Kiet ke Christ
Ndima nsanga mi ke utom Obong, ami mmenin ke nnyin imekeme ndinam ofon inyung inam ofon ke ndikom mbufa owo nsin ke Ufok Abasi.
Ndima ndito eka iren ye iban, eme edi! Nte nnyin isitingde ke usem Brazilian Portuguese nnyin, “Boa tarde!” Esit enem mi ndidu ye mbufo ke akwa mbono eke Ufok Abasi eke Jesus Christ of Latter-day Saints emi ke idak ndausung eke edema prophet nnyin, President Russell M. Nelson. Inyang mi idem ke akwa ufang nnyin kiet-kiet inyenede ke ndikop uyo Abasi otoke mme isungutom Esie ke isong ke usen edem ini eminnyin idude mi
Obio mi Brazil enyene nkpo eti eti. Kiet ke otu oro edi Inyang Amazon, inyang kiet emi okponde onyung oniongde akan ke ererimbot. Nsio-nsio inyang iba, Solimões ye Negro, enam enye. Edi, mmo efehe kiet ke ediwak itiat mbemiso mmo esobo kiet, oto ke ntak mmo etode nsio-nsio ebiet edi, usop mmong, ufiop, ye se idongode ke esit mmo. Ke ema eke efehe ke ediwak itiat, mme mmong emi ediana kiet, ekabare obufa mmong. Edi ke ini mme nsio-nsio mmong emi edianade kiet ye Inyang Amazon enyene odudu tutu ke ini enye esimde Atlantic Ocean, enye onuk mmong inung esie osio tutu ono ocean eti mmong ke ediwak itiat.
Ke ukem usung emi mme Inyang Solimões ye Negro efehede kiet man enam Inyang Amazon, ndito Abasi eto nsio-nsio ebiet, edu ye ido, edidu otokiet ke mfiak-nda-ndi Ufok Abasi Jesus Christ, edikabare edi ndisana owo ke Christ. Ke inyangtre, nte nnyin inwamde, inamde nkpo ino, inyung ima kiet eken, nnyin idiana kiet idi eti ino ererimbot. Nte mme anditiene Jesus Christ, ke isangade kiet ke inyang eti nkpo emi, nnyin iye ikan ino ererimbot esatde itong eti mmong gospel.
Jehovah eteme mme prophet esie ete ekpep nnyin ndinwam nyung mma kiet eken, man nnyin idiana kiet ke mbuotidem ye uduak ke nditiene Jesus Christ. Nte Paul, Apostle eke Obufa Testament, ekpebde mbon emi “enade baptism ke Christ esin Christ ke idem mmo…: koro mbufo kpukpru edi kiet ke Christ Jesus.”1.
Ke ini nnyin inwongode ke ini baptism nditiene Andinyanga, nnyin itie ntiense ke iso Ete ite ke nnyin ime inyime ndida enying Christ nno idem nnyin.2 Nte nnyin idomode ndinyene edisana uduot esie ke uwem nnyin, nnyin ikpuho ikpong se nnyin ikidide, oto ke Mkpa erifak Christ Jehovah, ndien ima emi nnyin inyenede ino mme owo okori.3 Nnyin itim ikere ibanga inemesit mbon efen. Nnyin ikut idem nnyin nte ndito eka, nte ndito Abasi emi enyenede edisana edu ye ukeme. Nnyin inyene udong ndinam nkpo nno kiet eken nyung nyo mfina kiet eken.4
Emi edi se Paul ekekotde ima.5 Mormon, prophet ke Nwed Mormon, ekekot enye nte, “edisana ima Christ,”6 emi edide uto ima emi eyede, ofonde, onyung okponde akan. Prophet nnyin, President Russell M. Nelson, ama eting abanga edisana ima Christ emi nte ndinam nkpo nno owo, emi edide usung ima emi ofonde akan ye nte enamde nkpo ono owo nte Andinyanga eke anamde.7
Yak nnyin ikere ibanga ukpep nkpo ima ye ndinam nkpo nno owo emi, nte Andinyanga eke anamde, ke ndisongo, nwam, nyung nda ye mbufa owo ke ufok Abasi ye mbon enyenede udong ndidi ufok Abasi.
Ke ini mme mbufa ufan emi eworode ke ererimbot edi enyung enyime gospel Jesus Christ, eduk ufok Abasi Esie, mmo ekabare edi mbet Esie, ke ntak emi mmo emanare obufa eto Enye. 8 Mmo edaha ekpong ererimbot enyung emek nditiene Jesus Christ, ke ofuri esit, ediana ye obufa “akpa-inyang” nte akamba Inyang Amazon—inyang emi oyohode ye nti nkpo ye edinen ido emi efehede aka ke iso Abasi. Apostle Peter okot enye “emana emi emekde, edisana oku, edisana idut, sanga-sanga owo.”9 Nte mbufa ufan emi edukde obufa ye ebiet emi mmo midukke akpa, ke ntongo mmo eyekere ke mmimo imisop ke obufa ebiet emi. Mbufa ufan emi ekut nte mmimo idukde sanga-sanga utongo-nkpo, ufiop, ye nsio-nsio nkpo—ebiet emi enyenede ido mmo, edu, ye usem esie. Obufa uwem ke Christ emi ekeme ndisong mmo idem. Kere ke esisit ini banga se mmo ekerede nte mmo ekopde ke inyang ini oruk usem nte “FHE,” “BYC,” “fast Sunday,” “baptism nno mme inyang mkpa,” “triple combination,” ye mme nkpo efen.
