahkolah ac ahkfalyelah ma El sapkihn.
El sapkihn lah mwet luti wosasuc lalos enenuh in oruh puhsrwen sulkackihn ke efahl ac puhsisacl nuh sin mwet nuh kwewa nuh ke mwet tuhlan la.
El sapkihn pac nuh selos in som liki inmahsrlon mwet koluk; ac in molweloslac sifacna, ac elos suc us tuhlihk nuhtin Leum enenuh in nwacsnwacs.1
Inge, kowos mwet ke Aaronic Pristut an kuh in liye lah sap luhn Leum wi kowosyang. Ke kowos etuh lah Leum El ahkolah pacl nuh kwewa inkacnek se in karihngihn masap Lal, kowos kuh in motko lah El ac oruh ma sac nuh suwos kais sie.
Lwelah nga fahk nuh suwos ohiyacn oruh Lal nuh sin sie tuhlihk mukul suc inge sruok ohfohs luhn prist ke Aaronic Pristut. El matwac yac (singucul ohnkohsr) 16. El muhta ke sie muhtuhn facl ma misineri ah tuhfahna fihli we ke tari ac. Elos srihsrngiyucki in som nuh ke siti luo, tuhsruhk tiac nuh ke siti se ma tuhlihk mukul sac muhta we ah.
Ke El fuhsr na pwacye ah, pahpah ninac kiyacl ah usacluh nuh Utah in karihngihnyuck. Sucu sac lutiyuck ac pacptaislac sin misineri. El tiac pacptaislac nuh ke Alu uh ke srihpen el soenna sun matwac yac alkosr.
Pahpah ninac kiyacl ah misac ke ongaiyac se. Oruh ninac mahtuh kiyacl ah suhpwacllah nuh yen sel ah, kosraclah inkof meoa, fohlohk nuh ke siti se ma el isuslac we ah.
El tuh fahsr ke inkacnek soko ke Mahs ke na yac somlah ah ke el puhla lah el enenuh in sramsram nuh sin muhtwacn se el tiac etuh. El sramsram nuh sel ke kahs English el srackna esam ah. El nuhrs se suhpweyucklac sin misin prestuhn nuh ke siti se lal ah in sukok lohm ac kahsruh luhn ono nuh sin misineri ma fah srihsrngiyucki nuh we pacl na sa. Elos kawuckyak ke elos sramsram ah. Ke el fohlohk nuh ke ohfohs luhlahp luhn misin ah, el fahkwacl nuh sin misineri ah.
Elder luo emet ah fihli ke Septempuh ke yac 2012. Tuhlihk mukul wacngihn sucu la sac pa oruh pacptais se emet lalos ah nuh ke Alu luhn Jisus Kraist luhn Mwet Luhlahlfongi ke Lwen-sahflah. Ke Mahs ke yac inge el mempucr se ke mahlwem ahkosr. El akmuhsralah nuh ke prist ke Aaronic Pristut ac oacyacpac kuh in pacptaisi mwet ahkluo nuh ke Alu uh. El pa pristut payonir se emet in orwacni tuhlihk srihsrihk sahyac nuhtin Pahpah Lucng weluhlwacng in akiyac Alu uh ke siti se ma oasr mwet 130,000.
Ke Sacnri ke lwen in Istuh, Mahs 31, 2013, pihsen mempucr ke Alu uh we ah kapwack nuh ke mempucr ohnkohsr ke siti sac. El pa mwet sefanna fin acn sac ma wi miting sac ke Sacnri sac. Intel muhsahllah ke lwen met ah, tuhsruhk el moniyuck in oasr we. El pruhe tuh elan kuh in fahsr som nuh ke alu ah. El akacsruhi ke kuhfa luhn Leum sac yurin elder fuhsr ahkosr ac misineri siacnyacn se.
Sramsram soko tiac atacn usrnguck ne ke kowos akihlen ke pactuhn in poun God ke muhsahi tohkohsrahi Lal. Nga liye kac ke pacl pucspucs.
Nga liyacack fin acn New Mexico ke nga mukul fuhsr se ah. Ke we puhs mwet pahluh fahk tari nuh sesr lah kuht enenuh in kahsruh misineri uh suk ac luti inse pwacye uh ac luhngse elos ma tuhkuh nuh in tohkohsrahi.
Nga sifacna liyacack ma mwet kol luhn pristut ac mempucr luhlahlfongi uh kuh in oruh uh. Ke yac 1955 nga orwaclah mwet wal se ke Air Force United States. Pisap luhk ke acn sihk ac use mwe insewowo se met likina nga som nuh ke kunohkohn se emet luhk ah, suc ma Albuquerque, New Mexico.
