Ahowerɛ a Okenyan
Ahowerɛ a Okenyan botum ekenyan hɛn ma yɛdze gyedzi edzi dwuma, yeedzi Agyenkwa no ɔfrɛ do ayɛ papa, na ahobrɛadze mu ara yɛdze hɛn abrabɔ ama No.
Ber a nna mowɔ nhyɛase skuul no, nna yɛnantsew kwan a woegudo a ɔyɛ nkwankyema do dze kɔ enyim dze san ekyir foow wɔ koko bi ne nkyɛn. Nna kwan bi so wɔ hɔ a, wonngudo a, wɔfrɛ no “mbanyimba anamɔn kwan.’’ Nna mbanyimba anamɔn kwan no yɛ dɛtse anamɔn kwan a ɔfow koko no tsentsen do. Nna ɔyɛ etsia naaso ɔyɛ kronn koraa. Meyɛ basiaba kakraba no, nna mutum nantsew kwan biara a mbanyimba no tum nantsew do. Ma ohia dodow no, nna minyim dɛ metse nda a odzi ekyir mu na dɛm no mebehia dɛ meyɛ ndzɛmba a ɔyɛ dzen, dɛ mbrɛ edzikamfo yɛe no—na nna mepɛ dɛ meyɛ ahoboa. Ntsi no ɔtɔ ber bi a, meka ekyir wɔ m’anyɛnkofo no mu wɔ kwan a woegudo no do, miyiyi m’asopaatse, na medze m’anan to famu nantsew fow mbanyimba hɔn kwan no. Nna morobɔ mbɔdzen ma m’anantabon ayɛ dzen.
Nna meyɛ Primary basiaba no, modween dɛ nna ɔno nye dza mobotum ayɛ dze ayɛ ahoboa. Sesei dze minyim dɛ ɔnntse dɛm! Kyɛn dɛ medze m’anan bɔto famu afow bepɔw akwan no, minyim dɛ mobotum esiesie m’anantabon dze anantsew ahyɛmu anamɔn kwan no do ber a meretsie Sunsum Krɔnkrɔn no. Osiandɛ Ewuradze, nam No nkɔnhyɛnyi do refrɛ hɛn mu biara dɛ yɛmbɔ bra na yɛndwen wɔ “kwan a ɔkrɔn na ɔyɛ krɔnkrɔn koraa’’ mu na “yentu anamɔn a ɔkrɔn koraa.’’1
Nkɔnhyɛsɛm yinom gye nyɛe, a hɛn awosu nkã-tse kã ho dɛ yebotum ayɛ na yɛayɛ mbordo, ɔtɔfabi a yɛtse no wɔ hɛn mu dza Elder Neal A. Maxwell frɛɛ no “ahowerɛ a okenyan.’’2 Ahowerɛ a okenyan ba sɛ “yɛdze ma yɛtse sesei [dze] toto ma yɛwɔ tum dɛ yɛbɛba abɛyɛ ho a.”3 Sɛ yedzi nokwar a, hɛn mu kor biara, tse gyinabea na nyimpa a ban a yɛyɛ, nye gyinabea na nyimpa ban a yɛpɛ dɛ yɛbɛyɛ no nsonsonee. Yɛhwehwɛ dza yebotum ayɛ ara yie ankorankor. Yɛwɔ nkã-tse yinom osiandɛ yɛyɛ Nyame ne mbabaa na ne mbambanyin, a wɔdze Christ Ne Kan woo hɛn naaso yɛtse wiadze a ɔahwe ase mu. Nyankopɔn na ɔdze nkã-tse yinom mae na ɔma yɛpɛ ntsɛm no yɛ adze.
Ahowerɛ a okenyan ho nkãtse no a ɔgye hɛn kɔ kwan no, ɔwɔ dɛ yefua ekyir, na Satan n’ator nsɛdo—a ɔdwedwe nkuranhyɛ no yɛhyɛ no nsew na yekwetsir. Iyi yɛ kwan a ɔsom bo a Satan n’enyi ber dɛ obohuruw esi mu. Yebotum asan mu eyi dɛ yɛbɛnantsew anamɔn kwan no a ɔkrɔn a ogya hɛn ma yɛhwehwɛ Nyankopɔn na N’asomdwee na N’adom, anaa yebotum etsie Satan, a ɔdze abagura nsɛm hyɛ hɛn do dɛ yennkedzi konyim ara da: yennkenya sika a ɔbɔsõ, yennkenya adwen da hɔ, ahoɔfɛw nnkɛba, biribiara nnkɛyɛ yie. Hɛn bo a ɔnndwe no botum ayɛ krɔnkrɔn—anaa asɛɛ adze.