Edi mmem mmen ndikut nte mmo ekerede ke mmimo idi isen owo. Ke ama etie ntem, mmo ekeme ndibup idem mmo nte, “Ndi ebiet odu ono mi mi? Ndi ami mmekan nduk Ufok Abasi Jesus Christ eke Latter-day Saints? Ndi ufok Abasi oyom mi? Ndi ami mmenyene mbufa ufan emi edinwamde mi?”
Mme ufan mi, ke mme ini ntre, nnyin emi idude ke nsio-nsio ebiet ke anyan usung isang nditiene Christ ana nte nnyin ikom mbufa ufan nnyin, ida mmo nte mmo edide, inyung inwam, ima, inyung isin mmo ke uwem nnyin. Kpukpru mbufa ufan emi edi ndima ndito Abasi.10 Inaha nte nnyin iyak owo mmo ndomo kiet atak koro, kpa nte Inyang Amazon odude uwem oto mme nkok esie, nnyin imiyom mmo kpa nte mmo eyomde nnyin, idinyene odudu ndinam eti nkpo ke ererimbot.
Mbufa ufan nnyin eda mme eno Abasi, inemesit, ye eti ido eke idem mmo edi. Udong mmo kabanga iko Abasi otuk mbon efen, ke ntre anyanga ndidemere mme iko ntiense nnyin. Mmo nko eda obufa usung edi eno nnyin ndifiok uwem ye iko Abasi.
Ekpep nnyin ke anyan ini nte nnyin ikemede ndinwam mbufa ufan nnyin ekop inemesit unyime ye ima ke mfiak-nda-ndi Ufok Abasi Jesus Christ. Mmo eyom nkpo ita man enyene nsongo ye mbuotidem ke ofuri uwem mmo:
Inyang, mmo eyom ndito eka iren ye iban ke Ufok Abasi emi etimde ekere nkpo ebanga mmo, nti ufan emi mmo ekande efehe ebine, emi edisangade ye mmo, ye emi ediborode mbume mmo. Nte mbon Ufok Abasi, yak nnyin itat enyin inyung iyom mbufa iso ke ini nnyin ikade ufok Abasi, yak nnyin ikuse itie utom nnyin, ubiong utom, ye mfina emi nnyin inyenede. Nnyin imikeme ndinam mkpri nkpo man mme mbufa ufan nnyin emi ekop idaresit ndidi ufok Abasi, nte ekom, imam, nditie ndiana kiet eken nte ikwode inyung ikponode Abasi kiet, ye ndimen mmo nwut mbon efen, ye mme nkpo efen. Nte nnyin iberede esit nnyin ino mme mbufa ufan ke mme usung emi nnyin inam utom ke spirit unwam.Nnyin ima inwam mmo ke nte Andinyanga akanamde, mmo idikereke ke idi “isenowo ke inua-otop nnyin.” Mmo eyekere ke mmimo iyenyene itie inyung inyene mbufa ufan, ndien akpan-akpan, mmo eyekop ima Andinyanga eto ke ntim-nkama nnyin.
Udiana, mbufa ufan eyom ubiong utom—ufang ndinam nkpo nno mbon efen. Ndinam nkpo nno mbon efen edi akamba ifiok kiet ke The Church of Jesus Christ of Latter-day Saints. Edi usung emi anamde mbuotidem nnyin okori. Kpukpru obufa ufan odot ndinyene ufang emi. Ke ini edide ubiong utom bishop ye ward council ndino owo ikoot ke mmo ema ekena baptism, nkpo ndomo kiet ikpanke nnyin, nte members, ndikot mbufa ufan nnyin ete enwam ke ndinam nkpo nno mbon efen mme ke ndinam utom.
Oyoho Ita, ana nte “ebok mbufa ufan ye nti iko Abasi.”11Nnyin imikeme ndinwam mmo ema enyung efiok mme nwed Abasi nte nnyin ikotde inyung ikpepde mme nkpo ye mmo, inam mme mbuk mme okposong iko etim anwanga mmo. Nnyin nko imikeme ndikpep mmo nte ebode nda usung nno idem mmo oto ke ndikpep nwed Abasi kpukpru ini. Ke ndidian do, nnyin imikeme ndika mbine mbufa ufan nnyin ke ufok mmo inyung ikot mmo ete edi ufok nnyin idighe tutu ededi mbono ufok Abasi, inwam mmo eduk akamba inyang mme ndisana owo.
