Iban ye Ukpebnkpo iko Abasi ke Ufok
Andinyanga edi eti uwutnkpo nte mbufo edinamde akpan ubiong ke utom Esie man enehede eting ebanga ndikpeb iko Abasi ke ufok.
Ndima ndito iban, edi utibe nkpo ndidu ye mbufo. Idaha emi edi ini nduai ke Ufok Abasi Jesus Christ eke mme Latter-day Saint. Abasi kayare ifiok abanga ufok Esie nte okonwongode ke iyenam.
Ndi mbufo emeti nte Enye ekebipde mme adanga didie ke mmong efehede editre ndisana? Nsuto odudu ekeme nditre ikpa-enyong? Edi okposong nkpo ono owo ndinyan mkpa kpanga ubok esie man etre inyang Missouri ndifehe ke usung esie, mme ndiwongore enye efehe odok aka enyong idim, nte edide ono ekededi nditre Abasi ukuno ifiok oto enyong esok ikot Latter-day Saint.”1
Ubak udeme ifiok Abasi idahaemi edi ndisop nsin ifiok Esie ke ibuot ye ke esit ikot Esie. Enye anam anwanga ke ndito iban Ete Nnyin ke Heaven eyenam akpan utom ke akwa nsop-idem oro. Idiongo utibe nkpo kiet edi enye ndida Prophet Esie usung ke ndinehede nting mbanga ukpep iko Abasi ke ufok ye ke ufokemana.
Mbufo eyebip ete, “Didie ke oro edinam nti iban edi akpan odudu ke ndinwan Abasi oduok ifiok ono ikot Esie?” Abasi ono iboro ke “The Family: A Proclamation to the World.” Mbufo emeti , iko emi, edi emekeme ndikut obufa etop onyung odiongo ke Abasi ama ada okut mme ikpo ukpuhore, eke etibede mi. Ke ntot emi, Enye odong iban utom ndidi mme etubom ekpeb iko-Abasi ke ufokemana ke mme iko emi ete: “Mme eka enyene akpan utom kabanga nkori ndito mmo.”2 Emi esine nkori ke akpaniko otode iko-Abasi ye ifiok.
Ntot emi akaiso “Mme ete ye eka enyene iso-utom ndinwam kiet eken nte ukem-ukem nsanga-utom.”3 Mmo edi ukem-ukem, ukem-ukem ke odudu mmo ndibok ke spirit ye ke ndibo ifiok, ndien ediana kiet ke ini enwamde kiet eken. Mmo edi ukem-ukem ke edisana akanga man enyene oyoho erinyanga oto kiet. Ke akpaniko, iren ye iban ikemeke ndibo oyoho erinyanga ikpong nte owo kiet.
Ntak, ndien, enyen Abasi anwan ke edidiana kiet ye ukem ebuana obode akpan ibiong-utom ndibok ke ata akwa udia kpukpuru owo anade ebo, ifiok akpaniko otode heaven edi? Nte nkemede ndikut, ntem osuk edi usung Abasi tongode ekobot mme ufokemana esin ke ererimbot emi.
Ke ntre, edi Eve okobo ifiok oro Adam okoyomde man adia mfri eto onode ifiok man mmo ekpenim kpukpuru ibet Abasi enyung ebon ufokemana. Ami ndiongoke ntak ekebemde iso edi ebine Eve kanga, edi Adam ye Eve ema enehede ediana kiet ke ini ekenode Adam ifiok.
Uwut-nkpo efen emi Abasi adade ono edibok otode iban edi nte Enye osongode-idem ndito Helaman. Mma nkop mfuho ke ini nkotde mbuk iko-Abasi emi nyung nti nko sung-sung iko asangade ye emem nto eka mi ke ini nkokpongde ufok nka ndinam utom ekong.
Helaman ekewet ete:
“Koro ndito Helaman ema ebo ukpeb eto eka mmo, ete, edieke mmo midiykke, Abasi eyedu ye mmo eyenyung anam mmo eboho”.
“Ndien ndito Helaman eting eno enye iko mme eka mmo eketingde, edoho enye ette ke mme-imo iyikke ette ke mme eka mmo ema ediongo nkpo emi.”4
Adanga nte ami me diongoke kpukpuru ntak Abasi enyende ke ndiyak Akpan ibiong-utom, eke ubok ndito ke ufokemana, nno nti iban, ami mmenim ke etiene ukeme mbufo ndima. Oyom akwa ima mbufo ndikere mbanga mme mfina owo efen nkan eke mbufo. Oro edi ata ima eke Christ enode owo emi mbufo ebokde. Ntuk ima oro oto owo eke emekde ada edi andibok emi odotde ndibo mme ufon otode Atonement Jesus Christ. Iko nda-usung Relief Society eka mi ekedide uwut nkpo, eno mi eti-udong: Ima ibehe Ifep ke Nsinsi.
