Ereyɛ Oguanhwɛfo
Mowɔ enyidado dɛ hɔn a esom hɔn no bohu wo dɛ nyɛnko na oehu dɛ, ɔwo dze, wɔwɔ nkonyimdzifo, na nkɔmbɔdzifo.
Ɔnnkyɛree na Primary abofra bi a mihyiaa no wɔ Chile maa meyerɛw m’ano. Ɔkãa dɛ, “Hello,’’ wɔfrɛ me David. Ana ibɛkã moho asɛm wɔ wiadze mfɛndzanan ehyiadzi yi mu a?’’
Maataa dzinn, adwendween David ne nkyia a enyi nndaho no ho. Hɛn nyina yɛpɛ dɛ wohu hɛn. Yɛpɛ dɛ hɛn ho hia, wɔkaa hɛn, na wɔdɔ hɛn.
Enuanom, hom mu kor biara no ho hia. Mpo sɛ wɔannkã woho asɛm wɔ wiadze mfɛndzanan ehyiadzi mu a, Agyenkwa no nyim wo na ɔdɔ wo. Sɛ ɔyɛ wo ahobow dɛ sɛ ɔyɛ nokwar a, ohia ara dɛ ibɔdwendwen ho dɛ “Oekrukye [wo] wɔ [Ne] nsayamu.’’1
Yenyim dɛ Agyenkwa no dɔ hɛn no, afei yebotum adwendwen dɛ, yebesi botum akyerɛ hɛn dɔ papa dze ama No?
Agyenkwa no bisaa Peter dɛ, “Ana edɔ me … ?”
Peter yii ano dɛ, “Nyew, Ewuradze, woara inyim dɛ modɔ wo. Ɔsee no dɛ, Nyɛn mo nguambaa.’’
Ber a wobisaa asɛmbisa yi “Ana edɔ me a ?’’ ne mprenu na ne mprɛnsa no Ɔyɛɛ Peter, awerɛhow dɛ oebisa no bio no, sii no dɔ pi: “Ewuradze, woara inyim adze nyina; inyim dɛ modɔ wo. Jesus see no dɛ, Nyɛn mo nguan.”2
Ana nna Peter nndaa noho edzi dada dɛ ɔyɛ Christ n’edzi ekyirnyi dɔfo a? Hɔn ehyiadzi a odzi kan wɔ mpoano no, nna “ntsɛmara’’ ɔdaan asawu no gyae na obedzii Agyenkwa n’ekyir.3 Peter bɛyɛɛ nyimpa enufo nokwarfo. Ɔkaa Agyenkwa no ho wɔ Nankasa no som ber mu na ɔboae kyerɛkyerɛ binom Jesus Christ n’asɛmpa no.
Afei dze nna Ewuradze a ɔasoɛr efi owu mu no nyim dɛ Ɔnnkɔwɔ Peter ne nkyɛn bio, a ɔkyerɛɛ no mbrɛ ɔwɔ dɛ osi som na mber a ɔwɔ dɛ ɔsom. Sɛ Agyenkwa no nnyi hɔ a, Peter behia dɛ ɔhwehwɛ Sunsum n’akwankyerɛ, ɔnoara gye nyikyerɛ, na afei onya akokodur na gyedzi dzi dwuma. Agyenkwa no tsim No nguan do no, Ɔpɛɛ dɛ Peter yɛ dza nkyɛ Ɔno wɔ hɔ a Ɔbɛyɛ. Ɔsee Peter dɛ ɔnyɛ oguanhwɛfo.
Ebɔbira a abɛsen no, President Russell M. Nelson too nsa a ɔtse dɛmara frɛɛ hɛn dɛ yɛnyɛn Egya no nguan wɔ kwan a ɔkrɔn yie mu na yendua ɔsomdwuma mu nyɛ.4
Yɛbɛgye ɔfrɛ yi do emudzi mu no, otwar dɛ yenya oguanhwɛfo n’akoma na yɛtse Ewuradze no nguan no hɔn ehiadze ase. Ntsi no yebesi dɛn bɛyɛ nguanhwɛfo a Ewuradze hia dɛ yɛbɛyɛ no?
