Stret Nem blong Jos

I Kam long Presiden Russell M. Nelson

Jisas Kraes i lidim yumi blong singaotem Jos long nem blong Hem, from se Hem i Jos blong Hem, we i fulap long paoa blong Hem.

Ol brata mo sista blong mi, long naes Sabat dei ia, yumi stap glad tugeta long ol plante blesing we i kam long Lod. Yumi talem tangkyu tumas from ol testemoni blong gospel we i kambak blong Jisas Kraes, from ol sakrifaes we yufala i bin mekem blong stap o kambak long kavenan rod blong Hem, mo from bigfala seves yufala i givim long Jos blong Hem.

Tedei, mi filim we mi mas toktok long yufala from wan samting we i impoten tumas. Sam wik i pas, mi putumaot wan toktok long saed blong stret nem blong Jos. Mi mekem hemia from se Lod i toktok strong long maen blong mi abaot hamas nem we Hem i putum blong Jos blong Hem, hem i Jos blong Jisas Kraes blong Ol Lata-dei Sent.

Olsem we yufala i save, hao pipol i ansa long toktok ia mo long niu stael gaed, oli defdefren. Plante memba, kwiktaem oli stretem nem blong Jos long blog mo sosol media pej blong olgeta. Sam oli stap askem se from wanem, wetem evri samting we i stap gohed long wol, se i nid blong yusum wan samting “simpol.” Mo sam oli talem se, oli no save mekem, so i no nid blong traem. Bae mi eksplenem from wanem mifala i kea bigwan long poen ia. Be faswan, bae mi talem se samting ia i no wanem:

• Hem i no wan jenis long nem.

• Hem i no wan niu nem.

• Hem i no samting nating.

• Hem i no toktok nating.

• Mo hem i no wan simpol nem.

Be hem i wan samting blong stretem. Hem i komanmen o oda blong Lod. Josef Smit i no givim nem blong Jos we i kambak long nem blong hem; semmak long Momon. Sevya Hemwan i talem: “Bae olsem ia nao oli mas singaotem jos blong mi long ol las dei, we i Jos blong Jisas Kraes blong Ol Lata-dei Sent.”

Iven bifo, long 34 A.D.K., Lod blong yumi we i laef bakegen long ded, i givim semmak instraksen long ol memba blong Jos blong Hem taem Hem i visitim Ol Amerika. Long taem ia Hem i talem:

“Bae yufala i singaotem jos ia long nem blong mi …

“Mo ?hao nao hem i jos blong mi sapos oli no singaotem hem long nem blong mi? From sapos oli singaotem wan jos long nem blong Moses, ale, hem i jos blong Moses; o sapos oli singaotem hem long nem blong wan man, ale, hem i jos blong wan man; be sapos oli singaotem jos long nem blong mi, ale, hem i jos blong mi, sapos oli bildimap folem gospel blong mi.”

Long wei ia nao, nem blong Jos, yumi no save toktok raon long hem. Taem we Sevya i talem stret, wanem nao i nem blong Jos blong Hem, mo i iven talem fastaem se: “Bae olsem ia nao oli mas singaotem jos blong mi,” Hem i no pleiplei. Mo sapos yumi letem oli yusum o agri long sam smol nem, o iven yumi sponsarem ol smol nem ia, nao Hem i harem nogud from.

?Wanem i stap long wan nem, o long kes ia, wan smol nem? Taem i kam long ol smol nem blong Jos, olsem “LDS Jos,” “Momon Jos,” o “Jos blong Ol Lata-dei Sent,” bigfala samting we yumi livimaot insaed long ol nem ia, i we, i no gat nem blong Sevya. Blong karemaot nem blong Lod long nem blong Jos blong Lod, i wan bigfala viktri long Setan. Taem yumi karemaot nem blong Sevya, long kwaet fasin, yumi karkaremaot evri samting we Jisas Kraes i mekem blong yumi—iven Atonmen blong Hem.

