Edi, edikpang utong eno Uyo Prophet

Iko otode Bishop Dean M. Davies

Akpa Onoitem ke Presiding Bishopric

Nte nnyin iwukde uwem nnyin edinam mkpang-utong ye ndikop uyo eke mme odu uwem prophet, nnyin iyebo nsinsi edidiong.

Ke editing mbanga President Ufok Abasi Jesus Christ eke mme Latter-day Saint, Obong ama eting anwa-anwa ntem:

“Ndien nko, ubiong utom President itie Akwa Oku edi ndida ke ibuot ofuri ufok Abasi, ye enye nditie nte Moses —

“… Ih, enye edi ata okut nkukut, andiyarade ye prophet, emi enyenede kpukpru mme eno Abasi edino ke ibuot ufok Abasi” (Doctrine ye Covenants 107:91–92; emphasis added).

Mmebo edidiong ndikut eno Abasi onode mme prophet Esie. Yak ami nneme mbanga kiet ke otu edisana nkpo emi ye mbufo? Mbemiso mbo ikoot emi, ami nkesinwam ke edisese ye ndiwut mme ebiet ubop temple. Ke September 11, 2001, ama ekebe, ema enehede ekpeme ndibe-be ye ndideduk adanga U.S. nto idut efen. Ke ntak ntem, uka isang esida owo hour iba mme ita ndi-to ke Vancouver ke Canada ndika Seattle Washington Temple. President Gordon B. Hinckley emi ekedide President Ufok Abasi ke ini oro ama ono ekikere ete ke ndinyene temple ke Vancouver eyedi edidiong ono mbon Ufok Abasi. Ema eno unyime ndiyom itie, ndien ke nnyin ikese mme isong ufok Abasi, eyom nko ke mme ebiet efen emi midige UfokAbasi enyene.

Ima ikut ediye itie ke ebiet enimde eno emi onyung adade adiana Trans-Canadian Highway. Itie oro ama otim ofon, enyene nti usung, ye emi etode ndiye eto pine ye ndiye usung isang motor do.

Nnyin ima imen ndise ebiet emi ye ebiet enye odude iwut ke meeting Temple Sites Construction Committee eke ofiong oro. President Hinckley ama ono unyime ete yak inam nduongo ibanga edidep itie emi. Ke December isua oro, nnyin ima ino committee oro eti iboro inyung iyom yak ekpedep enye. Ke enye ndibo iboro nnyin, President Hinckley ama odoho ete, “Ami nkere ke akpana nte nkut itie emi.”

Ke ini iso offiong oro edide oyoho usen iba nte Christmas ebede, nnyin ima idika Vancouver ye President Hinckley; President Thomas S. Monson; ye Bill Williams owo architect temple. Paul Christensen, stake president ama emen nnyin aka oto oro. Mfuho enyong ye ndeng ama odu edi President Hinckley ama ososop owoho ke motor asanga akanade oto isong oro.

Ke isuk idude ke oto isong oro mma mbup President Hinckley mme enye akpama ndise mme ebiet efen. Enye ama odoho ih, ke imo ikpema. Nte emekut, ke edise mme ebiet efen, nnyin ima ikeme edinam ndomo nse.

Nnyin ima iwat ikanare Vancouver ndise mme ebiet efen, tutu ifiak ikesim ata akpa itie. President Hinckley odoho ete, “Ebiet emi eye.” Ekem enye obup ete, “Iyekeme ndika itie ufok Abasi nnyin oniong-de nte ¼ kilometer [0.4 km]?”

Nnyin ima iboro, “ntre President.”

Ima ikoduk motor iwat idaha ebiet mboho ufok Abasi. Nte ikesimde chapel, President Hinckley ama odoho “nwongode nno ufien.” Nnyin ima inwongode iduk efak nte eketemede. Efak emi ama otongo emenede ke enyong aka nsit-nsit.

Nte motor esimde ibuot obot oro, President Hinckley ama odoho, “tuak da, tuak da.” Do, enye ama ayan ubok ono nnasia ke ndibup, “Isong enye emi? Ebiet emi ana ono temple. Abasi oyom yak temple odu mi. Eyekeme ndidep enye? Eyekeme ndidep enye?”