Dɛ ma nsɛmbisa nyina tse no, yebotum ahwɛ hɛn Agyenkwa, Jesus Christ—Oguanhwɛfo Pa no. Nna wonyim Agyenkwa no nguan no na wonyim hɔn dodow, wɔweɔɔn hɔn, na wɔboaa hɔn ano kaa Nyankopɔn no kuw no ho.
Wonyim hɔn na wonyim hɔn Dodow
Ber a yɛper dɛ yebedzi Agyenkwa no ne fasusu do no, otwar dɛ, odzi kan yehu No nguan no na hɔn dodow. Wɔama hɛn ankorankor na ebusua ebusua tsitsir dɛ yɛnhwɛ hɔn ntsi no yenyim pefee dɛ wɔakan Ewuradze no nguankuw no nyina a kor nnka ekyir. Naaso, dodow, mfa nkanee ho ara, dza ɔfa ho nye dɛ erohwɛ no pefee dɛ nyimpa kor biara tse Agyenkwa no dɔ nkã a ɔnam obi a ɔsom ma No no do. Dɛm kwan mu no, obiara botum ehu dɛ Egya dɔfo a ɔwɔ Sor nyim no.
Ɔnnkyɛree na mihyiaa akataasia bi a wɔdze akyerɛɛbaa bi a ne mfe bor ne dze bɛyɛ mbɔho enum maa no dɛ ɔnsom no Wɔbɔmu no, nna hɔn beenu no enyi gye ndwom ho. Sɛ akataasiaba yi kɛsera no a, wɔbɔmu tow ndwom na wodzi mpepaenum. Nna wɔreyɛ anyɛnkoyɛ a ohyira hɔn beenu abrabɔ.
Mowɔ enyidado dɛ hɔn a esom hɔn no bohu wo dɛ nyɛnko na oehu dɛ, ɔwo dze, wɔwɔ nkonyimdzifo, na nkɔmbɔdzifo—obi a onyim hɔn gyinabew, na ɔgye hɔn abamba wɔ hɔn enyidado na hɔn enyidar mu.
Ɔnnkyɛree na menye menyɛnko nyaa dwumadzi bi dɛ yɛnkɔsom akyerɛbaa bi a yennyim no papa. Ber a menye me mfe 16, Jess ɔsomdwumadzi nyɛnko, faa apam no, nyansa mu ara osusuu dɛ, “Ohia dɛ yebohu no.’’
Ntsɛmara yɛdwen ho dɛ selfie na text a yɛdze bɛda hɛnho edzi beye. Mosuoo fon no mu, na Jess miaa bɔtɔm no do dze twaa mfonyin no. Nna hɛn ɔsomdwumadzi kwan a odzi kan yɛ anyɛnkofa edwuma.
Hɛn sera a odzi kan no, yebisaa hɛn akyerɛbaa no sɛ biribi wɔ hɔ a yebotum dze aka hɛn mpaabɔ ho ama no a. Ɔkãa nankasa n’akoma mu tafɛrbanyinmbɔmu bi ho asɛm na ɔkãa dɛ ntsi no n’enyi bɛgye hɛn mpaabɔ no ho. No nokwardzi na awerɛhyɛmu dze ɔdɔ baa hɛn ntamu hɔara. Ebɛn adom dɛɛdɛw na ɔyɛ dɛ yɛkaa no wɔ hɛn daadaa mpaabɔ mu.
Ber a ibɔ mpaa no, ibɛtse Jesus Christ no dɔ ma hɔn a esom hɔn no. Nye hɔn nkyɛ dɛm ɔdɔ no. Ebɛn kwan papa na ɔwɔ hɔ dɛ ibɛnyɛn No nguan no kyɛn dɛ ibɔboa hɔn ma wɔatse No dɔ nkã—a ɔnam wo do?
Wɔweɔn Hɔn
Kwan a otsĩa ebian a ibotum dze enya oguanhwɛfo n’akoma nye dɛ ibɔweɔn No nguan. Dɛ yɛyɛ Jesus Christ N’asɔr a ɔwɔ hɔ Nda a Odzi Ekyir Ahotseweefo mba no, yɛyɛ adze esiado esiado, yetum tu, yɛhyehyɛ, yesiesie, na yɛsan si biribiara. Yɛyɛ ntsɛm dɛ yɛdze hɛn nsa anaa borɔtow prɛtse mã bɔhwɛ ehiadze bi. Naaso ana beberee wɔ hɔ?