Luk hemia long wei we Hem i lukluk: Long laef bifo, Hem i Jehova, God blong OlTesteman. Anda long daereksen blong Papa blong Hem, Hem i Krieta blong wol ia mo ol nara wol. Hem i jusum blong folem tingting blong Papa blong Hem, mo mekem wan samting blong evri pikinini blong God, !we i no gat nara man i save mekem! I livim glori blong Hem, blong i kam long wol olsem Wan Stret Pikinini Ia Nomo blong Papa we i gat mit mo bun, nao oli plei long Hem, oli jikim, spet, mo kilim Hem. Long Garen blong Getsemane, Sevya i tekem long Hemwan evri sobodi, evri sin, mo sin, evriwan long ol trabol mo safaring we, yu mo mi, mo evriwan, i eva gotru, o bae i gotru long hem. From evri bigfala trabol ia we i soa mo i hevi tumas, blad blong Hem i ronaot long evri hol blong skin. Evri safaring ia i kam bigwan moa, taem we, long wan prapa nogud wei, oli hangem Hem long kros long Kalvari.

Tru long ol eksperiens ia we oli soa bigwan mo Laef Bakegen long Ded blong Hem—Atonmen blong Hem we i no gat en—Hem i mekem se evriwan bae oli nomo save ded samtaem, mo i pemaot wanwan long yumi long wanem sin i mekem, sapos, yumi sakem sin.

Afta long Laef Bakegen long Ded blong Sevya, mo ded blong ol Aposol blong Hem, wol i daeva long plante handred yia blong tudak. Afta, long yia 1820, God Papa, mo Pikinini blong Hem, Jisas Kraes, Tufala i kamkamaot long Profet Josef Smit blong statem Kambak blong Jos blong Lod.

Afta evri samting we Hem i stap strong tru long hem—mo afta evri samting Hem i mekem blong yumi, ol man—mi luksave mo mi sore tumas, se yumi no luk be yumi stap akseptem se, Jos we i kambak blong Lod, bae yumi singaotem long ol nara nem, !mo evriwan long ol nem ia, oli karemaot gud nem blong Jisas Kraes!

Evri Sandei, taem yumi klin inaf mo tekem mo kakae sakramen, yumi mekem wan niu tabu promes bakegen long Papa long Heven, se yumi rere blong tekem long yumi nem blong Pikinini blong Hem, Jisas Kraes. Yumi promes blong folem Hem, sakem sin, obei ol komanmen blong Hem, mo, oltaem, tingbaot Hem.

Taem yumi no putum nem blong Hem long Jos blong Hem, yumi stap minim nomo blong karemaot Hem olsem stamba lukluk blong laef blong yumi.

Blong tekem nem blong Sevya long yumi, i minim blong talemaot mo witnesem long ol narawan—tru ol aksen mo toktok blong yumi—se Jisas, Hem i Kraes. ?Weswe? ?Yumi fraet tumas blong spolem wan we i singaotem yumi “Momon,” nao yumi mestem fulwan blong difendem Sevya Hemwan, blong stanap from Hem iven wetem nem ia we oli singaotem Jos blong Hem long hem?

Sapos yumi, olsem wan pipol, mo wanwan man o woman, i wantem yusum paoa blong Atonmen blong Jisas Kraes—blong i klinim mo hilim yumi, blong mekem yumi kam strong moa mo leftemap yumi, mo long en, i mekem yumi kam wan god—yumi mas luksave, kliawan, se Hem i stamba blong paoa ia. Yumi save stat taem yumi singaotem Jos blong Hem long nem we Hem i putum i stap.

Long plante long wol, Jos blong Lod i haed olsem “Momon Jos.” Be, yumi, olsem ol memba blong Jos blong Lod, yumi save se huia i stanap long hed blong hem: Jisas Kraes, Hemwan. Laki tumas, plante we oli harem toktok ia, Momon, oli ting se yumi stap wosipim Momon. !I no olsem! Yumi ona mo respektem bigfala profet ia blong Amerika. Be yumi no ol disaepol blong Momon. Yumi ol disaepol blong Lod.

Long ol fas dei blong Jos we i kambak, ol toktok ia Momon Jos and Ol Momon, plante taem oli yusum olsem ol jik toktok—ol nogud singaot, ol rabis tok—we i blong haedem han blong God blong putumbak Jos blong Jisas Kraes long ol las dei ia.

Ol brata mo sista. I gat fulap toktok agensem stret nem blong Jos. From dijitol wol we yumi stap laef long hem, mo wetem ol intanet program we i stap helpem yumi blong faenem infomesen ia we yumi nidim kwiktaem—wetem infomesen abaot Jos blong Lod— toktok i talem se blong stretem naoia, i no waes nating. Ol narawan oli filim se, from se plante naoia oli save yumi olsem “Ol Momon,” mo “Momon Jos,” yumi sapos blong yusum nomo.

