Utom Unam Emem
Ami nting iko ntiense kabanga ifure eke ukpong koro ndinam emem ye Abasi ye owo efen eyetibe edieke nnyin inehede isuhore idem ye uko ke ndiyom emem.
Ke April emi ebede, President Russell M. Nelson okotongo ukpeb unwam, enye eting ke edi usuŋ kiet ndinim ibet ndima Abasi ye kiet eken.1 Nnyin nte officers, inehede ikom mbufo ke akwa unyime emi mbufo enamde eno utom oro. Nnyin imekom mbufo ke nditiene edima prophet nnyin ke eti utom inyung idɔhɔ ete ekubet item efen. Eka nnen nnen ebine mbon emi eyomde uŋwam. Ekusɔŋɔ uda ekere nte edisangade. Edieke itienede mme ukpep ŋkpɔ emi ekekpepde nnyin, enam ye ukpohore itie-oku, enyuŋ eyom Edisana Spirit ada nnyin usuŋ, nnyin iyekan.
Usenubɔk emi ami nyetiŋ mbaŋa unam utom emi midighe nte ubiɔŋ utom, isineke ke mbume emi enimde ini enɔ, inyuŋ inyeneke owo emi etiŋde enɔ ibɔhɔke heaven. Ke ntak emi iyaresit ye utɔk ɔyɔhɔde uwem nnyin, ufɔn ndinam utɔ utom emi ɔyɔhɔ nnyin idem, ke ofuri itie. Yak ami mbuana uwut ŋkpɔ kiet ke ufɔk kiet kabanga oruk unwam oro.
Grant Morrell Bowen ekedi owo utom, eti ebe ye ete emi, nte ediwak owo emi edude uwem eto isɔŋ, ema eyene mfina ke ini idiɔk potato mmɔ eke ɔdiɔkde. Enye ye ŋwan esie, Norma, ema enam utom efen, ke akpatre eka obio efen, enyuŋ etɔŋɔ ndiforo. Edi, ke ndiɔk iso, esit ama ayat Brother Bowen eti eti ke ini, mbume temple recommend, bishop esie ikinimke enye kabanga unyime Morrell ke enye edi ɔyɔhɔ ekpe tithe.
Ami mfiɔkke mme anie owo ke otu irenowo iba emi ekedi nnen nnen ke usen oro, edi mmefiɔk ke Sister Bowen ama ɔwɔrɔ ye obufa temple recommend esie ke ini Brother Bowen ɔkɔwrɔde ye iyaresit emi edisiode enye ke ufɔk Abasi ke ufaŋ isua Efut.
Ke misehe owo emi ekedide nnen nnen abaŋa ŋkpɔ tithe emi, imikut ite ke Morrell ye bishop esie ema efre item Andinyaŋa emi ɔdɔhɔde ete “Sɔp yime nnɔ owo usua fo”2 ye item Paul emi ɔdɔhɔde ete “Kuyak eyo okut esim iyaresit fo.”3} Akpanikɔ edi ke mmɔike nyimeke ndien eyoama okut esim iyaresit Brother Bowen ke mme usen, ndien mme urua, ndien mme isua, onyuŋ anam nnyin ikut se ɔfiɔk ŋkpɔ owo Rome kiet eketigde ete, ke “Iyaresit, edieke owo mikpanke, esiwak [ndidiɔk] akan utɔk emi eke ɔtɔŋɔde enye.”4 Edi utibe ŋkpɔ ke ndinam emem odu ɔnɔ nnyin, ndien ke ntak ima emi enye esie ono ufokemana esie ye Ufok Abasi enye ɔfiɔkde ke edi akpanikɔ, Morrell Bowen afiak ediduk ufɔk Abasi. Yak ami ntin nnɔ mbufo se iketibede. Yak ami nneme esisit nno mbufo nte oro eketibede.
Enyen eren Brother Bowen, Brad, edi eti ufan nnyin onyuŋ edi eti Area Seventy emi odude ke South Idaho. Brad ekedi isua 11 ke ini ŋkpɔ emi eketibede, ndien ke isua 15 enye ese nte uwem ikɔ Abasi ete esie akade isɔŋ isɔŋ, okut idiɔk ŋkpɔ emi edɔkde eto ebiet emi eke etɔde iyaresit ye utɔk. Ana nte enam ŋkpɔ. Ndien ke ini nduɔk odudu ekɔm eke ekperede ke 1977, Brad, enye ufɔk ŋwed isua 26 ke Brigham Young University; ŋwan esie, Valerie; ye obufa eyeneren esie, Mic, eduk moto mmɔ ndien, ke mikesehe nte eyo ɔdiɔkde, ewat eka Billings, Montana. Unɔmɔ emi mmɔ ekenyenede ke ini mmɔ ewatde eke etɔ snow ke West Yellowstone ikekpanke owo ita emi ndinam utom unwam mmɔ ke ndisobo ye Brother Bowen Sr.