Ana hɛn nguan no nyim dɛ yɛdze ɔdɔ roweɔn hɔn na yebedzi dwuma dze aboa hɔn a?
Matthew tsir 25 mu no yɛkenkan dɛ:
“Hom mbra, hom a m’Egya ehyira hom, hom mbɛfa ahenman a woesiesiei maa hom … :
“Osiandɛ ɔkɔm dzee me, na hom maa me edziban: Nsukɔm dzee me, na hom maa me anondze: Meyɛɛ hɔho, na hom faa me kɔr fie: …
Ɔno na nyimpa tsenenee no bobua ase no dɛ, Ewuradze, dabɛn na yehun wo dɛ ɔkɔm dze wo, na yɛmaa wo edziban, anaa nsukɔm dze wo, na yɛmaa wo anondze?
“Dabɛn na yehun wo dɛ eyɛ hɔho na yɛfaa wo kɔr fie?’’5
Enuanom, kasafua tsitsir no nye yehun. Ɔtseneneenyi no hun hɔn a wohia osiandɛ nna wɔroweɔn na wɔrohwɛ. Hɛn so yebotum ayɛ ɔweɔnfo enyiwa dze aboa na yɛakyekye werɛ, dze akamfo na mpo yeehu hɔn ndaamba. Ber a yedzi dwuma no, yebenya anohoba a ɔwɔ Matthew ho awerɛhyɛmu dɛ: “Susuampa dɛ hom ayɛ ama mo nuamom nketseaba yi mu kor no … , hom ayɛ ama me.’’6
Nyɛnko bi—yɛbɛfrɛ no John—kãa dza obotum esi sɛ yehu obi n’ehiadze a ɔnnda edzi ho asɛm: “Akyerɛbaa bi a ɔwɔ mo ward yɛɛ dɛ oboku no ho. Bosoom ebien ekyir no, mohunii dɛ mo quorumnyi biara mbɛn no kun no nye no ndzii ayamuhyehye asɛm yi ho nkɔmbɔ. Awerɛhow muara, nna mo so minndzii ho dwuma. Ewiei no, menye kun no puei kedzidzii. Nna ɔyɛ banyin a ɔfɛr adze, ɔnntaa mpɛ noho asɛm. Naaso ber a mekãa dɛ, ‘Nna wo yer pɛ dɛ oku no ho no. Ɔno bɔbor wo do. Ibɛpɛ dɛ ikã ho asɛm a?’ osuii. Mber tsiabaa no yedzii kokoa na akoma mu nkɔmbɔ na yenyaa nkitahodzi nwanwa.’’
John dze kaa ho dɛ, “modwen ho dɛ hɛn suban nye dɛ yɛyɛ adze a oye ma obi kyɛn dɛ yɛdze nokwar na ɔdɔ bɔhwɛ gyinabew no.’’7
Ebia hɛn nguan no epira, ayew, anaa mpo ɔdze enyidaho aman; dɛ hɔn nguanhwɛfo no, yebotum aka hɔn a wodzi kan hu hɔn ehiadze no ho. Yebotum etsie na yɛadɔ hɔn a yennkobua atsɛn na yɛdze Sunsum Krɔnkrɔn no nhumu akwankyerɛ ama hɔn enyidado na mboa.
Enuanom, osian nkenyan ayamuyie nyɛe nketsenketse a hom yɛ no ntsi, enyidado na dɛwdzi wɔ wiadze. Ber a wɔhwehwɛ Ewuradze n’akwankyerɛ wɔ mbrɛ wobesi akyerɛ No dɔ na woehu hɔn a wɔsom hɔn hɔn ehiaze no, hɛn enyiwa bobuei. Wo ɔsom edwuma krɔnkrɔn no ma wo nkenyan krɔnkrɔn ho kwan. Ibotum dze awerɛhyɛmu ahwehwɛ dɛm nkenyan no.
Wɔboa hɔn ano ka Nyankopɔn no Kuw ho.
