Mbaa na Fie Asɛmpa no Nsũae
Agyenkwa no nye hom fasusu a odzi mu wɔ mbrɛ hom bedzi dwuma tsitsir wɔ N’anamɔn tu dɛ asɛmpa nsuae wɔ fie bedzi adɔntsen.
Me nkyerɛbaa adɔfo, ɔyɛ me enyigye dɛ menye hom ehyia mu. Iyi yɛ mber nwanwa wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no mu. Ewuradze ruhue nyimdzee egu N’Asɔr do dɛ ma Ɔbɔɔ ho anohoba dɛ ɔbɛyɛ no
Hom kaa dza Ɔkãa no: “Nsu a ɔrepem bɛda ho afon ekesi aber bɛn? Ebɛn tum na obotum esianka sor? Dɛ sɛ nyimpa botum atsen n’abasa a ɔyɛ mberɛw dze esianka Esutsen Missouri wɔ no kwan a ɔpem mu no, anaa wɔadan no ma wɔapem akɔ etsifi afamu mu mpo a, onnkotum esiw Otumfo kwan dɛ mma onnhue nyimdzee mmfi sor nngu Nda a Odzi Ekyir Ahotseweefo hɔn tsir do.”1
Sesei mbrɛ Ewuradze rekyɛ nyimdzee n’afã bi fa Oruhue onnyiewiei nokwar ɔhardo egu No nkorɔfo hɔn tsir na hɔn akoma mu no. Ɔama ɔada edzi pefee dɛ Ɔsor Egya Ne mbabaa na wobedzi akotsen wɔ dɛm ɔhardo ndzeyɛɛ nwanwa no ho. Dza odzi adanse wɔ anwanwadze yi ho nye Oregya No nkɔnhyɛnyi tseasefo ma oetsim akã asɛmpa nkyerɛkyerɛ wɔ fie no mu yie.
Hom botum ebisa dɛ, Osi dɛn na ɔma mbaa nokwafo yɛ tum a wodzi akotsen dze bɔboa Ewuradze ma Oehue nyimdzee egu N’ahotseweefo do?” Ewuradze ma No mbuae wɔ, “Ebusua no: Dawubɔ ma Wiadze no” mu. Hom kaa nsɛm no, na mbom hom botum enya ntseasee fofor na hom ehu dɛ Ewuradze dzii kan hun nsesã nwanwa yinom, a sesei ogu do reba yi. Dawurbɔ no mu no, Ɔmaa nkyerɛbaa asɛdze dɛ wɔnyɛ ebusua no n’akyerɛkyerɛfo tsitsir wɔ nsɛmfua yinom mu: Nãnom hɔn asodzi tsitsir ara nye dɛ wɔtsetse hɔn mba.”2 Asɛmpa no nokwar na nyimdzee kã ntsetsee no ho.
Dawurbɔ no kɔ do dɛ: Ɔyɛ egyanom na nãnom hɔn asɛdze dɛ wɔboa hɔn ho dɛ adamfo etsĩpɛmfo.3 Wɔyɛ etsĩpɛmfo, etsĩpɛn dɛ wobotum enya sunsum mu mpontu na nyimdzee, na dɛm ntsi wɔboa hɔn ho dze nya nkabɔmu. Wɔyɛ pɛr wɔ hɔn ndaamba krɔnkrɔn dɛ wɔbɔbɔ mu enya nkwagye ntowdo. Nokwar, mbanyin na mbaa nnkotum enya nkwagye ntowdo dɛ ankonam.
Dɛn ntsi, na, Nyame Ne babaa a ɔwɔ nkabɔmu na etsĩpɛn nkitahodzi mu onya asodzi tsitsir dɛ ɔmfa dza ohia papaapa a otwar dɛ obiara nya no, nokwar nyimdzee a ofi sor no, ntsetse? Dɛ mbrɛ mutum hu no, dɛm ayɛ Ewuradze N’akwan fitsi ber a wɔkyekyer ebusua ebusua wɔ wiadze yi mu no.