Nnyin ikebup-ke ibanga isong emi. Enye akada ono edem-edem inyung ikpereke usung, ikesineke nwed ediyam. Nnyin ifiok-ke se iborode emi, edi President Hinckliey ama afiak ayan ubok odoho ntem, “Ebiet emi ana ono temple.” Ke esisit ini, ima idikpong ika anwa ubom ofim edifiak nyong ufok.

Edem usem oro, ema ekot mi ye Brother Williams ke office President Hinckley. Enye ama oduri  plan ofuri ebiet emi ke ekpri babru: mme usung, chapel, nwaha ufien, ye mark X ke ata ebiet temple. Enye ama obup se ikop-de ibanga. Nnyin ima idoho ete ke enye ikpenyime-ke yak edep uto nsong urua itie oro. Ke owo ita enyene itie oro: kiet oto Canada, kiet India, enye eken oto China! Ndien ebiet emi ikenaha ino edibop itie ido ukpono.

Enye ama eting ete, “Ih, enam se ekekeme.”

Do, nyo-nyo nkpo etibe. Ke ediwak ofiong ebede nnyin ima idep ebiet oro, ndien obio Langley ke British Columbia ama edino unyime yak ebop temple do.

Ke edikere mbanga nkpo emi, enye ada nsuhore idem ke ndifiok ete okposuk Brother Williams ye ami idide nta ifiok emi idiongo-de utom real estate ye edibop temple, President Hinckley otim enyene se okponde akan emi onyung edide, eno nkukut. Enye ama ese onyung okut ebiet emi Abasi oyomde yak temple ada.

Kini Obong okonode uyo yak Ndisana owo eyo eset ke ubono-nkpo emi ebop temple, Enye ama eting ntem:

“Yak ebop ufok eno enying mi emi asanga-de ekekem ke usung nte ndiwut-de mmo.

“Edieke ikot mi mibop-ke ke usung eke ndiwut-de mmo…. , Ami ndiboho enye ke ubok mmo” (Doctrine and Covenants 115:14–15).

Nte mme Ndisana owo eyo eset, kpa ntre ye nnyin mfin: Obong amayarade osuk akakaiso ndiyarade nno Ada-ibuot ufok Abasi mme usung unam nkpo ke obio ubong Abasi ke eyo nnyin. Ndien, ke nte enye ekerede, enye ono nda usung nte owo nnyin kiet-kiet ekpekarade uwem mmo ke usung nte Obong onyimede.

Ke April isua 2013 ami mma nting iko mbanga ukeme ndibop itiat idak isong kpukpru temple man okposong ada ke ofum ye oyobio emi edi-nyek-de mmo. Itiat idak isong emi edi ata editongo. Temple emenyene ediwak nkok emi eyit-de otokiet ke usung emi ekekerede ebenga enye. Edieke uwem etiede nte mme temple emi nnyin kiet-kiet iwanade ndibop nte Obong ekpep-de (se ke 1 Corinthians 3:16–17), nnyin ikpebup idem nnyin mbume eti ibuo ete, “Mme nsuto nkok nditung ufok ke ikpenim ke itie man akpanam mme uwem nnyin eye, ada uko-uko, ye edisongo nda ke mme oyobio ererimbot?”

Nnyin imekeme ndikut iboro mbume emi ke Nwed Mormon. Nte abangade Nwed Mormon, Prophet Joseph Smith ama eting ete: “Ami mma nting nno ndito ete iren nte ke Nwed Mormon edi nwed emi edide ata nen-nen ke otu mme ediwak nwed ke ererimbot, ke enye edi keystone ido ukpono nnyin, ndien owo eyesik ekpere Abasi ke ndikop ukpep-nkpo esie nkan nwed ekededi” (Mme akpa iko ke Nwed Mormon). Ke mme akpa iko ewetde ke Nwed Mormon, ekpep nnyin ete ke mmo oro ebode edisana ntiense otode Edisana Spirit [ke Nwed Mormon edi iko Abasi] eyedi diongo nko kpa ke odudu oro ke Jesus Christ edi Andinyanga ererimbot, ke Joseph Smith edi andiyarade Esie ye [prophet Restoration], ye nko ke Ufok Abasi Jesus Christ eke Latter-day Saints edi obio-ubong Abasi enimde mi ke ererimbot.