Otsĩa ebiasa, yɛpɛ dɛ yɛboa hɛn nguan ano ka Nyankopɔn no nguankuw ho. Yɛbɛyɛ a, otwar dɛ yɛhwɛ bea a oedu wɔ ahyɛmu anamɔn kwan no do na yenya pɛ dɛ yɛnye hɔn bɛnantsew wɔ hɔn gyedzi akwantu no do. Hɛn dze yɛ adom krɔnkrɔn dɛ yebohu hɔn akoma mu na yɛakyerɛ hɔn wɔ hɔn Agyenkwa no hɔ.
Nna ɔyɛ dzen ma Akyerɛbaa Josivini a ɔwɔ Fiji dɛ obohu n’enyim kan wɔ anamɔn kwan no do— Ne nyɛnko hunii dɛ nna Josivini per dɛ obohu kyerɛwsɛm no yie ama ɔakenkan. Ɔmaa Josivini ahwehwɛenyiwa fofor a wɔdze kenkan na akyerɛw dua akokɔangoa a ɔdze bɛkeka Jesus Christ ne dzin biara a wɔbɔbɔ no wɔ Mormon Nwoma mu no. Dza ɔhyɛɛ ase dze pɛ a ɔnnyɛ dzen dɛ ɔbɔsom na ɔaboa no kyerɛwsɛm nsũae no nsunsuando maa Josivini kɔɔr ne tepmple a odzi kan wɔ ne enumaa ne mfe 28 ekyir.
Sɛ hɛn nguan hɔnho yɛ dzen anaa wɔyɛ mberɛw, woridzi dɛw anaa wɔwɔ atseetsee mu o, yebotum ahwɛ no pefee dɛ obiara no nko nnantsew. Yebotum adɔ hɔn a hɔn sunsum mu gyinabew mmfa ho na yɛaboa hɔn na yɛahyɛ hɔn nkuran ma ɔakɔ kan. Ber a yɛbɔ mpaa na yɛhwehwɛ tse hɔn akoma ase no, megye dase dɛ Ɔsor Egya bɛkyerɛ hɛn kwan na No Sunsum nye hɛn bɔkɔ. Yɛwɔ kwan dɛ yɛyɛ “abɔfo a woetwa ehyia’’ hɔnho ber a Odzi hɔn enyim.8
Ewuradze frɛ hɛn dɛ yɛnyɛn No nguan, na yɛhwɛ No kuw no dɛ mbrɛ Ɔno bɛyɛ. Ɔfrɛ hɛn dɛ yɛnyɛ nguanhwɛfo mma man biara na ɔman biara. (Na nyew, Elder Uchtdorf, yɛdɔ na yɛpɛ German nguanhwɛfo.) Na Ɔpɛ dɛ Ne mbabun bɛka edwuma no ho.
Hɛn mbabun botum ayɛ nguanhwɛfo a wɔyɛ dzen papaapa no mu bi. Wɔka ho, dɛ mbrɛ President Russell M. Nelson kãe no, “apapafo no a Ewuradze dze hɔn aba wiadze yi mu da no ho.’’ Wɔyɛ “esunsum enyimnyamfo,’’ hɛn “agordzifo apapa’’ a wodzi Agyenkwa n’ekyir.9 Ana hom botum esusu tum a nguanhwɛfo a wɔtsetse dɛm dze bɛba ber a wɔhwɛ No nguan a? Yɛnye mbabun yinom robɔmu asom no, yehu anwanwadze.
Nkataasia na mberantsɛ, yehia hom! Sɛ hom nnyaa ɔsom dwumadzi a, hom nye hɔn Relief Society anaa elderfo quorum president ndzi nkɔmbɔ. Wobedzi dɛw wɔ hɔn pɛ mu dɛ wɔbɔhwɛ no pefee dɛ wonyim No nguan na wonyim hɔn dodow, wɔweɔn hɔn, na wɔboa hɔn ano kɔ Nyankopɔn ne ban no mu.
Sɛ da no ba dɛ yebobu ntwɛr wɔ hɛn Agyenkwa dɔfo n’ananadze, a yɛanyɛn No nguankuw a, Mobɔ mpaa dɛ yebotum eyi ano dɛ mbrɛ Peter yɛe no: “Nyew, Ewuradze; woara nyim dɛ modɔ wo.’’10 Iyinom, Wo nguan, wɔdɔ, hɔn, wɔwɔ ahotɔ, na wɔwɔ fie. Wɔ Jesus Christ ne dzin mu, amen.