Mbaa Hɔn Ahohyɛmu wɔ Israel Mboaboa Ano no ho
Meretserɛw mo nkɔnhyɛ ntotɔserɛ no ma hom, Asɔr no mu mbaa, dɛ wɔnsiesie daakye ber a wɔboa ma wɔboaboa Israel a ɔabɔ apetse no ano.
Me nkyerɛbaa adɔfo a wɔsom bo, ɔyɛ me enyigye dɛ menye me hom wɔ ha. Bia ndaansa yi mu asɛm bi bɛma hom ehu m’atsenkã a ɔfa hom ho nye hom tum krɔnkrɔn a wɔdze ehyira hom no.
Da kor bi, ber a merekasa kyerɛ America Anaafo mboanofo binom no, nna m’asɛngyinado no kenyaan me dodow no, na ber tsitsir mu ara no, mekãa dɛ, “Osiandɛ meyɛ mba 10 [du] hɔn enã ntsi, mutum kã kyerɛ hom dɛ …” Na mokɔr do wie m’asɛm no kã.
Mennhu dɛ makã kasafua enã. Nyia ɔrekyerɛ m’asɛm ase no, ɔfaa no dɛ mannkasa yie no, sesãa kasafua enã no kɔɔr egya,ntsi mboanofo no ennhu dɛ mafrɛ moho enã. Mbom me yer Wendy tsee, na ɔyɛɛ no dɛw dɛ mafom dɛ Freud.
Dɛm ber noara mu no, nna m’akoma mu ahwehwɛdze kɛse ara nye dɛ mebɛyɛ biribi soronko wɔ wiadze mu—tse dɛ ma enã nko yɛ no—huhuruwii fii m’akoma mu. M’abrabɔ mu no , ber biara a woebisa me siantsir a mesaan mu yii dɛ mebɛyɛ datser a, mo mbuae ayɛ kor aber biara: “Osiandɛ menntum annsaan mu ennyi dɛ mebɛyɛ enã.”
Meserɛ, hom nhyɛ no nsew dɛ ber biara a mebɛkã kasafua enãno, nna merennkasa mfa mbaa a wɔawoo anaa wɔapaa mba abanyɛn no wɔ abrabɔ yi mu nko. Merekasa fa hɛn Ɔsor Awofo Hɔn mbabaa mpanyimfo nyina ho. Ɔbaa biara yɛ enã osian n’onnyiewiei nkrabea krɔnkrɔn no.
Ntsi anafua yi, osiandɛ meyɛ mba 10 [du] egya—mbaa baakron na babanyinba kor—na dɛ meyɛ Asɔr no ne President no, mobɔ mpaa dɛ hom bɛtse mbrɛ misi dwen fa hom ho—fa hom nyimpa ban nye papayɛ a hom yɛ nyina ho. Obiara runntum nnyɛ dza ɔbaa ɔtseneneenyi yɛ no. Obiara runntum nnyɛ enã ne nhyɛdo no bi.
Mbanyin botum na wɔtaa kã Ɔsor Egya na Agyenkwa Hɔn dɔ no kyerɛ nkaafo. Naaso mbaa wɔ ho akyɛdze soronko—akyɛdze a ofi sor. Hom tum tse obi n’ehiadze horow ho nkã—nye ber wohia adze no. Hom tum tsen kɔ binom hɔ, kyekye hɔn werɛ, kyerɛkyerɛ hɔn, na hom hyɛ hɔn dzen wɔ hɔn ehiadze ber noara mu.
Mbaa hu adze wɔ kwan fofor do kyɛn mbanyin, na O, mbrɛ yehia hom nhumu a! Hom awosu ma hom dzi kan dwen binom ho, dɛ hom susu ndzeyɛɛ biara no nsunsuando wɔ binom do.
Dɛ mbrɛ President kãa no, ɔyɛ hɛn enyimnyam Enã—ɔdze Ɔsor Egya Ne nhyehyɛɛ ho ntseasee a no mu dɔ no—na ɔhyɛɛ dza yɛfrɛ no “Asehwe no” no ase. Eve ne nsanmuyi nyansaa na akokodur mu no na Adam n’abamba ngyinae si no na ɔmaa Nyankopɔn N’enyigye ho nhyehyɛɛ no kɔɔr kan. Wɔama hɛn mu kor biara tum dɛ yɛba asaase yi do, benya honandua, na wɔsɔ hɛn hwɛ dɛ yebotum asan mu egyina ama Jesus Christ sesei, tse dɛ ma yɛyɛɛ no abrabɔ a ansaana nyimpa reba asaase do no.
