Enim ke akpaniko, Ema, Enam
Nnyin inyene uyuho ke uwem ke ndidi nti mbet Jesus Christ—ke ndisanga ke usung Esie nyung nam utom Esie.
Ndima ndito-eka mi iren ye iban, edi inem nkpo ndudu ye mbufo ke eti ikpehe akwa mbono mfin emi: man ikop nti iko; ikop inem, utibe nkaikwo eke missionaries emi edade eno ediwak tosin missionaries ke ofuri ererimbot—ndito iban nnyin, ndito iren nnyin—ndien akpan-akpan ndidiana otokiet ke mbuotidem nnyin mfin, nko isongo edima President ye prophet nnyin, President Russell M. Nelson, First Presidency, ye General Officers eke Ufok Abasi. Edi usen idaresit ndidu ye mbufo mfin emi.
Edidem Solomon eset ekedi ata okut unen nworo nda owo kiet emi ke mbuk.1 Ekebiet nte enye ama enyene ofuri nkpo—okuk, odudu, itoro, uworo-etop, ukpono. Edi ke ediwak isua inemesit ye udia-uwem okurede, didie ke Edidem Solomon okokut utit uwem esie?
Enye ete, “Kpukpru nkpo edi ikpikpu.”2
Erenowo emi, emi ekenyenede ofuri nkpo ama, eketre ke mbiara, unana idorenyin, ye unana inemesit, kotu ofuri nkpo emi enye ekenyenede.3
Iko usem German kiet ekotdeWeltschmerz odu. Ntak urua, oro oworo mfuho eketode ndikere mbanga nte ererimbot odiokde kesim nte nnyin ikerede nte ererimbot ekpetiede.
Ndusuk esisitWeltschmerz odu ke idem ofuri nnyin.
Ini emi ndobo mfuho odukde uwem nnyin. Ini emi mbom oyohode usen nnyin onyung esin akwa mbukpong ke okoneyo nnyin. Ini emi ndiokiso ye utip-ikpe esimde uwem nnyin, ye eke mbon emi nnyin imade. Ini emi nnyin isangade ikpong ye ke ndobo usung eke ndiokiso, ndien ubiak enime inem uwem nnyin onyung obiongore emem nnyin—nnyin iyedue ke ndinyime ye Solomon ete ke uwem edi ikpikpu inyung inyeneke se oworode.
Akwa Idorenyin
Sifon edi, ke idorenyin odu. Iboro odu ono ukpok, ikpikpu, mfuho ye Weltschmerz eke uwem. Iboro odu ono ata ntotungo unana-idorenyin, ye ubiongo emi ekemede ndisim mbufo.
Idorenyin emi odu ke uduot iko Abasi Jesus Christ ye ke odudu erifak Andinyanga man okok udongo eke ukpong nnyin.
Jesus odoho ete, “Ami nkedi, man mmo enyene uwem, enyung edodiong enyene ekan.” 4
Nnyin inyeneke uwem oro ito ke nditre ndiyo unana nnyin mme ke nam-nkure nnyin edi oto ndidi nti mbet Jesus Christ—ke nditiene usung Esie nyung nam utom Esie. Nnyin inyene uwem oto ke ndifre mbanga uwem nnyin nyung mbuana ke akwa utom Christ.
Ndien nso idi utom Christ? Edi ndinim Enye ke akpaniko, ma ima nte Enye akamade, nyung nam nte Enye akanamde.
Jesus “akasanga ke ebiet ke ebiet anam ufon ono owo.”5 Enye okodu kotu mme ubuene, mbon emi esinde, mbon udongo, ye mbon obut. Enye akanwam mbon unana odudu, mmem-idem, ye anana ufan. Enye okodu ye mmo; Enye eneme-nneme ye mmo. “Enye onyung anam udongo mmo kpukpru okure.”6
Ke ofuri ebiet emi Enye akakade, Andinyanga ekekpeb “eti mbuk”7iko Abasi. Enye ekpeb nsinsi akpaniko emi onode owo ntat-nyak ke spirit ye ke obukidem.