Nte ndito-iban Abasi, mbufo emenyene nda-mmana ye akwa ukeme ndidionge mfina mbon efen ye ndima. Oro, eyenam mbufo esop ekop iko otode spirit. Spirit nko eyeteme se mbufo ekerede, se mbufo etingde, ye se mbufo enamde eda ebok owo man Obong Abasi ono ifiok, akpaniko, ye uko esok mmo.
Mbufo ndito eka iban ekopde uyo mi edu ke sanga-sanga ebiet ke isang mbufo ke uwem. Ndusuk edi mkpri iban edude ke ikpehe mboho iban ke ata akpa ini. Ndusuk edi mme nka-iferi etimde idem ndidi mme andibok Abasi oyomde mmo edi. Ndusuk edi mbufa mme odo-ndo emi minyeneke ndito kanga; mbon eken edi eka enyenede eyen kiet mme ediwak ndito. Ndusuk edi eka mkpri-iwaad ye mbon efen emi ndito edude ke anwa mission. Ndusuk edung ye ndito ekpade-mba ke iko Abasi enyung eka anyan ekpong ufok. Ndusuk edung ikpong inyeneke eti ada-nsanga. Ndusuk edi eka-eka.
Edi, se ikpededi itie mbufo, mbufo edi mbak—akpan mbak—etode ufokemana Abasi ye ufokemana mbufo, edide ke ini iso, ke ererimbot emi, mme ke ererimbot spirit. Ibiong-utom mbufo otode Abasi edi ndibok ediwak ikot Esie ye eke mbufo nte ekemede, ye ima mbufo ye mbuotidem mbufo ke Jesus Christ.
Mfina kpukpuru mbufo edi ndidiongo mmon emi edibokde, didie, ye ini. Emeyom unwam Abasi. Enye odiongo esit mbon efen, Enye onyung odiongo ini mmo ebengede-idem ndiyime edibok mbufo. Akam mbuotidem mbufo eyenam mbufo ekut-unen. Ebuotidem ke ndibo nda-usung Esie.
Enye ono iko mboutidem emi: “Ebenge Ete ke enying mi ke akpaniko, enyung enim ke iyebo, ndien mbufo eyebo, koro mbufo eyenyene Edisana Spirit, emi ayarade kpukpuru nkpo eke ofonde.”5
Ke ndidian ke akam, ifik-ifik ukpeb-nwed Abasi eyedi kiet ke odudu mbufo ndibok. Emi edi enwongo: “Ekutimede esit ekere se editingde, edi etim enim ke esit mbufo, koro kpa idaha oro ke eyeno mbufo se editingde emi ekemde ye kpukpuru owo.”6
Ntre mbufo eyeda ini ndibong akam, ekere mbanga, ye ke ndikere mbanga nkpo spirit. Mbufo eyenyene ifiok akpaniko enode mbufo ye nkori ke odudu mbufo ndibok mbon efen ke ufokemana mbufo.
Ini eyedu emi mbufo edikerede ke nkori mbufo ke ndikpeb nte edibede ndaha edibok misopke. Mbuotidem edinam mbufo eka-iso. Andinyanga odong iko mbuotidem emi ono mbufo ete:
“Ndien, ekukpa mba ndinam nti utom, koro mbufo ebop itiat idak isong eno akwa utom. Koro oto ke nkpri nkpo ikpo oto oworo.
“Sese, Abasi oyom esit, ye eti ekikere; koro eke enyenede eti ekikere onyung okop item mmo edidia ufon isong Zion ke utit ini emi.”7
Mbufo ndidu mi okoneyo emi edi idiongo ke mbufo emenyime ndibo ikoot Obong ndibok mbon efen. Oro edi akpaniko ono mbon ekpride ekan edude mmi. Mbufo emediongo mbon edibokde ke ufokemana mbufo. Edieke ebupde ke esit akpaniko, enyin mme iso eyeduk esit mbufo. Edieke ebupde ndifiok se ekpenamde mme se etingde, mbufo eyekop iboro kpukpuru ini enamde item, odudu mbufo ndibok eyekori. Mbufo edibenge idem ebet usen emi edibokde ndito mbufo.