Me nkyerɛbaa adɔfo, hom wɔ sunsum mu akyɛdze soronko na atsenkã ho awosu. Anafua yi medze m’akoma mu enyidado nyina hyɛ hom nkuran dɛ, hom mbɔ mpaa mfa nya hom sunsum mu akyɛdze ho ntseasee—hom nsiesie no, na wɔntra mu, nkyɛn dza hom ayɛ no dada no mpo. Hom reyɛ dɛm no hom bɛsesã wiadze.
Dɛ hom yɛ mbaa no, hom kenyan nkaafo na hom hyehyɛ gyinapɛn a ɔsɛ fata nhwɛdoyɛ. Mebɛma hom nkaabɔ tsitsir ebien a yɛyɛɛ no ndaansa yi wiadze mfɛndzanan ehyiadzi no no mu nsɛm bi. Me nkyerɛbaa, nna hom nye kor biara ne saafee.
Odzi Kan, erosom. Erosom ne gyinapɛn abɔso nye hɛn Agyenkwa, Jesus Christ. Mpɛn dodowara no, mbaa yɛ, na daa wɔabɛn, dɛm gyinapɛn no kyɛn mbanyin. Sɛ hom rosom nokwar mu ara a, hom dzi hom nkã-tse do dɛ hom mboa obi fofor ma onya Agyenkwa no No dɔ ho sũahu yie. Ɔyɛ mbaa atseneneefo hɔn su dɛ wɔsom. Minyim mbaa binom a wɔbɔ mpaa dabiara dɛ, “Egya woana na Ibɛpɛ dɛ moboa no ndɛ?”
Ansaana Ebɔbira 2018 nkaabɔ no a ɔfa yɛrehwɛ binom do wɔ akwan krɔnkrɔn a ɔkrɔn do bɛba no, nna mbanyin binom hɔn ntɔyɛɛ nye dɛ wɔyɛ ahyɛnsew wɔ fie nkyerɛkyerɛ dwumadzi no do dɛ “woewie yɛ” na wɔakɔ dwuma a odzi do no do.
Naaso sɛ itse dɛ akyerɛbaa no a eresera akyerɛkyerɛ no adze no hia mboa a, ntsɛmara ibua na nkyii wɔ bosoom no nyina mu so. Dɛm ntsi mbrɛ hom si sera kyerɛkyerɛɛ no na okenyaan hɛn ma yepegyaa mu sesaa kɔɔr erosom no.
Otsĩa Ebien, ndaansa wiadze mfɛndzanan ehyiadzi mu no, yɛyɛɛ nsesã so wɔ Melchizedek Asɔfodzi quorum horow mu. Aber a yedzii aper rohwehwɛ mbrɛ yebesi aboa Asɔr no mu mbanyin ama wɔayɛ ndam wɔ hɔn asodzi mu yie no, yesusuu Relief Society hɔn fasusu no ara yie.
Relief Society mu no, mbaa a wogu mfe ahorow na abrabɔ mu gyinabew horow bɔmu hyia mu. Abrabɔ mu gyinabew biara dze ne haw ba, naaso, nna hom wɔ hɔ, dapɛn dapɛn biara, hom bɔmu hyia mu, hom bɔmu nyin na hom kyerɛkyerɛ asɛmpa no, na hom yɛ dza onya nhyɛdo pa wɔ wiadze no mu.
Afei, yeridzi hom fasusu do no, hɔn a wokita Melchizedek Asɔfodzi no yɛ elderfo quorum kuwmba. Mbanyin yinom gu mfe 18 [duawɔtwe ] kesi 98 [eduokron awɔtwe] (anaa no mboree), a wɔwɔ asɔfodzi na Asɔr sũahu asorɔtow ara yie. Enuanom yinom afei wobotum akyekyer enuayɛ anyɛnkofa, esũa adze abɔmu, na woehyira nkaafo no yie.