Ke ini mmɔ esimde do, Brad ye eyeneka esie aŋwan, Pam, ebeŋe ndiyene nneme ye ete mmɔ ikpɔŋ. “Afo edi eti ete,” Brad ɔtɔŋɔ, “ndien nnyin imefiɔk nte afo amade nnyin. Edi mfina odu, ndien enye odu ebihi. Ke ntak emi esit ekeyatde fi ini kiet, ofuri ufɔkemana emi inyeneke emem ke ediwak isua. Nnyin imisuana, ndien afo edi nkukure owo emi edinamde idem ɔsɔŋ nnyin. Mbɔk, mbɔk, ke ofuri ini emi ama ekebe, ndi afo eyekut ufaŋ ke esit fo ndifre se iketibede ye bishop oro ndien afiak ada mbon ufɔkemana emi usuŋ ke iko Abasi nte afo ekesinamde?”
Enye ikisioroke uyo. Ndien Brother Bowen emenere enyin ese owo iba emi, ndito esie, ekedide ɔkpɔ esie ye idem esie,5 onyuŋ ɔdɔhɔ suŋ-suŋ ete, “lŋ. Iŋ, nyenam ntre.”
Ye inemesit ye mkpaidem ke utɔ ibɔrɔ emi, Brad Bowen ye ufɔk esie ese nte ebe ye ete mmɔ akade ebine obufa bishop esie ke spirit emem man enehede mme ŋkpɔ ke uwem esie. Ke ibɔrɔ emi eke ɔfɔnde man enem esit abaŋa esen owo emi, bishop emi, emi ekesikotde Brother Bowen ete ɔnyɔŋ edi ke ediwak ini ke edem, afat Morrell onyung omum enye akama—ke ata anyan ini ke afafat.
Ke udua ifaŋ ekebede—ikebihike—Brother Bowen ama ɔnyɔŋ edi ufɔk Abasi ofuri ofuri ɔnyuŋ akama idem esie nte odotde ndifiak nka temple. Ikebihike enye ama enyime ikoot ndikara ekpri branch eke owo Edip-ye-ition ndien enye anam enye ɔkɔri ebe owo Ikie. Kpukpru ŋkpɔ emi eke ada itie ke isua Aba-ye-duop emi ekebede, edi eti utom mkpe ubɔk nditɔ nnɔ ete mmɔ ye unyime ete mmɔ ndifen nnɔ nyuŋ nka iso isehe ndudue mbon efen ada edidiɔŋ emi osuk odukde edi—ndien eyedi ke nsinsi—ke ufɔkemana Bowen.
Ndito eka iren ye iban, Jesus ɔdɔhɔ nnyin ete yak nnyin “iduŋ ye kiet eken ke ima”6 yak “eneni okudu ke ufɔt mbufo.”7 “Enye emi enyenede spirit eneni idighe ekim mmɔŋ,” ke enye eke ɔdɔhɔ mme Nephites.8 Ke akpanikɔ, ke akamba usuŋ, ebuana nnyin ye Christ edi-to—mme editiene—ebuana nnyin ye kiet eken.