Mbon emi eyakde idem mmo eno utom Christ eyekut akpaniko emi Andinyanga okowongoke ete: “Owo ekededi eke ediduokde uwem esie kabanga mi eyeda uwem esie enyene.”8
Ndito-eka mi iren ye iban, Solomon ama edue—uwem idige “ikpikpu.” Ke nde efen, uwem ekeme ndiyoho ye uduak, iboro ye emem.
Ubok erikok Jesus Christ esim kpukpru mmo emi eyomde Enye. Ami mmedi nehede ndiongo ndien nyikke ke ndinim nyung ma Abasi nyung ndomo nditiene Christ ekeme ndikpuho esit nnyin, 9 etre ubiak nnyin, onyung oyoho ukpong ye “akwa idara.”10
Enim ke akpaniko, Ema, Enam
Ke ntre, ana nnyin inam okpon akan ata edinyene ifiok iko Abasi man otodo oro enyene odudu erikok ke uwem nnyin. Ana nnyin ida oro isin ke uwem nnyin—inam oro edi ubak ke se nnyin idi ye se nnyin inam.
Yak ami nno ekiekere koro owo-mbet otongo ye ndimem iko ita emi:
Enim ke akpaniko, ema, enyung enam.
Ndinim Abasi ke akpaniko ada ekesim ndinyene mbuotidem ke Enye nyung ntongo ndinim iko Esie akpaniko. Mbuotidem anam esit nnyin okori ke ima nnyin nno Abasi ye mbon efen. Nte ima oro okoride, iyom ndikpebe Andinyanga ke nte nnyin isangadeke akwa usung-isang eke owo mbet.
“Edi,” mbufo ete, “ebiet nte oro emem. Ke akpaniko, mfina uwem—mfina mi—okpon akan se ebuahade ye mkpri item oro. Mbufo ikemeke ndikokWeltschmerzye mkpri iko ita emi: Enim ke akpaniko, Ema, Enam.”
Idige iko-mbom esino ukok. Edi ima Abasi esino uboho, mfiak-nno, ye osongo.
Abasi odiongo mbufo. Afo edi eyen Esie. Enye ama mbufo.
Kpa kini mbufo ekerede ke owo imaha mbufo. Enye ediyom mbufo.
Ke ata mfin emi—ofuri usen—Enye ke oyom mbufo, man okok udongo mbufo, emenede mbufo ke enyong, onyung esin akwa idara ke esit mbufo. Enye oyom ndibin ekim ekededi emi ekimde uwem mbufo osio onyung ono edisana,ye uyama anana-utit ubong Esie ediyoho uwem nnyin.
Ami mmefiok emi ke idem mi.
Ntre edi ntiense mi nte Apostle kiet eke Obong Jesus Christ ye mmo emi etienede Abasi—ofuri owo se inehedeinim ke akpaniko, ema, enyung enam—ekeme ndifiok ukem emi.
Nnyin imenim ke akpaniko
Nwed Abasi ekpeb nnyin ete ke “mbuotidem miduhe, owo ikemeke ndinem [Abasi] esit; koro owo eke asangade ekpere Abasi enyene ndinim ete Enye odudu.”11
Eke usuk owo, ososong ndinim ke akpaniko. Ntangidem nnyin owut idem. Ndusuk nnyin ikere koro nnyin imenyene-oniong, ifiok-nwed, mme ifiok ukpeb, ke nnyin ikemeke ndinim Abasi ke akpaniko.Ndien nnyin idise ukpono-Abasi nte ndisime nkpo.12
Ke ifiok-ukpeb mmi, edinim ke akpaniko itimke ibiet edidebi emi nnyin isede inyung imade emi nnyin ikpenemede ibanga inyung inam. Edi nkpo-utom emi ikpedade inam utom ndien, ke ibibiak iso nnyin, ida-itibi ndudu ke isong emi iditode mkpasip man onwum mfri emi enyenede nsuho.13
Esanga ekpere Abasi, ndien Enye eyesanga ekpere mbufo.14Emi edi se enwongo eno ofuri mbon emi eyomde ndinim ke akpaniko.