Obiradzi a abasen no, Emi na Akyerɛbaa Nelson kasaa kyerɛɛ Asɔr mu mbabun no. Yɛtoo nsa frɛɛ hɔn dɛ wɔmbɔdɔm Ewuradze Ne mbabun nsordaafokuw no mfa mboa ma wɔaboaboa Israel ano wɔ ntwamutam n’afã ebien nyina. Mboaboa ano yi nye tafɛrbanyin-mbɔmu a ɔkrɔn kɛsefapem a ɔkrɔn kɛsena edwuma a ɔkrɔn kɛse wɔ asaase yi do ndɛ!1
Ɔyɛ fapem a wohia mbaa dzendzenndzen, osiandɛ mbaa na wɔkyekyer ndaamba. Meretserɛw mo nkɔnhyɛ ntotɔserɛ no ma hom, Asɔr no mu mbaa, dɛ wɔnsiesie daakye ber a wɔboa ma wɔboaboa Israel a ɔabɔ apetse no ano.
Henfa na hom botum ahyɛ ase?
Mema nsato anan:
Odzi Kan, moto nsa frɛ hom dɛ hom mfa homho nhyɛ 10 [da-du] akɔnkye mmfi social media na dawurbɔdze biara a ɔdze adwen bɔn na adwen fĩ ba hom adwen mu. Hom mbɔ mpaa mfa nhu nhyɛdo a ɔsɛ dɛ woyi no akwa wɔ hom akɔnkye ber no mu no. 10 [da-du] akɔnkye no nsunsuando no bɛyɛ hom ahobow. Ebɛnadze na hom hyɛ no nsew n’ekyir no a hom eyi wiadzesɛm ho adwendwen a nna oripira hom sunsum no efi hɔ kakra no? Ana nsesã aba bea a afei ipɛ dɛ ihwer wo mber nye w’ahom a? Ana dza ohia wo kɛse no adan a—kakra mpo a? Mehyɛ hom nkuran dɛ hom nkyerɛw nkenyan no na hom ndzi kor biara do.
Otsĩa Ebien, Moto nsa frɛ hom dɛ hom nkenkan Mormon Nwoma no fitsi sesei dze kesi afe n’ewiei. Hom abrabɔ dza ɔrokɔ do biara a hom robɔ mbɔdzen ahyehyɛ no, ɔyɛ dɛ mbrɛ hom nnkotum ayɛ iyi, naaso sɛ hom yi hom akoma mu nyina dze gye nsato yi a, Ewuradze bɔboa ma woehu kwan a wobodua do ayɛ. Na, ber a mpaabɔ mu ara hom rusũa no, mobɔ hom anohoba dɛ ɔsor ntokura no bobuei ama hom. Ewuradze dze nkenyan na nyikyerɛ mbordo behyira hom.
Ber a hom rekenkan no, mehyɛ hom nkuran dɛ hom nyɛ ahyɛnsew wɔ nyiyimu horow a ɔkã fa Agyenkwa no ho. Nkyii, hom ngye enyim nkã Christ ho asɛm, ndzi dɛw wɔ Christ mu, na hom mbɔ Christ asɛmpa ho dawur nkyerɛ hom ebusua ebusua na anyɛnkofo.1 Ɔnam dɛm kwan yi do hom nyina bɔtwe abɛn Agyenkwa no. Na nsesã, anwanwadze mpo, bɛhyɛ ase aba.
Anapa yi wɔyɛɛ nkaabɔ bi a ɔfa Kwesida som fofor no na Asɔr adzesuadze a fie yɛ ne fapem no. Hom, me nkyerɛbaa adɔfo, nye asɛmpa adzekyerɛ esiado esiado fofor yi no konyimdzi saafee no. Meserɛ hom nkyerɛkyerɛ hɔn a hom dɔ hɔn no dza hom rusũa fi kyerɛwsɛm no mu. Hom nkyerɛkyerɛ hɔn dɛ sɛ wɔyɛ bɔn a wɔndan nkɔ Agyenkwa no hɔ nkɛgye N’ayarsa na ahotsew tum. Na hom nkyerɛkyerɛ hɔn ma wɔntwe No tum ahoɔdzen dabiara wɔ hɔn abrabɔ mu.