Sapos hemia i blong toktok raon blong putum nem blong wan oganaesesen we man i mekem, maet bae ol toktok ia oli win. Be long impoten poen ia, yumi lukluk long Hem we i Jos blong Hem, mo luksave se ol wei blong Lod oli no semmak, mo bambae oli neva semmak long hemia blong yumi, ol man. Sapos yumi save gat longfala tingting mo mekem gud pat blong yumi, Lod bae i lidim yumi tru long impoten wok ia. Long en, yumi save se Lod i stap helpem olgeta we oli lukaot blong mekem tingting blong Hem, semmak olsem Hem i helpem Nifae blong mekem wok blong hem blong bildim wan sip blong krosem solwota.

Yumi wantem blong yumi gat gud fasin mo gat longfala tingting long traehad blong yumi blong stretem ol mistek ia. Ol media we oli responsibol, bae oli glad blong mekem folem wanem yumi askem.

Long wan jeneral konfrens we i pas, Elda Benjamin De Hoyos i tokbaot wan taem olsem. Hem i talem:

“Sam yia i pas, taem mi stap wok long ofis blong pablik afea blong Jos long Meksiko, oli invaetem mi mo wan moa blong tekpat long wan redio toktok. … [Wan long ol daerekta blong program] i askem mifala: ‘?From wanem Jos i gat wan longfala nem olsem?’

“Fren blong mi mo mi i smael long gudfala kwestin ia, mo afta, eksplenem se nem blong Jos, man i no jusum. Sevya i givim. … Program daerekta, kwiktaem mo wetem respek i talem: ‘Bae yumi ripitim mo yusum nem ia wetem gladhat.’”

Ripot ia i givim wan eksampol blong folem. Wan afta wan, bae yumi traehad moa, olsem wanwan man mo woman, blong stretem ol mistek ia we oli krip i kam insaed truaot long ol yia. Haf blong wol maet oli folem, o no folem muv blong singaotem yumi folem stret nem. Be bae yumi tufes blong stap kros sapos plante long wol oli stap singaotem Jos mo ol memba blong hem long rong nem, sapos yumi tu, yumi mekem semmak.

Niufala stael gaed i givhan fulap. I talem: “Jos i wantem oli yusum ful nem blong Jos: ‘Jos blong Jisas Kraes blong Ol Lata-dei Sent.’ Taem oli nidim wan moa sot seken refrens o nem, ol toktok ia: ‘Jos,’ o ‘Jos blong Jisas Kraes’ oli stret nem blong yusum. “Jos we i Kambak blong Jisas Kraes ” tu i wan stret nem blong yusum mo i gud blong yusum.

Sapos wan i askem: “?Yu yu wan Momon?” yu save ansa: “Sapos yu stap askem sapos mi mi wan memba blong Jos blong Jisas Kraes blong Ol Lata-dei Sent, !yes, mi mi wan memba!”

Sapos wan i askem: “?Yu yu wan Lata-dei Sent?” yu save ansa: “Yes, mi wan. Mi biliv long Jisas Kraes mo mi wan memba blong Jos blong Hem, we i kambak.”

Ol dia brata mo sista. Mi promesem yufala se sapos yufala i mekem bes blong yufala blong stretem nem blong Jos blong Lod, Hem we i Jos blong Hem, bae i kapsaetem paoa mo blesing blong Hem long hed blong ol Lata-dei Sent, ol kaen ia we yumi neva luk bifo. Bambae yumi gat save mo paoa ia blong God blong helpem yumi blong tekem olgeta blesing blong gospel we i kambak, blong Jisas Kraes i go long evri nesen, famli, lanwis mo pipol, blong help blong mekem wol ia i rere from Seken Kaming blong Lod.

?Afta, wanem i stap long wan nem? Taem yumi tokbaot nem blong Jos blong Lod, ansa hem i !Evri samting! Jisas Kraes i lidim yumi blong singaotem Jos long nem blong Hem, from se Hem i Jos blong Hem, we i fulap long paoa blong Hem.

Mi save se God i stap laef. Jisas Hem i Kraes. Hem i lidim Jos blong Hem tedei. Mi testifae olsem long tabu nem blong Jisas Kraes, amen.

