Sunsum mu Ahoɔdzen
Dɛ Jesus Christ n’esuafo anokwafo no, hom botum enya ankorankor nyikyerɛ na nyikyerɛ a ɔnye Ne mbrasɛm no saa na oye ma hom.
Ber a nna mirifi Young Women asesebɔ ase ɔhyewber yi no, akataasiaba nwanwafo bi dze asɛnsin bi brɛɛ me. No mu no, obisaa dɛ, “Sɛ Nyankopɔn robɔ mbɔdzen akã biribi akyerɛ me a mibesidɛn botum ehu?’’ N’asɛmbisa no yɛ me ahomka . Hɛn akra pɛ dɛ wɔnye hɛn sor fie nya nkitahodzi. Yɛpɛ dɛ yɛtse nkã dɛ hɛn ho wɔ hia, na mfaso wɔ hɛn ho. Mbom ɔtɔfabi a yedzi aper dɛ yebohu nsonsonee a ɔda hɛnara hɛn adwendwen na Sunsum no n’awasa bɔkɔɔ no ntamu. Nkɔnhyɛfo, tsetse na ndɛ, akyerɛkyerɛ dɛ “sɛ biribi frɛ wo na ɔgyegye wo dɛ yɛ papa a, ofir Christ.’’
President Russell M. Nelson atsen ɔfrɛ a ɔnnyɛ dzen, na tum wɔmu dɛ: “M’enuanom na nkyerɛbaa adɔfo, mototɔ serɛ hom dɛ hom ntu hom sunsum mu ahoɔdzen mpon mmfa nnya nyikyerɛ. … Hom nsan mu nyi dɛ hom bɛyɛ sunsum mu edwuma a ohia ma hom enya Sunsum Krɔnkrɔn akyɛdze no na hom ataa atse Sunsum no ne ndze pefee ara yie.’’
Mepɛ anapa yi nye dɛ mekãsa kyerɛ hom fi m’akoma mu wɔ akwan anan ho a hom botu hom sunsum mu ahoɔdzen mpon dze enya nyikyerɛ.
Gye enyim ara Nya Mber na Kwan fa Tse Nyankopɔn ne Ndze
Ber a hom dze hom pɛ hyehyɛ mber si hɔ dabiara dze twe bɛn Nyankopɔn Ne ndze no, tsitsir ara wɔ Mormon Nwoma mu no, ewiei no, Ne ndze bɛyɛ pefee koraa na hom bohu no yie ara.
Dza ɔbɔ ebira no, enyidan horow na dede a wɔhyɛ wiadze na hɛn efiefie na hɛn abrabɔ mu mã no botum ama wɔayɛ dzen yie dɛ yɛbɛtse Ne ndze. Ndan enyi yinom botum agye hɛn adwen na akoma, ma yennkegya kwan ama Sunsum Krɔnkrɔn ne nkenyan bɔkɔɔ no.
Nkɔnhyɛnyi Joseph Smith kyerɛkyerɛɛ dɛ ɔtaa ba no dɛ Nyankopɔn yi Noho dze kyerɛ “ankorankor wɔ kokoa mu, wɔ hɔn pia mu, wɔ sar do anaa haban mu, na mpɛn dodowara dede anaa basabasayɛ nnyi hɔ.’’
Satan pɛ dɛ ɔpaa hɛn fi Nyankopɔn ne ndze ho ber a ɔmma yɛnnkɔ mbeambea a hɔ yɛ dzinn no. Sɛ Nyankopɔn kasa wɔ ndze bɔkɔɔ, tsiabaa no mu a, menye hom hia dɛ yɛtwe bɛn dze tsie No. Susu ara dɛ nkyɛ ebɛnadze na obesi sɛ nna yeesi pi dɛ yɛnye sor rebedzi nkitaho ber a yɛtsena Wi-Fi ho! Fa mber na bea bi fa tsie Nyankopɔn ne ndze dabiara. Na fa pɛrpɛyɛ fa sie mber krɔnkrɔn yi, osiandɛ pii nara gyina do!
2. Tu Anamɔn Mma Nntwentweɔn
Sɛ hom nya nkenyan na afei yɛgye enyim dze dzi dwuma a, Ewuradze botum dze hom edzi dwuma. Mber dodow a hom dzi dwuma no, nna Sunsum no ndze abɛyɛ nyɛnko. Nyankopɔn n’akwankyerɛ a hom bohu no benyin mbordo na “Ɔpɛ … dɛ ɔda N’adwen na pɛ edzi kyerɛ.’’ Sɛ hom twentweɔn a, hom werɛ botum efir nkenyan no anaa hom bɛyew kwan a hom dze bɔboa obi ama Nyankopɔn.