Nnyin Imema
Nwed Abasi owut ke nte nnyin inehede ima Abasi ye ndito Esie, inemesit nnyin akabare okpon. 15Ima emi Jesus eketingde abanga, nte ededi, idige ndino-card, ntop-nduok, ndaha nka nkpo efen emi emade. Idige ima emi etingde ebanga ndien efre. Idige oruk ima nte “yak ndiongo mme odu nkpo eke ami mkpenamde.”
Ima emi Abasi etingde abanga edi oruk ima emi odukde esit nnyin kini nnyin idemere ke usenubok, odu ye nnyin ke ofuri usen oro, oyoho esit nnyin kini nte nnyin isiorode uyo ibong akam nnyin ke mbubreyo okurede.
Emi edi ndedibe ima Ete ke Heaven enyenede ono nnyin.
Edi anana-utit esit-mbom emi anamde nnyin nditim nkut mbon efen ke se mmo edide. Otode ke enyin ata ima, nnyin ikut owo nsinsi ke eti idaha ye udori ye ndima ndito iren ye iban eke Abasi Andikong-nkan.
Inikiet emi nnyin ikutde ntre, nnyin ikemeke ndisat-odusat, ndibiom, mme ndisua owo ekededi.
Nniyn Inam
Ke utom Andinyanga, esiwak ndi-to “mkpri ye ndimem nkpo” ke “ikpo nkpo [esiworo] ada itie.”16
Nnyin imediongo ke oro oyom ndifiak nnam man akabare anam-ofon ke nkpo ekededi. Mme ikpebre clarinet, itia ball isin ke net, ndidiong moto, mme ndiwat ubom-enyong, edi oto ndinanam ke nnyin idikabare inam ofon ama.17
Nka emi Andinyanga nnyin akasiakde mi ke isong—Ufok Abasi Jesus Christ eke Latter-day Saints—anwam nnyin ndinam oro ofon. Ono nnyin ebiet ndinam ke usung emi Enye ekpebde nyung ndiong mbon efen nte Enye akanamde.
Nte mbon Ufok Abasi, eno nnyin ikoot, ibiong-utom, ye ufang man inwam mbon efen ke esit-mbom ye mfonido.
Ibighike, Ufok Abasi efiak eyrie-eting kabanga ndinwam, mme ndinam-nkpo nno mme ndima mbon efen. Ema etim ekere man ebiere se nnyin idikotde isio-isio item emi.
Kiet ke mme enying ekekerede ekedi ndikpeme, enying emi odotde ye ikoot Christ: “Bok mme erong Mi.”18 Nte ededi, oro ama enyene ndudue kiet: ndikot iko oro eyenam mi ndi German shepherd. Ke ntre, ami mmeyuho ke nte ekotdeunwam.
Utom Emi Odu Ono Kpukpru owo
Ke ntre, ndiyiri emi idige obufa. Oro eyeno obufa ye eti ufang man nnyin inam mbet Andinyanga ke “ndima kiet eken”19obufa usung man itongo inyung inam utom Ufok Abasi.
Ekere ebanga utom ukworo-iko; enyene-uko, ndimem, ye akpan ebuana iko Abasi edi eti uwutnkpo eke unwam nno mme unana spirit eke mbon efen, se owo emi mmo ekpedide.
Mme ndinam utom eke temple—ndiyom enying mbon-ubon nnyin nyung nno mmo nsinsi edidiong? Emi edi edisana usung ke ndinwam.
Kere-banga ndiyom mme ubuene ye mbon unana, ndidibede ubok eke oduode, mme ndibong-akam ndiong mbon udongo ye mbon nkpo-nam. Nte emi idige ata edisana unwam emi Obong akanamde kini Enye okodude ke isong?
Edieke afo mudige owo Ufok Abasi nnyin, ami mmekot mbufo nte “edi enyung edikut.” 20Edi edibuana ye nnyin. Edieke afo edide owo Ufok Abasi nnyin edi odu ke mfiak-edem, ami ndoho mbufo nte: mbok efiak edi. Nnyin imoyom mbufo!
