Etuhoakyɛ Som mu Dɛwdzi no
Yɛabɔ hɛn Egya a ɔwɔ Sor anohoba dɛ yɛdze ɔdɔ bɔsom Ɔno nye binom na yɛayɛ Ne pɛ wɔ adze nyina mu.
Wowiee wiadze mfɛndzanan ehyiadzi a abɛsen no, nyimpa pii dze asɛmbisa kor noara bisaa me dɛ: “Ana ngua no mu tsena yɛ ahomkã a?’’ Nna me nyiano yɛ adze kor noara aber biara: “Sɛ erennkasa dza a ngua no ntsena mu no yɛ ahomkã papaapa.’’ Ɔyɛ nokwar, anaa? Ehyiadzi yi m’egua no mu tsena no nnyɛ ahomka dze, naaso nhyira na enyimnyamhyɛ dɛ menye hom rekasa ewimbir yi yɛ me enyisɔ ankasa.
Ɔtɔfabi a ber a yɛsom no, yɛtsena ngua asorɔtow mu. Binom yɛ ahomka yie na binom so nnyɛ, naaso yɛabɔ hɛn Egya a ɔwɔ Sor anohoba dɛ yɛdze ɔdɔ bɔsom Ɔno na binom na yɛayɛ Ne pɛ wɔ adze nyina mu.
Mfe kakra a abɛsen no, Asɔr no mu mbabun sũaa dɛ “sɛ hom ‘rebɛyɛ Nyame n’edwuma’ [Nkyerɛkyerɛ na Ahyɛmudzi 4:2] a, nna hom rebɛkã akwantu kɛsenara a ɔwɔ hɔ pɛn no ho. Wɔroboa Nyankopɔn ma N’edwuma akɔ ntsɛm, na ɔyɛ sũahu kɛse, a ɔyɛ enyigye, na nwanwa.’’1 Ɔyɛ akwantu a ɔwɔ hɔ ma obiara—mfe dodow biara edzi—na ɔsan so yɛ akwantu a ɔnye hɛn fa dza hɛn nkɔnhyɛnyi dɔfo akã ho asɛm dɛ “ahyɛmudzi anamɔn kwan,’’ no do.2
Naaso, ɔyɛ asefem dɛ, yɛtse pɛsɛankonya wiadze mu a daa nkorɔfo bisa dɛ,”Ebɛnadze na mibenya efi mu?’’ kyɛn dɛ wobisa dɛ, “Woana na mubotum aboa no ndɛ?’’ anaa “Mibesi dɛn bɔsom Ewuradze yie wɔ me ɔfrɛ mu?’’ anaa “Ana medze m’adze nyina rema Ewuradze a?’’
M’abrabɔ mu etuhoakyɛ som ho fasusu kɛse yɛ Akyerɛbaa Victoria Antonietti. Ber a nna mirinyin wɔ Argentina no nna Victoria yɛ me Primary akyerɛkyerɛfo no hɔn mu kor wɔ mo nkorbata no mu. Benada ewiaber biara, sɛ yehyia mu yɛ Primary a, ɔdze chocolate kyɛgye brɛɛ hɛn. Nna obiara pɛ kyɛgye no—mbom, obiara gyedɛ emi nko. Nna mikyir chocolate kyɛgye! Na ɔbɔ mbɔdzen mpo dɛ ɔbɛma me kyɛgye no bi no, naaso mopow no daa.
Da kor bi ɔdze kyɛgye no maa mbofra no wiei no, mibisaa no dɛ, “Ebɛnadze ntsi na mmfa asɔmu fofor mba—tse dɛ ekutu anaa vanilla?’’
Ɔsereew kakra ekyir no, obisaa me dɛ, “Ebɛnadze ntsi na nsɔ sin kakra nhwɛ? Wɔdze ndzɛmba soronko yɛɛ kyɛgye yi, na mobɔ wo anohoba dɛ sɛ isɔ hwɛ a, ibɛpɛ!’’
Mohwɛɛ moho, na m’ahobow mu no, nna ɔyɛ dɛ kyɛgye no yɛ obiara dɛw. Mepeen do dɛ mobɔsɔ ahwɛ. Hom botum esusu dza osii a? Mepɛe! Dɛm ber no nye da odzi kan a chocolate kyɛgye yɛɛ me dɛw ankasa.
Mfe pii ekyir koraa ansaana muhun esumadze a nna ɔwɔ Akyerɛbaa Antonietti no chocolate kyɛgye no mu. Nna menye me mbabanyin baasa kɛsera me maame dapɛn biara. Nsera yinom kor mu no, nna menye me maame ridzi chocolate kyɛgye sin bi, na mekãa mbrɛ misii bɛpɛɛ kyɛgye ne mber a odzi kan ho asɛm kyerɛɛ no. Afei ɔdze asɛm no nkaa no kyerɛkyerɛɛ me.