Mfatoho, ɔyɛ Eve na onyaa nyimdzee dɛ ɔsɛ dɛ Adam dzi nyimdzee dua n’aba no bi ama woesie Nyankopɔn Ne mbrasɛm nyina na wɔakyekyer ebusua. Minnyim saintsir a Eve dzii kan nyaa nyimdzee no, naaso Adam na Eve nyaa nkabɔmu a odzi mu ber a wohue no nyimdzee guu Adam do no.
Mfatoho kor so a Ewuradze dze mbaa hɔn ntsetsee akyɛdze horow no dze dzii dwuma nye kwan a Ɔfaa do dze hyɛɛ Helaman ne mbabanyin no dzen no. Sɛ mekenkaan kyerɛwsɛm no na mekaa mara me maame no nkuranhyɛ nsɛm bɔkɔɔ ber a mirifi fie rokɔ nsordaafo som no a, me men mu siw.
Helaman kyerɛɛw dɛ:
“Hɔn nãnom akyerɛkyerɛ hɔn dɛ sɛ wonya gyedzi a, Nyankopɔn bɛgye hɔn.
“Na wɔkaa nsɛm a hɔn nãnom kãa kyerɛɛ me no na wɔsee me dɛ: Yenngye kyim dɛ hɛn nãnom no nyim dɛm.”4
Minnyim Ewuradze ne siantsir nyina a Ɔdze ebusua hɔn ntsetsee ho asodzi tsitsir ama mbaa nokwafo dze, naaso megye dzi dɛ ɔnam dɛ wotum dɔ no kã ho. Ɔgye ɔdɔ kɛse ana etum enya obi n’ehiadze ho atsenkã akyɛn wɔankasa wo dze. Dɛm no nye Christ no dɔ mapã ma nyimpa a eretsetse no no. Dɛm ayamuyie atsenkã no a fi nyimpa a ɔasan mu eyi dɛ ɔbɛtsetse nkaafo a ɔafata Jesus Christ No Werdambɔ no nsunsuando no. Relief Society kasatɔw no, “Ayamuyie nntwa abrɔdo,” a mankasa me maame yɛɛ ho fasusu no, hyɛ me nkenyan.
Dɛ hom yɛ Nyame Ne mbabaa no, hom wɔ awoosu na tum kɛse dɛ hom tse binom hɔn ehiadze na hom dɔ. Dɛm no ma, hom yɛ har dɛ hom bɛtse Sunsum no No nwasaa. Nkyii Sunsum no botum ama hom kwankyerɛ wɔ dza hom bɔdwen, dza hom bɛse, nye dza hom bɛyɛ dze atsetse nkorɔfo ama Ewuradze ehue nyimdzee, nokwar na akokodur egu hɔn do.
Nkyerɛbaa a hom tse me ndze, hom mu kor biara wɔ hom abrabɔ akwantu mu gyinabew soronko bi. Binom yɛ mbasiamba ekumabaa a iyi nye ber a odzi kan a hom aba wiadze mfɛndzanan mbaa nhyiamu. Binom yɛ mbaa kumabaa a wɔreyɛ ahoboa abɛyɛ hɔn a wɔtsetse nkaafo dɛ ma Ewuradze pɛ dɛ hom yɛ no. Binom awar fofor a wonnyaa nnyaa mba; nkaafo no yɛ enãnom ekumbaa a hom kita ba kor anaa mboree. Binom yɛ mbasirmba enãnom na binom kita mba a wɔwɔ asɛmpakã mbewdo. Binom kita mba a wɔayɛ mberɛw wɔ gyedzi mu na wɔwɔ ekyirekyir. Binom tsena ankonam a wonnyi adamfo nokwafo. Binom yɛ nananom.
Naaso, mbrɛ w’ankorankor gyinabew tse biara no, ewɔ kyɛfa—kyɛfa tsitsir—wɔ Nyame N’ebusua mu na wankasa w’ebusua mu, sɛ ɔyɛ ndaamba, wiadze yi mu o, anaa sunsum wiadze mu. W’asodzi a ofi Nyame hɔ nye dɛ edze wo ɔdɔ na wo gyedzi wɔ Ewuradze Jesus Christ mu no bɛtsetse N’ebusua na w’ebusua mu mba dodowara a ibotum.