Ol Not

1. “Lod i talem strong long maen blong mi hamas nem blong we Hem i talemaot blong Jos blong Hem, i impoten tumas, mo hem i Jos blong Jisas Kraes blong Ol Lata-dei Sent. Yumi gat wok i stap long fored blong yumi blong stretem tingting blong yumi wetem tingting blong Hem. Long sam wik i pas, plante lida blong Jos mo dipatmen blong Jos oli tekem step blong mekem folem hemia. Sam moa infomesen abaot impoten mata ia bae oli kamaot long ol manis we oli stap kam. (Russell M. Nelson, “Nem blong Jos” [ofisol toktok long Inglis, 16 Ogis 2018], mormonnewsroom.org).

2. Ol Presiden blong Jos bifo, oli bin mekem semfala rikwes ia. Eksampol, Presiden George Albert Smith i talem: “No letem daon Lod taem yufala i singaotem Jos ia i Momon Jos. Hem i no singaotem Jos ia se, Momon Jos (luk long Conference Report, Epril 1948, 160.)

3. Luk long “Style Guide—The Name of the Church,” mormonnewsroom.org.

4. Doktrin mo Ol Kavenan 115:4

5. 3 Nifae 27:7–8

6. Luk long Moses 1:33

7. Luk long Doktrin mo Ol Kavenan 19:18

8. Luk long Moronae 4:3; Doktrin mo Ol Kavenan 20:37, 77

9. Momon i stamba man we i raetem Buk blong Momon, ol narawan oli Nifae, Jekob mo Moronae. Evriwan oli witnes blong Lod, mo transleta blong hem we i kasem insperesen, i Profet Josef Smit.

10. Iven toktok ia, Ol Man blong Momon, o Ol Momon, oli stap olsem wan jik toktok we oli bin yusum bifo (luk long History of the Church,2:62–63, 126).

11. Ol nara jik nem toktok i bin tekem ples long taem blong Niu Testeman. Long taem blong pas long Kot, Aposol Pol i kot long fored blong Feliks; nao oli talem se Pol i wan ringlida blong grup blong olgeta man blong Nasaret” (luk long Ol Wok 24:5). Long saed blong fasin blong yusum toktok ia “blong Nasaret” wan i raetem: “Hemia i semfala nem we oli givim long ol Kristin Man blong poenem olgeta. Oli bin stap singaotem olgeta olsem ia, from se Jisas i blong Nasaret” (Albert Barnes, Notes, Explanatory and Practical, on the Acts of the Apostles1862], 313).

    Semmak i gat wan nara toktok blong wan narawan we i talem se: “from se oli stap singaotem Lod blong yumi se i Man Nasaret, olsem wan nogud singaot, (luk long Matiu 26:71, semmak, oli bin singaotem ol disaepol blong Hem se oli “Ol Man Nasaret. Bae oli no save talem se oli ol Kristin Man, olsem ol disaepol blong Mesaea” (The Pulpit Commentary: The Acts of the Apostles, ed. H. D. M. Spence and Joseph S. Exell [1884], 2:231).

    Long wan sem samting, Elda Neal A. Maxwell i talem: Tru long stori blong skripja, yumi luk ol traehad blong daonem ol profet mo sakemaot olgeta—blong givim olgeta wan rabis nem blong daonem olgeta. Be plante taem, olgeta blong tedei mo histri blong man, i jes fogetem gud olgeta. Mo tu, ol fas Kristin man, oli bin singaotem olgeta: “grup blong Ol Man Nasaret.’ (Ol Wok 24:5.)” (“Out of Obscurity,” Ensign, Nov. 1984, 10).

12. Luk long 1 Nifae 18:1–2

13. Benjamín De Hoyos, “Called to Be Saints,” Liahona, May 2011, 106.

14. I nomata yumi no save kontrolem wei we ol nara pipol oli stap singaotem yumi, be yumi save kontrolem olsem wanem yumi stap singaotem yumiwan. ?Hao nao bae yumi wantem ol narawan oli ona long stret nem blong Jos, sapos yumi, ol memba blong Jos ia, yumi no stap mekem?

15. Style Guide—The Name of the Churchmormonnewsroom.org.

16. Toktok ia, sent i wan toktok we oli yusum plante taem long Tabu Baebol. Long leta blong Pol i go long Ol Man Efesas, eksampol, hem i yusum toktok ia, sent wan taem long evri japta. Wan sent, i wan we i stap biliv long Jisas Kraes mo i stap traehad blong stap folem Hem.

17. Luk long Doktrin mo Ol Kavenan 121:33