“Edieke afo… aduakede ndidi ntiene mi, “Enye ɔdɔhɔ,” nyuŋ nti ete ke eyen eka fo edue fi—
“Ka bine eyen eka fo, nyung bem iso nam emem ye [enye], ndien di tiene mi ke ofuri esit ndien ami nyebɔ fi.”9
Ke akpanikɔ nnyin kiet kiet imikeme ndibat nkani unan ye ukut ye ubiak emi osuk akade iso ata emem ke esit nnyin mme ke ufɔk mme eke mbɔhɔ iduŋ nnyin. Mme nnyin idi ntak ubiak oro mme ekenam nnyin ikop ubiak oro, ana nte ekɔk mme unan oro man uwem enem nte Abasi okoyomde ete edi. Ukem-ukem nte udia emi esinede ke refrigerator fo emi nditɔ-nditɔ fo esede eno fi, mme nkani utɔk oro ema ebiara ke anyan ini. Mbɔk kunɔ mmɔ ufaŋ ke ufɔk fo aba. Nte Prospero ɔdɔhɔde Alonso emi eke atuade mkpefiɔk ke The Tempest, “Yak nnyin ikuti ukut-mbiomo emi ekebede.”10
“Fen nɔ, ndien eyefen enɔ fi,”11 Christ ekekpep ikɔ Abasi emi ke eyɔŋ obot. Ndien ke eyo nnyin enye ekpep ete: “Ami, Jehovah, nyefen nnɔ owo eke ami anamde, edi ana nte afo efen ɔnɔ kprukpru owo.”12 Edi, edi akpan-nkpɔ ɔnɔ ubak mbufo emi edude ke ubiak nditi se Enye mi tingke. Enye ikɔdɔhɔkeete, “Owo iyakke fi okop ubiak mme ukut oto mme ŋkpɔ emi mbon efen enamde fi.” Nko Enye ikɔdɔhɔke ete, “Man etim efen ɔnɔ owo, fiak duk ebuana ubiak mme fiak ka idiɔk itie.” Edi ke misehe utɔ idiɔk ŋkpɔ emi owo anamde, nnyin iyekpon ikan ubiak nnyin ke ini nnyin idoride ukot nnyin ke usuŋ emi ata usɔbɔ odude. Usuŋ oro edi enye emi efende ɔnɔ emi Jesus eyen Nazareth akasaŋade emi okotde nnyin ete, “Edi etiene mi.”13
Ke utɔ ikoot ntem ndidi mbet Esie ye ke ndiŋwana ndinam nte Enye akanamde, Jesus ɔdɔhɔ ete yak nnyin idi ŋkpɔ-utom eke mfɔn Esie—ndidi “mme nsaŋa-utom Christ” ke “utom ndinam emem,” nte Paul eketiŋde ɔnɔ mbon Corinth.14 Andikɔk kpukpru unan, Enye emi anamde se ikwaŋade enen, ɔdɔhɔ yak nnyin ida ye Enye ke utom emem, ke ererimbot emi usuŋ efen miduhe ke ndinyene emem.
Ke ntre, nte Philips Brooks ewetde : “Afo oro emi ayakde utɔk odu fi ke idem ke isua ke isua, aduakde ndisio enye unyɔŋ usen kiet; afo oro emi enyenede utɔk emi mukanke udɔhɔ ete ke mfin emi edi usen emi afo ayakde ntaŋ-idem fo man anam emem; afo kebe mme owo ke efak ukɔmke mmɔ, usioro ke uyo ke ntak idiɔk esit … ; afo amanam … esit abiak [owo] ke ntak ekɔm mme mbom, emi afo omunde akama ndinɔ … usen kiet, … ka idahaoro nyuŋ kenam ŋkpɔ emi afo mudu-nyeneke ufaŋ aba ndinam.”15
Ndima ndito-eka mi iren ye iban, ami metie ntiense nte ke ndifen nnɔ mme idiɔk ŋkpɔ, mme edi akani mme obufa, edi akpan akpan ke uduak mkpa erifak Jesus Christ. Ami metie ntiense nte ke utɔ edikɔk eke spirit emi ekeme ndito Andifak nnyin ikpɔŋ, emi ɔsɔpde edi ndinyaŋa nnyin “ye usɔbɔ ke mba esie.”16 Nnyin imekɔm Enye, ye Ete nnyin ke Heaven, emi ɔnɔde Enye edi, edidemere ye obufa emana oro, ini iso emi nkani ukut ye ndudue miduhe, anam oro, edi ebemiso edep mmo, ekpe ekɔm-urua ono, ke ubiak iyip Eyen-erɔŋ emi ekeduɔkde.
Ye unen ikɔ Abasi emi Andinyaŋa ererimbot ɔnɔde mi, ami metie ntiense mbanŋa emem ke ukpɔng emi emem ye Abasi ye emem ye kiet eken adade edi edieke nnyin isukde idem inyuŋ isɔgɔde iyom enye. “Etre ndiŋwana ye kiet eken.”17 Edieke enyenede akani utɔk, kpe emem. Nyene ima nnɔ kiet eken.
Ndima ufan mi, ke ebuana utom emem nnyin, ami ndɔhɔ yak mbufo edi anam emem—man ema emem, eyom emem, etongo emem, ekpeme emem. Ami nnam ebeŋe emi ke enyin Ɔbɔŋ Emem, emi ɔfiɔkde kpukpru ŋkpɔ abaŋa “ndida-unan ke ufok ufan [Esie]”18 edi osuk enyene ukeme ndifen nnɔ nyuŋ mfre—onyuŋ ɔkɔk—onyuŋ enem esit. Kabaŋa emi ke ami mbeŋe, nnŋ mbufo ye ami, ke enyiŋ Ɔbɔŋ Jesus Christ, amen.