Dza ɔgye wo nsɛnhia no nye ibohu nyia ebɛtsetse no, mbrɛ ebɛtsetse, na ber no. Hom hia Ewuradze No mboa. Onyim nkaafo hɔn akoma, na Onyim ber a wɔayɛ krado dɛ wɔbɛgye ntsetsee. Hom gyedzi mpaabɔ bɛyɛ hom konyimdzi ne saafee. Hom botum atwer dɛ hom benya N’akwankyerɛ.
Ɔmaa nkuranhyɛ yi: “Hom mbisa Egya no wɔ me dzin mu, na hom ngye ndzi dɛ hom nsa bɛkã, na hom benya Sunsum Krɔnkrɔn no a ɔda ndzɛmba a no ho hia edzi.”5
Kyerɛwsɛm adzesũa enyiber do a ɔkã mpaabɔ ho no bɛyɛ tum a hom dze tsetse a orinyin no n’afã. Anohoba no nye yi: “Eso mma hom nndzi kan nndwendwen dza hom bɛkã ho; na mbom hom nkora nkwa nsɛm wɔ hom adwen mu aber nyina, na dɔn no nya sõ a, wɔdze obiara nedze bɛma no.”6
Ntsi hom bɛfa mber ara yie abɔ mpaa, dze adwendwen, na hom etsim wɔ sunsum mu ndzɛmba do. Hom benya ma wohue nokwar nyimdzee egu hom do na hom enyin wɔ tum a hom dze bɛtsetse hom ebusua mu nkaafo no.
Mber binom wɔ hɔ a hom bɛtse dɛ hom kankɔ wɔ mbrɛ hom besi atsetse yie ho adzesua no rokɔ nyaa. Obegya gyedzi dze etsim. Agyenkwa no maa wo nkuranhyɛ yi:
“Dɛm ntsi, mma hom mmberɛ wɔ papayɛ ho, osiandɛ hom rotow dwumadzi kɛse bi ne fapem. Na ndzɛmba nkakraba mu na dza ɔyɛ akɛse fi mu ba.
“Hwɛ, Ewuradze rohwehwɛ akoma nye adwen pa; na nyia ɔwɔ su pa na ɔyɛ setsie no, obedzi Zion asaase no do ndzepa wɔ nda a odzi ekyir yinom mu.”7
Hom wɔ ha anafua yi yɛ adanse dɛ hom wɔ pɛ dɛ hom bɛgye Ewuradze Ne nsato no dɛ hom ntsetse nkaafo ato mu. Iyi yɛ nokwar ma kumabaa koraa a ɔwɔ ha anafua yi. Hom botum ehu onyia a hom bɛtsetse no wɔ hom ebusua mu. Sɛ edze nokwar akoma bɔ mpaa a, dzin bi anaa enyim bi bɛba w’adwen mu. Sɛ ibɔ mpaa dɛ ibohu dza ibɛyɛ anaa ibɛkã a, ibɛtse mbuae no ne nkã. Ber biara a eyɛ setsie no, wo tum dɛ ebɛtsetse no benyin. Nna ereyɛ ahoboa ma da no a ebɛtsetse wankasa wo mba.
Mbasirmba hɔn nãnom botum abɔ mpaa dze ehu mbrɛ wobohu atsetse babanyin anaa babaa a ɔyɛ dɛ ma ntsetsee nntsɛ no. Hom botum abɔ mpaa dze etum ehu nyia ɔwɔ sunsum mu nhyɛdo a wo ba no hia na ɔbɛgye no ato mu. Nyankopɔn tsie na Obua nãnom a wɔrehaw hɔn akoma mu ntotɔserɛ mpaabɔ, na Ɔdze mboa soma.
Nana so a ɔwɔ ha anafua yi, botum enya tsipaa a ne mba na ne nanamba dze haw no. Hom botum enya akokodur na woenya akwankyerɛ efi kyerɛwsɛm mu ebusua ebusua hɔn suahu ho.