Me maame kãa dɛ, “Cris ehu nna Victoria na n’ebusua nnyi ahodze pii, na dapɛn biara no nna ɔwɔ dɛ ɔsan mu yi dɛ obotua bɔɔs kaw ma ɔnye ɔno na ne mbofra baanan no akɔ Primary anaa ɔbɔtotɔ ndzɛmba dze ayɛ chocolate kyɛgye akɛma ne Primary mbofra no. Daa ɔsaan mu yii chocolate kyɛgye no kyɛɛn bɔɔs no, na nna ɔnye ne mba no nantsew kwansin bɔbor ebien [3 km], wɔrokɔ na wɔreba, a ma wimu tse no mmfa ho.”
Dɛm da no m’enyisɔɔ no chocolate kyɛgye no ara yie. Ma ohia dodow no, musũaa dɛ esumadze a nna ɔwɔ Victoria ne kyɛgye no mu yɛ ɔdɔ no a ɔwɔ dze ma hɔn a ɔsoom hɔn no na n’etuhoakyɛ som no a ɔyɛɛ ma hɛn no.
Morodwendwen Victoria ne kyɛgye suahu ho no boa me ma mekaa etuhoakyɛ afɔrbɔ ho adzesũadze a ɔmmbɔ adze a Ewuradze dze kyerɛɛkyerɛ N’esuafo ber a Ɔnantsewee kɔr temple sikakorabea no ho no. Hom nyim asɛm no. Elder James E. Talmage kyerɛkyerɛɛ dɛ nna ndakaba 13 na ɔwɔ hɔ, “na nna nkorɔfo toow hɔn ntoboa guu iyinom mu dze kyerɛ botae [ahorow] a wɔakyerɛw [no] wɔ ndakaba no ho.’’ Jesus hwɛɛ ntoboafo no a wɔatow santsen a nyimpa asorɔtow nyina kã ho no. Binom dze “nokwar botae’’ ma hɔn akyɛdze ber a binom so toow “dwetɛ na sika akɛse,’’ guu mu a wɔwɔ enyidado dɛ wobɔhwɛ hɔn, wobohu hɔn, na woeyi hɔn ayɛw wɔ hɔn ntoboa no ho.
“Nyimpadodow no hɔn mu no nna ɔbaa kunafo hianyi bi wɔ, a … ɔtoow kɔɔbermba ebien guu akoradze-ndakaba no kor mu, no ntoboa no nndu America sika kapɛrba fã. “Na Ewuradze frɛɛ N’esuafo na Ɔkyerɛɛ hɔn ɔbaa kunafo no a ohia akyekyer no nye ne ndzeyɛɛ no, na Ɔsee dɛ, ‘Nokwar mese hom dɛ, kunafo hianyi yi dze pii ebogu mu akyɛn hɔn a woebogu sikakorabea no mu no nyina: “Na … dza wɔwɔ na abor hɔn do na wɔdze bi ebogu mu, na oyidze, ofi ne hia mu dze dza ɔwɔ nyina, n’asetena nyina na ɔdze ebogu mu’ [Mark 12:43–44].”3
Nna kunafo no ne mber mu no onnyi gyinabew a ɔda nsew wɔ ne man mu. Nna nokwar okitsa biribi a ohia dodow: nna n’adwen mu yɛ krɔngyenn, na ɔmaaa dza ɔwɔ nyina a ɔwɔ dze ma. Ebia ɔmaa dza osuar kyɛn binom, dzinn kyɛn binom, soronko koraa kyɛn binom. Binom hun dɛ, dza ɔdze mae no nnyɛ tsitsir biara, naaso Agyenkwa no, “nyia ohu akoma mu adwendwen na nsusui,’’4 hun dɛ ɔdze dza ɔwɔ nyina mae.
Nkyerɛbaa, ana yɛdze hɛn dza yɛwɔ nyina rema Ewuradze a yɛtweɔntweɔn? Ana yɛdze hɛn mber na talent horow robɔ afɔr ama ebusuasantsen a wɔreba no etum esũa dɛ wɔbɔdɔ Ewuradze na woesie Ne mbrasɛm a? Ana yɛdze ahwɛyie na enyimia rosom hɔn a woetwa hɛn ho ehyia nye hɔn a wɔnye hɔn ama hɛn no—yɛdze hɛn mber na hɛn ahom robɔ afɔr a nkyɛ yebotum dze edzi dwuma wɔ akwan horow bi mu a? Ana yɛdze mbrasɛm akɛse ebien no robɔ bra—dɛ yɛbɔdɔ Nyankopɔn na yɛadɔ Ne mba a?5 Dɛm dɔ no ɔtaa da edzi dɛ ɔsom.