Otsĩa Ebiasa, hom nyɛ nhyehyɛe ma hom ntaa nkɔ temple. Iyi behia afɔrbɔ kakra wɔ hom abrabɔ mu. Mber dodow a hom taa kɔ temple no bɛma Ewuradze kwan ma Ɔakyerɛkyerɛ hom mbrɛ hom besi bɔtwe N’asɔfodzi tum no a wɔdze ama hom wɔ Ne Temple no. Hom a hom nntse mmbɛn temple bi no, moto nsa frɛ hom dɛ mpaabɔ mu ara, hom nsũa mfa temple ho wɔ kyerɛwsɛm nye nkɔnhyɛfo atseasefo hɔn nsɛm mu. Hom mper dɛ hom bohu mbordo, hom bɛtse ase mbordo, hom benya atsenkã mbordo afa temple ho kyɛn mpɛn biara.
Ndaansa Obiradzi yi wiadze nyina mu mbabun mpaabɔsom no, mekasaa faa aberantsɛba bi a n’abrabɔ sesãe ber a n’awofo sesãa ne smartphone maa no phone dadaw dze no bi no. Aberantsɛba yi ne maame yɛ ɔbaa gyedzinyi a onnyi suro. Ohun dɛ ne babanyin no repem kɔ nsanmuyi horow a obotum esiw no kwan ma ɔnnkɔkɔ asɛmpakãsom. Ɔdze no ntotɔserɛ kɔr temple dɛ obohu kwan pa a ɔdze bɔboa ne babanyin no. Nkyii odzii nkenyan biara do.
Ɔsee dɛ: “Metsee dɛ Sunsum no rekyerɛ me ma mohwɛ me ba no phone no do mper pɔkyee bi dze kye ndzɛmba pɔkyee binom. Nna minnyim mbrɛ wosi miamia smartphone yinom do, naaso Sunsum no maa me kwankyerɛ ma moduadua social media horow a monnkɔ hɔ mpo! Minyim dɛ Sunsum no boa awofo a wɔrohwehwɛ kwankyerɛ dze abɔ hɔn mba ho ban. [Ahyɛse no] me ba no no bo fuuw me papaapa. … Naaso nda ebiasa ekyir no, ɔdaa me ase! Naa otum tse nsonsonee no.”
Ne babanyin no suban na ndzeyɛɛ sesãa korakora. Afei na ɔboa ara yie wɔ fie, ɔtseew n’enyim yie, na ɔyɛ tsinkonn ara yie wɔ asɔr. Ɔdɔɔ temple enumabea a ɔsoom wɔ hɔ mber kakra no na ɔreyɛ n’asɛmpakã dwuma ho ahoboa.
Me nsato a otsĩa anan, ma hom a hom edu mfe no, nye dɛ hom mfa homho nhyɛ Relief Society mu yie. Mehyɛ hom nkuran dɛ hom nsũa ndɛ Relief Society no botae nsɛnkã no. Ɔyɛ nkenyan. Obotum aboa wo ma enya ɔwo ara w’abrabɔ mu botae nsɛnkã. Meserɛ hom nhwehwɛ Relief Society mpaamukã no a wɔdze too gua bɛyɛ mfe 20 [eduonu] abasen no nokwar mu dɛw no.3 Mpaamukã yi bi a ɔda ahwehwɛ mu san President a Odzi Kan na n’Apamfo ɔfese ban ho. Ber biara a mekenkan no enyigye hyɛ me mã. Ɔkyerɛ wo nyimpa ban a eyɛ na nyimpa a Ewuradze pɛ dɛ eyɛ mber yi ara mu dɛ ebɛyɛ wo kyɛfa dze aboa ma wɔaboaboa Israel a ɔbɔ apetse no ano.
Me nkyerɛbaa adɔfo, yehia hom! “Yehia homahoɔdzen, homnsakyeree, homgyedzi, homakandzi mbɔdzembɔ, homnyansaa, na homndze horow.”4 Sɛ hom nnkã ho a, yennkotum aboaboa Israel ano.
Modɔ hom na meda hom ase na sesei mihyira hom dɛ hom botum egyaa wiadze no wɔ ekyir ber a hom boa wɔ edwuma tsitsir a wohia no ntsɛm yi. Yɛbɔmu a yebotum ayɛ dza hɛn Ɔsor Egya hwehwɛ dɛ yɛbɛyɛ dze esiesie wiadze ama No Dɔba ne Mbae a Otsĩa no.
Jesus nye Christ no. Iyi nye N’Asɔr. Megye ho dase wɔ Jesus Christ ne dzin mu, amen.