Ke ikutde ukpuhore ye mfina mbufa ufan nnyin enyenede ke ndidi mbon ufok Abasi, nte ndito eka iren ye iban, nnyin imikeme ndibuana nte nnyin ikibede ukem ukem mfina oro ke uwem nnyin. Emi eye anam mmo efiok ke mmo idighe ikpong ndien ke Abasi eye odiong mmo nte mmo enyenede mbuotidem ke mme enwongo Esie.12
Ke ini mme Inyang Solimões ye Negro edianade kiet, Inyang Amazon okop odudu. Ke ukem usung oro, ke ini nnyin ye mbufa ufan nnyin idianade kiet ke akpaniko, mfiak-nda-ndi Ufok Abasi Jesus Christ enyene odudu onyung osongo ada. Anwan mi, Rosana, ye ami imikom kpukpru mbon emi ekenamde nnyin iduk obufa inyang emi ke ediwak isua ke edem, ke ini nnyin ikinyimede gospel Jesus Christ ke obio nnyin Brazil. Ke mme isua emi ebede, nti mbon emi enam nkpo ke akpaniko eno nnyin enyung enwam nnyin ika iso ke ndisanga ke nnen-nnen ido. Nnyin imekom mmo.
Mme prophet ke Edem Usiaha Utin Ererimbot ema efiok nte enimde mbufa ufan man esanga kiet ke mbuotidem ekeduk obufa inyang eti ido emi emi adade aka nsinsi uwem. Nte uwut nkpo, ke eke okutde eyo nnyin ye ke eke ofiokde ke nnyin iyenyene ukem ukem mfina emi.13 Moroni ama odong usuk akpan nkpo oro ke se enye ewetde ke Nwed Mormon:
“Ndien ke ini ema ekebo mmo esin ke baptism, ndien odudu Edisana Spirit otuk onyung anam mmo esana, ema ebat mmo esin ke otu mbon ufok Abasi Christ; ndien ema eda enying mmo, man eti mmo enyung ebok mmo ye eti iko Abasi, ndinim mmo ke nnen nnen usung, ndinim mmo kpukpru ini nno akam, edorinyin ikpong ke ima Christ, emi ekedide ntongo ye utit mbuotidem mmo.
“Ndien ufok Abasi ema esobo kiet kpukpru ini, nditre udia nyung mbong akam, ye nditing iko ye kiet eken ke abanga ufon ukpong mmo.”14
Ndima ufan mi ke utom Obong, nnyin imikeme ndinam ofon akan emi ndien yak nnyin inam ofon akan emi ke ndidara mbufa ufan nsin ke ufok Abasi. Ami mmekot mbufo nte ekere se nnyin ikpenamde ke ndinyime, ndara, nyung nwam mmo, otongode ke Sunday efen. Kuyak ubiong utom fo ke ufok Abasi akpan fi ndidara mbufa ufan ke ufok Abasi. Koro, mme ukpong emi edi akpan-nkpo ke iso Abasi ndien enyung ekpon ekan mme edinam. Edieke inamde nkpo ino mbufa ufan nnyin ke oyoho esit ima nte Andinyanga akanamde, ami menwongo nno mbufo, ke enying Esie, nte ke Enye eye anwam nnyin. Ke ini inamde nkpo nte mbon mbuotidem, nte Andinyanga ekenamde, mbufa ufan nnyin eye enyene unwam mmo eyomde man enyene odudu, ewa idem, enyung enyene mbuotidem tutu utit. Mmo eyediana ye nnyin nte nnyin idide nti owo ke Abasi enyung enwam nnyin ida eti mmong isok ererimbot emi oyomde mme edidiong gospel Jesus Christ. Ndito Abasi emi eyekut ke mmimo “idighe aba isen owo, edi ke idi kiet ye ikot Abasi.”15 Ami menwongo nno mbufo nte ke mmo eyekut Andinyanga, Jesus Christ ke ufok Abasi Esie. Mmo eyeka iso esanga ye nnyin nte akpa-inyang eduk ndaha ndinam eti nkpo tutu Obong nnyin, Jesus Christ nnyin adara mmo ye ntara-ubok, ndien mmo ekop nte Ete odohode ete, “Mbufo eye nyene nsinsi uwem.”16
Ami ndoho mbufo nte yak eyom unwam eto Jehovah man ema mbon efen nte Enye ekemade mbufo. Yak ofuri nnyin inam item Mormon okonode ete, “Ke ntre, ndima ndito-eka mi iren [ye iban], ebong akam eno Ete ke ofuri odudu esit, man mbufo eyoho ye ima esie, emi enye onode kpukpru owo emi etienede Eyen Esie Jesus Christ ke akpaniko.”17 Kabanga mme akpaniko emi, ami mmetie ntiense nyung nnam ntre ke enying Jesus Christ, amen.