Ke mwe insewowo se lal ah el fahk lah pacl luhk ke air force kuh in oruh kuhlwacnsap luhn misin luhk. Nga fihli ke alu se ke Sacnri se emet ke Pracns Se Emet fin acn Albuquerque. Mukul se fahsryak nuh yuruk, ahkuhtwelyac nuh sihk lah el pa prestuhn luhn tistrik uh, ac fahk nuh sihk lah el ac pahngonyuc in kuhlwacnsap oacna sie misineri luhn stek.
Nga fahk nuh sel lah nga fahsr in ahkpah muhkwena nuh ke wik ekahsr na nga ac pakpucki nuh yen sahyac fin facluh. El fahk, “Nga tiac etuh kac, tuhsruhk kuht ac oruh in pahngon kom in kuhlwacnsap.” Ke infulwacn lutlut luhk ke military, ma se tuh luhman tiac yohk, nga suleyucklac sin mwet foko luhn officer in lutiyuck in eis orekma luhn mwet kol se ke ohfohs luhlahp ah ma tuh sana misac.
Na, key yac luo nga muhta we ah, nga orekma ke kunohkohn luhk. Ke inkaiyacn ekuh uh ac kapihn wik nuh kwewa, nga luti wosasuc luhn Jisus Kraist nuh sin mwet ma mempucr ah use nuh sesr.
Nga ac mukul se ma wiyuc ah orwaclah puhs liki ao 40 ke mahlwem se ke kuhlwacnsap luhn misineri lal in tiac tongtong in suk sie mwet in luti. Mempucr ah oruh kuht arulacna kahfofo lah kuht kwacna luti sucu luo ke sie ekuh. Nga sifacna liyacack kuh ac mwe insewowo ke pahng kalweniyuck sin mwet pahluh nuh sin mempucr nuh kwewa in oruh sie misineri.
Ke Sacnri sahflah se met liki nga som liki acn Albuquerque, stek se emet akwucki ke siti sacn. Inge oasr tempuhl muhtahl se we, lohm sin Leum, ke siti se ma kuht tuh sie pacl ah ohsun lun sie lohm in alu yurin Mwet Luhlahlfongi suc use kawuck nuh sesr in lutiyuck ac in puhla mwe loh luhn Nguhn. Elos puhla pwacngohk wowo nuh ke Alu pwacye luhn Leum.
Nga liyacack tohkoh fin acn New England ke nga som lutlut ah. Nga pahngonyuck in oruh mwet in kahsruh nuh sin prestuhn luhn tistrik wowo se suc tuh sie pacl ah tiac pwacrkihn Alu uh tuhsruhk el orwaclah mukul yohk kuh la ke ip luhn nguhn. Mwet in luti ke sucu se lal ah luhngse el fal in tiac lohacng nuh ke sismohk paip lal ac liye ma God lac liye kacl. Nga ac prestuhn luhn tistrik yucyak puhtati nuh ke acn ah in muhtwacta nuh ke pracns srihsrihk ma tuh oasr Massachusetts ac Rhode Island in muhsahi ac ahkinsewowo tohkohsrahi luhn God.
Ke yac nga kuhlwacnsap wi mwet kol wowo sac, kuht liye mwet uh use kawuck nuh ke Alu uh ke mwe srihkasrak ac solsol lalos in lohng misineri uh. Nuh sihk kapwack luhn pracns ingoh luhman suhmuhi ac muhnahs. Tuhsruhk ke Sacnri nga puhla, ke yac limekohsr tohkoh, Mwet Sap luo tuhkuh in akiyac tistrik lasr ah nuh ke stek se ke lohm in alu Longfellow Park fin acn Cambridge.
Yac puhs tohkoh nga fohlohk in kol toeni se luhn stek we. Prestuhn luhn stek usyuc in liye ohl yotyot se fin acn Belmont. El fahk nuh sihk lah ac oruh sie acn wowo nuh ke tempuhl luhn God. Tempuhl se oasr we mihsenge. Ke nga liye ah, nga esamwack mempucr puhsisacl nga wi muhta ke pracns srihsrihk ah, mwet tuhlan elos solwacma ah, ac misineri ma lotwelos ah.
Oasr tikin sasuc se ke miting se inge oyekuh uh. Nga weluhl ke Sacnri in Istuh sacpacna ma prist sac, suc nga tuhfahna sruhmuhn kac ah, fahsr nuh ke miting luhn mempucr sefanna lal ah. Tikin se ma isracsr in engan ke pahpah se tuhmwacl ah fahk lah el ac weluhl ke miting luhn pristut se inge oyekuh. Pahpah tuhmwacl ah misineri na wowo se ke misin sacpacna ma pahpah mahtuh tuhmwacl ac tuh prestuhn ah. Nga liye tari Missionary Handbook se ke yac 1937 luhn pahpah mahtuh tuhmwacn pahpah mahtuh tuhmwacl ah. Sucu lal ah use mwet pucspucs nuh ke Alu uh.