Hom Ngye Hom Soma mfi Ewuradze hɔ
Mpaabɔ a Ɔsor Egya yɛ dɛ n’enyiber yi ano no yɛ hɛn ntotɔserɛ dɛ ongya hɛn nkɔ obi a ohia hɛn mboa hɔ. President Henry B Erying akyerɛkyerɛ hɛn dɛ yɛnhwehwɛ nyikyerɛ ber a yebisa Nyankopɔn onyia no a yebotum aboa ama No no. “Sɛ hom bisa nsɛmbisa tse dɛm a, Sunsum Krɔnkrɔn no bɛba na hom bɛtse nkenyan wɔ ndzɛmba ho a hom botum ayɛ ama binom. Sɛ hom kɔ na wɔkɛyɛ ndzɛmba no a, hom rokɔ Ewuradze no soma, na sɛ hom rokɔ Ewuradze no soma a, hom fata Sunsum Krɔnkrɔn n’akyɛdze.’’
Hom botum abɔ mpaa na woebisa Ewuradze hɔ soma. Ber a hom yɛ no, Obotum dze hom nsaano edwuma biara dze ayɛ N’awanwadwuma.
Me nanabanyin [maame afamu], Fritz Hjalmar Lundgren, tuii fii Sweden mber a nna oedzi mfe 19. No nko kodur America, a nna ɔdze adaka na oenya skuul adzesua mfe esia pɛ. Onntum nnkã Borɔfo kasa no, otuu kwan kɔr Oregon na ɔkɛyɛɛ edwuma dɛ obu ndua na, ɔnye me nanabasia na me maame, kɔdɔɔm Asɔr no Ɔannhwɛ wɔ ward bi do da, naaso dɛ home teacher nokwafo no, ɔdze ebusua ebusua asorɔtow bɔbor 50 baa Asɔr dwumadzi mu. Osii dɛn yɛɛ dɛm?
Nanabanyin no wu ekyir no, nna morohwehwɛ adakaba bi a ne nkrataa gu mu na muhun krataa bi a banyin bi a oaian Nanabanyin no dɔ ntsi ɔsanee ba asɔr akyerɛw. Krataa no se, “Nuabanyin Fritz n’esumasɛm, megye dzi dɛ, ɔkɔ Ɔsor Egya no soma aber nyina.’’
Nna dɛm krataa no fi Nuabanyin Wayne Simonis hɔ. Nanabanyin kɛseraa no na nna onyim ebusua mu ba biara. Ewiei no, Nanabanyin kãa kyerɛɛ hɔn dɛ wohia hɔn, na ɔtoo nsa frɛɛ hɔn ma wɔba asɔr. Mbom dɛm Kwesida no, Nuabanyin Simonis soɛree a nna onnhu dza ɔnnyɛ—nna onnwie ne dan no do nkruwuii a nna ɔresan ayɛ no bio no na nna enyida kwan dɛ nsu bɔtɔ dɛm dapɛn no. Osii egyinae dɛ ɔbɔkɔ asɔr, oekyia Nanabanyin, na afei oefi hɔ na ɔakɔ fie ekowie nkruwuii no. Nna n’ebusua nntum nnkɔ sacrament nhyiamu a ɔnnka ho.
Nna ne nhyehyɛɛ no ye ara kɛpem dɛ, wɔ adantsifi no do no, ɔtsee dɛ obi rofow atwer no. Ne nsɛm mu no: “Mber a mohwɛɛ sor no, … nna Nuabanyin Fritz na ogyinaa atwer no sor no. Ɔyerɛɛw n’ano kyerɛɛ me. Ahyɛase no, m’enyi tooe na meyɛɛ tse dɛ abofra kakraba a ɔakye no dɛ ɔannkɔ skuul. Afei … mobofuwee. [Naaso Nuabanyin Fritz yii] no sor tar hɔara na ɔdze san atwer no do. Ber a ɔbobɔɔw ne shyɛɛt fufuw ne nsa kɔr sor no, ɔdanee hwɛɛ me na ɔkãa dɛ, ‘Nuabanyin Simonis, ewɔ hamɛr kor so? Edwuma yi hia wo papaapa ɔnntse dɛm a nnkyɛ enngya w’ebusua hɔ, na sɛ ohia dɛm a, mepɛ dɛ moboa wo.’ Ber a mohwɛɛ n’enyiwa mu no, muhun ayamuyie na Christsu dɔ nko. M’ebufuw gyaae … Medze m’edwindadze guu famu dɛm Kwesida no na midzii me nyɛnko pa n’ekyir sianee atwer no na yɛsanee kɔr asɔr.’’
Nanabanyin nyaa no soma fi Ewuradze hɔ, na nna onyim dɛ ɔwɔ dɛ ɔhwehwɛ eguan a ɔayew no. Dɛmara dɛ mbanyin baanan no a wɔsoaa hɔn nyɛnko a nna ɔyar mbubui dze kɔr adantsifi do na wogyaa no mu sii famu dɛ Jesus Christ nsã no yarba no, dɛmara na Nanabanyin no soma no dze no kɔr adantsifi. Ewuradze dze nyikyerɛ ma hɔn a wɔrohwehwɛ aboa binom.