Fi Adam na Eve aber do, dze dua Egya Israel aber do, na wɔ Mormon Nwoma mu ebusua biara no, adzesua kor da edzi pefee a ɔfa dza ɔsɛ dɛ wɔyɛ mba a wɔnnyɛ aso hɔn ho awerɛhowdzi: yɛnkɔ do ndɔ hɔn.
Yenya Agyenkwa No no nkuranhyɛ fasusu ber a Ɔnyɛɛn No Ɔsor Egya No sunsum mu mba a wɔtseew etua no. Hɔn na hɛn ahyɛ no yaw mpo no, Agyenkwa ne nsa da ho ara tsen.8 Ɔkasaa wɔ 3 Nephi mu kyerɛɛ No sunsum mu enuanom na nkyerɛbaa, a Ɔbɔɔ mbɔdzen na Oenntum annyɛn hɔn: “O hom a … hom yɛ Jacob n’asefo, nyew, hom a hom yɛ Israel fifo, mpɛn ahen na maboaboa hom ano dɛ mbrɛ akokɔ baatan boaboa ne mba ano hyɛ n’atsaban ase, na manyɛn hom.”9
Nkyerɛbaa a hom wɔ abrabɔ akwantu gyinabew biara mu, ebusua gyinabew biara, na amambra biara mu no, Agyenkwa no nye hom fasusu a odzi mu wɔ mbrɛ hom bedzi dwuma tsitsir wɔ N’anamɔn tu dɛ asɛmpa nsuae wɔ fie na ebusua mu bedzi adɔntsen.
Hom dze ayamuyie atsenkã a ofi mu ba no bɛba nsesã ɔwɔ w’ebusua mu dwumadzi na ndzeyɛɛ mu. Dɛm no bɛma enyin kɛse wɔ sunsum mu. Sɛ enye w’ebusua bɔ mpaa a, ibenya ɔwo na Agyenkwa no dɔ atsenkã ama hɔn. Dɛm no bɔkɔ do abɛyɛ wo sunsum mu akyɛdze sɛ ihwehwɛ a Sɛ edze gyedzi kɛse bɔ mpaa a w’ebusua bɛtse sunsum no.
Ibedzi kan akenkan kyerɛwsɛm no na abɔ ho mpaa dze ayɛ ahoboa ansaana ebusua no boa ano abɔ mu akenkan kyerɛwsɛm no. Ibenya mber dze abɔ mpaa ama Sunsum no ekeyan w’adwen. Na sɛ odu wo do dɛ ebɛkenkan a, ebusua no bɛtse wo dɔ ma Nyankopɔn na N’asɛm no. Ɔno na No Sunsum bɛnyɛn hɔn.
Nhuei kor yi ara botum aba ebusua nhyiamu biara mu sɛ hom bɔ ho mpaa na hom yɛ ho nhyehyɛɛ a. Ɔbɛgye mbɔdzembɔ na mber, naaso ɔdze anwanwadze bɛba. Mekaa adzesuadze bi a me maame kyerɛkyerɛe ber a meyɛ kumabaa no. Meda ho tum hu Ɔsomafo Paul n’akwantu ho map horow a ɔkekaa mu no. Ɔyɛ me nwanwa mbrɛ onyaa mber na ahom dze yɛɛ dɛm. Na besi ndɛ no, no dɔ a ɔwɔ ma Ɔsomafo nokwafo no da ho hyira me.
Hom mu kor biara bohu kwan a hom dze bɛyɛ hom kyɛfa ma nokwar ehue egu hom ebusua ebusua a wɔwɔ Ewuradze N’Asɔr wɔdze asan ananmu aba no do. Hom mu kor biara bɔbɔ mpaa, esũa, na ɔadwendwen ho dze ehu dza hom ntoboa soronko no bɛyɛ. Mbom minyim iyi, hom mu kor biara, nye Nyame Ne mbambanyin rotwe kondua kor no, bɛyɛ fã kɛse wɔ asɛmpa nsũae na abrabɔ anwanwadze a ɔbɛma Israel mboano no no akɔ do ɔhar do na woesiesie Nyame N’ebusua ama Ewuradze Jesus Christ Ne mbae enyimnyam mu no. Wɔ Jesus Christ ne dzin krɔnkrɔn no mu, amen.