Nga sramsram nuh sin pisap se luhn tikin sac in etuh lah puhla fuhkah el motko in ahkfalye kunohkohn luhn pristut in orekma in orwacni nguhna nuh sin Leum. Pisap el engan uh ke el ahkuhtweyac ohiyacn mwet kol ke misin luhn ward ukwe kapkapwack luhn mwet lohlngohk uh. El eis mwe etuh ingacn ke ohsun nuh yurin misineri an ke pacl nuh kwewa.
Pisap ac kaunsucl luhn ward sramsramkihn kapkapwack luhn mwet lohlngohk nuh kwewa. Elos sulaclah ma elos kuh in oruh nuh sin kais sie mwet ac sucu lalos in kahsrwelos in kawuckyak met liki pacptaislac, in sang elos in wi mukwikwi uh, ac in tuhfwacloslac suc pacptaislac. El fahk nuh sin misineri uh kuhtuh pacl uh oasr suhnuhn mwet elos ac sun in luti lah misineri uh fahsrwelihk ac som nuh ke ohsun yurin mwet, orekmakihn mwet sruok Aaronic pristut oacna companion uh.
Finsrak luhn u luhn pristut ke ward, suc nuh sin mwet ke u uh in suli mwet elos etuh in ohsun nuh yurin misineri uh. Finne prestuhnsi ke u luhn tikin uh suliyuck in akiyac finsrak ac plwacn nuh sin mwet ke u lalos in kahsruh use mwet elos etuh nuh ke tohkohsrahi luhn God.
Inge, tikin ke ward fokoko ac prist ke u sasuc ac srihsrihk uh kuh in luhman oasr kuhtuh srihk ma elos oacna sie kac nuh sin kais sie kuh nuh suwos. Ac kowos sahp tiac liye yohk oacna sie ke puhla lowos an ke muhsahiyacn Alu uh ke ma sikyak ma nga nuhnkuh muh ma usrnguck fin acn New Mexico ac fin acn New England.
Tuhsruhk oasr inkacnek se suc ma kuht ma se na kac ke kunohkohn lasr ke pristut. Kuht ahkfuhlwactye kuht sifacna ac ahkfalye ma kunacsr kais sie nuh ke masap in eis wosasuc nuh sin tuhlihk nuh kwewa nuhtin Pahpah tuhmasr Inkuhsrao.
Kuht nuh kwewa oasr kain puhla se ke inkacnek suc ma Leum El muhsahi tohkohsrahi Lal fin facluh. Ke Alu Lal uh, ke kuhfwen orekma wowo nuh kwewa ac u ma utuckuh nuh sesr uh, srackna oasr muhtwacwacyacn ma pwacye lutiyuck sin mwet pahluh ke ohiyac kuht in ahkfalye kunohkohn luhn pristut lasr in oruh orekma luhn misineri.
Ke toeni luhlahp in Eprel ke yac (sie yuc foko luhmngaul yuc) 1959, Prestuhn David O. McKay el luti ip yohk se inge, oacna ke mwet pahluh ke pacl lal, weluhlwacng Prestuhn Thomas S. Monson. Prestuhn McKay el sruhmuhn sramsram soko ke sahflahiyacn sramsram lal lah ke yac 1923 ke misin fin acn British, oasr sie ahkuhtweyac luhlahp suhpweyuckwelihk nuh sin mempucr luhn Alu uh. Prestuhn McKay el fahk lah sulaclah sac pa: Sang kunohkohn nuh sin mempucr nuh kwewa ke Alu uh lah ke yac fahsruh uh yac 1923 mempucr nuh kwewa ac fah oruh misineri. Mempucr nuh kwewa misineri! Kowos kuh in use ninac kiyowos nuh in Alu uh, kuh ac kuh in pahpah tomowos an; sap ac kuh in mwet wi kowos orekma ke acn in orekma an. Mwet se ac fah lohng pweng wo ke ma pwacye uh suwos.”
Ac Prestuhn McKay el tahfwelah: “Ac pa pweng mihsenge uh. Mempucr nuh kwewa—miliacn se tahfuh—misineri se!”2
Ke sulkackihnyuck ke yac 2002 orekma se luhn misineri ah kuh in oruh kunohkohn luhn pisap uh, nga motko lah ac ahkfalyeyucklac fuhkah. Kahlwem nuh sihk lah luhpan orekma pisap uh enenuh in karihngihn mempucr uh ac kol u luhn ward uh apkuhran in yohk liki na orekma elos kuh in orwaclah.