President Dallin H. Oaks kyerɛkyerɛɛ dɛ: “ɛn Agyenkwa dze Noho mae wɔ etuhoakyɛ som mu. Ɔkyerɛkyerɛɛ dɛ ɔwɔ dɛ hɛn mu kor biara dzi N’ekyir ber a yɛropa hɛn ho fi pɛsɛankonya enyikadze ho ama yeetum asom binom.’’
Ɔkɔɔr do kãa dɛ:
“Yeregyaa hɛnho mu dze asom binom ne fasusu a kor yenyim … nye afɔrbɔ a awofo yɛ dze hwɛ hɔn mbofra. Enãnom hu amandze na wogyaa hɔnankasa hɔn ehiadze na ahotɔ mu dze wo na wɔtsetse ba kor biara. Egyanom hyehyɛ hɔn abrabɔ na ehiadze dze boa ebusua. …
“… Yɛsan so dzi dɛw wɔ hɔn a wɔhwɛ ebusuafo a woedzi dzɛm na awofo a wɔayɛ mpanyimfo no. Som yi mu biara mbisa dɛ, ebɛnadze na mibenya efi iyi mu? Ne nyina hia dɛ yɛdze hɛnankasa hɛn ahotɔ to nkyɛn ma etuhoakyɛ som. …
“[Na] iyi nyina kyerɛ onnyiewiei fapem no dɛ hɛn enyiwa gye na yɛhyɛ mã mbordo sɛ yɛyɛ adze na yɛsom wɔ dza yɛdze ma ho, nnyɛ wɔ dza yenya ho.
“Hɛn Agyenkwa kyerɛkyerɛ hɛn dɛ yendzi N’ekyir ber a yɛreyɛ afɔrbɔ a ɔsɛ dɛ yegyaa hɛnho mu wɔ etuhoakyɛ som mu ama binom.’’6
Dɛmara na President Thomas S. Monson kyerɛkyerɛɛ dɛ “ebia sɛ yɛnye hɛn Yɛfo dzi ehyia enyim na enyim a, onnkebisa hɛn dɛ, ‘Gyinabew ahen na ikitsae?’ na mbom, ‘Nyimpa baahen na iboa hɔn?’ Nokwar no nye dɛ, nnkotum adɔ Ewuradze dabiarada kɛpem dɛ ibɔsom No ber a erosom No nkorɔfo no.’’7
N’asekyerɛ nye dɛ, nkyerɛbaa, sɛ yɛtsena ngua a ɔyɛ ahomka mu anaa yɛtsena ngua a wobu mu no a ɔadɔ nkandar no do wɔ ekyir hɔ o, ɔmmfa ho. Ɔnnkɛfa ho mpo, sɛ okehia dɛ, yɛkɔɔr abradaa bi mu kɔboaboa abɔdomaba a orusũ a. Dza ɔbɛfa ho nye dɛ yɛdze pɛ baa ha dze robɔsom, dɛ yehun hɔn a yɛsom hɔn no na yekyiaa hɔn enyigye mu ara, yɛdaa hɛnho edzi kyerɛɛ hɔn a wɔtsena hɛn nkyɛn no—a yɛyɛɛ anyɛnkoyɛ sɛ wɔnnsee hɛn dɛ yɛnsom hɔn mpo a. Na ɔbɛfa ho nokwar mu ara dɛ yɛdze som ho ndzɛmba tsitsir a ɔdɔ na afɔrbɔ kã ho dze bɛyɛ adze nyina.
Meenya nyimdzee dɛ onnhia dɛ yɛbɛyɛ chocolate kyɛgye ma yɛabɛyɛ konyimdzifo anaa Primary kyerɛkyerɛnyi a oetu noho esi hɔ, osiandɛ ɔnnyɛ kyɛgye no bi a. Nna ɔyɛ ɔdɔ no a ɔyɛ nyɛe n’ekyir no.
Megye dase dɛ ɔdɔ nam afɔrbɔ do yɛ krɔnkrɔn—kyerɛkyerɛnyi n’afɔrbɔ na mpo ɔnam Nyankopɔn Ne Ba n’abɔso na onnyiewiei afɔrbɔ no do Megye dase dɛ Ɔtse ase! Modɔ No na mepɛ dɛ medze mara me pɛsɛankonya su to nkyɛn ama meetum aadɔ na maasom dɛ mbrɛ Ɔno yɛ no. Jesus Christ ne dzin mu, amen.