Mmo emi nko edi mme nkok nditung mbuotidem ye iko ntiense nnyin:

1. Jesus Christ edi Andinyanga ererimbot.

2. Nwed Mormon edi iko Abasi.

3. Ufok Abasi Jesus Christ eke Latter-day Saints edi obio ubong Abasi ke isong.

4. Joseph Smith edi prophet, ndien nnyin imenyene mme odu uwem prophet ke isong mfin emi.

Ke ofiong ifang ebede, ami mmekpang utong nno ediwak iko general conference emi President Nelson onode otongode nte ekekot enye nte Apostle. Edinam emi okpuhore uwem mi. Nte nkpep-de nyung nkerede mbanga ifiok isua 34, etim anwanga onyung asangade ekekem ye ukpep-nkpo esie. Kiet-kiet ke otu ukpep-nkpo emi asanga ye nkok nditung ufok etingde ebanga, mme edide nkok nditung ufok ke ndibop mme temple ke uwem nnyin. Mmo edi edibuotidem ke Jesus Christ; editua mkpofiok, ediduok mmong man ekpeyet mme idiok nkpo nnyin; edino Holy Ghost; edinyanga mmo oro ekpade ye mme utom temple; edinim usen Sabbath ke edisana; otongode ye akpatre ke ekikere; edisanga ke usung ediomo inamde. President Nelson eting abanga kpukpru emi ke ima ye nsing ifik.

Akwa itiat inuk ye nkok nditung ufok Abasi ye eke uwem nnyin edi Jesus Christ. Enye emi, edi ufok Abasi Esie. President Nelson edi prophet Esie. Ukpep-nkpo President Nelson edi iko ntiense emi ayarade uwem ye ido Jesus Christ ke ufon nnyin. Enye eting iko abanga edu ye utom Andinyanga ke ima ye ke ifiok. Enye nko eting ediwak inem-inem iko ntiense abanga edisana ikot mme prophet—mmo edide President ufok Abasi—emi enye akanamde utom ye mmo.

Ke emi, mfin, edi ifet nnyin ndinyime enye nte odu uwem prophet ke ererimbot. Nnyin imefiok nte edibede ubok eno mme ada ibuot ufok Abasi ke edisana usung edide ndiyan mme ubok nnasia nnyin ke enyong ke square ndiwut unyime ye edidiana kiet. Nnyin imenam emi ke ekpri minute ifang ebede. Edi ndidibede ubok ke ata akpaniko akan nnam nwut emi. Nte emende ewut ke Doctrine ye Covenants 107:22, ana nte ebere ye First Presidency ke “nsongo-nda, mbuotidem, ye akam ufok Abasi.” Nnyin idi man inam oyoho-yoho ke akpaniko edidibede ubok nno odu uwem prophet ke nte enye adade usung ye nnyin ndidian idem nno mme iko esie, ndinyene mbuotidem nyung nnam se eting-de, ye edibong akam ete Obong odiong enye.

Ke ini ami nkereke mbanga President Russell M. Nelson, ami nda ndongesit ke iko Andinyanga kini Enye okodohode, “Edieke mbon mi edikpangde utong ino uyo mme isung-utom mi emi Ami mmekde nte yak eda mme owo usung, sese, ke akpaniko ke nting nno mbufo, owo idiseheke-de mmo ikpong itie mmo (Doctrine ye Covenants 124:45).

Edikpang utong ye edikokop se odu uwem prophet eting-de eyenyene ntotungo udong ekpededi ye ukeme ndikpuhore uwem nnyin. Nnyin imenyene nsong nda. Nnyin imebo enwongo ye nsongo nda. Nnyin imekop iko Obong eting-de. Nnyin imetuk ima Abasi. Emi eyenam nnyin ifiok nte inamde nkpo nte etemede.

Ami mmema nnyung ndibede-ubok nno President Russell M. Nelson ye mbon eken emi ekekotde nte prophet, mme ata okut nkukut ye mme andiyarade. Ami mmeting nte ke enye enyene mme eno Obong onode ke ibuot esie, ndien mmedi ntiense nte edieke iyirede kiet ke uwem nnyin ndikpang utong nyung nkop uyo mme odu uwem prophet, emi eyenam yak ebot uwem nnyin etiene edisana ubono-nkpo Obong ono nnyin, ndien nnyin iyebo nsinsi edidiong. Eno uyo ikoot esie esok kpukpru owo. Edi, man edikpang utong eno uyo prophet; ihn, etiene Christ enyung edu uwem. Ke enying Jesus Christ, amen.