Yɛ Adze wɔ Gyedzi mu
Kwan kor a yɛbɛfa do dze bohu ahowerɛ a okenyan efi Satan n’ator nsɛdo ho nye dɛ ahowerɛ a okenyan no begya hɛn ma yɛayɛ edwuma pa. Ahowerɛ a okenyan no nnkyerɛ dɛ yɛnyɛ dza yenya ahomka wɔ ho nko, nna dɛ orinngya hɛn akɔ abagura mu. Meesua dɛ sɛ megyaa moho mu wɔ biribiara a mennsɛ, ho adwendwen mu a, monnkɔ kan, na ɔyɛ dzen mbordo koraa dɛ mebɛtse Sunsum ne nkã na meedzi do.4
Ɔyɛ aberantsɛba no Joseph Smith hun n’esintɔ yie ankasa na ɔhaaw wɔ “[ne] bɛkyebo ɔkra ne yieyɛ ho’’. Ne nsɛnkã mu no, “M’adwen tseetsee mo dodow, osiandɛ mo bɔn buu mo fɔ, na… metsee nkã dɛ minndzi mara mo bɔn na wiadze bɔn ho yaw.’’5 Iyi gyaa no “adwendwen dzendzen na ɔhaw kɛse.’’6 Ana ɔnye wodze sɛ a? Ana w’esintɔ rehaw wo anaa ɔretseetsee wo a?
Oye, Joseph yɛɛ ho biribi. Ɔkãa dɛ, “Nna metaa se moho dɛ: Ebɛnadze na mowɔ yɛ?”7 Joseph dze gyedzi dzii dwuma. Ɔkɔr kyerɛwsɛm no mu, kenkaan ɔfrɛ no wɔ James 1:5, na ɔdaan Nyankopɔn dze gyee mboa. Enyido-adzehu no nsunsuando na ɔhyɛɛ Nsanananmu no ase. Mbrɛ m’enyi si sɔ dɛ Joseph n’ahowerɛ a okenyan no, ne haw na atseetsee ber no, kenyaan no ma ɔdze gyedzi dzii dwuma.
Dzi Nkenyan Do Fayɛ Papa
Wiadze no taa kã bo a ɔnndwe ho asɛm dɛ dza oye ma monko, yetsim wɔ dza woetwa mu kɔ no do, na yɛdwendwen ho dɛ emi nye woana, ma mennsɛ, na dza mepɛ ho. Ahowerɛ a okenyan no kenyan hɛn ma yedzi Agyenkwa no fasusu do, ɔno a “okyinii yɛ papa.’’8 Ber a yɛnantsew osuanyiyɛ anamɔn kwan no, yebenya sunsum mu nkenyan nkakrankakra dze aboa binom.
Asɛm bi a metsee no mfe pii a abɛsen kɔ no aboa me ma meehu nkenyan a ofi Sunsum Krɔnkrɔn no hɔ na afei midzi do. Akyerɛbaa Bonnie D. Parkin, nkaano wiadze Mfɛndzanan Relief Society President, kãa dza odzi do no:
“Nna Susan … yɛ adzepamnyi nwanwafo bi. Na President [Spencer W.] Kimball nye [no] wɔ ward. Kwesida bi, Susan hunii dɛ ɔhyɛ suit fofor. Ndaansa yi ara na n’egya … dze serekye tam fɛɛfɛɛfɛw bi brɛɛ no. Susan dween ho dɛ serekye tam no botum ayɛ tae fɛɛfɛw bi ma ɔnye President Kimball ne suit fofor no akɔdo. Dɛm ntsi ɔpaam tae no Dwowda. Ɔdze krataa haahar bi kyekyeer ho na ɔnantsewee kɔr President Kimball ne fie.
Ɔrokɔ enyim abow ho no, awerɛfir mu ara ogyinae na ɔdwendwen ho dɛ, ‘Emi nye woana na mayɛ tae dze ama nkɔnhyɛnyi? Ebia na ɔwɔ beberee wɔ hɔ.’ Ɔdween dɛ ɔayɛ mfomdo no, ɔdaan noho dɛ ɔrokɔ.