4. Gye Dzi na nya Awerɛhyɛmu
Ɔnnkyɛree na, mekenkan asɛmpasomafo kɛse bi so a onyaa no soma fi Ewuradze hɔ ho asɛm wɔ kyerɛwsɛm no mu. Nna Aaron rekyerɛkyerɛ Lamanfo hɔn hen, a ɔyɛɛ no ahobow siantsir a Aaron no nuabanyin Ammon ammba no so hɔ ammba kyerɛkyerɛ no. “Na Aaron see ɔhen no dɛ: Hwɛ, Ewuradze no Sunsum afrɛ no wɔ beebi fofor.’’
Sunsum no kasae kyerɛɛ m’akoma: hɛn mu kor biara wɔ som soronko a odzi, na ɔtɔ mber bi a annyɛ a Sunsum no bɛfrɛ hɛn wɔ “beebi fofor.’’ Akwan pii wɔ hɔ a yɛdze kyekyer Nyankopɔn n’Ahenman dɛ yɛyɛ Jesus Christ n’esuafo ahyɛmudzi-ayɛfo, ahyɛmudzi esiefo. Dɛ N’esuafo anokwafo no, hom botum enya ankorankor nyikyerɛ na nyikyerɛ a ɔnye Ne mbrasɛm no saa na oye ma hom. Hom wɔ som na asɛdze soronko ahorow dɛ wodzi wɔ abrabɔ mu na wɔbɛma hom akwankyerɛ soronko ma wɔdze ahyɛ no mã.
Nephi, Jared no nuabanyin, na mpo Moses nyina nyaa esu akɛse a nna wotwa—na obiara yɛɛ no soronko. Nephi dze “ndua dzii edwin nwanwa bi.’’ Jared no nuabanyin paam ahɛmbaa a nna wɔyɛ “petsee so dɛ kyɛnse.’’ Na Moses “nantsewee wɔ asaase kɛsɛɛ do wɔ po no ne finimfin.’’
Hɔn mu biara nyaa nankasa n’akwankyerɛ, a ɔfata hɔn, na obiara nyaa awerɛhyɛmu na wodzii dwuma. Ewuradze n’adwen wɔ hɔn a wɔyɛ setsie, na wɔ Nephi ne nsɛm mu no, “obesiesie kwan ama [hɛn ma] ɔayɛ dza ɔahyɛ hɔn dɛ wɔnyɛ no.’’ Hom nhyɛ no nsew dɛ Nephi se, “kwan bi”— nnyɛ “kwan no.’’
Ana yɛpow anaa yebu hɛn enyi gu ankorankor soma ofi Ewuradze hɔ osiandɛ Oesiesie “kwan bi’’ fofor kyɛn dza hɛn enyi da ho kwan no?
Wogyaa me nanabanyin kɔr bea a nna ɔnntaa nnkɔ hɔ—ɔhyɛ suit, wɔ adantsifi do, Kwesida. Hom mfa hom werɛ nhyɛ Nyankopɔn mu dɛ obegya hom, mpo sɛ kwan no yɛ soronko kyɛn dza hom enyi da ho kwan no anaa ɔyɛ soronko kyɛn binom dze.
Latter-day Saintfo gu mu ahorow pii wɔ bɔbea na kɛseyɛ mu, naaso “hɔn nyinara yɛ adze kor ma Nyame”—“bibinyi na borɔnyi, akowa na fahodzinyi, ɔbarimba na ɔbaa,’’ sigyanyi na warfo, sikanyi na hianyi, abofra na panyin, meba mu akyɛrnyi na nsakyereenyi a ɔnnkyɛree. Ɔmmfa ho hom nyimpa ban a eyɛ anaa dza iridzi ho ako, Ewuradze to nsa frɛ hom wɔ ne pon ho.
Ber a hom rohwehwɛ na wɔereyɛ no Egya ne pɛ no bɛyɛ nyɛe a ɔnnyɛ nã wɔ hom daadaa abrabɔ mu, nokwar, hom mma wongya hom na wonnu homho.
Ɔakyekyer Asɔr no ne nhyehyɛɛ fofor ma mbofra na mbabun no wɔ erosua dze hwehwɛ nyikyerɛ do, yɛrohwehwɛ dza Ewuradze bɛpɛ dɛ yɛyɛ, na afei yɛreyɛ wɔ dɛm akwankyerɛ no do Hɛn mu kor biara, a mfe anaa gyinabew mmfa ho no botum aper dze ahwehwɛ, enya, na ɔayɛ. Ber a hom dzi nhwɛdo a wɔakyekyer ama hɛn nda mu no, hom bɔtwe abɛn Jesus Christ—No dɔ, Ne kan, N’akwankyerɛ, N’asomdwee, na N’ayarsa na ahoɔdzen tum. Na hom botu hom sunsum mu ahoɔdzen mpon dze abɛyɛ dabiara Ne nsamu edwindze wɔ N’edwuma kɛse ne nyɛe mu. Jesus Christ ne dzin mu, amen.