Edi, edian ukeme mbufo ye eke nnyin.
Otode ke asanga-sanga eno, ukeme, ye ido mbufo, mbufo eyenwam nnyin ndikabare mfon-mma nyung nkop inemesit. Nko, nnyin iyenwam mbufo ekabare efon-ema enyung enem esit nko.
Edi, enwam nnyin inam inyung inyene ido edikok, mfonido, ye mbom nno ofuri ndito Abasi. Sia kpukpru nnyin inwana ndikabare ndi mbufa owo emi “nkani nkpo ama ekebe efeb” ndien “kpukpru nkpo … akabare edi mbufa.”21 Abasi owut nnyin usung emi idisangake—ika iso inyung idok enyong. Enye ete, “Mbufo ema ema Mi, eyenim mbet Mi.”22 Yak kpukpru nnyin inam utom otokiet man ikabare idi mbon emi Abasi oyomde ete nnyin idi.
Oruk ido iko Abasi emi nnyin iyomde ndinyene ke Ufok Abasi Jesus Christ edi emi. Nnyin iyom ndinam Ufok Abasi edi ebiet eke nnyin ifende-ino kiet eken. Edi ebiet eke nnyin itreke ndikut ndudue, nditing iko-edem, ye ndibiat owo. Ebiet, emi utu ke ikukut ndudue, nnyin idodiong inyung inwam kiet man akabare ofon nte nnyin ikemede ndidi.
Yak ami mfiak nkot mbufo. Edibuana ye nnyin. Nnyin imoyom mbufo.
Mbon emi Minenke
Mbufo eyekut ke Ufok Abasi emi oyoho ye ubak ata nti owo emi edude ke ereimbot. Mmo eno ekom, ema, efon-ido enyung enam akpaniko. Mmo ewa-idem, ewa idem enam utom, ndien ke ubak ini eworo eda.
Ndien mmo nko inenke-ima.
Mmo esinam ndudue.
Kini-kini mmo eting iko emi mmo mikpetingke. Mmo enam nkpo emi mmo edikerede ete ke mmimo ikpenamke.
Edi mmo enam ido kiet emi—mmo eyom ndifon nyung nsanga mkpere Obong, Andinyanga nnyin, kpa Jesus Christ.
Mmo k’edomo ndinam nkpo enen.
Mmoenim ke akpaniko. Mmoema.Mmoenam.
Mmo eyom nditre mmaidem, enyene mbom, esana, ebiet Jesus ofon.
Ubono-nkpo eke Inemesit
Ihn, ubakini uwem ekeme ndisong. Ntre kpukpru nnyin imenyene idiok-ini ye ini ubiongo eke nnyin.
Edi iko Abasi Jesus Christ ono idorenyin. Ndien, ke Ufok Abasi Jesus Christ, nnyin idiana ye mbon efen emi eyomde ebiet emi nnyin ikemeke ndibo emem—ebiet nkori, ke ididi-kiet, nnyin iyekeme ndinim ke akpaniko, ma, nyungnnam.
Kesioho nsio-nsio ndaha nnyin, nnyin iyom ndida kiet eken nte ndito iren ye iban eke edima Ete nnyin ke Heaven.
Ami mmenem esit mbe adanga ke ndidi owo Ufok Abasi Jesus Christ eke Latter-day Saints ye ke ndidiongo ke Abasi ama ndito Esie ekesim ndino mmo ubono-nkpo inemesit ye iboro ke uwem emi ye usung ndifiok nsinsi idara ke ebekpo ubong ke uwem emi edidide.
Ami mmeno ekom koro Abasi ama ono nnyin usung man ikok esit emi obungode ye Weltschmerz eke uwem emi.
Ami nno iko ntiense nyung nyak edidiong mi nte ke nte nnyin inimdeAbasi ke akpaniko, nte nnyin imade Enye inyung ima ndito Esie ke ofuri esit nnyin, inyung idomo ndinam nte Abasi etemede nnyin, nnyin iyebo ukok ye emem, inemesit ye iboro. Ke edisana enying Jesus Christ, amen.