“Hɔara na Akyerɛbaa Kimball bueii enyim abow no na ɔkãa dɛ, O, Susan!’
“Ɔdze ahopopo no, Susan kãa dɛ, Kwesida no muhun President Kimball dɛ ɔhyɛ ne suit fofor. Ɔnnkyɛree na me papa dze serekye tam fi New York brɛɛ me … dɛm ntsi m’apam tae ama no.’
“Ansaana Susan botum akɔdo akasa no, Akyerɛbaa Kimball gyinaa no, dze ne nsa guu n’abatsir do, na ɔkãa dɛ: ‘Susan, mma nnhom adwen papa do dabiarada.’”9
Mepɛ dɛm no! “Mma nnhom adwen papa do dabiarada.’’ Ɔtɔfabi na menya nkenyan dɛ menyɛ adzebi mma obi a, modwen ho dɛ sɛ ɔyɛ nkenyan anaa mara m’adwendwen a. Naaso wɔkaa me dɛ, “dza ofir Nyankopɔn no twetwe nyimpa ma wɔkɔ do yɛ papa; ma wɔyɛ dza oye, na dɛ nyimpa botum adɔ Nyankopɔn na wɔasom no no, Nyankopɔn na okenyan.’’10
Sɛ ɔyɛ nkenyan ma hɛn anaa nkã-tse ara dɛ yɛmboa o, papayɛ nnsɛɛe dabiarada; osiandɛ “ɔdɔ mmbɔ adze ara da’’11—na ɔnnyɛ mbuae a omuo so.
Ɔtaa dɛ mber no nnyɛ, na ɔnntɔkã so dɛ yenyim hɛn ɔsom ndwuma nketsenketse no nsunsuando. Naaso ɔtɔ mber bi a, yebohu dɛ yɛayɛ edwindadze wɔ Nyankopɔn ne nsamu na ɔbɛyɛ hɛn enyisɔ dɛ yebohu dɛ Sunsum Krɔnkrɔn no nam hɛn do reyɛ edwuma no yɛ Nyankopɔn ne ngyetomu a ɔda edzi.
Nkyerɛbaa, emi na hom botum atotɔ aserɛ Sunsum Krɔnkrɔn no ma ɔakyerɛ hɛn “ndzɛmba nyina a ɔwɔ dɛ [yɛyɛ],’’12 mpo sɛ yɛayɛ dza ɔwɔ dɛ yɛyɛ dɔɔ sõ. Sɛ nkenyan ba a, yebotum egyaa nkyɛnse mu hohor anaa taferbanyinmbɔmu a ɔregye hɛn mber dodow ato hɔ ama yeetum akenkan akyerɛ abofra bi, yɛakɛsera nyɛnko bi, yɛakɔhwɛ hɛn fipamfo ne mba, anaa yɛasom wɔ temple. Hom ntse me ase—mekyerɛw m’edwuma a ohia dɛ meyɛ nyina; na m’enyi gye ho dɛ mutwitwa dza m’ewie yɛ no mu. Naaso asomdwee ba wɔ iruhu dɛ ereyɛ nyimpa papa nnye iruwie edwuma beberee ne yɛ nnsɛ. Morohwɛ dza ɔhow mo werɛ ber a misi nkitsi dɛ mibedzi nkenyan do sesã kwan a modwen fa “me mber,’’ ho na muhu nyimpa, dɛ wɔnnyɛ nntõtõ ananmufo, mbom dɛ wɔyɛ m’abrabɔ no botae.
Ahowerɛ a Okenyan Gya hɛn Kɔ Christ hɔ
Ahowerɛ a okenyan gya hɛn kɔ ahobrɛadze mu, nnyɛ awerɛhow anaa abagura mu a daa ofi ntõtõho a yɛyɛ no wɔ hɛn sintɔ mu a ɔba no ho. Mbaa ahyɛmudzisiefo gu mu ahorow wɔ kɛseyɛ na bɔbew mu; hɔn ebusua ebusua, hɔn abrabɔ sũahu horow, na hɔn gyinabew ahorow nnsɛ.