Sie pisap nga etuh liye lah oruh se tiac sie orekma se ma weacng tuhsruhktuh pacl wowo se in orwacni ward se nuh sie in oruh wo se ma mempucr nuh kwewa orwaclah misineri se. El pahngon mwet kol se luhn misin. El ohsun nuh sin misineri ke Sactte nuh kwewa in etuh ke orekma lalos ac in ahkkweyaclos. Kaunsucl luhn ward sokwack inkacnek luhn u uh ac u luhn pristut in orekmakihn etuh luhn kuhlwacnsap in kahsruh ahkolah mempucr in oruh misineri. Ac oacna mwet nuhnuhnkuh luhn Israel, el kahsruh mwet fuhsr in puhla mwe insewowo ke Iwaclah in karihngihn in nwacsnwacs ac wo.
Pacl na tari ah nga siyuck lah el ahkuhtweyac fuhkah pihsrpihsriyacn puhseni ke pihsen mwet pacptaislac ke ward lal ah ac puhseni luhn mwet fuhsr ahkolah ac oasrasr in eis wosasuc luhn Jisus Kraist nuh facluh. El fahk lah nuh sel puhseni sac tiac tuhkuh ke yohkiyacn oruh se lalos, tuhsruhk ohiyac se ma elos ma se lac ke pwacriyaclos in use mwet nuh ke siti srihsrihk luhn Mwet Luhlahlfongi ma use nuh selos kain engan se.
Nuh sin kuhtuh mwet uh, puhseni se tuhkuh ke sie ma weacng pwacrkihn. Oacna wen nahtuhl Mosiah, elos puhla usrwen ma koluk ke moul lalos sifacna ac onwelah usrnguck ke Iwaclah ke Alu luhn God. Ke srihpen luhngse ac kulohkihn ke mwe sang luhn Mwet Lahngo, elos luhngse kahsruh mwet nuh kwewa elos kuh in kahsruh in kahingkuhnlah mwe ahsor luhn ma koluk, puhla engan luhn nuhnak muhnahs, ac orwacni nuh selos in moullac ke tohkohsrahi luhn God.
Pa luhngse luhn God ac luhngse nuh sin kawuck ac mwet tuhlan lalos ma orwacltahlweni nuh sie in kuhlwacnsapuh mwet uh. Elos kena in eis wosasuc nuh sin mwet nuh kwewa ke ip lalos ke facluh. Ac elos ahkolah tuhlihk nahtuhlos in nwacsnwacs in pahngonyuck sin Leum in luti, in fahkwack, ac in kuhlwacnsap ke ip sahyac ke nien grape Lal.
Finne ke ward luhlahp ma tikin sasuc se fah oruh ma kunacl in akacsruhi ke wosasuc ac muhsahi tohkohsrahi kuh ke u srihsrihk loessuhlah ma sie prist sasuc kuhlwacnsap we, elos ac fah ma se na ke srihpac se. Tikin se ac fah mokleyuck ke luhngse luhn God in saplakyang nuh sin kawuck ma soenna mempucrlac. El ac fah sang kawuck lal in wi ke kuhtuh kuhlwacnsap kuh mukwikwi ke Alu uh ac solwacl ac sucu lal an in lutiyuck sin misineri uh. Mwet ma pacptaislac uh fah enenuh kawuck, ac el ac fah kawuck nuh selos.
Prist se ac fah suli mwet sahyac uh in weluhl ke u srihsrihk luhn Mwet Luhlahlfongi uh ma el puhlakihn luhngse luhn God ac mihslac ahkinsewowoyuck ke Iwaclah sac.
El fin tahfwelah ke luhlahlfongi kuh ke ma kunen pristut lal an, el ac fah liye u se in orwaclah sie pracns, ac sie lwen stek luhn Saion tuhfah akwucki ke siti lal. Ac fah oasr ward se ma pisap oaru se kac. Ac kuh in sie sin tuhlihk mukul nahtuhl kuh nuhtin nahtuhl ma fah sie lwen eis mwet kuhlwacnsap luhn God nuh ke ohl fototoyang ac fahk, “Ac pa inge acn wolacna se luhn tempuhl uh.”
Nga pruhe tuh acn nuh kwewa kuht oasr we ac orekma nuh kwewa lasr ke pristut luhn God, kuht ac fah tuhkweni nuh sie ke oruh se in use wosasuc nuh facluh nohfohn ac lah kuht ac fah ahkkweye mwet kuht luhngse in nwacsnwacslah liki ma koluk ac in engan wi kuht ke tohkohsrahi luhn God. Ke inen Jisus Kraist, suc la Alu se inge, amen.