Mme eka mkparawa ekeme ndibong akam eda idiongo nte ekpebde eyen eren mme anwan emi mikopke ukpeb-nkpo mbufo. Emekeme ndibong akam eda ediong owo enyenede odudu spirit eyenowong mbufo oyomde, ediyung imade. Abasi eye okop oyung eyere uto otuk-esit akam oro otode mme eka enyenede mfina, ndien Enye eye ono unwam.
Nko, eka ete mme eka eka odude mi okoneyo emi ekeme ndinyene nkong-ibot etiene ubiak ye afanikong etode ndito ye ndito-ndito. Eda uko ye nda-usung ke ifiok otode mme ufokemana ke nwed Abasi.
Otongode ke ini Eve ye Adam, ebe oto Ete-nnyin Israel, onyung edisim ofuri ufokemana ke Nwed Mormon, odu ukpeb-nkpo kiet kabanga se idinamde ke ukut ndito emi esongde ibuot: ekutre ndima mmo.
Imenyene uwut-nkpo onode uko abangade Jesus Christ nte Enye okobokde mme osong-ibot ndito spirit Ete Esie ke Heaven. Ke ata ini mmo ye nnyin inode ubiak, ubok Jesus Christ osuk atatara ana.8 Enye eketing ke 3 Nephi abanga ndito eka Esie iban ye iren eke spirit emi Enye eketimede edi mikekemeke ndibok: “Mbufo ikot mi… emi etode ufok Israel, adanga ediwak ini didie ke Ami nkobon mbufo nte unen obonde ndito esie ke idak mba esie, ndien nyung mbok mbufo”..”9
Mme iban ke ofuri ndaha isang uwem, ke ofuri ndaha ufokemana, ye ofuri edu uwem, Jesus Christ edi nnen-nnen uwut nkpo mbufo kabanga nte edidade akpan itie ke edinam Esie eda esin ifik ke ukpeb-nkpo iko Abasi ke ufok ye ufokemana.
Mbufo eyeda nda-mmana esit ima esin ke ukpuhore ke edinam mbre ye ibet ke ufokemana mbufo. Oro eyenno akamba nkori ke Spirit. Adanga nte edianade ebong akam enyung ebongde eno mbon ufokemana mbufo, eyokop ntuk ima mbufo ye ima Jesus Christ enyenede eno mmo. Oro eyedi ke ediwak ndaha eno spirit mbufo, adanga nte eyomde. Mbon ufokemana mbufo eyekop ntuk esie nte ebengede ye mboutidem okponde.
Adanga nte ufokemana ebonode ndisioro uyo nkot nwed-Abasi, mbufo ema ekokot enyung ebong akam ebanga mmo man etim idem mbufo. Mbufo ema enyene ini ndibenge nyom spirit esin unwana ke esit mbufo. Ndien, ke ekemde ini mbufo ndikot, mbon ufokemana eyekop ntuk ima mbufo enyenede eno Abasi ye iko Esie. Enye ye spirit Esie eyebok mmo.
Ukem eriyarade emi ekeme ndidu ke eboho ufokemana ekededi, edieke ebengede enyung etimde idem eyom. Ekeme ndida ukeme ye ini, edi eyeda utibe-nkpo edi. Mmeti ukpeb-nkpo eka mi ekekpebde ini nkedide ekpri. Mmekeme nditi mfon-mfon udedebi nduri ndise enye akanamde ndiwut usung isang Apostle Paul. Idem akpa mi nte enye akadade ini ye odudu ndinam ntre. Ndien tutu idaha emi mmobo eridiong etiene ima enye enyenede ono eti Apostle oro.
Mbufo kiet-kiet eyeyom usung nditip-nsim ke nkori ifiok akpaniko ke esit ufokemana mbufo ke mfiak-ntoho ufok-Abasi Jesus Christ. Kpukpuru mbufo eyebenge, ekpeb, enyung ekere ebanga eda ediongo se sanga-sanga etibe mbufo edidide. Edi mmondiongo nte: Kpukpuru mbufo, ebopde-idem ye ndito-iren Abasi eyedi akpan ubak ke utibe-nkpo otode ukpeb-nkpo nwed Abasi ye uwem edinamde ntang-mbok Israel osop onyung odiong ufokemana Abasi idem ebet erifiak ndi Jesus Christ. Ke odot-ukpono enying Jesus Christ, amen.