Ɔyɛ nokwar dɛ, hɛn nyina tɔ sin wɔ hɛn ndaamba krɔnkrɔnyɛ ho, na nokwar bi wɔ hɔ a yebohu dɛ hɛn nko yenndzi konyim. Mbom asɛmpa ne dɛw nye dɛ Nyankopɔn n’adom dze, yedzi konyim. Yɛdze Christ no mboa no, yebotum ayɛ adze nyina.13 Kyerɛwsɛm no bɔ anohoba dɛ “yebohu adom a ɔboa hɛn wɔ ber a ohia mu.’’14
Nokwar ahobow no nye dɛ hɛn mbrɛwyɛ horow botum ayɛ nhyira sɛ wɔbrɛ hɛn adze na wɔdan hɛn kɔ Christ hɔ a.15 Sɛ ahobrɛadze mu ara yɛdze hɛn esintɔ bɛn Jesus Christ, kyɛn dɛ yɛbɔtweɔntweɔn wɔ awerɛhow mu a, hɛn bo a ɔnndwe no bɛyɛ krɔnkrɔn.
Nokwar, Jesus n’anwanwadze no taa dze esintɔ, ehiadze, nkõgu, anaa mberɛwyɛ bi a oehu hyɛ ase. Hom kaa paanoo nye esunam no? Asɛmpa akyerɛwfo no mu kor biara kã mbrɛ anwanwadzemu ara Jesus sii nyɛɛn nyimpa mpempem no a wodzii N’ekyir no.16 Mbom asɛm no dze esuafo no a wohun dza nna wonnyi no hyɛ ase; wohunii dɛ nna wɔwɔ “paanoo enum, na esunam nketsenketse ebien pɛr: naaso ɔyɛ ebɛnadze wɔ nyimpadodow no mu?’’17 Nna esuafo no akã nokwar: nna wonnyi edziban a ɔdɔɔsõ, naaso wɔdze dza wɔwɔ no maa Jesus na afei Ɔyɛɛ anwanwadze no.
Ana adwen ho da dɛ wo talent na akyɛdze horow no suar koraa ma dwuma a ɔda enyim no a? Mowɔ. Naaso emi na ɔwo botum dze dza yɛwɔ no ama Christ, na Ɔno bɛma hɛn mbɔdzembɔ adɔr. Sɛ idan Nyankopɔn n’adom no a—dza ewɔ dze ma no dɔɔsõ koraa—sɛ ewɔ nyimpa esintɔ na mbrɛwyɛ horow mpo a.
Nokwar no nye dɛ hɛn mu kor biara nye Nyankopɔn ntamu nnwar—kor biara yɛ Nyankopɔn ne ba.18 Na dɛmara dɛ Ɔnye nkɔnhyɛfo na mbanyin na mbaa nyina ayɛ wɔ abakɔsɛm mu no, dɛmara so na Ɔsor Egya pɛ dɛ ɔsesã hɛn.
C. S. Lewis kyerɛkyerɛɛ Nyankopɔn ne nsesa tum mu wɔ kwan yi mu: “Susu woara woho dɛ eyɛ dan a wɔtse mu. Nyankopɔn ba dɛ oribesi dan no bio. Ebia, ahyɛse no, ibotum atse dza Ɔreyɛ no ase. Ɔreyɛ nsukã no yie na ɔrema dan n’etsifi no a oruwin no egyae na dza ɔkekã ho; nna nyim dɛ ohia dɛ wɔyɛ dɛm edwuma no dɛm ntsi ɔannyɛ wo ahobow. Mbom afei, Ɔahyɛ ase rububu fie no wan a ɔhaw wo kɛse noara. … [Ehu,] Orisi dan fofor koraa efi dza edwendwen ho no ho. … Nna idwen dɛ [wɔreyɛ] wo ekuraba kakraba ahomka bi: naaso nna Orisi ahenfie. Ɔpɛ dɛ Ɔnoara ba na ɔbɛtsena mu.’’19
Osian hɛn Agyenkwa no werdam afɔr no ntsi, yebotum ayɛ edwuma a ɔda hɛn enyim no. Nkɔnhyɛfo no akyerɛkyerɛ dɛ, ber a yɛfow osuanyiyɛ anamɔn kwan no, yɛnam Christ n’adom do botum aatsew hɛnho. Divine discontent botum ekenyan hɛn ma yɛdze gyedzi edzi dwuma, yeedzi Agyenkwa no frɛ do ayɛ papa, na ahobrɛadze mu ara yɛdze hɛn abrabɔ ama No. Jesus Christ ne dzin mu, amen.